जशपुर जिला म पहाड़ी कोरवा समुदाय के चार झन लोगन मन डहार ले फांसी लगाके आत्महत्या करे के घटना के जांच बर भारतीय जनता पार्टी ह एक समिति गठित करे हे। प्रदेश अध्यक्ष अरूण साव डहार ले गठित ये छै सदस्यीय जांच समिति संबंधित स्थान मनके दउरा करके घटना ले संबंधित तथ्य मनके रिपोर्ट पार्टी ल सौंपही। ये समिति म नेता प्रतिपक्ष नारायण चंदेल अउ पूर्व सांसद रामविचार नेताम समेत अन्य जनप्रतिनिधि मन शामिल हे।
इही बीच एक बयान जारी कर नेता प्रतिपक्ष नारायण चंदेल ह ये घटना बर राज्य सरकार ल जिम्मेदार ठहरावत कीहिन हे कि पहाड़ी कोरवा दंपत्ति ह कथित रूप ले भूख अउ बेरोजगारी के सेती आत्महत्या कर लेहे। श्री चंदेल ह कीहिन कि आत्महत्या करने वाला परिवार करा रोजगार नइ रीहिस अउ गांव ले करीबन पंद्रह किलोमीटर दूरिहा जंगल म महुआ बीनके कोनो प्रकार ले अपन गुजर बसर करत रीहिन। श्री चंदेल ह आरोप लगाइन कि ये परिवार ल केंद्र सरकार डहार ले हर महीना प्रति व्यक्ति दे जाने वाला पांच किलो अनाज योजना के लाभ घलो नइ दे जात रीहिस। ओमन दावा करे हे कि राज्य सरकार ह छै करोड़ रूपिया ले जादा के खाद्यान्न घोटाला करे हे अउ एखर उच्च स्तरीय जांच जरूरी हे।
नेता प्रतिपक्ष ह अइसना घटना के पुनरावृत्ति ल रोके बर खाद्यान्न के सही वितरण नइ करइया दोषी मनके खिलाफ सख्त कार्रवाई करे के मांग करे हे।
मुख्यमंत्री भेंट-मुलाकात
मुख्यमंत्री भूपेश बघेल ह भेंट-मुलाकात कार्यक्रम के दउरान दुर्ग जिला म अठहत्तर करोड़ सत्ताईस लाख ले जादा के विकास काम के लोकार्पण अउ भूमिपूजन करीन। ये विकास काम म सड़क निर्माण, स्वास्थ्य केंद्र, स्वामी आत्मानंद स्कूल भवन अउ तटबंध निर्माण के काम शामिल हे। पुरई गांव म आयोजित कार्यक्रम म श्री बघेल ह अलग-अलग योजना मनके तहत हितग्राही मन ल सहायता राशि अउ कई ठन सामग्री वितरित करीन।
रेलवे रिकॉर्ड माल ढुलाई
भारतीय रेलवे ह वित्तीय बछर दू हजार बाईस-तेईस म पंद्रह सौ बारह एमटी की रिकॉर्ड माल ढुलाई करे हे। रेलवे डहार ले जारी एक ठन विज्ञप्ति म पाछू वित्तीय बछर के दउरान हासिल करे गे उपलब्घि मनके जानकारी दे गेहे। एखर अनुसार पाछू बछर भारतीय रेलवे ह माल ढुलाई, विद्युतीकरण, नवा लाईन बिछाय, दोहरीकरण अउ लोको उत्पादन के संगेसंग सुरक्षा सुनिश्चित करे बर प्रौद्योगिकी के एकीकरण सहित विभिन्न श्रेणी मन म रिकॉर्ड कायम करे हे।
मिलेट कैफे
बलरामपुर जिला मुख्यालय म मिलेट कैफे खोले गेहे। कृषि मंत्री रविंद्र चौबे अउ उद्योग मंत्री कवासी लखमा ह ए कैफे के शुभारंभ करीन। ये मउका म श्री चौबे अउ श्री लखमा ह मिलेट कैफे म तैयार करे गे व्यंजन मनके स्वाद चखीन। सेहत बाजार के नाम ले शुरू करे गे ये मिलेट कैफे के संचालन राष्ट्रीय ग्रामीण आजीविका मिशन-बिहान के तहत महिला स्व सहायता समूह के महिला मन डहार ले करे जात हे।
एखर अलावा मंत्री मन सुराजी गावं योजना के तहत जिला के बढकीमहरी म गोबर ले निर्मित पेंट यूनिट के लोकार्पण करीन। बलरामपुर शहरी गौठान म संचालित ये गोबर पेंट यूनिट म तीन महिला स्व सहायता समूह के करीबन तीस झिन महिला मन ल रोजगार मिलही।
टीएस सिंहदेव नोटिस
अंबिकापुर म करीबन बावन एकड़ भूमि म स्थित शिवसागर तालाब ल पाट के एखर जमीन ल बेचे के मामला म बिलासपुर उच्च न्यायालय ह स्वास्थ्य मंत्री टीएस सिंहदेव ल नोटिस जारी करे हे । उच्च न्यायालय के न्यायाधीश गौतम भादुड़ी अउ न्यायाधीश एन.के. चंद्रवंशी के बेंच ह ये मामला के सुनवाइ करत हुए स्वास्थ्य मंत्री ल व्यक्तिगत रूप ले या अपन वकील डहार ले ग्यारा अप्रैल के जवाब पेस करे बर केहे हे। संगेसंग कोर्ट डहार ले यहू केहे गेहे कि यदि नियत तिथि म श्री सिंहदेव ह अपन जवाब नइ दीही त याचिका के सुनवाई करत एक तरफा निर्णय ले जाही। अंबिकापुर के तरूण नीर समिति ह सार्वजनिक तालाब ल बेचे के मामला म एक याचिका लगाये रीहिस।
