राज्यपाल विश्वभूषण हरिचंदन ह आज न्यायाधिपति रमेश सिन्हा ल अब ले कुछु देर बाद राजभवन म छत्तीसगढ़ उच्च न्यायालय के मुख्य न्यायाधीश के शपथ देवाही। सपथ ग्रहण समारोह राजभवन के दरबार हाल म आयोजित करे जाही। सपथ लेके बाद रमेश सिन्हा ह छत्तीसगढ़ उच्च न्यायालय के पन्द्रहवां मुख्य न्यायाधीश बन जही। छत्तीसगढ़ आय ले पहिली न्यायमूर्ति रमेश सिन्हा ह इलाहाबाद उच्च न्यायालय म न्यायाधिपति रिहीस।
एखरे ले पहिली, छत्तीसगढ़ उच्च न्यायालय के नव नियुक्त मुख्य न्यायाधीश रमेश सिन्हा के आज रायपुर विमानतल पहुंचे म छत्तीसगढ़ उच्च न्यायालय के न्यायाधीश संजय के. अग्रवाल, पी. सेम कोसी समेत आने वरिष्ठ अधिकारी मन उंखर स्वागत करीन।
बेरोजगारी-भत्ता
प्रदेस म एक अप्रैल ले बेरोजगारी भत्ता योजना लागू हो जही। एखर चलत पात्र हितग्राही मनके बैंक खाता म पच्चीस सौ रूपिया हर महीना डाले जाना हे। उहें, बेरोजगार मन ल कौशल विकास के प्रसिक्षण देके संगेसंग ओमन ल रोजगार दे म मदद करे जाही। बेरोजगारी भत्ता योजना के लाभ ले बर आवेदक के परिवार के बछर भर के कमाई ढाई लाख रूपिया ले कम होना चाही। उहें, आवेदक ल छत्तीसगढ़ के मूल निवासी होना घलो जरूरी हवय अउ ओखर उमर अट्ठारह ले पैंतीस बछर के बीच होना चाही। आवेदक ह मान्यता प्राप्त बोर्ड ले कम से कम बारहवीं कक्षा पास होना चाही अउ प्रदेस के कोनों भी जिला रोजगार अउ स्व-रोजगार मार्गदर्शन केन्द्र म पंजीकृत होना चाही।
ईडी-छापा
प्रवर्तन निदेशालय-ईडी के टीम ह सरलग दूसर दिन प्रदेस म छापा के कार्रवाई ल जारी रखे हे। टीम ह आज बिहनिया रईपुर अउ भिलाई म सराब अउ होटल कारोबारी मनके ठिकाना म पहुंचीन। बताय जात हे कि ईडी के टीम ह काली जउन ठिकाना म छापा मारे रिहीस हे, उहां ले देर रतिहा सबो टीम लहुट गे रिहीस हे।
जानबा के अनुसार ईडी ह अभू तक प्रदेस म कोयला परिवहन घोटाला मामला म आई.ए.एस. समीर विश्नोई, मुख्यमंत्री कार्यालय के उप सचिव सौम्या चौरसिया, कोयला कारोबारी सूर्यकांत तिवारी, सुनील अग्रवाल अउ लक्ष्मीकांत तिवारी समेत खनिज विभाग के दू झिन अधिकारी मन ल गिरफ्तार कर चुके हे।
इही बीच, उप सचिव सौम्या चौरसिया के जमानत याचिका उपर सुनवाई ह इकतीस मार्च तक बर टल गेहे, जेमा आज सुनवाई होना रिहीस।
साव-विदेश मंत्री पत्र
भारतीय जनता पार्टी के प्रदेस अध्यक्ष अरूण साव ह विदेश मंत्री डॉक्टर एस. जयशंकर ल चिट्ठी लिखके साउदी अरब म बंधक बनके कामबूता करत प्रदेस के जवान लइका मन ल वापिस बुलाय के आग्रह करे हे। श्री साव ह अपन चिट्ठी म बतईन कि दुरूग जिला के बोरी थाना के अंतर्गत डोमा गांव के रहइया गोपाल साहू अउ तीन झिन आने लोगन मन ल साउदी अरब म नौकरी दिलाय के नाम म भेजे गे रिहीस। फेर अभी के बेरा म ए युवा मन ल अट्ठारह ले बीस घंटा के काम ले जाथे। ओमन बतईन कि एमन बर उहां ठीक से रेहे अउ खाय के व्यवस्था घलो नइ करे गेहे। सरलग सारीरिक अउ मानसिक परेसानी के सेती युवा मन ह अपन देस म वापस आय के गुहार लगाय हे।
एक भारत-श्रेष्ठ भारत
देस के सबो राज्य के पुलिस के कामबूता म एकरूपता लाय बर केन्द्रीय स्तर म पुलिस डहार ले एक भारत-श्रेष्ठ भारत अभियान के चलत आदान-प्रदान कार्यक्रम सुरू करे गेहे। एखर चलत प्रदेस स्तर म गठित पुलिस के टीम आने राज्य म जाके पुलिस के कामबूता के जानकारी लेवत हे। इही कड़ी म गुजरात पुलिस के पन्द्रह सदस्यीय टीम दुरूग पहुंचे हे, जउन कि पन्द्रह दिन तक दुर्ग संभाग अउ प्रदेस के कतकोन जिला म जाके उहां के पुलिस कार्रवाई के जानकारी लीहीं। अइसने, छत्तीसगढ़ पुलिस के टीम घलो गुजरात गेहे।
स्कूल-नया शिक्षा सत्र
