केंद्रीय प्रत्यक्ष कर बोर्ड-सीबीडीटी ह स्थाई खाता संख्या-पैन ल आधार ले जोड़े के बेरा ल बढ़ाके तीस जून तक कर देहे। एखर पहिली एखर समय सीमा इकतीस मार्च राखे गे रीहिस। बोर्ड के कहना हे कि जउन करदाता तीस जून तक पैन ल आधार ले नइ जोड़ पाही, त उंखर पैन कार्ड ल निष्क्रिय कर दे जाही।
पैनकार्ड धारी मनखे ह एक घांव फेर अपन कार्ड ल आधार ल जोड़े के सूचना दीही त एक महीना के अंदर एक घांव फेर सक्रिय करे जा सकथे। एखर बर एक हजार रूपिया के भुगतान करे बर पड़ही।
केंद्र सरकार ह कोविड के मामला म बढ़ोत्तरी ल देखत सार्वजनिक स्वास्थ्य तियारी अउ टीकाकरण उपर काली राज्य मनके संग समीक्षा करीन। केंद्रीय स्वास्थ्य सचिव राजेश भूषण ह राज्य अउ केंद्र शासित प्रदेश मनके संग वीडियो कॅान्फ्रेंस के माध्यम ले एक ठिन बड़का बइठका लीन । ओमन राज्य अउ केंद्र शासित प्रदेश मन ल कोनो प्रकार के लापरवाही नइ बरते के सलाह दीन अउ स्वास्थ्य अनुसंधान विभाग के संगेसंग परिवार कल्याण विभाग कोति ले मिले सलाह के पालन करे बर कीहिन ।
देश के चौबीस जिला मन म पाछू हप्ता के दउरान कोरोना संक्रमण के साप्ताहिक दर दस प्रतिशत ले जादा दर्ज करे गीस। बाईस राज्य अउ केंद्र शासित प्रदेश मन म कोविड के मामला औसत ले कम हे।
छत्तीसगढ़ उच्च न्यायालय के नवनियुक्त मुख्य न्यायाधीश रमेश सिन्हा ह काली राजभवन के दरबार हाल म शपथ लीही। शपथ ग्रहण के तियारी ल अंतिम रूप देबर मुख्य सचिव अमिताभ जैन ह अधिकारी मनके संग बइठका लीन। बइठका म मुख्य सचिव ह अधिकारी मन ल जरूरी बेवस्था करे के निर्देश दीन।
राजधानी रायपुर के संगेसंग प्रदेश के कतकोन शहर मन म आज प्रवर्तन निदेशालय-ईडी ह छापा मारीस। जानबा के मुताबिक ईडी के टीम ह आज बीहनिया रायपुर के संगेसंग भिलाई, बिलासपुर, कोरबा अउ रायगढ़ म छापा मारे के कार्रवाई करीन। बताये जात हे कि कोल परिवहन म कथित अवैध लेवी अउ जमीन खरीदी-बिक्री ले जुड़े मामला ल लेके ईडी के टीम ह छापा मारीन। समाचार मिले तक ईडी के कार्रवाई चलत हे।
कांकेर जिला म माओवादी मन डहार ले लगाये गे विस्फोटक के चपेट म आय ले दू झिन जवान घायल होगे हे। हमर संवाददाता ले मिले जानबा के मुताबिक कोइलीबेड़ा थाना क्षेत्र म पुलिया बनाय के काम म सुरक्षा बर बीएसएफ अउ जिला पुलिस बल के संयुक्त दल ह तलाशी अभियान म निकले रीहिन। इही दउरान चिलपरस अउ कागबरस के बीच हुरहा आईईडी विस्फोट होय ले बीसएसएफ के दू झिन जवान घायल होगे। दूनो जवान के इलाज रायपुर म चलत हे।
केंद्रीय शिक्षा मंत्रालय ह अपन मुख्य कार्यक्रम प्रधानमंत्री स्कूल फॅार राइजिंग इंडिया पीएमश्री बर देशभर के करीबन नौ हजार स्कूल मनके सूची जारी करे हे। मंत्रालय ह बताइन कि ए संस्थान मनके चयन केंद्रीय विद्यालय अउ नवोदय विद्यालय के संगेसंग करीबन दू लाख पचास हजार सरकारी स्कूल ले करे गेहे। मंत्रालय ह कीहिन हे कि ये चयन प्रक्रिया म पाठ्यक्रम, दाखिला प्रक्रिया के संगेसंग कुल छै ठिन मानदंड के मूल्यांकन करे गेहे।
कृषि मंत्री रविंद्र चौबे ह काली रायपुर म चार दिवसीय गोंडवाना राष्ट्रीय आजीविका कला अउ सांस्कृतिक महोत्सव के शुभारंभ करीन। ए मउका म ओमन कीहिन कि अइसन आयोजन ले आदिवासी अउ सांस्कृतिक परंपरा ल बढ़ावा मिलथे अउ संगेसंग ग्रामीण कुटीर उद्योग अउ हस्तशिल्प ल घलो आगू आय म मदद मिलथे।
जानबा के मुताबिक तीस मार्च तक चलइया ए मेला म नाबार्ड के छत्तीसगढ़ क्षेत्रीय कार्यालय डहार ले एक सौ बीस ठिन स्टॉल लगाये गेहे। ए मेला म छत्तीसगढ़ के आने आने जिला ले एक सौ पच्चीस प्रतिभागी अउ देश के पंद्रह राज्य ले घलो एक सौ पच्चीस प्रतिभागी मन शामिल होवत हे।
