मुख्यमंत्री भूपेश बघेल आज रायपुर म आयोजित कार्यक्रम म जिला सहकारी केंद्रीय बैंक मर्यादित दुर्ग के अंतर्गत अहिवारा म बैंक के शाखा भवन के संग ग्यारा एटीएम अउ गोदाम के वर्चुअल लोकार्पण करीन। कार्यक्रम म कुल दू करोड़ इक्कीस लाख रूपिया ले जादा के राशि के विकास कार्य के लोकार्पण करे गीस। ए बेरा म मुख्यमंत्री ह कहिन कि प्रदेश म किसान अउ ग्रामीण मनके जीवन म सहकारिता के माध्यम ले बड़ बदलाव आय हे।
छत्तीसगढ़ उच्च न्यायालय के नवनियुक्त चीफ जस्टिस रमेश सिन्हा ह ओवेशन ल संबोधित करत हुए कीहिन कि छत्तीसगढ़ के राष्ट्रीय पहचान रामायण अउ महाभारत काल ले हे। कार्यक्रम म जस्टिस गौतम भादुड़ी ह स्वागत भाषण दीन। एखर अलावा महाधिवक्ता सतीश चंद्र वर्मा, हाईकोर्ट अधिवक्ता संघ के अध्यक्ष अब्दुल वहाब खान, डिप्टी सॉलिसिटर जनरल रमाकांत मिश्रा ह केंद्र सरकार डहार ले ओखर स्वागत करीन। जानबा के मुताबिक चीफ जस्टिस श्री सिन्हा छत्तीसगढ़ हाईकोर्ट के पंद्रहवां चीफ जस्टिस हरय।
छत्तीसगढ़ खनिज साधन विभाग डहार ले बलरामपुर जिला के केनापारा ग्रेफाईट ब्लॉक ल ई-नीलामी के माध्यम ले कंपोजिट लाइसेंस के रूप म आबंटन बर एक सौ ग्यारा प्रतिशत के अधिकतम बोली लगाये गीस। भौमिकी अउ खनिकर्म के संचालक जयप्रकाश मौर्य के निर्देशन म उनतीस मार्च के ए ई नीलामी करे गीस। राज्य डहार ले पहिली बार ग्रेफाईट ब्लॉक के सफलता पूर्वक ई-नीलामी करे गेहे। एखर पहिली देश म केवल ओडिशा अउ मध्यप्रदेश डहार ले ग्रेफाईट ब्लॉक के आबंटन ई-नीलामी के माध्यम ले करे गेहे।
प्रवर्तन निदेशालय-ईडी के टीम ह आज भिलाई-तीन के ट्रांसपोर्ट व्यवसायी अचल भाटिया के घर छापा मारीन। इडी के टीम डहार ले ट्रांसपोर्टर के ठिकाना पहुंचके जांच शुरू कर देहे। बुधवार के घलो ईडी के टीम ह भिलाई म बड़ पैमाना म शराब ले जुड़े अधिकारी अउ व्यवसायी मनके घर म दबिश दे रीहिस।
मुख्यमंत्री भूपेश बघेल ह आज रायपुर स्थित अपन कार्यालय म आयोजित कार्यक्रम म छत्तीसगढ़ के पहिली डिजिटल रेडियो स्टेशन रेडियो संगवारी लांच करीन। ओमन ह ए मउका म रेडियो संगवारी के संस्थापक अउ संचालक के संग पूरा टीम ल छत्तीसगढ़ के कला अउ संस्कृति ल व्यापक प्रचार प्रसार के दिशा म एक बेहतर प्रयास बतात हुए बधाई अउ शुभकाम ना दीन। मुख्यमंत्री ह कहिन कि रेडियो संगवारी के माध्यम ले छत्तीसगढ़ी लोक कला, लोक संस्कृति अउ गीत संगीत ल आम लोगन तक पहुंचाय बर रेडियो संगवारी के स्थापना करे गेहे, जेन सराहनीय प्रयास हे।
मुख्यमंत्री ह कहिन कि छत्तीसगढ़ के लुप्त होवत संस्कृति, विधा अउ कला परंपरा ल नवा जीवन देबर रेडियो संगवारी एक ताकतवर माध्यम हो सकत हे। नवा कलाकार मनके प्रतिभा ल घलो एखर माध्यम ले आसानी ले दुनिया के सामने लाये जा सकत हे।
ए बेरा म रेडियो संगवारी के संस्थापक राहुल शर्मा अउ सह-संस्थापक डॅाकटर हेमंत सिरमौर ह बताइन कि रेडियो संगवारी ल टू-जी इंटरनेट स्पीड म घलो आसानी ले सुने जा सकत हे।
कांकेर लोकसभा क्षेत्र के सांसद मोहम मंडावी के प्रतिनिधि अउ युवा आदिवासी भाजपा नेता विक्रम धु्रर्वे ह आज चिखलाकसा स्थित अपन निवास म फांसी लगाके आत्महत्या कर लीन। जानबा के मुताबिक मृतक तीर पुलिस ल सोसाइट नोट बरामद होय हे, जेमा विक्रम धुर्वे ह आत्महत्या के पाछू खुद ल जिम्मेदार बताय हे। पुलिस रिपोर्ट दर्ज करके मामला के जांच म जुट गेहे। ये घटना बालोद जिला के दल्लीराजहरा क्षेत्र के हे।
