देश के मुख्य न्यायाधीश डी.वाय. चंद्रचूड़ ह कहिन हे कि देश म बाढ़त कोरोना संक्रमण ल देखत हुए वकील मन वीडियो कॉन्फ्रेंस अउ मिश्रित पद्धति ले अदालत के कार्रवाई म सामिल हो सकत हे। मीडिया म आये खबर मनके हवाला देत हुए भारत के मुख्य न्यायाधीश अउ न्यायमूर्ति जे.बी. पार्डीवाला ह कहिन हे कि अदालत ह वकील मन ल मिश्रित पद्धति ले मामला के कार्यवाही म सामिल होय के पक्ष म हवय।
आंगनबाड़ी समय परिवर्तन
प्रदेश म गर्मी बाढ़े के संग लईका मनके स्वास्थ्य ल ध्यान म राखत हुए आंगनबाड़ी केंद्र मनके बेरा म बदलाव करे गेहे। गर्मी के बेरा आंगनबाड़ी केंद्र अब बीहनिया सात ले ग्यारा बजे तक चलाये जाही। आंगनबाड़ी केंद्र के चलाये के बेरा छै घंटा ले घटाके चार घंटा कर दे गेहे। गर्मी के मौसम के बाद एक जुलाई ले आंगनबाड़ी केंद्र ह फेर ले बीहनिया साढ़े नौ बजे ले मंझनियां साढ़े तीन बजे तक चलाये जाही।
एखर बारे म महिला अउ बाल विकास विभाग डहार ले जम्मों जिला महिला अउ बाल विकास अधिकारी मन ल आदेश जारी कर दे गेहे।
शाला प्रवेश उत्सव
प्रदेश म गर्मी के छुट्टी के बाद अवइया सोला जून ले शासकीय स्कूल मन खुल जाही। एखर पहिली प्रवेश उत्सव के तैयारी बर मुख्य सचिव अमिताभ जैन ह शिक्षा विभाग के अधिकारी मनके बइठका लीन।
मुख्य सचिव ह कहिन कि अवइया शिक्षण सत्र म शाला प्रवेश उत्सव के आयोजन बर जम्मों तैयारी पूरा कर लेवय। संगेसंग विद्यार्थी मन ल निशुल्क पाठ्य पुस्तक, स्कूल ड्रेस अउ सायकल बांटे के तैयारी सुनिश्चित करयं। श्री जैन ह ए दरी स्कूल म स्मार्ट क्लास अउ आइसीटी लैब ल बजट म उपलब्धता के आधार म प्राथमिकता देके निर्देश दीन।
ओम माथुर-भाजपा नेता मुलाकात
भारतीय जनता पार्टी के प्रदेश प्रभारी ओम माथुर ले प्रदेश भाजपा अध्यक्ष अरूण साव अउ नेता प्रतिपक्ष नारायण चंदेल ह आज नई दिल्ली म भेंट करीन। ए बेरा म प्रदेश कोषाध्यक्ष नंदन जैन, प्रदेश प्रवक्ता दीपक म्हस्के, प्रदेश सोशल मीडिया संयोजक सोमेश चंद्र पांडे, अउ सह संयोजक मितुल केठारी घलो मौजूद रीहिन। ए बेरा म भाजपा के वरिष्ठ नेता मन ह श्री माथुर ले प्रदेश के कतकोन विषय उपर विस्तार ले गोठबात करीन।
कोरोना समाचार
प्रदेश म कोरोना संक्रमण के मामला एक घांव फेर बाढ़त हे। काली राज्य म नौ सौ पचहत्तर सैंपल के जांच करे गीस, जेमा अड़तालिस मरीज मन कोरोना ले संक्रमित पाय गेहे। सबले जादा अठारा झिन मरीज दुर्ग जिला ले मिले हे। उंहे रायपुर म नौ अउ बिलासपुर-धमतरी जिला ले आठ-आठ झिन संक्रमित मरीज मनके पुष्टि होय हे। जबकि बिलासपुर जिला म केरोना ले संक्रमित एक झिन मरीज के मउत घलो होगे।
