आज विश्व वानिकी दिवस हरय। ए मउका म मुख्यमंत्री भूपेश बघेल ह वर्चुअल माध्यम ले तैंतीस जिला के बंयालिस जगा मन म मुख्यमंत्री वृक्ष संपदा योजना के शुभारंभ करीन। एखर माध्यम ले वृक्षारोपण ले किसान मन ल जादा आमदनी होही।
राज्य शासन डहार ले पांच एकड़ तक के वृक्षारोपण बर सौ फीसदी अनुदान दे जाही । एखर ले जादा क्षेत्र म पौधा लगाये बर पचास प्रतिशत अनुदान देके प्रावधान करे गेहे। जे खर ले किसान मन ल सालाना प्रति एकड़ पंद्रह ले पचास हजार रूपिया तक के आय होय के अनुमान हे। योजना म सबो वर्ग के किसान मनके पड़त भूमि म वृक्षारोपण करे जाही। ए बछर तेईस हजार ले जादा किसान मन डहार ले चंदन, आंवला, खमार अउ शीशम जइसन बारा प्रजाति के पौधा लगाय जाही।
ए मउका म मुख्यमंत्री ह सामुदायिक वन संसाधन अधिकार जारी करे के प्रक्रिया के निगरानी ले संबंधित एक ठिन मोबाइल ऐप के लोकार्पण घलो करीन। संगेसंग मुख्यमंत्री ह शहीद महेंद्र कर्मा तेंदूपत्ता संग्राहक सामाजिक सुरक्षा योजना म चौदा सौ ले जादा हितग्राही मनके खाता म बाईस करोड़ रूपिया राशि जमा करीन।
विस समाचार
राज्य विधानसभा म आज विपक्ष ह स्वामी आत्मानंद स्कूल मनके सेटअप के मुद्दा जोरशोर ले उठाइस । भाजपा के धरमलाल कौशिक ह जानना चाहत हे कि प्रदेस म कतना स्वामी आत्मानंद स्कूल खोले गेहे। एमा ले कतका भवन बन चुके हे अउ कतना बनना बांचे हे।
एखर जवाब म शिक्षामंत्री डॅाक्टर प्रेमसाय सिंह टेकाम ह बताइन कि दू सौ उन्यासी स्वामी आत्मानंद स्कूल खोले गेहे। पहिली ले चलत स्कूल म ही एखर बेवस्था करे गेहे अउ उंहा जरूरत के मुताबिक मरम्मत के काम करे गेहे अउ अतिरिक्त भवन घलो बनाय गेहे। मंत्री ह बताइन कि ए स्कूल मन बर अलग से भवन बनाय के योजना नइ हे।
श्री कौशिक ह आरोप लगाय हे कि आत्मानंद स्कूल के नाम म हिंदी मीडियम स्कूल मन ल अनाधिकृत रूप ले कब्जा कर ले गेहे। एखर जवाब म शिक्षामंत्री ह बताइन कि स्कूल मन म अंग्रेजी अउ हिंदी माध्यम ल अलग-अलग पाली म बांटे गेहे। एक सौ इक्यासी स्कूल मन म मरम्मत बर निविदा बुलाये गेहे। संगेसंग विज्ञापन निकालके खाली पद म संविदा के आधार बर भर्ती करे गेहे।
विस-अनुदान मांग
छत्तीसगढ़ विधानसभा म काली आदिम जाति अउ अनुसूचित जाति विकास स्कूल शिक्षा अउ सहकारिता मंत्री डॅाक्टर प्रेमसाय िंसंह टेकाम के विभाग मन बर करीबन उनचास करोड़ रूपिया के अनुदान मांग ध्वनिमत ले पारित होगे। विधानसभा म अनुदान मांग के चर्चा के जवाब देत मंत्री डॅाक्टर टेकाम ह बताइन कि प्रदेश म एक सौ एक नवा स्वामी आत्मानंद उत्कृष्ट अंग्रेजी माध्यम स्कूल खोले जाही। ओमन बताइन कि शैक्षणिक गुणवत्ता बढ़ाय बर चौक परियोजना म चार सौ करोड़ रूपिया के प्रावधान करे गेहे। एखर संगेसंग मुख्यमंत्री स्कूल जतन योजना म पांच सौ करोड़ रूपिया खर्च करे जाही। डॅाक्टर टेकाम ह बताइन कि नवा वित्त वर्ष के मुख्य बजट म पंद्रह पोस्ट मैट्रिक छात्रावास खोले जाय बर एक करोड़ तैंतालिस लाख रूपिया के प्रावधान करे गेहे। हर जिला म पोस्ट मैट्रिक छात्रावास खोले जाही।
उंहे नगरीय प्रशासन अउ विकास तथा श्रम मंत्री डॅाक्टर शिवकुमार डहरिया के विभाग बर करीबन साढ़े चार हजार करोड़ रूपिया के अनुदान मांग घलो पारित कर दे गेहे। विधानसभा म अनुदान मांग के चर्चा के जवाब देत मंत्री डॅाक्टर डहरिया ह बताइन कि राज्य सरकार डहार ले नगरीय निकाय के अधोसंरचना विकास बर एक हजार करोड़ रूपिया के प्रावधान करे गेहे।
माओवादी मुठभेड़
बीजापुर जिला म सुरक्षा बल अउ माओवादी मनके बीच होय मुठभेड़ म एक झिन माओवादी मारे गीस। पुलिस अधीक्षक आंजनेय वार्ष्णेय ह घटना के पुष्टि करत बताइन कि ये मुठभेड़ गंगालूर थाना क्षेत्र के कोरचोली अउ तोड़का के बीच जंगल मन म आज बीहनिया होइस। ओमन बताइन कि माओवादी मनके होय के सूचना मिलत सुरक्षा बल मन ल मउका बर रवाना कर दे गे रीहिस। ए दउरान माओवादी मनके संग उंखर मुठभेड़ होगे। सुरक्षा बल मनके सर्चिंग अभियान चलत हे।