जानबा के मुताबिक विक्रम धुर्वे डौंडीलोहारा विधानसभा क्षेत्र म सक्रिय अउ युवा नेता के रूप म उभरत रीहिन। ओमन भाजपा अनुसूचित जनजाति मोर्चा बालोद के जिलाध्यक्ष घलो रीहिन।
दुर्ग जिला के बेमेतरा रद्दा म एक मोटर सायकिल के अनियंत्रित होय के गिरे ले ओमा सवार एक महिला के मउत होय के संग एक मनखे ह घायल होगे।
उंहे राजनांदगांव के जंगलपुर तीर पाछू रतिहा एक अज्ञात वाहन ह मोटर सायकिल सवार तीन लोगन ल पाछू ले टक्कर मार दीन। हादसा म एक मनखे के मउत होगे, उंहे दू युवक मन घायल होगे। जेमन ल इलाज बर अस्पताल म भर्ती कराय गेहे।
एति सक्ती जिला के पतेरापाली खुर्द मोड़ तीर एक स्कूल बस ह बाइक सवार दू लोगन ल टक्कर मार दीन। ए हादसा म एक मनखे के मउत होगे। उंहे एक आने मनखे ह गंभीर रूप ले घायल होगे हे। जेला सक्ती के अस्पताल म भर्ती कराय गेहे।
दुर्ग के हिशा बघेल छत्तीसगढ़ के पहिली महिला अग्निवीर हरय। ओमन अठाईस मार्च के ओडिशा के आईएनएस चिल्का म अपन प्रारंभिक प्रशिक्षण पूरा करीन अउ भारतीय नौसेना म शामिल होइन।
जानबा के मुताबिक हिशा बघेल ह दुर्ग जिला बोरीगारका गांव के निवासी हरय। हिशा बघेल छब्बीस सौ के अग्निवीर बैच म शामिल होय रीहिन। ए बैच म दू सौ तिहत्तर माइलोगिन रीहिन।
आय ले जादा संपत्ति के मामला म पूर्व आईआरएस अधिकारी अमन सिंह ल हाईकोर्ट ले राहत मिल गेहे। अमन सिह के डहार ले दायर करे गे अग्रिम जमानत याचिका ल मंजूर कर ले गेहे।
कोर्ट के आदेश के बाद अब अमन सिंह ल पुलिस गिरप्तार नइ कर सकय। जस्टिस राकेश मोहन के बेंच ह पहिली ले ए मामला म सुनवाई पूरा कर ले रीहिस अउ फैसला ल सुरक्षित कर ले रीहिन।
प्रदेश के कतकोन इलाका म आज घलो अंधड़ चले अउ गरज-चमक के संग बरसा होइस। राजधानी रायपुर के संगेसंग बिलासपुर, दुर्ग अउ सरगुजा संभाग के कतकोन जिला मन म मंझनियां के बाद मौसम म बदलव देखे गेहे।
मौसम विभाग के मुताबिक एक सिस्टम दक्षिण पश्चिम राजस्थान के उपर बने हे अउ एक द्रोणिका के अनियमित गति दक्षिण तमिलनाडु ले उत्तर छत्तीसगढ़ तक विस्तारित हे। जेखर कारण प्रदेश के कतकेन इलाका म आज हल्का ले मध्यम बरसा होवत हे।
– छत्तीसगढ़ राज्य हज कमेटी के चेयरमैन मोहम्मद असलम खान ह बताइन कि हज कमेटी ऑफ इंडिया मुंबई ले मिले सूचना के अनुसार हज यात्रा दू हजार तेईस बर आवेदन करे के हज यात्री मनके चयन आज मंझनियां तीन बजे ले करे जात हे।
– राजनांदगांव जिला म नीट परीक्षा के तियारी करत एक युवक ल बीएएमएस पाठ्यक्रम म प्रवेश देवाय के नाम ले साढ़े पांच लाख रूपिया के ठगी करे के मामला आगू आय हे।
– कोंडागांव जिला के बयानार थाना अंतर्गत चेरंग गांव म आज माओवादी मनह एक निजी मोबाइल टॅावर म आगी लगा दीन। माओवादी मन घटनास्थल म बैनर पोस्टर घलो लगाए रीहिन।
– राजनांदगांव नगर पालिका निगम के वित्तीय बछर दू हजार तेइस चौबीस के आय-व्यय अनुमान पत्रक आज प्रस्तुत करे गेहे।
अउ
– दुर्ग जिला के सुपेला थाना क्षेत्र के अंतर्गत काली जवारा विसर्जन के दउरान एक युवक ह दू नाबालिक सग बहिनी मन उपर चाकू ले हमला कर दीस। जेखर बाद एक युवती के मउका म ही मउत होगे । फेर गंभीर रूप ले घायल आने युवती ल अस्पताल म भर्ती कराय गेहे।