प्रदेस म सरकारी स्कूल के अवइया नवा सत्र ह सोलह जून ले सुरू हो जही। स्कूल सिक्षा विभाग के प्रमुख सचिव आलोक शुक्ला ह विभाग के प्राथमिकता वाले योजना ल नवा सिक्षा सत्र सुरू होय के पहिली पूरा करे के निरदेस जिला कलेक्टर मन ल दीन हे। स्कूल के भवन के मरम्मत काम पन्द्रह जून के पहिली करे बर कहे गेहे। ओमन ह छूटे हुए स्कूल भवन, आश्रम, छात्रावास के सर्वेक्षण कराय के संगेसंग ओखर मरम्मत अउ आने कक्षा बनाय बर हिसाब बनाके एक सप्ताह म विभागीय पोर्टल म डाले बर कहिन हे। श्री शुक्ला ह सबो स्कूल म गणवेश अउ पात्र नोनी मन बर स्कूल सुरू होय के पहिली निःशुल्क सायकल हर हाल म दे बर कहिन। शाला प्रवेश उत्सव म प्रवेश लेवइया लइका मनके स्वागत टीका लगा के करे जाही। संगेसंग ओमन ल निःशुल्क पाठ्य पुस्तक घलो दे जाही।
अष्टमी/रामनवमीं
आज चैत्र नवरात्रि के महाअष्टमी हरय। आज के दिन आदिशक्ति दुर्गा दाई के आठवां रूप महागौरी के पूजा अर्चना करे जाथे। राज्य के सबो शक्तिपीठ अउ देवी मंदिर म नवरात्रि के बेरा पूजा अउ अनुष्ठान के कतकोन कार्यक्रम कराय जात हे। आज बिहनिया ले ही सबो शक्तिपीठ अउ देवी मंदिर म लोगन मनके भीड़ देखे बर मिलत हे। जगह-जगह हवन पूजा अउ धार्मिक आयोजन होवत हे। कतकोन जगह म भंडारा घलो कराय जात हे।
उहें, काली रामनवमीं के मउका म ज्योति कलश अउ ज्वारा के विसर्जन करे जाही।
राज्यपाल विश्वभूषण हरिचंदन अउ मुख्यमंत्री भूपेश बघेल ह प्रदेसवासी मन ल रामनवमीं के बधाई अउ सुभकामना दीन हे। ओमन ह ए बेरा म प्रदेसवासी मनके सुख, समृद्धि अउ खुसहाली के कामना करीन।
आकर्षी-कश्यप
दुर्ग के अंतर्राष्ट्रीय बैंडमिंटन खिलाड़ी आकर्षी कश्यप ह विश्व के चौदहवां वरीयता प्राप्त कनाडा के मिशेल ली. ल हराके बड़े उलटफेर करे हे। मेड्रिड म खेले जात स्पेन मास्टर प्रतियोगिता म पहिली दौर के मुकाबला म पहिली सेट गंवाय के बाद आकर्षी ह दूसर अउ तीसर सेट ल इंक्यावन मिनट म जीत के प्रतियोगिता ल अपन नाम कर लीस।
जानबा के अनुसार आकर्षी कश्यप ह ए प्रतियोगिता म बिना वरीयता मिले वाले खिलाड़ी हे। जबकि कनाडा के खिलाड़ी ल ए प्रतियोगिता म छठवां वरीयता मिले रिहीस। आकर्षी कश्यप के अब अगला मुकाबला काली तीस मार्च के होही।
ऐति, गोवा म उन्नीस ले छब्बीस मार्च तक खेले गे योनेक्स सनराईज मास्टर्स वेटेरन बैडमिंटन प्रतियोगिता म कोरबा के मनीषी सिंह ह रजत पदक हासिल करे हे। प्रतियोगिता के फाइनल मैच मनीषी सिंह अउ राजस्थान के हिमानी पुनिया के बीच खेले गीस। ए उपलब्धि म मुख्यमंत्री भूपेश बघेल ह मनीषी सिंह ह बधाई अउ सुभकामना दीन हे।
मुख्यमंत्री-बिजली दर
मुख्यमंत्री भूपेश बघेल ह किहीन हे कि प्रदेस म बिजली दर म बढ़ोतरी नइ होना प्रदेसवासी मनके हित म महत्वपूर्ण कदम हवय। ओमन ह मीडिया ले गोठबात करत कहिन कि राज्य विद्युत नियामक आयोग डहार ले एसो बिजली के दर म कोनों बढ़ोतरी नइ करे गेहे। ओमन बतईन कि राज्य विद्युत नियामक आयोग डहार ले सरकार ले कोनों करजा नइ ले गेहे।
अउ अब थोरकुन समाचार सार म-
– महिला स्वरोजगार अउ सुपोषण ल बढ़ावा दे बर प्रदेस के बालोद जिला म मिलेट कैफै के संचालन सुरू करे गेहे। एखर उद्घाटन महिला अउ बाल विकास मंत्री अनिला भेंड़िया ह मिलेट केक काटके करीन।
– नारायणपुर जिला म माओवादी मन ह पूर्व उप सरपंच के हत्या कर दीन। जानबा के अनुसार धनोरा थाना क्षेत्र के राजपुर पंचायत के पूर्व उप सरपंच ल पाछु रतिहा माओवादी मन ह घर ले बाहिर निकाल के उंखर हत्या कर दे रिहीन अउ सव करा पर्चा घलो फेंकीन।
– छत्तीसगढ़ योग आयोग डहार ले रायपुर के गोंदवारा स्थित कबीरदास वार्ड के बसंत विहार गार्डन म तीसवां निःशुल्क नियमिति योगाभ्यास केन्द्र के सुभारंभ करे गीस।
अउ
– बलरामपुर जिला के चांची तीर ट्रक अउ स्कूल बस के टक्कर होगे। ए हादसा म स्कूल बस म सवार तीस ले जादा लइका मन घायल होगे हे। उहें, ट्रक चालक के हालत गंभीर बताय जात हे।