प्रधानमंत्री नरेन्द्र मोदी ह लोगन मन ले अंगदान बर आगू आय के अपील करे हे। आकाशवाणी ले ‘‘मन की बात‘‘ कारीकरम के निन्यानवे अंक म आज ओमन किहीन कि अइसना जरूरतमंद मनखे मनके संख्या अधिक हवय, जेन मन अंगदान के प्रतीक्षा करत हवय। प्रधानमंत्री ह ए बात उपर संतोष जतईन कि केन्द्र सरकार ह अंगदान बर पूरा देस म एके जइसे नीति लाय उपर काम करत हे। श्री मोदी ह यहू किहीन कि अंगदान बर उही राज्य के वासी होय के सर्त ल हटाय के निर्णय ले गेहे। एखर ले लोगन मन कोनों भी राज्य म अंगदान बर अपन पंजीकरण करा सकही।
प्रधानमंत्री ह अक्षय ऊर्जा के बारे म किहीन कि भारत सौर ऊर्जा के क्षेत्र म जेन गति ल बढ़त हे, ओ एक बड़े उपलब्धि हवय। सौर ऊर्जा अउ नवीकरणीय ऊर्जा के क्षेत्र म हमर देस के असाधारण सफलता ह दुनियाभर म गोठबात के बिसय होगे हे।
प्रधानमंत्री ह नवरात्रि को अवसर म अब्बड़ अकन माईलोगिन मनके चर्चा घलो करीन। ओमन किहीन कि नवा भारत के निर्माण म नारी शक्ति के बड़े भूमिका हे।
ओमन किहीन कि रमजा़न के महीना सुरू होगे हे अउ आगू कुछ दिन म रामनवमीं, महावीर जयंती, गुड फ्राइडे अउ ईस्टर घलो मनाय जाही। श्री मोदी ह किहीन कि अप्रैल के महीना म दू महान विभूति – महात्मा ज्योतिबा फुले अउ बाबा साहेब भीमराव अंबेडकर के जयंती मनाय जाथे। आजादी के अमृतकाल म ए दूनों महापुरूष मन ले सीखे अउ प्रेरणा लेहे के जरूरत हवय।
श्री मोदी ह सुरता देवइन कि कोनों-कोनों जघा म कोरोना के मामला फेर बढ़त हवय, जेखर चलते ओमन ह लोगन मन ले सावधानी बरते अउ स्वच्छता उपर ध्यान राखे के अपील करीन।
प्रधानमंत्री ह किहीन कि देसवासी मन म अवइया तीस अप्रैल के प्रसारित होने वाला ‘‘मन की बात‘‘ कारीकरम के सौवां कड़ी ल लेके बहुत उत्साह हे, जेखर बर ओमन लोगन मन ले सुझाव अउ विचार भेजे के आग्रह करीन।
प्रधानमंत्री-सराहना
प्रधानमंत्री नरेन्द्र मोदी ह केन्द्रीय रिजर्व पुलिस बल-सीआरपीएफ के चौरासीवां स्थापना दिवस के मउका म आयोजित परेड म सामिल पुलिस जवान मनके सराहना करे हे। छत्तीसगढ़ के जगदलपुर सीआरपीएफ कैम्प म ए परेड पहिली बार आयोजित करे गीस, जेमा प्रभावी अउ ऊर्जावान जवान मन ह भाग लीन। सीआरपीएफ के ट्वीट उपर प्रतिक्रिया देवत हुए प्रधानमंत्री ह किहीन कि सीआरपीएफ के ए प्रदर्सन ह अद्भुत हवय।
मुख्यमंत्री-स्टील कॉनक्लेव
