स्वास्थ्य मंत्रालय कोरोना
केंद्रीय स्वास्थ्य मंत्रालय ह लोगन मन ल आगाह करे हे कि कोरोना महामारी अभी खतम नइ होय हे। देश म कोविड के स्थिति ल लेके नई दिल्ली म मीडिया ल संबोधित करत केंद्रीय स्वास्थ्य सचिव राजेश भूषण ह बताइन कि हरएक दिन दुनियाभर म कोविड के करीबन चौरानबे हजार मामला आगू आवत हे। फेर भारत म ए बेरा संक्रमण के सिरिफ नौ सौ छैसठ मामला दर्ज हे, जउन कि विश्व के जम्मों देश म दर्ज वर्तमान संक्रमण के सिरिफ एक प्रतिशत हे। ओमन कीहिन कि महाराष्ट्र समेत आठ राज्य मन म संक्रमण के सबले जादा मामला आगू आवत हे। एला देखत संक्रमण ल रोके के जरूरी उपाय ले जुड़े परामर्श ए आठ राज्य मनल विशेष रूप ले जारी करे गेहे।
प्रधानमंत्री नरेंद्र मोदी ह देश म कोविड अउ इन्फ्लुएंजा के स्थिति के आकलन बर काली एक उच्च स्तरीय बइठका लीन। ए मउका म प्रधानमंत्री ह स्वास्थ्य संबंधी बुनियादी ढांचा के तैयारी अउ टीकाकरण के वर्तमान स्थिति के संग कोरोना के नवा वेरिएंट अउ इन्फ्लुएंजा के सेती जन स्वास्थ्य उपर पड़इया असर के आकलन करीन।
मीडियाकर्मी सुरक्षा विधेयक
प्रदेश म पत्रकार मनके सुरक्षा ले जुड़े छत्तीसगढ़ मीडियाकर्मी सुरक्षा विधेयक काली विधानसभा म सर्व-सम्मति ले पारित हो गीस। ए विधेयक के पारित होय म मुख्यमंत्री भूपेश बघेल ह विधानसभा परिसर म मीडिया के प्रतिनिधि मनले गोठबात करत कीहिन कि छत्तीसगढ़ विधानसभा के संग प्रदेस के पत्रकार मन बर काली एतिहासिक दिन रीहिस हे। ओमन कीहिन हे कि पत्रकार संगी दुर्गम क्षेत्र म काम करके अपन जान ल जोखिम म डारके खबर लानथे। कई बखत पत्रकार मन अइसन रिपोर्टिंग घलो करथे जेखर ले ओमन ल अउ उंखर परिवार ल खतरा घलो हो सकथे।
मुख्यमंत्री ह कीहिन कि ओमन ल सरकार ले अधिमान्यता प्राप्त नइ हे। फेर ओखर संस्थान ल ये सूचित करे जाथे कि उंखर बर ये मन ह काम करथे। एखर सेती ओमन ल घलो ये कानून के तहत सुरक्षा मिले के अधिकार होही। एखर बर ओ पत्रकार मन ल पाछू छै महीना के भीतर प्रकाशित या प्रसारित अपन तीन रिपोर्टिंग या आलेख प्रस्तुत करना होही, ओखर आधार म ओमन ल ए कानून के दायरा म सामिल करे जाही।
मुख्यमंत्री ह बताइन कि ए कानून के तहत पत्रकार के संग यदि कोनो मनखे दुर्व्यवहार करथे, त एखर सिकायत दर्ज कराय बर एक अधिकार संपन्न समिति बनाय गेहे। ए समिति ल सुनवाई करे अउ जरूरी निर्देश देके संगेसंग दंड देके अधिकार दे गेहे।
विस समाचार
प्रदेश म कोरोना संक्रमण के दउरान भ्रष्टाचार के सिकायत मिले म चार झिन डॅाक्टर मन ल निलंबित करके उंखर खिलाफ विभागीय जांच करे जात हे। ये जानकारी स्वास्थ्य मंत्री टी.एस. सिंहदेव ह आज राज्य विधानसभा म दीन।
