केंद्रीय गृह अउ सहकारिता मंत्री अमित शाह काली छत्तीगढ़ के बस्तर संभाग के मुख्यालय जगदलपुर म चौरासीवां सीआरपीएफ दिवस परेड समारोह म मुख्य अतिथि के रूप म सामिल होही। जगदलपुर करा करनपुर म स्थित केंद्रीय रिजर्व पुलिस बल परिसर म राखे गे ए समारोह म केंद्रीय मंत्री सलामी परेड के निरीक्षण करही। संगेसंग अच्छा प्रदर्शन करइया बलकर्मी मन ल अलंकरण देके सम्मानित घलो करही।
आज मीडिया ले गोठबात करत सीआरपीएफ के महानिदेशक सुजॉय लाल थाउसेन ह बताइन कि केंद्रीय गृहमंत्री अपन बस्तर प्रवास के दउरान सीआरपीएफ कैम्प म घूमही अउ जवान मन संग बातचीत करे के संग खाना घलो खाही।
छत्तीसगढ़ के माओवाद प्रभावित बस्तर क्षेत्र म सीआरपीएफ के उपलब्धि मनके जिक्र करत डी.जी. सीआरपीएफ ह बताइन कि पाछू दू साल के दउरान सीआरपीएफ ह माओवादी मनके कोर एरिया म तिरपन ठिन फॅारवर्ड ऑपरेशन बेस स्थापित करे हे। एखर ले अब इंहा अभियान चलाये बड़ आसानी होथे, अउ सड़क बने के संग स्कूल घलो फेर ले सुरू होवत हे । ओमन बताइन कि कैंप होय ले भारत सरकार के कल्याणकारी योजना मन ल ए इलाका म संचालित करे म मदद मिलत हे। डीजी सीआरपीएफ ह बताइन कि अवइया बेरा म सीआरपीएफ कोति ले बस्तर क्षेत्र म अंदरूनी इलाका म कैंप बनाय ले पाछू बछर मन म माओवादी घटना म कमी आय हे । ओमन यहू बताइन कि माओवादी हमला म गंभीर रूप ले घायल मनखे मनके इलाज बस्तरेच म उपलब्ध कराय बर जगदलपुर म ट्रामा सेंटर ल स्थापित करे बर भवन निर्माण के प्रस्ताव स्वीकृत होगे हे, अउ तुरते ए ट्रामा सेंटर बनके तियार हो जाही।
केंद्रीय गृहमंत्री छ.ग.-02
केंद्रीय गृहमंत्री सीआरपीएफ परेड दिवस समारोह के मउका म छत्तीसगढ़ के बस्तर संभाग बर हल्बी म प्रसारित होवइया आकाशवाणी के साप्ताहिक समाचार बुलेटिन के घलो वर्चुअल शुभारंभ करहीं। ए पहिली घांव हे जब कोनो प्रमुख समाचार माध्यम डहार ले बस्तर क्षेत्र के हल्बी बोली म समाचार कार्यक्रम शुरू करे जात हे। पंद्रह मिनट समय के ये साप्ताहिक समाचार बुलेटिन आकाशवाणी केंद्र जगदलपुर ले हरएक इतवार बीहनिया साढ़े सात बजे ले प्रसारित करे जाही।
मुख्यमंत्री किसान घोषणा
राज्य सरकार अब प्रदेश के किसान मनले समर्थन मूल्य म प्रति एकड़ बीस कुंटल धान खरीदही। मुख्यमंत्री भूपेश बघेल ह काली विधानसभा म विनियोग विधेयक उपर चर्चा के जवाब देत घोषणा करीन। चर्चा के बाद विनियोग विधेयक दू हजार तेईस पारित कर दे गीस। चर्चा के दउरान मुख्यमंत्री ह कीहिन कि किसान मनके एके मांग रीहिस कि समर्थन मूल्य म प्रति एकड़ तीस कुंटल धान खरीदे जाय। एला देखत किसान मनके हित म सरकार प्रति एकड़ बीस कुंटल धान खरीदने वाला हरय।
उंहे मुख्यमंत्री ह कीहिन कि एक अप्रैल ले आवासहीन, उज्जवला गैस योजना अउ शौचालय के हितग्राही मनके सर्वे कराय जाही। आवास योजना म जेमन पात्र हितग्राही होही, ओमन ल क्रमबद्ध आवास दे जाही। एखरे संग मुख्यमंत्री ह विधानसभा अध्यक्ष डॅाक्टर चरणदास महंत, नेता प्रतिपक्ष नारायण चंदेल समेत अनेक मंत्री संसदीय सचिव अउ विधायक मनके मांग म ओमन के विधानसभा क्षेत्र बर बहुत अकन घोषणा करीन।
गुणवत्ता आश्वासन मानक प्रमाणपत्र
केंद्रीय स्वास्थ्य अउ परिवार कल्याण मंत्रालय ह उत्कृष्ट स्वास्थ्य सेवा अउ मरीज मन ल अच्छा इलाज उपलब्ध कराय के सेती छत्तीसगढ़ के चार ठिन अउ प्राथमिक स्वास्थ्य केंद्र मन ल राष्ट्रीय गुणवत्ता आश्वासन मानक प्रमाणपत्र- एनक्यूएएस प्रदान करीन हे। एमा सुकमा जिला के गादीरास प्राथमिक स्वास्थ्य केंद्र, बीजापुर के कुटरू प्राथमिक स्वास्थ्य केंद्र, सरगुजा के रघुनाथपुर प्राथमिक स्वास्थ्य केंद्र, अउ राजनांदगांव के शंकरपुर शहरी प्राथमिक स्वास्थ्य केंद्र शामिल हरय।
प्रधानमंत्री टीबी उन्मूलन
