केंद्र सरकार ह दुर्लभ बीमारी मनके उपचार के उद्देश्य ले व्यक्तिगत उपयोग बर आयात करे जाने वाला सबो दवाई अउ विशेष खाद्य पदार्थ मन ल बुनियादी सीमा शुल्क ले छूट प्रदान करे हे।
सरकार ह अलग-अलग कैंसर के इलाज म इस्तेमाल होने वाला पेम्ब्रोलिजुमाब ल बुनियादी सीमा शुल्क ले पूरी तरह ले छूट प्रदान करे हे। ए दवाई मन उपर सामान्यतः दस प्रतिशत के दर ले बुनियादी सीमा शुल्क लगाये जाथे, जबकि जीवन रक्षक दवा अउ टीका मनके कुछ श्रेणी मन उपर बुनियादी सीमा शुल्क के रियायती दर पांच प्रतिशत या शून्य हे।
प्रधानमंत्री नरेंद्र मोदी ह बिलासपुर म प्रधानमंत्री ग्राम सड़क योजना के उपलब्धि उपर प्रसन्नता जताय हे। भाजपा प्रदेश अध्यक्ष अरूण साव डहार ले करे गे एक ठन ट्वीट संदेश के जवाब म प्रधानमंत्री ह कीहिन हे कि प्रधानमंत्री ग्राम सड़क योजना के अइसे उपलब्धि मन ह उत्साहित करइया हे। ओमन कीहिन कि बिलासपुर के लोगन मन के खुशी म पूरा देश शामिल हे।
केंद्र सरकार ह रेलवे स्टेशन मनके विकास बर अमृत भारत स्टेशन योजना के अंतर्गत एक हजार दू सौ पचहत्तर रेलवे स्टेशन मनके पहिचान करे हे। रेल मंत्री अश्वनी वैष्णव ह लोकसभा म एक प्रश्न के लिखित उत्तर म ये बात ल कीहिन।
ओमन कीहिन कि ये येजना म मास्टर प्लान के तैयारी अउ स्टेशन म प्रवेश, प्रतीक्षालय कक्ष, प्रसाधन, निशुल्क वाई-फाई अउ बेहतर यात्री सूचना प्रणाली जइसे स्टेशन के सुविधा मन ल चरणबद्ध तरीका से सुधारे के काम शामिल हे। ए योजना म भवन मन म सुधार, शहर के दूनो तरफ के स्टेशन के एकीकरण, दिव्यांग जन मन बर सुविधा अउ स्टेशन मन म दीर्घकालिक सिटी सेंटर्स के निर्माण के परिकल्पना घलो करे गेहे।
राज्य म तंबाकू अउ तंबाकू उत्पाद उपर नियंत्रण बर एखर ले जुड़े कानून मन ल कड़ाई ले लागू करे जाही। सबो शैक्षणिक संस्थान मन ल तंबाकू मुक्त बनाय बर प्रभावी कदम उठाय जाही।
मंत्रालय म तंबाकू नियंत्रण कार्यक्रम के तहत गठित राज्य स्तरीय समन्वय समिति के बइठका म अपर मुख्य सचिव रेणु जी. पिल्ले ह तंबाकू नियंत्रण ले जुड़े कानून मन ल प्रभावी ढंग से लागू करे के निर्देश देहे। बइठका म तंबाकू नियंत्रण बर कानूनी प्रावधान कोटपा छत्तीसगढ़ संशोधन अधिनियम अउ ई-सिगरेट उपर प्रतिबंध लगाये के कड़ाई ले पालन कराए के निर्देश देहे।
राजमार्ग मन म घायल मनके इलाज बर एंबुलेंस सेवा – एक शून्य आठ अउ एक शून्य तीन तीन के एकीकरण करे जाही। मंत्रालय म आयेजित परिवहन विभाग के बइठका म परिवहन सचिव एस. प्रकाश ह राजमार्ग मन म दुर्घटना ल रोके बर ब्लैक स्पॉट्स के सुधार कार्य मन म तेजी लाये के निर्देश अधिकारी मन ल दीन। बइठका म राजमार्ग मन म लगे कैमरा अउ टोलप्लाजा के डेटा ल इंटीग्रेट कर चालानी कार्रवाई सुनिश्चित करे के निर्णय ले गेहे।
उच्च न्यायालय ऑटो एक्सपो
छत्तीसगढ़ उच्च न्यायालय ह रायपुर म आयोजित ऑटो एक्सपो म वाहन मनके पंजीयन टैक्स म एकमुश्त पचास प्रतिशत छूट उपर रोक लगा देहे। मिले जानकारी के अनुसार राजधानी के साइंस कॉलेज मैदान म पाछू चौबीस मार्च ले ऑटो एक्सपो के आयोजन करे जात हे। जेमा राज्य सरकार ह वाहन मनके विक्रय के बाद पंजीयन टैक्स उपर एकमुश्त पचास प्रतिशत छूट देके घोषणा करे रीहिस, जेमा रोक लगाये बर छत्तीसगढ़ उच्च न्यायालय म याचिका दाखिल करे गे रहिस। प्रारंभिक सुनवाई के बाद हाईकोर्ट ह पचास प्रतिशत छूट म रोक लगा देहे।