भाजपा विधायक शिवरतन शर्मा ह प्रश्नकाल म पूछीन कि कोरोना संक्रमण के बेरा पाछू तीन बछर म भ्रष्टाचार अउ गड़बड़ी ले जुड़े कतकोन सिकायत मिले हे अउ एखर मन उपर का कार्रवाई होय हे। एखर जवाब देत श्री सिंहदेव ह बताइन कि कोंडागांव के एक अउ जशपुर के तीन झिन डॅाक्टर मनके खिलाफ भ्रष्टाचार के सिकायत मिले रीहिस हे। स्वास्थ्य विभाग अउ छत्तीसगढ़ चिकित्सा सेवा निगम डहार ले एखर खिलाफ जांच करे गे रीहिस। स्वास्थ्य मंत्री ह यहू बताइन कि दवाई अउ उपकरण देवइया कुछएक कंपनी मनके खिलाफ सिकायत घलो मिले रीहिस। ए कंपनी मन ल ब्लैक लिस्ट करत उंखर अनुबंध ल खतम कर दे गेहे।
महिला कमांडो-यात्रा
केंद्रीय रिजर्व पुलिस बल-सीआरपीएफ के चौरासी स्थापना दिवस म पच्चीस मार्च के होवइया परेड ए बखत जगदलपुर म होही।
आजादी के अमृत महोत्सव के उपलक्ष्य म राखे गे ए परेड म सामिल होय बर सीआरपीएफ के पचहत्तर महिला कमांडो के दल दिल्ली के इंडिया गेट ले लेके छत्तीसगढ़ तक एक हजार आठ सौ अड़तालिस किलोमीटर के यात्रा सोला दिन म पूरा करही। महिला सशक्तिकरण के संदेश ल लेके ये दल पाछू नौ मार्च के दिल्ली ले रवाना होय रीहिस। ए दल के काली भिलाई पहुंचे के बाद भिलाई इस्पात संयंत्र के मुख्य महाप्रबंधक निशा सोनी समेत आने आने अधिकारी मन डहार ले सबो महिला कमांडो के स्वागत करे गीस। कालीच ये दल जगदलपुर बर रवाना हो गीस।
पुलिस ठगी सचेत
पुलिस मुख्यालय डहार ले प्रदेश के लोगन मन ल ऑनलाइन ठगी ले बचे बर सचेत रहे बर केहे हे। पुलिस मुख्यालय ह बताइन कि साइबर अपराध ले जुड़े हेल्पलाइन नंबर- एक नौ तीन शून्य – म दर्ज होवइया सिकायत के आधार म ये देखे म आवत हे कि आजकल ठगी करइया गिरोह के सदस्य लोगन मन ल वाट्सएप, इंस्टाग्राम अउ सोशल मीडिया के जरिया ले आने आने प्रकार के टास्क पूरा कराय म पइसा कमाय के लालच देथे अउ ए दउरान उंखर ले निजी जानकारी हासिल कर लेथे।
पुलिस के मुताबिक कुछएक गिरोह अइसन हे, जेखर सदस्य मन डहार ले पार्ट टाइम ऑनलाइन नौकरी के प्रस्ताव दे जाथे। एखर बाद ओमन ल कतकोन टास्क दे जाथे। विश्वास बने के बाद उंखर ले लेनदेन के दउरान पीड़ित के बैंक खाता ले रकम निकाल ले जाथे। एखर बर फोन पे अउ गूगल पे जइसन मोबाइल एप के इस्तेमाल घलो करे जाथे। पुलिस अधिकारी मन ह कोनो अज्ञात स्रोत के ऑनलाइन लिंक उपर पंजीयन करे अउ कोनो भी लेनदेन ले बाचे के सलाह देहे। एखरे संग पुलिस अधिकारी मन ह अनजान फोन नंबर ले मिलइया नौकरी के प्रस्ताव उपर घलो ध्यान नइ देबर अपील करे हे।
कोंडागांव जागरूकता