अभी के बेरा म एक सौ नब्बे झिन मरीज मनके इलाज प्रदेश के कतकोन अस्पताल अउ होम आइसोलेशन म चलत हे।
जिला पंचायत अध्यक्ष-निधन
दुर्ग जिला पंचायत के अध्यक्ष शालिनी यादव के रायपुर के एक ठिन निजी अस्पताल म निधन होगे। श्रीमती यादव ह पाछू कुछु दिन ले बीमार रीहिस हे अउ ओखर दुर्ग के एक ठिन निजी अस्पताल म इलाज होवत रीहिस। काली दिल के दौरा पड़े के बाद ओमन ल ग्रीन कारिडोर बनाके दुर्ग ले रायपुर लाके एक ठन निजी अस्पताल म भर्ती कराय गे रीहिस। जिहां इलाज के बेरा आज ओखर मउत होगे।
मुख्यमंत्री भूपेश बघेल, गृहमंत्री ताम्रध्वज साहू अउ विधायक अरूण वोरा ह शालिनी यादव के निधन म दुख जताय हे।
गोधन न्याय योजना-राशि अंतरण
मुख्यमंत्री भूपेश बघेल ह आज रईपुर म गोधन न्याय योजना के चलत पशुपालक ग्रामीण, गौठान ले जुड़े माईलोगिन मनके समूह अउ गौठान समिति ल पांच करोड़ बत्तीस लाख रूपिया के पइसा ऑनलाइन दीन हे। एखर अंतर्गत सोलह ले इकतीस मार्च तक खरीदे गे एक लाख पैंतालीस हजार कुंटल गोबर के एवज म दू करोड़ इंक्यानवे लाख रूपिया के भुगतान करे गीस। संगेसंग गौठान समिति ल एक करोड़ तैंतालीस लाख रूपिया अउ माईलोगिन मनके समूह ल अंठानवे लाख रूपिया के लाभांस रासि बांटे गीस। ए बेरा म मुख्यमंत्री ह किहीन कि गोधन न्याय योजना म हम लोगन मन सरलग उपलब्धि पाय हन। ए योजना के मुख्य उद्देश्य ही अपन गांव ल आर्थिक रूप ले मजबूत बनाना हे।
ओमन बतईन कि राजीव गांधी ग्रामीण भूमिहीन कृषि मजदूर न्याय योजना के विस्तार कर दे गेहे। अब नगर पंचायत अउ अनसूचित क्षेत्र के नगर पालिका के भूमिहीन कृषि मजदूर मन ल ए योजना के लाभ मिलही। ए योजना के लाभ ले बर भूमिहीन कृषि मजदूर मन ल पन्द्रह अप्रैल तक आवेदन करना होही।
स्वास्थ्य सचिव बैठक
स्वास्थ्य परिवार कल्याण अउ चिकित्सा शिक्षा विभाग के सचिव प्रसन्ना आर. ह आज आने आने स्वास्थ्य कार्यक्रम म विभाग के संग जुड़के काम करइया अंतर्राष्ट्रीय अउ राष्ट्रीय संस्थान के संगेसंग गैर शासकीय संगठन के बइठका लीही। नवा रायपुर म होय ए बैठक म स्वास्थ्य सेवा ल मजबूत बनाय अउ जादा ले जादा लोगन मन ल शासकीय अस्पताल के माध्यम ले इलाज कराय बर विस्तार ले चर्चा करे गीस। ओमन ह सहयोगी संस्था के भागीदारी ले स्वास्थ्य के क्षेत्र म होवत कामबुता के समीक्षा करीन अउ एला प्रभावी बनाय के निर्देश दीन। श्री प्रसन्ना ह बैठक म विश्व स्वास्थ्य दिवस म एसो के थीम- हेल्थ फॅार ऑल ल साकार करे बर सबो सहयोगी संस्था अउ गैर सरकारी संगठन ले अपील ेकरीन। ओमन ह सबो संस्था ल लोगन तक गुणवत्तापूर्ण सेवा उपलब्ध कराय के निर्देश दीन।