प्रवर्तन निदेशालय-ईडी ह छत्तीसगढ़ सरकार ल पत्र लिखके उप सचिव सौम्या चौरसिया अउ निलंबित आईएएस अधिकारी समीर विश्नोई के खिलाफ भ्रष्टाचार निवारण अधिनियम के तहत मामला दर्ज करे के निवेदन करे हे। पुलिस महानिदेशक अउ सामान्य प्रशासन विभाग के सचिव ल भेजे गे ये पत्र म ईडी ह दूनो अधिकारी मनके खिलाफ उंखर डहार ले करे गे कार्रवाई अउ संपत्ति के ब्यौरा देहे।
सिविक एक्शन कार्यक्रम
नारायणपुर जिला के सोनपुर गांव म भारत-तिब्बत सीमा पुलिस बल आईटीबीपी डहार ले सिविक एक्शन कार्यक्रम के तहत शिविर के आयोजन करे गीस। ये मउका म ग्रामीण मन ल दैनिक उपयोग के सामान वितरित करे गीस। संगेसंग स्थानीय ग्रामीण मन ह माड़ संस्कृति उपर आधारित सांस्कृतिक कार्यक्रम घलो प्रस्तुत करीन। शिविर म आईटीबीपी के अधिकारी मन ह युवा मन ल समाज के मुख्यधारा म रहिके काम करे अउ कोनो तरह के समस्या आय म उनला संपर्क करे बर कीहिन ।
बीजापुर जिला म विस्फोट के चपेट म आय ले एक झिन जवान ह घायल होगे । मिले जानकारी के अनुसार जिला के नेलसनार बांगापाल क्षेत्र ले केंद्रीय रिजर्व पुलिस बल के टीम तलाशी अभियान बर निकले रीहिस। इही दउरान पांडेमुर्गा राष्ट्रीय राजमार्ग म माओवादी मन डहार ले सुरक्षा बल मन ल नुकसान पहुंचाये के उद्देश्य ले विस्फोट लगाये गे रीहिस, जेला बरामद कर बाद म निष्क्रिय करत बेरा विस्फोट होय ले बम विरोधक दस्ता के एक झन जवान घायल होगे, जेला बेहतर इलाज बर रायपुर लाये गेहे।
एति नारायणपुर के कुरूसनार थाना अंतर्गत गुमिया गांव म बेड़ा पुल निर्माण म लगे मिक्सर मशीन अउ पानी पंप म माओवादी मन आग लगा दीन, जेखर ले मशीन जलके नष्ट होगे।
रामनवमी के पर्व आज छत्तीसगढ़ सहित देशभर म श्रद्धा अउ उल्लास के संग मनाये जात हे। ये पर्व भगवान विष्णु के सातवां अवतार भगवान श्रीराम के जनम के उपलक्ष्य म मनाये जाथे। हिंदू कैलेण्डर के अनुसार रामनवमी चैत्र माह के नंवा दिन मनाये जाथे। राष्ट्रपति द्रौपदी मुर्मू, उपराष्ट्रपति जगदीप धनखड़ अउ प्रधानमंत्री नरेंद्र मोदी ह देशवासी मन ल रामनवमी के शुभकामना देहे।
एक ठन संदेश म राष्ट्रपति ह कीहिन कि भगवान राम के जयंती के ये परब निस्वार्थ सेवा के संदेश देथे। ओमन लोगन मन ल भगवान राम के आदर्श ल आत्मसात करे अउ भारत ल एक गौरवशाली राष्ट्र बनाये म स्वयं ल समर्पित करे के आग्रह करीन।
प्रधानमंत्री ह अपन ट्वीट संदेश म कीहिन कि मर्यादा पुरूषोत्तम भगवान श्रीराम के जीवन त्याग, तपस्या, संयम अउ दृढ़ संकल्प उपर आधारित रीहिस अउ ये हर युग म मानवता बर प्रेरणा बने रइहीं।
रामनवमी के मउका म आज प्रदेश म अलग-अलग जगा म स्थित राम मंदिर म भगवान श्रीराम के पूजा अर्चना करे जात हे। राजधानी रायपुर के दुधाधारी मठ म भगवान श्रीराम के दर्शन बर आज बीहनिया ले श्रद्धालु मनके तांता लगे हे।
उंहे नवरात्रि परब के नवां दिन आज सबो देवी मंदिर अउ शक्तिपीठ मन म पूजा अर्चना करे जात हे। संगेसंग बाजा-गाजा अउ जसगीत के संग जवारा विसर्जन घलो करे जात हे।
दक्षिण पूर्व मध्य रेलवे खेल संघ डहार ले रायपुर म अंतर्विभागीय क्रिकेट प्रतियोगिता के आयोजन करे गीस। एमा अठारा ठन टीम ह हिस्सा लीन। फाइनल मैच डब्लू आर एस अउ मैकेनिकल टीम के बीच खेले गीस। रोमांचक मुकाबला म मैकेनिकल टीम विजेता रीहिस।
अउ अब थोरकुन समाचार सार म-
– महासमुंद जिला के कसीबहरा पड़ाव करा पिकअप वाहन के अनियंत्रित होके पलटे ले करीबन चौबीस झिन घायल होगे। एमा ले पांच झिन के हालत गंभीर बताये जात हे। खबर के मुताबिक यात्री लक्ष्मीपुर ले केशवा शादी म शामिल होय बर जात रीहिन।
अउ
– धमतरी जिला के पुलिस ह कानून बेवस्था ल अउ बेहतर बनाये बर महिला पुलिस कमांडो के टीम तैयार करे हे।