मुख्यमंत्री भूपेश बघेल ह आज रईपुर म आयोजित ऑल इंडिया स्टील कॉनक्लेव म सामिल होइन। ए मउका म ओमन किहीन कि स्टील उद्योग ह छत्तीसगढ़ के अर्थव्यवस्था के रीढ़ हवय। स्टील सेक्टर ल आगू बढ़ाय बर राज्य सरकार ह तत्पर हे। ओमन ह केन्द्र सरकार ले एसईसीएल के माध्यम ले स्टील व्यापारी मन ल कोल लिंकेज देवाय के मांग करे हे।
मुख्यमंत्री-घोषणा
मुख्यमंत्री भूपेश बघेल ह राजधानी रईपुर के शासकीय नागार्जुन स्नातकोत्तर विज्ञान महाविद्यालय ल ‘‘छत्तीसगढ़ इंस्टीट्यूट ऑफ साईंस‘‘ के रूप म विकसित करे के घोसना करीन हे। मुख्यमंत्री ह कालेज के हीरक जयंती समारोह ल संबोधित करत हुए किहीन कि ए महाविद्यालय ल छत्तीसगढ़ इंस्टीट्यूट ऑफ साईंस के रूप म विकसित करे बर सासन स्तर म हरसंभव प्रयास करे जाही। ओमन पढ़ईया लइका मनके मांग उपर कालेज म ई-लाइब्रेरी खोले के घलो घोषणा करीन। ए मउका म ओमन ह पंडित दीनदयाल उपाध्याय ऑडिटोरियम के नाम म सासकीय नागार्जुन स्नातकोत्तर विज्ञान महाविद्यालय के नाम घलो जोड़े के बात किहीन।
चावल गड़बड़ी-चेतावनी
मुख्यमंत्री भूपेश बघेल ह किहीन हे कि गरीब मनखे मनके चावल म गड़बड़ी करइया मन उपर कड़ा कार्रवाई करे जाही। खाद्य विभाग के अधिकारी मन ह बतईन कि पाछु बछर के सितंबर महीना म जेन उचित मूल्य के दुकान मन म बचत स्टॉक म कमी पाय गेहे, उंखर परीक्षण कराय जावत हे। गड़बड़ी पाय जाने पर संबंधित के खिलाफ सख्त कार्रवाई करे अउ एखर रिपोर्ट खाद्य विभाग ल भेजे के निरदेस दे गेहे।
गोधन न्याय योजना-अवॉर्ड
छत्तीसगढ़ के गोधन न्याय योजना ल एक घांव फेर राष्ट्रीय स्तर के पुरस्कार ले सम्मानित करे गेहे। नई दिल्ली म राखे गे कारीकरम म छत्तीसगढ़ के गोधन न्याय योजना ल ‘‘ई-गवर्नेंस अवॉर्ड‘‘ प्रदान करे गीस। ए पुरस्कार कृषि विभाग के संयुक्त संचालक आर.एल. खरे ह ग्रहण करीन। ए उपलब्धि बर मुख्यमंत्री भूपेश बघेल अउ कृषि मंत्री रविन्द्र चौबे ह कृषि विभाग के अधिकारी अउ कर्मचारी मन ल बधाई अउ सुभकामना दीन हे।
टीबी उन्मूलन-सम्मान
विश्व क्षय दिवस के उपलक्ष्य म टीबी उन्मूलन म उत्कृष्ट कार्य करे बर छत्तीसगढ़ के चार जिला ल सम्मानित करे गेहे। केन्द्रीय स्वास्थ्य मंत्रालय डहार ले प्रधानमंत्री नरेन्द्र मोदी के अध्यक्षता म वाराणसी म राखे गे वर्ल्ड टीबी समिट म गरियाबंद जिला ल रजत पदक अउ बस्तर, धमतरी अउ बलौदाबाजार-भाटापारा जिला ल कांस्य पदक प्रदान करे गीस।
एनसीसी सम्मान
