बीजापुर जिला म माओवादी मन डहार ले लगाय गे प्रेसर आईईडी के चपेट म आय ले छत्तीसगढ़ सशस्त्र बल-सी.ए.एफ. के एक झिन जवान सहीद होगे। मिले जानकारी के अनुसार मिरतुर थाना क्षेत्र म सड़क निर्माण के काम चलत हे। एखर सुरक्षा म बर तीमेनार कैम्प ले सी.ए.एफ. के कुछु जवान मन निकले रिहीन। ए दउरान टेकरी के तीर अस्सिटेंड प्लाटून कमांडर विजय यादव प्रेसर आईईडी के चपेट म आ गे। शहीद जवान ल भैरमगढ़ थाना म गार्ड ऑफ ऑनर देके बाद उंखर पार्थिव सरीर ल उत्तरप्रदेश के बलिया जिला के राजपुर गांव बर रवाना करे गीस।
मुख्यमंत्री भूपेश बघेल ह ए माओवादी घटना के निंदा करत सहीद जवान के परिजन मनके प्रति संवेदना जतइन हे।
अरहर दाल-निगरानी समिति
केन्द्र सरकार ह देस म अरहर दाल के स्टॉक के निगरानी बर एक ठिन समिति बनाय हे। केन्द्र सरकार, राज्य सरकार मनके सहयोग ले आयात, मिल अउ व्यापारी मन करा मौजूद स्टॉक उपर नजर राखही। ए फइसला ओ खबर के बाद ले गीस, जेमा बताय गे रिहीस कि बने मात्रा म आयात के बावजूद व्यापारी बाजार म अरहर के स्टॉक के बिक्री नइ करत हे। केन्द्रीय खाद्य अपर सचिव निधि खरे के अध्यक्षता म ए समिति के गठन करे गेहे। मंत्रालय ह किहीस कि सरकार अवइया महीना म कीमत म अप्रत्याशित बढ़ोतरी के स्थिति म जरूरी उपाय करे बर घरेलू बाजार म आने दाल मनके स्टॉक के स्थिति उपर घलो बारीकी ले नजर राखे हे।
लोकसभा विश्वविद्यालय-रिक्तियां
केन्द्रीय शिक्षा मंत्री धर्मेन्द्र प्रधान ह बतईन कि देशभर म केन्द्रीय विश्वविद्यालय मन म अनुसूचित जाति अउ अनुसूचित जनजाति मनके 1 हजार 398 पद खाली हे। लोकसभा म एक लिखित उत्तर म श्री प्रधान ह बतईन कि ए साल एक फरवरी तक केन्द्रीय विश्वविद्यालय मन म अनुसूचित जाति के 878 पद अउ अनुसूचित जनजाति के 520 पद खाली रिहीस। शिक्षा मंत्री ह यहू बतईन कि केन्द्रीय विश्वविद्यालय मन ल निरदेस दे गेहे कि रिक्त पद मन ल भरे बर मिशन के तहत काम करे जाय।
मुख्यमंत्री-राजनांदगांव
मुख्यमंत्री भूपेश बघेल ह काली राजनांदगांव जिला म 105 करोड़ रूपिया के लागत के आने-आने विकास कार्य के भूमिपूजन अउ लोकार्पण करीन। छुरिया विकासखंड म आयोजित कंवर महोत्सव अउ किसान महासम्मेलन म श्री बघेल ह कुमरदा अउ कल्लूबंजारी म सरकारी बैंक अउ आमगांव म धान खरीदी केन्द्र खोले के घोषणा करीन। ए दउरान ओमन किहीन कि राजनांदगांव जिला म किसान मनके संख्या अउ खेती के रकबा म ढाई गुना बढ़ोतरी होय हे। प्रदेस के किसान अब वैज्ञानिक तरीका ले किसानी करत हे।
ए दउरान मुख्यमंत्री ह छुरिया म पंचायत कैफे के सुरूवात करीन। ए कैफे के संचालन बिहान महिला स्व-सहायता समूह के सदस्य मन करही।
मुख्यमंत्री शहरी स्लम स्वास्थ्य योजना
मुख्यमंत्री शहरी स्लम स्वास्थ्य योजना के माध्यम ले प्रदेस म अब तक 44 लाख ले जादा लोगन मन ल मोबाइल मेडिकल यूनिट के माध्यम ले इलाज करे गेहे। योजना के अंतर्गत अब तक साढे़ 10 लाख ले जादा मरीज मनके पैथोलॉजी टेस्ट करे जा चुके हे। संगेसंग करीबन साढ़े 37 लाख मरीज मन ल मुफ्त म दवा दे गेहे।
दीक्षांत समारोह
अटल बिहारी वाजपेयी विश्वविद्यालय बिलासपुर के चौथा दीक्षांत समारोह काली 28 मार्च के होही। समारोह के अध्यक्षता राज्यपाल विश्वभूषण हरिचंदन करही। समारोह के मुख्य अतिथि फिजी गणराज्य के भारत म उच्चायुक्त कमलेश शशि प्रकाश होही। समारोह म विश्वविद्यालय के पढ़ईया मन ल 58 स्वर्ण पदक भेंट करे जाही।
सिविक एक्शन कैम्प