भारतीय जनता पार्टी के प्रदेश अध्यक्ष अरूण साव ह कीहिन हे कि मुख्यमंत्री भूपेश बघेल डहार ले प्रति एकड़ बीस कुंटल धान खरीदी के घोषणा ह किसान मनके संग छलावा हरय। ओमन कीहिन कि राज्य म पंजीकृत किसान मनके संख्या के आधार उपर हरएक साल करीबन पैंसठ लाख एकड़ ले धान बिसाय जात हे। पाछू पांच साल म तीन करोड़ पच्चीस लाख एकड़ ले धान खरीदी होय हे।
ओमन कीहिन कि राज्य सरकार ह कहूं पंद्रह एकड़ के जगा म बीस कुंटल प्रति एकड़ के दर ले धान बिसावत हे, त सोला करोड़ पच्चीस लाख कुंटल धान सरकार ल अउ किसान मनले बिसाय बर पड़ही। अइसन म सरकार ल चालीस हजार छै सौ पच्चीस करोड़ रूपिया के भुगतान किसान मन ल करे बर पड़ही। श्री साव ह राज्य सरकार ले ए बारे म जवाब देबर केहे हे। ओमन कीहिन कि मुख्यमंत्री ह किसान मन ल गुमराह करे बर बीस कुंटल धान खरीदी के घोषणा करे हे। उंखर मनके कहना हे कि मुख्यमंत्री ह किसान मनके अतेक संसो करथे, त सत्ता म बइठतेच प्रति एकड़ बीस कुंटल धान के खरीदी काबर नइ करीस।
प्रदेश के मुख्य सचिव अमिताभ जैन ह अधिकारी मनले केहे हे कि अवइया शिक्षण सत्र म शाला प्रवेश उत्सव राखे के तियारी ल पूर कर लेवय। काली मंत्राल य म समग्र शिक्षा कार्यक्रम के समीक्षा के दउरान ओमन कीहिन कि छात्र मन ल मुफत म पुस्तक ड्रेस अउ साइकिल बांटे बर तियारी कर ले जाय। बइठका म मुख्य सचिव ह अधिकारी मन ल समग्र शिक्षा के अंकेक्षण बर जरूरी निर्देश दीन।
छत्तीसगढ़ राज्य ओपन स्कूल के परीक्षा आजले शुरू होगे हे। परीक्षा बर प्रदेश म दू सौ तिहत्तर केंद्र बनाय गेहे। बारहवीं के परीक्षा आजले शुरू होके दू मई तक अउ दसवीं के परीक्षा एक अप्रैल ले शुरू होके दू मई तक चलही।
ए परीक्षा मन म करीबन एक लाख तीन हजार छात्र शामिल होही। उंहे छत्तीसगढ़ संस्कृत विद्यामंडलम डहार ले चलत परीक्षा ह काली सिरागे। परीक्षा के केंद्रीय मूल्यांकन तीन अप्रैल ले शुरू होही।
प्रदेश म पाछू चौबीस घंटा के दउरान आने आने सड़क हादसा म चार झिन लोगन के मउत होगे अउ बीस झिन लोगन घायल होगे हे। महासमुंद जिला के नरतोरा के तीर राष्ट्रीय राजमार्ग क्रमांक तिरपन म पाछू रतिहा एक ठिन पिकअप गाड़ी ह रद्दा के तीर खड़े ट्रेक्टर ले जाके टकरागे। ए घटना म पिकअपन म बइठे तीन झिन लोगन के मउत होगे, त उंहे बीस झिन लोगन मन घायल होगे हे।
एति भिलाई नगर के डबरापारा तिराहा के तीर आज बीहनिया एक झिन छात्र के सड़क दुर्घटना म मउत होगे हे।
सूरजपुर जिला म काली दू झिन युवा मनके जान ले अउ एक झिन युवा ल गंभीर रूप ले घायल करइया बाघ ल वन विभाग के टीम ह पकड़ लेहे। वन विभाग के टीम ह बाघ के इलाज करे के बाद रायपुर के जंगल सफारी बर रवाना कर देहे। इंहा एखर बने ढंग ले इलाज करे जाही।
– रायगढ़ के सांसद गोमती साईं ह प्रधानमंत्री नरेंद्र मोदी ले नई दिल्ली म मिलके छत्तीसगढ़ के विकास के उपर गोठबात करीन।
– प्रदेश के वनमंत्री मोहम्मद अकबर ह आज कबीरधाम जिला के झलमला अउ कुसुमघटा गांव म राखे गे किसान सम्मेलन म सामिल होइन। ए मउका म ओमन आने आने विकास काम के शिलान्यास अउ लोकार्पण करीन।
– रोग प्रतिरोधक क्षमता बढ़ाय बर काली उनतीस मार्च के रायपुर के शासकीय आयुर्वेद महाविद्यालय चिकित्सालय म सोला साल तक के लईका मन ल स्वर्ण प्राशन कराय जाही।
– राजनांदगांव जिला म साल्हेवारा थाना क्षेत्र के रामपुर गांव म डेबिट कार्ड बनाय के नाव म पोस्टमैन ले डेढ़ लाख रूपिया के ठगी के मामला आगू आय हे।
अउ
– मुंगेली शहर म हिंदू नववर्ष के मउका म शोभायात्रा निकाले गीस। ए दउरान शहर म उछाह देखे गीस।