प्रधानमंत्री ह वाराणसी म आज वन वर्ल्ड टी.बी. शिखर सम्मेलन ल संबोधित करत कीहिन कि सरकार के सरलग प्रयास ले देश म तपेदिक के मरीज के संख्या कम होवत हे।
प्रधानमंत्री ह कीहिन कि आज टीबी के इलाज के अस्सी प्रतिशत दवा देश म बनत हे। प्रयोगशाला के संख्या बढ़ाय गेहे अउ मरीज मन ल आयुष्मान भारत योजना के दायरा म लाये गेहे। श्री मोदी ह कीहिन कि कई ठिन कार्यक्रम के अंतर्गत करीबन पचहत्तर लाख टीबी मरीज मनके खाता म दू हजार करोड़ ले जादा रूपिया भेजे गेहे।
ए मउका म केंद्रीय स्वास्थ्य मंत्री मनसुख मांडविया ह बताइन कि देस म हरएक साल चौबीस लाख मनखे मन म टीबी के पता चलथे अउ करीबन चौरानबे हजार लोगन मनके ए बीमारी ले मउत हो जाथे।
कार्यक्रम के दउरान प्रधानमंत्री ह टीबी उन्मूलन के दिशा म प्रगति बर चुनिंदा राज्य अउ जिला मन ल पुरस्कार दीन। कार्यक्रम म छत्तीसगढ़ के राज्यपाल विश्वभूषण हरिचंदन समेत जम्मों राज्य के राज्यपाल अउ स्वास्थ्य मंत्री घलो वर्चुअल तरीका ले सामिल होइन।
मुख्यमंत्री लोकार्पण
मुख्यमंत्री भूपेश बघेल ह आज रायपुर ले बिलासपुर रद्दा म रायपुर – विजयनगरम शाखा रेलमार्ग म स्थित लेवल क्रॉसिंग म बने फुल हाईट फोरलेन रेलवे अंडरब्रिज के लोकार्पण करीन। करीबन अठाईस करोड़ के लागत ले बने ए राज्य के पहिली फुल हाईट फोरलेन रेलवे अंडरब्रिज हरय। एखर ले रायपुर शहरी क्षेत्र के करीबन पांच लाख के आबादी ल सुगम यातायात के फायदा मिलही।
फसल बीमा पोर्टल शुभारंभ
केंद्रीय कृषि मंत्री नरेंद्र सिंह तोमर ह काली प्रधानमंत्री फसल बीमा योजना के तहत राष्ट्रीय फसल बीमा पोर्टल के माध्यम ले दावा विस्तारण बर डिजिक्लेम के शुरूआत करीन। एखरे संग छै राज्य मनके बीमाकृत किसान मन ल एक हजार दू सौ साठ करोड़ रूपिया ले जादा के बीमा दावा के भुगतान करे गेहे। एमा छत्तीसगढ़ समेत राजस्थान, उत्तरप्रदेश, हिमाचल प्रदेश, उत्तराखंड अउ हरियाणा के किसान सामिल हवय।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत छत्तीसगढ़ से पद्मश्री पुरस्कार के लिए चयनित काष्ठशिल्प कलाकार अजय कुमार मंडावी ले होय भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली पच्चीस मार्च के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
रमजान
देश के कई ठिन हिस्सा मन म काली संझा चांद दिखाई दीस। एखरे संग रमजान के महीना आज ले शुरू होगे। आज रोजा के पहिली दिन हरय। रमजान इस्लामिक कैलेण्डर के नौवां महीना होथे अउ रमजान के तीस रोजा पूरा होय के बाद ईद मनाये जाथे। प्रधानमंत्री नरेंद्र मोदी अउ छत्तीसगढ़ के मुख्यमंत्री भूपेश बघेल ह रमजान म लोगन मन ल बधाई दीन हे।
मुख्यमंत्री चेट्रीचण्ड्र
मुख्यमंत्री भूपेश बघेल काली राजधानी रायपुर के जयस्तंभ चौक म सिंधी समाज कोति ले आयोजित चेट्रीचण्ड्र कार्यक्रम म सामिल होइन। ओमन ए मउका म सिंधी समाज डहार ले निकाले गे भगवान श्री झूलेलाल के शोभायात्रा के फूल बरसाके करके स्वागत करीन।
मुख्यमंत्री ह ए मउका म सिंधी पंचायत ल सामाजिक काम बर नवा रायपुर अटल नगर म जमीन देके घोषणा करीन।
राहुल गांधी-अयोग्य
कांग्रेस नेता राहुल गांधी के लोकसभा सदस्यता रद्द कर दे गेहे। लोकसभा सचिवालय के अधिसूचना के अनुसार ए साल तेईस मार्च ले ओमन ल लोकसभा सदस्यता बर अयोग्य घोषित कर दे गेहे। गुजरात म सूरत के अदालत ह ओमन ल एक विवादित बयान के मामला म दोषी करार देवत दू साल के सजा सुनाय रीहिन।
एति राहुल गांधी के सदस्यता रद्द होय उपर भारतीय जनता पार्टी के प्रदेश अध्यक्ष अरूण साव ह कीहिन कि संवैधानिक प्रक्रिया के तहत ओखर सदस्यता रद्द करे गेहे।
भूकंप
छत्तीसगढ़ के सरगुजा संभाग म आज बीहनिया कई ठिन जगा म भूकंप के झटका महसूस करे गीस। बीहनिया दस बजके अठाईस मिनट म आये ए भूकंप के तीव्रता रिक्टर स्केल म करीबन तीन दशमलव नौ मापे गेहे। एमा कोनो जनहानि नइ होय हे।