प्रदेस म तेंदूपत्ता सकेले के काम ल ए महीना के तीसरा हफ्ता ले सुरू करे जाही। ए काम खातिर वन विभाग डहार ले तैयारी सुरू कर दे गेहे। खबर के मुताबिक जम्मों जिला म फड़ मुंशी के चुनई करे के संगेसंग अग्नि सुरक्षा अउ तेंदूपत्ता तोड़े के संबंध म कार्यशाला राख के प्रसिक्षण घलो दे जाही।
कोरोना-समाचार
राज्य म ए समय कोरोना बीमारी ह बाढ़त हे। काली प्रदेस म एक हजार चार सौ अंठावन ठन सैंपल के जांच करे गीस, जेमा सैंतालीस झिन मनखे मन ल कोरोना पॉजिटिव पाय गीस। अभी एक सौ पचपन झन मरीज मनके इलाज प्रदेस के कई ठिन अस्पताल म करे जात हे।
ओति, धमतरी जिला के नगरी म सासकीय प्री-मैट्रिक अनुसूचित जनजाति कन्या छात्रावास म ओन्नईस झन पढ़इया लइका मन कोरोना बीमारी ले पीड़ित हे। ए जम्मों झन नोनी मन ल छात्रावास के परिसर म होम आइसोलेशन म रखे गेहे।
ऐति, बिलासपुर जिला प्रसासन डहार ले दूसर राज्य ले अवइया मनखे मनके कोरोना जांच करे खातिर एक ठिन टीम बनाय गेहे।
रमन सिंह-बयान
पूर्व मुख्यमंत्री डॉक्टर रमन सिंह ह किहीन हे कि नान घोटाला मामला के जांच ल ईडी ह पहिलीच ले करत हे अउ ए मामला के निष्पक्ष जांच करे खातिर एला दूसर राज्य म ट्रांसफर करना चाहत हे। फेर, राज्य सरकार ह एमा मंजूरी नइ देत हे। जेखर ले जांच ह अब तक पूरा नइ हो पाय हे। डॉक्टर सिंह ह मुख्यमंत्री भूपेश बघेल उपर आय ले जादा संपत्ति के मामला म उंखर छबि ल नकसान पहुंचाय के आरोप लगईन हे।
माओवादी समाचार
दंतेवाड़ा जिला म आज एक झिन महिला माओवादी के संगेसंग दू झन माओवादी मन ह पुलिस के आगू म आत्मसमर्पण कर दीन। ए माओवादी मन उपर नक्सली गतिविधि म सामिल होय के आरोप हे।
उहें, बीजापुर जिला म सुरक्षा बल के टीम डहार ले एक झिन माओवादी ल गिरफ्तार करे गीस।
ओति, नारायणपुर जिला के कुकड़ाझोर थाना क्षेत्र के ताडोनार रद्दा म सुरक्षा बल के टीम ह पांच किलो के बम बरामद करीन हे। ए बम ल बम निरोधक दस्ता के टीम डहार ले निष्क्रिय कर दे गीस।
अंगना म शिक्षा-स्कॉच अवॉर्ड
राज्य म स्कूल सिक्षा विभाग डहार ले लॉकडाउन के दउरान सुरू करे गे ‘‘अंगना म सिक्षा‘‘ कारीकरम ल एक ठन निजी संगठन ह स्कॉच अवार्ड ले सम्मानित करे गीस। ए इनाम मिले म मुख्यमंत्री भूपेश बघेल अउ स्कूल शिक्षा मंत्री डॉक्टर प्रेमसाय सिंह टेकाम ह स्कूल सिक्षा विभाग के संगेसंग ए परियोजना ले जुड़े महिला सिक्षिका अउ दिगर मनखे मन ल बधाई दीन।
दिल्ली टीम-रायपुर दौरा
नई दिल्ली ले आय राष्ट्रीय ग्रामीण आजीविका मिशन, बिल एंड मेलिंडा गेट्स फाउंडेशन अउ जीडीआई के टीम ह आज रईपुर के सेरीखेड़ी म मल्टी-यूटिलिटी सेंटर अउ समुदाय प्रबंधित प्रशिक्षण केन्द्र के निरीक्षण करीन। संगेसंग ए टीम ह प्रतिभागी मन ल गोठबात घलो करीन। ए दउरान बिहान ले जुड़े माईलोगिन के जिनगी म आय सामाजिक, आर्थिक अउ मानसिक बदलाव के संगेसग उंखर जीवन स्तर म आय परिवर्तन के बारे म जानकारी घलो लीन।
मुख्य सचिव-बैठक
राज्य के मुख्य सचिव अमिताभ जैन के अगुवई म मंडी बोर्ड के एक ठन समीक्षा बइठका राखे गीस। ए दउरान प्रदेस म मंडी बोर्ड के भूईंया ल व्यवसायिक रूप ले विकास करे के फइसला ले गीस। उहें, मंडी बोर्ड के उपयोग नइ होवइया भूईंया के व्यवसायिक विकास करके किसान मॉल अउ किसान सेंटर बनाय खातिर कार्ययोजना बनाय के निरदेस अधिकारी मन ल दे गीस। मुख्य सचिव ह किहीन कि राज्य के हरेक विकासखंड के गौठान मनके संगेसंग सहर के गौठान मन म घलो गोबर पेंट बनाय के मसीन लगाय जाय।
महावीर जयंती