ट्रेन-परिचालन
खड़गपुर रेलमंडल म रेल रोको आंदोलन के सेती दक्षिण पूर्व मध्य रेलवे ले होके चलइया कुछु गाड़ी के अवई-जवई ह आज अउ काली प्रभावित रइही। एमा कुछु ट्रेन ल रद्द कर दे गेहे। त उहें, कुछु ट्रेन ल आने रद्दा ले चलाय जात हे, जउन गाड़ी ल रद्द करे गेहे, ओमा दुर्ग-राजेन्द्र नगर साउथ बिहार एक्सप्रेस, हावड़ा-मुंबई मेल एक्सप्रेस, सालीमार कुर्ला एक्सप्रेस, रानी कमलापति-सांतरागाछी एक्सप्रेस, मुंबई-हावड़ा दुरंतो एक्सप्रेस अउ सांतरागाछी जबलपुर एक्सप्रेस सामिल हरय। उहें, पन्द्रह ले जादा गाड़ी ल आने रद्दा ले चलाय जात हे।
महावीर जयंती
मुख्यमंत्री भूपेश बघेल ह रईपुर के जैन दादा बाड़ी म आयोजित भगवान महवीर जनम कल्याणक महोत्सव म सामिल होईन। ए मउका म ओमन ह किहीन कि भगवान महावीर के जनम समाज के कल्याण बर होय रिहीस। ज्ञान प्राप्ति के बाद ओमन ह जउन संदेस समाज ल दीन हे, उही आज घलो सरलग चलत हे। मुख्यमंत्री ह काली ए बेरा म किहीन कि भगवान महावीर के सबले बड़े संदेस अंहिसा के सिद्धांत हवय। उंखर मनके विचार ल हरेक मनखे तक पहुंचाय के जरूरत हे।
दुर्घटना
कोरबा जिला म आज बीहनिया होय रद्दा हादसा म दू झिन मनखे के मउत होगे। जानबा के अनुसार सीतामणी के रहइया एक झिन सियनहा ह अपन तीन बछर के पोता के संग आज बीहनिया टहले बर निकले रीहिन । इही बेरा सिटी कोतवाली थाना क्षेत्र म तेज रप्तार टै्रक्टर ह दूनो ल अपन चपेट म ले लीस जेखर बाद गंभीर रूप ले घायल दादा अउ पोता ल एक ठन निजी अस्पताल म भर्ती कराय गीस। जिहां इलाज के बेरा ओखर मउत होगे। एति घटना ले गुस्साये उंहा के रहइया लोगन मन ह कोरबा-चांपा रद्दा म चक्का जाम कर दीन।
उंहे कांकेर जिला के कांकेर-जगदलपुर रद्दा म चारपहिया गाड़ी के टक्कर ले मोटर सायकिल सवार एक झिन जवान लईका के मउका म ही मउत होगे।
मौसम
मौसम विभाग ह अप्रैल अउ जून के बीच देशभर के कतकोन जगा म तापमान ल औसत ले जादा अउ गरम मौसम रेहे के अनुमान जताय हे। मौसम विभाग ह कहिन हे कि ए बेरा म मध्य भारत, पूर्वी भारत अउ उत्तर पश्चिम भारत के कतकोन जगा म दिन के तापमान ह सामान्य ले जादा रहे के संभावना हे।
मौसम विभाग के अनुमान हे कि अवइया पांच दिन म उत्तर भारत के जादातर हिस्सा म अधिकतम तापमान तीन ले पांच डिग्री सेल्सियस तक बाढ़ सकत हे । ए पांच दिन म देश के कोनो भी जगा म गरम हवा चले के संभावना नइ हे।