कोंडागांव पुलिस डहार ले ए बेरा जिला म अभिव्यक्ति जागरूकता सप्ताह मनाये जात हे। इही कड़ी म काली कोंडागांव थाना परिसर म स्थानीय महिला जन प्रतिनिधि मनके मौजूदगी म महिला मनके सुरक्षा अउ आत्मनिर्भरता उपर एक विशेष कार्यक्रम के आयोजन करे गीस हे। ए मउका म अतिरिक्त पुलिस अधीक्षक शोभराज ग्रवाल ह कीहिन कि माइलोगिन अउ लइका के संग होवइया अपराध के प्रति महिला मन ल जागरूक होना जरूरी हे। कार्यक्रम म साइबर अपराध के संग लइका मनके संग होवइया अपराध ले बांचे के उपाय घलो बताय गेहे।
पद्म सम्मान
राष्ट्रपति द्रौपदी मुर्मू ह काली राष्ट्रपति भवन म राखे गे नागरिक अलंकरण समारोह म ए बछर बर चुने गे चौव्वन विशिष्ट मनखे मन ल पद्म पुरस्कार दीन। एमा तीन पद्म विभूषण, चार पद्म भूषण अउ सैंतालिस पद्म श्री सम्मान सामिल हे। ए समारोह म छत्तीसगढ़ के प्रसिद्ध पंडवानी गायिका उषा बारले ल पद्मश्री ले सम्मानित करे गीस।
उंहे दिवंगत राजनेता एस.एम. कृष्णा, जाने-माने वास्तुकार बालकृष्ण दोषी ल मरणोपरांत पद्म विभूषण सम्मान दे गीस हे। प्रसिद्ध समाजसेवी सोमनहल्ली ल घलो ए सम्मान दे गीसे। एखरे संगेसंग उद्योगपति कुमार मंगलम बिड़ला, प्रसिद्ध पार्श्वगायिका सुमन कल्याणपुर, शिक्षाविद् कपिल कपूर अउ आध्यात्म गुरू कमलेश पटेल ल पद्म भूषण ले सम्मानित करे गीस।
आयकर विभाग मोबाइल ऐप
आयकर विभाग ह करदाता मनके सुविधा बर एआईएस नाम ले निशुल्क मोबाइल ऐप शुरू करे हे। ए ऐप के मदद ले करदाता मन अपन सालाना आय के विवरण के संग आने आने जानकारी देख सकही। ए ऐप के माध्यम ले टीडीएस यानी आय के स्रोत उपर कर कटौती के संग ब्याज अउ शेयर के लेनदेन, आयकर रिफंड अउ जीएसटी ले जुड़े जानकारी घलो मिलही।
रावतपुरा सरकार विवि-संगोष्ठी
नेहरू युवा केंद्र अउ यूनिसेफ के राज्य इकाई डहार ले काली रायपुर स्थित श्री रावतपुरा सरकार विश्वविद्यालय म जलवायु, उर्जा अउ जल संरक्षण के क्षेत्र म युवा नेतृत्व – विषय उपर युवा-गोठ के नाम ले संगोष्ठी के आयोजन करे जाही। राज्यपाल विश्वभूषण हरिचंदन कार्यक्रम माइपहुना होही। उंहे विश्वविद्यालय के प्रा-चांसलर हर्ष गौतम अउ कुलपति प्रोफेसर एस.के. सिंह अउ यूनिसेफ के राज्य इकाई के प्रमुख जॉब जकारिया ह विशेष अतिथि रीही।
अउ अब थोरकुन समाचार सार म-
– स्वाधीनता सेनानी सरदार भगत सिंह, राजगुरू अउ सुखदेव के शहादत दिवस म मुख्यमंत्री भूपेश बघेल ह श्रद्धांजलि दीन।
– प्रदेश के पुलिस मुख्यालय म पदस्थ आरक्षक संजीव मिश्रा ल भिलाई पुलिस ह गिरप्तार कर लेहे। एखर खिलाफ अपन साथी पुलिसकर्मी ल भड़काय के आरोप रीहिस।
– बस्तर रेंज के पुलिस महानिरीक्ष सुंदरराज पी. ह बताइन हे कि दंतेवाड़ा जिला म बचेली के तीर पाछू रतिहा पुलिस अउ माओवादी मनके बीच होय मुठभेड़ म कोनो हताहत नइ होय हे।
अउ