देस म आज भगवान महावीर के जयंती ल सरधा अउ भक्ति के संग मनाय जात हे। ए मउका म राज्य म घलो जैन समुदाय के मनखे मन डहार ले जघा-जघा कई ठिन कारीकरम करे जात हे। राष्ट्रपति द्रौपदी मुर्मु, उप राष्ट्रपति जगदीप धनखड़ अउ प्रधानमंत्री नरेन्द्र मोदी ह महावीर जयंती के मउका म लोगन मन ल सुभकामना दीन।
उहें, राज्य के मुख्यमंत्री भूपेश बघेल ह घलो प्रदेस के जनता मन ल सुभकामना अउ बधाई दीन। ए मउका म श्री बघेल ह किहीन कि भगवान महावीर ह समाज ल सत्य, अहिंसा, प्रेम अउ करूणा के संदेस दे रिहीन। ओमन अहिंसा ल जम्मों धर्म ले उपर बताय रिहीन। संगेसंग भगवान महावीर ह ‘‘जियो और जीने दो‘‘ के सीख घलो दे रिहीन।
हज यात्री-चयन
केन्द्र सरकार डहार ले एसो डिजिटल चयन प्रक्रिया के माध्यम ले एक लाख चालीस हजार हज यात्री मन ल चुने गेहे। एमा दस हजार ले जादा सत्तर बछर के मनखे मन हे। उहें, चार हजार ले जादा माईलोगिन मन ल सामिल करे गेहे। केन्द्रीय अल्पसंख्यक कार्य मंत्रालय ह बतईन हे कि हज यात्री मन ल स्वास्थ्य बीमा कराना जरूरी हे। मंत्रालय ह यहू बतईन कि स्टेट बैंक कैशलेस सुविधा के बारे म जानकारी दे खातिर टेलीफोन हेल्प लाइन सुविधा सुरू करे जाही।
पोषण पखवाड़ा
माईलोगिन अउ लइका मन ल कुपोषण ले बचाय खातिर प्रदेस म बीस मार्च ले तीन अप्रैल तक पोषण पखवाड़ा दिवस मनाय गीस। ए दउरान सुपोषण रथ, साइकिल बाईक रैली, मैराथन, मिलेट्स, जागरूकता कैम्प, सुपोषण चौपाल अउ अम्मा की रसोई करीकरम करे गीस। ए कारीकरम म माईलोगिन मनके संगेसंग पंचायत के प्रतिनिधि, किसान अउ जवान लइका मन ह घलो सामिल होईन।
दुर्घटना
रायगढ़ जिला म पाछु चौबीस घंटा के दउरान अलग-अलग सड़क दुर्घटना म एक आरक्षक समेत छह झिन मनखे मनके मउत होय के समाचार मिले हे।
मिले खबर के मुताबिक जूटमिल थाना क्षेत्र म एक ठन टरक ह सड़क के बाजू म खड़े दू झन जवान लइका मन ल अपन चपेट म ले लीन। ए हादसा म ए दूनों झन लइका के मउकाच म परान छूट गे।
ओति, पुसौर थाना क्षेत्र के चिखली गांव के तीर एक ठन चरचकिहा गाड़ी के चपेट म आय ले एक झिन आरक्षक के मउत होगे। बताय जात हे कि आरक्षक ह ड्यूटी ले छूट के फटफटी म अपन घर जावत रिहीस।
उहें, भगवानपुर के रहइया एक झिन सियान मनखे ल टरक ह टक्कर मार दीस। ए हादसा म ए सियान मनखे के मउत होगे।
ऐति, लैलूंगा थाना क्षेत्र म गोंदली ले भराय एक ठिन टरक ह पलट गे। ए हादसा म टरक चलइया मनखे के मउत होगे। उहें, दू झन मनखे मन घायल होगे।
ओति, घरघोड़ा थाना क्षेत्र म फटफटी चलइया एक झिन जवान लइका के मउत होगे। बताय जात हे कि एखर फटफटी ह अनते-तनते होगे गिर गे, जेखर ले ए लइका के परान छूट गे।
रबर खेती
केरल राज्य म रबर के खेती करे जाथे, वइसने छत्तीसगढ़ म घलो अब रबर के खेती करे जाही। ए संबंध म काली रईपुर म इंदिरा गांधी कृषि विश्वविद्यालय अउ रबर अनुसंधान संस्थान कोट्टायाम के बीच एक ठन समझौता उपर हस्ताक्षर करे गीस। ए समझौता के तहत रबर अनुसंधान संस्थान, कोट्टायाम बस्तर के एक हेक्टेयर क्षेत्र म रबर के खेती ल प्रायोगिक रूप ले करे जाही। सात बछर बर पौधा, खातू, दवई अउ मजदूरी मे होवइया खरचा ल इंदिरा गांधी कृषि विश्वविद्यालय ल दे जाही। संगेसंग कुछ-कुछ तकनीकी जानकारी किसान मन ल प्रसिक्षण के माध्यम ले दे जाही।
सभापति-पार्षद कार्रवाई
भिलाई नगर निगम के सभापति गिरवर बंटी साहू ह नगर निगम के नौ झन भाजपा पार्षद मनके बर्खास्तगी के मांग ल लेके निगम आयुक्त ल चिट्ठी लिखे हे। पत्र म ओमन लिखे हे कि पाछु इक्कईस मार्च के राखे गे नगर निगम के बइठका म ए भाजपा पार्षद मन ह सदन के अवमानना करत अशोभनीय आरचण करे रिहीन। सभापति ह ए पार्षद मनके खिलाफ बर्खास्तगी के कार्रवाई करे के अनुसंसा करे हे।