छत्तीसगढ़ घुड़सवार रेजीमेंट-एनसीसी अंजोरा दुर्ग म कार्यरत् शिवदयाल साहू ल डीजी एनसीसी कमांडेशन कार्ड अवॉर्ड ले सम्मातिन करे गेहे। ए सम्मान भोपाल म आयोजित एक कार्यक्रम म एनसीसी के डायरेक्टर जनरल लेफ्टिनेंट गुरबिर पाल सिंह ह प्रदान करीन। छत्तीसगढ़ घुड़सवार रेजीमेंट एनसीसी अंजोरा दुर्ग के कमांड अधिकारी कर्नल तुषार उपासनी ह ए उपलब्धि बर शिवदयाल साहू ल बधाई अउ सुभकामना दीन हे।
गोबर खरीदी-एमओयू
बलौदाबाजार-भाटापारा जिला प्रसासन अउ इही जिला के सिमगा विकासखंड म संचालित श्री सीमेंट उद्योग के बीच रईपुर म मुख्यमंत्री भूपेश बघेल के उपस्थिति म गोबर खरीदी बर एमओयू होय हे। एखर अंतर्गत श्री सीमेंट ह कोयला के जगह हरित ऊर्जा ल बढ़ावा दे बर रोज दस मीटरिक टन गोबर बिसाही। भट्ठी ल गर्म करे बर कोयला के संगेसंग एडिशनल फ्यूल रिर्सोसेज के रूप म गोबर के उपयोग घलो करे जाही।
दुर्घटना
सारंगढ़-बिलाईगढ़ जिला म आज होय एक सड़क दुर्घटना म दू झिन नोनी लइका मनके मउत होगे। उहें, चार झन नोनी लइका घायल होगे हे।
मिले खबर के मुताबिक आज बिहनिया सारंगढ़ के बटाउपाली गांव के छह झिन लइका मन रद्दा तीर पैदल जावत रिहीन। ए दउरान एक तेज रफ्तार डंपर ह ए मन ल अपन चपेट म ले लीस। हादसा के बाद सबो ल अस्पताल ले जाय गीस, जहां डॉक्टर ह दू झिन नोनी मन ल मृत घोषित कर दीन। दुर्घटना के बाद गुस्साय ग्रामीण मन ह मउका म खड़े पुलिस के गाड़ी अउ डंपर म तोड़फोड़ करीन हे। पुलिस ह बतईन कि अभी स्थिति नियंत्रण म हवय।
मुख्यमंत्री भूपेश बघेल ह ए दुर्घटना म दू झन नोनी के मउत उपर गहरा दुख व्यक्त करीन हे। घायल नोनी मनके इलाज बर जिला प्रसासन ल निरदेस देहे। उहें, मुख्यमंत्री के निरदेस म जिला प्रसासन ह मृत नोनी मनके परिवार ल पच्चीस-पच्चीस हजार रूपिया के सहायता रासि उपलब्ध कराय हे।
अउ अब सुनव मौसम के हाल..
प्रदेस के कोरिया, धमतरी अउ महासमुंद समेत कई ठिन जिला म आज थोरकुन ले मध्यम बारिस होय के खबर हे। मौसम विभाग ले मिले जानकारी अनुसार पश्चिमी विक्षोभ के प्रभाव ले प्रदेस के आने-आने हिस्सा म हल्का ले मध्यम बारिस, अंधड़ अउ ओला बरसे के आसंका बने हुए हे। अवइया चौबीस घंटा म प्रदेस म कुछु-कुछु जघा म हल्का ले मध्यम बरसा या गरज-चमक के संग छींटा पड़े के संभावना हे।
गांजा-जब्त
महासमुंद जिला म अंतर्राज्यीय गांजा तस्करी के आरोप म दू झिन मनखे ल गिरफ्तार करे हे। इमन के तीर ले करीब दू करोड़ दस लाख रूपिया के गांजा जब्त करे गेहे। सरायपाली पुलिस ह मुखबिर के सूचना म राष्ट्रीय राजमार्ग स्थित पेट्रोल पंप मेर नाकाबंदी कर संदिग्ध गाड़ी के जांच करीन, जेमा तरबूज के भीतर लुका के रखे गे दस क्विंटल ले जादा गांजा बरामद करे गीस।