नारायणपुर जिला के माओवाद प्रभावित धनोरा गांव म भारत-तिब्बत सीमा पुलिस बल डहार ले काली सिविक एक्शन कैम्प के आयोजन करे गीस, जेमा हिकपुला, ईडनॉर, झोरी, मडमनौर अउ राजपुर गांव के ग्रामीण अउ स्कूली लइका मन सामिल होइन। लइका मन ल सिक्षण सामग्री बांटे गीस। कार्यक्रम के दउरान ग्रामीण अउ लइका मन ल समाज के मुख्यधारा ले जुड़े बर सासन के योजना मनके बारे म जानकारी दे गीस। संगेसंग लइका मन ल नवोदय विद्यालय म भर्ती होय बर प्रेरित करे गीस। ए मउका म निःशुल्क चिकित्सा सिविर घलो लगाय गीस।
हादसा
प्रदेस म बीते चौबीस घंटा म अलग-अलग हादसा म पांच मजदूर मनके मउत होगे। उहें, तीन मजदूर मन घायल होगे।
सक्ती जिला के बाराद्वार थाना क्षेत्र के खम्हरिया गांव म सड़क निर्माण के दउरान 5 मजदूर मन करेंट के चपेट म आ गे। ए हादसा म 3 मजदूर मनके मउत होगे। उहें, दू आने मजदूर मन गंभीर रूप ले झुलस गे। जिखर इलाज चांपा के अस्पताल म करे जात हे।
उहें, कोरबा जिला के दर्री थाना क्षेत्र म काली एन.टी.पी.सी. प्लांट म सुधर कार्य के दौरान एक मजदूर करीब 5 फीट के ऊंचाई ले गिर गे, जेखर बाद ओला अस्पताल लेगे गीस, जिहां डॉक्टर मन ह ओला मृत घोषित कर दीस।
इही बीच, बालोद म मकान बनाय के बेरा दू मजदूर चौथा मंजिल ले गिर गे। ए हादसा म एक मजदूर के मउत होगे। उहें, गंभीर रूप ले घायल एक आने मजदूर ल राजनांदगांव के अस्पताल म भर्ती कराय गेहे।
बाघ-हमला युवक मौत
सूरजपुर जिला म बाघ के हमला ले आज दू झन युवक मनके मउत होगे। उहें, एक आने युवक गंभीर रूप ले घायल होगे। ए घटना ओड़मी ब्लॉक के कालामाजन गांव के हरय। तीनों युवक आज बिहनिया लकड़ी बिने बर जंगल गे रिहीन। इही दउरान बाघ ह उंखर मन उपर हमला कर दीस। मामला के जानकारी मिले के बाद वन विभाग के टीम मउका म पहुंचीस। फिलहाल टीम ह बाघ ल नइ देख पाय हे। तमोरपिंगला ले हाथी मंगाय गेहे, जेखर मदद ले जंगल म सर्च ऑपरेसन चलाय जाही। वन विभाग के अधिकारी मनके अनुसार जंगल म कैमरा भेजे गेहे। वन विभाग ह ग्रामीण मन ल जंगल डहार झन जाय के सलाह देहे। ए घटना के बाद सिक्षा विभाग ह ऐतिहयात के तौर म गांव के स्कूल ल बंद राखे के आदेस देहे।
कुदरगढ़ महोत्सव
सूरजपुर अंचल के ईष्ट देवी मां बागेश्वरी के धाम म तीन दिवसीय कुदरगढ़ महोत्सव के सुरूवात काली लोक पारंपरिक गीत ले होईस। स्कूल शिक्षा मंत्री डॉक्टर प्रेमसाय सिंह टेकाम ह ए महोत्सव के सुभारंभ करीन। पहिली दिन जाने-माने कलाकार मन ह अलग-अलग विधा म अपन प्रस्तुति दीन। संसदीय सचिव परसनाथ राजवाड़े ह समारोह के अध्यक्षता करीन।
तीरंदाजी-शतरंज प्रतियोगिता
रायपुर म महिला मन बर आयोजित ‘‘दस का दम‘‘ तीरंदाजी प्रतियोगिता म खेल अकादमी बिलासपुर के तुलेश्वरी खुसरो ह गोल्ड मेडल हासिल करे हे। उहें, इही अकादमी के दिव्या यादव ह तीसर स्थान पाय हे। भारतीय खेल प्राधिकरण अउ प्रदेस आर्चरी एसोसिएशन डहार ले ए प्रतियोगिता के आयोजन करे गे रिहीस।
ओति, भुवनेश्वर म खेले गे अखिल भारतीय सिविल सर्विसेस शतरंज प्रतियोगिता म राजनांदगांव के दू खिलाड़ी उषा चटर्जी अउ अफशा परवीन ह रजत पदक जीते हे।
हॉकी
राजनांदगांव म खेले गे वेस्ट जोन हॉकी चैंपियनशिप के दूनों वर्ग के खिताब मध्यप्रदेश के टीम ह जीत लेहे। बालिका वर्ग म जिहां मध्यप्रदेश ह महाराष्ट्र ल हराके खिताब अपन नाम करीस। उहें, बालक वर्ग म मध्यप्रदेश ह रोमांचक मुकाबला म राजस्थान के टीम ल हराके जीत हासिल करीस। विजेता खिलाड़ी मन ल महापौर हेमा देशमुख ह सम्मानित करीन।