सुरक्षा मंच प्रेसवार्ता
जनजाति सुरक्षा मंच छत्तीसगढ़ के अध्यक्ष गणेशराम भगत ह मांग करे हे कि आदिवासी समाज ल छोड़के अन्य धर्म अपनाने वाला लोगन मनके नाम अनुसूचित जाति या जनजाति के श्रेणी ले हटाये जाय। ये मांग ल लेके सोला अप्रैल के राजधानी रायपुर म एक रैली घलो निकाले जाही।
रायपुर म एक प्रेसवार्ता ल संबोधित करत हुए श्री भगत ह मांग करे हे कि धर्मांतरण करइया लोगन मनके नाम जनजाति वर्ग के सूची ले हटाय बर संविधान म संशोधन करे जाय। ओमन बताइन कि रायपुर म प्रस्तावित रैली म छत्तीसगढ़ समेत देशभर के जनजाति समुदाय के लोगन मन शामिल होही।
माओवादी मुठभेड़
सीमावर्ती राज्य झारखण्ड के चतरा म सुरक्षा बल ह मुठभेड़ म पच्चीस लाख रूपिया के इनामी माओवादी गौतम पासवान समेत पांच झन माओवादी मन ल मार गिराये हे। सबो झन के शव बरामद कर ले गेहे। मउका ले पांच ठन हथियार घलो बरामद कर ले गेहे। कोबरा के दू सौ तीन बटालियन के जवान मन ह ये कार्रवाई करीन।
विस्फोट मौत
कबीरधाम जिला के रेंगाखार थाना क्षेत्र स्थित चमारी गांव म बिहाव म उपहार के रूप म मिले होम थियेटर ल चालू करे के दउरान भीषण विस्फोट होय ले दूल्हा सहित दू झनके मउत होगे। जबकि परिवार के चार सदस्य मन गंभीर रूप ले घायल होगे।
मिले जानकारी के मुताबिक ये विस्फोट अतका भीषण रीहिस हे कि मकान के छत उड़गे अउ दूल्हा के मउका म ही मउत होगे। जबकि ओखर भाई ह इलाज के दउरान अस्पताल म दम तोड़ दीस। पुलिस मामला के जांच करत हे अउ होम थियेटर ल उपहार देवइया मनखे के तलाश करे जात हे। अतिरिक्त पुलिस अधीक्षक मनीषा ठाकुर ह घटना के पुष्टि करे हे।
अउ अब एक सतर्क करने वाला खबर –
छत्तीसगढ़ सहित देश के कई ठन राज्य मन म एक घांव फेर कोरोना के मामला बाढ़त हे। एला देखत हुए स्वास्थ्य अमला एहतियाती कदम उठावत हे। राज्य म बीते दस दिन के दउरान कोरोना संक्रमण के मामला म लगातार बढ़ोत्तरी देखे जात हे। पॉजीटिवीटी दर चार दशमलव एक चार प्रतिशत तक पहुंच गेहे।
काली प्रदेशभर म होय पांच सौ बत्तीस नमूना मनके जांच म बाइस नवा मरीज मनके पहिचान होय हे। हालाकि काली कोरोना संक्रमण ले काखरो मउत नइ होय हे। एखरे संग प्रदेश म सक्रिय मरीज मनके संख्या एक सौ तेरा पहुंच गेहे। एमा रायपुर अउ बिलासपुर म सबले जादा नवा मरीज मिले हे। उंहे राज्य के चौदा ठन जिला म ए बखत कोरोना के एको झन सक्रिय मरीज नइ हे। जेन जिला मन म नवा मामला मिले हे उंहा स्वास्थ्य विभाग डहार ले कॉन्ंटेक्ट ट्रेसिंग के काम शुरू कर दे गेहे।
डायलिसिस सुविधा
प्रधानमंत्री राष्ट्रीय डायलिसिस कार्यक्रम जीवन धारा के तहतप्रदेश के बाईस ठिन जिला मन म डायलिसिस के सुविधा देवाय बर चिकित्सक मन ल प्रशिक्षित करे गेहे। एम्स रायपुर डहार ले तीस ले जादा चिकित्सक मन ल ये प्रशिक्षण दे गीस। एखर मदद ले अब प्रदेश के दूरिहा इलाका मन म घलो डायलिसिस के सुविधा मिल सकही।
रायपुर एम्स के निदेशक प्रोफेसर डॅाक्टर नितिन एम.नागरकर ह बताइन कि राज्य म किडनी रोगी मनके बाढ़त संख्या ल देखत हुए आने आने जिला मन म डायलिसिस के सुविधा शुरू करे जात हे।
निजात अभियान
बिलासपुर पुलिस ह बीते दू महीना के दउरान नशा के खिलाफ निजात अभियान के तहत जन जागरूकता उपर आधारित पांच सौ ले जादा कार्यक्रम करे हे । ए दउरान स्कूल कॉलेज के संगेसंग सार्वजनिक जगा मन म कांउसिलिंग करे गीस। उंहे दीवार लेखन अउ फ्लैक्स के माध्यम ले लोगन मन ल नशा के दुष्प्रभाव के जानकारी दे गीस। एखर अलावा जिला म नशा के कारोबार करइया तेरह सौ ले जादा लोगन मन ल गिरप्तार कर उंखर खिलाफ कार्रवाई करे गीस।