उंहे मोहला-मानपुर अंबागढ़ चौकी जिला म सुरक्षा बल मन ह माओवादी मन डहार ले डंप करे गे विस्फोटक समान बरामद करे गेहे। पुलिस अधीक्षक वाय. अक्षय कुमार ह बताइन कि परेवाडीह क्षेत्र म माओवादी मनके होय के सूचना लगातार मिलत रीहिस। जिला पुलिस बल अउ आईटीबीपी के टीम गश्त म निकले रीहिस। तभे कोटुलझार के जंगल म जवान मन ल विस्फोटक बरामद करे म सफलता मिलीस।
भाजपा जांच दल
भारतीय जनता पार्टी बस्तर जिला के भेजरीपदर घटना के जांच करही। एला लेके प्रदेश अध्यक्ष अरूण साव ह एक ठिन छै सदस्य के जांच समिति बनाय हे। ये समिति संबंधित जगा के तुरते दौरा करके ए घटना के जांच करके अपन रिपोर्ट पार्टी ल सौंपही। ए समिति म पूर्व मंत्री ननकीराम कंवर, पूर्व सांसद दिनेश कश्यप अउ पूर्व विधायक बैदूराम कश्यप, राजाराम तोड़ेम, किरणदेव संग शिवनारायण पांडे सामिल हे।
खबर के मुताबिक भेजरीपदर म उन्नीस मार्च के एक झिन माइलोगिन के शव ल दफनाय ल लेके दू समुदाय के बीच विवाद होगे रीहिस हे।
चैत्र नवरात्र
चैत्र नवरात्र परब के शुरूआत काली ले होवत हे। ए नौ दिन म मां शक्ति के नौ रूप के आराधना करे जाही। दंतेवाड़ा जिला के दंतेश्वरी मंदिर म ए बखत श्रद्धालु डहार ले बड़का मात्रा म ज्योति कलश जलाय जाही। एखर बर ऑनलाईन बुकिंग के सुविधा घलो देगे रीहिस। मंदिर परिसर म सीसीटीवी कैमरा अउ आने बेवस्था घलो दुरूस्त करे जात हे। एखर संग सलूर स्थ्ति तपेश्वरी माता मंदिर अउ आने देवी मंदिर मन म घलो काली घट स्थापना करके ज्योति कलश जलाय जाही।
उंहे नवरात्र ल लेके डोंगरगढ़ म मां बम्लेश्वरी के दरबार सजधज के तियार होगे हे। माता के दर्शन बर अवइया पदयात्री मन बर पंडाल म अलग व्यवस्था करे गेहे। जिहां स्वास्थ्य कर्मी चौबीस घंटा अपन सेवा दीही। अंजोरा ले लेके डोंगरगढ़ तक आने आने समाजसेवी संस्था डहार ले रद्दा मनके तीरेतीर छियांलिस सेवा पंडाल बनाय गेहे, जिहां परयात्री मन बर खाना अउ फलाहारी के बेवस्था रीही। रेंगत अवइया भगत मनके सुरक्षा बर काली ले राजनांदगांव शहर म भारी वाहन के अवई जवई प्रतिबंधित कर देहे। ए बेवस्था तीस मार्च तक रीही। ए दउरान बालोद ले अवइया भारी वाहन मोहारा बाइपास ले खैरागढ़ ले अवइया वाहन गटूला अउ राष्ट्रीय राजमार्ग क्रमांक तिरपन ले होके अवइया वाहन ट्रांसपोर्ट नगर अउ सीआईटी बाइपास ले होके जाही।
उंहे रायपुर अउ रतनपुर के प्रसिद्ध महामाया मंदिर जांजगीर चांपा जिला के चंद्रहासिनी मंदिर अउ महासमुंद जिला के खल्लारी अउ चंडीदेवी मंदिर संग प्रदेशभर के आने देवी मंदिर मन म चैत्र नवरात्र ल लेके लगभग तियारी पूरा कर ले गेहे।
चेट्रीचण्ड्र अवकाश
प्रदेश म चेट्रीचण्ड्र महोत्सव म अवइया तेईस मार्च के सामान्य अवकाश घोषित करे गेहे। ए संबंध म सामान्य प्रशासन विभाग ह अधिसूचना जारी कर देहे। महोत्सव के दिन राज्य के सबो नगर निगम अउ नगरपालिका क्षेत्र म सामान्य अवकाश रीही। फेर ए दिन राज्य के सबो बैंक आने शासकीय वित्तीय संस्था, कोषालय, उप कोषालय अउ सहकारी बैंक खुले रीही। उंहे नया रायपुर स्थित सबो शासकीय कार्यालय म कामकाज होही संगेसंग ग्रामीण क्षेत्र मनके सरकारी दप्तर घलो खुले रीही।
विश्व कठपुतली दिवस
विश्व कठपुतली दिवस के मउका म आज बिलासपुर पुलिस डहार ले पपेट शो के माध्यम ले लोगन ल नशा ले दूरिहा रहे बर प्रेरित करे गीस। खबर के मुताबिक जिला पुलिस डहार ले नशा के खिलाफ लोगन ल जागरूक करे बर निजात कार्यक्रम चलाये जात हे। एखर तहत पुलिस विभाग डहार ले नशा के खिलाफ बेरा-बेरा म जन-जागरूकता उपर कार्यक्रम करे जाथे।