छत्तीसगढ़ विधानसभा म आज एक घांव फेर प्रधानमंत्री आवास योजना के मुद्दा जोरसोर ले उठाय गीस। प्रश्नकाल म विपक्षी सदस्य पुन्नूलाल मोहले, शिवरतन शर्मा अउ धरमलाल कौशिक ह बांचे आवास ल लोगन ल देवाय के मामला म सरकार ले सवाल करीन। एखर जवाब म पंचायत मंत्री रविन्द्र चौबे ह स्वीकार करीन कि कोरोना काल के दउरान राज्य सरकार ह अपन राज्यांस नइ दे रिहीन। ओमन कहिन कि जउन भी हितग्राही पात्र होही, ओमन ल आवास दिलाय जाही। मंत्री के जवाब ले असंतुष्ट विपक्षी सदस्य ह नाराबाजी करीन अउ घुमाके जवाब देके आरोप लगावत सदन ले बहिर्गमन कर दीन।
उहें, सदन म आज अपन सवाल म सदस्य बृजमोहन अग्रवाल ह जानना चाहिस कि बोधघाट परियोजना के काम ए सरकार के कार्यकाल म पूरा होही कि नहीं। ओमन मंत्री रविन्द्र चौबे ले पूछीन कि मुख्यमंत्री अउ जल संसाधन मंत्री ह सदन म केहे रिहीस कि इही कार्यकाल म बोधघाट परियोजना ल पूरा कर दे जाही। श्री अग्रवाल ह किहीन कि ए परियोजना के काम करे बर जेन कंपनी ल नियुक्त करे गेहे, ओमन मध्यप्रदेश ब्लैक लिस्टेड हे अउ पहिली घलो दे गे काम ल समय म पूरा नइ कर पाय हे।
जवाब म मंत्री रविन्द्र चौबे ह कहिन कि ए कंपनी केन्द्र सरकार म इम्पैनल हे अउ पूर्ववर्ती राज्य सरकार ह कंपनी ल पांच करोड़ रूपिया के कार्य स्वीकृत करे रिहीस। उही आधार म राज्य सरकार ह कंपनी ल इकचालीस करोड़ रूपिया के काम दे रिहीस।
विस-शून्यकाल
विधानसभा म आज शून्यकाल के दउरान पूर्व मुख्यमंत्री डॉक्टर रमन सिंह ह सार्वजनिक वितरण प्रणाली-पीडीएस के अनाज म एक हजार करोड़ रूपिया के घोटाला के आरोप लगईन। विपक्ष के तेरह सदस्य मन ह स्थगन प्रस्ताव देके एमा चर्चा कराय के मांग करीन। जवाब म खाद्य मंत्री अमरजीत भगत ह बतईन कि ए मामला म चार करोड़ पचपन लाख मूल्य के अनाज के वसूली करे जा चुके हे। एक सौ इकसठ दुकान मन ल निलंबित अउ एक सौ उन्नीस रासन दुकान मन ल निरस्त करे गेहे। विधानसभा उपाध्यक्ष संतराम नेताम म स्थगन प्रस्ताव ल अग्राह्य कर दीन। एखर बाद विपक्षी सदस्य मन म सदन म सोरसराबा करीन, जेखर सेती सदन के कार्यवाही दू बार स्थगित करना पड़ीस।
लोकसभा-रेणुका सिंह
केन्द्र सरकार, देसभर म आदिवासी अउ उंखर विकास बर आने-आने कल्याणकारी योजना मन ल लागू करत हे। लोकसभा म एक ठिन लिखित उत्तर म जनजातीय मामला के राज्यमंत्री रेणुका सिंह ह बतईन कि अनुसूचित जनजाति घटक निधि के रूप म दू हजार तेईस-चौबीस के बजट म लगभग एक लाख बीस हजार करोड़ रूपिया आवंटित करे गेहे। नीति आयोग ह महत्वपूर्ण जनजातीय आबादी वाले आकांक्षी जिला के पहिचान करे हे।
पोषण पखवाड़ा
प्रदेस म महिला अउ बाल विकास विभाग डहार ले लइका अउ माईलोगिन के पोषण अउ स्वास्थ्य देखभाल संबंधी जागरूकता लाय बर आज ले पोषण पखवाड़ा मनाय जात हे। तीन अप्रैल तक चलइया ए पखवाड़ा के दउरान जागरूकता रथ ले प्रमुख पंचायत अउ हाट बाजार मन म माईलोगिन अउ लइका मनके पोषण, स्वास्थ्य अउ देखभाल ले जुड़े सही आदत के विकास अउ सुधार के संबंध म वीडियो क्लिप के प्रदर्सन करके लोगन मन ल जागरूक करे जाही। पोषण पखवाड़ा के दउरान मिलेट्स के लाभ बताके एखर उपयोग बर लोगन ल प्रेरित करे जाही।
मुख्यमंत्री-वार्षिक अधिवेशन
मुख्यमंत्री भूपेश बघेल काली रईपुर म आयोजित झेरिया गड़रिया समाज के वार्षिक अधिवेशन म सामिल होईन। ए मउका म ओमन ह भेड़ पालन अउ ऊन संवर्धन बोर्ड के गठन के संगेसंग महादेवघाट म सामाजिक भवन बनाय बर पचास लाख रूपिया देके घोषणा करीन। मुख्यमंत्री ह कहिन कि युवा मन ल पारंपरिक अउ आधुनिक तकनीक ले बुनाई बर प्रसिक्षण दे जाही। उहें, उद्योग अउ व्यवसाय लगाय बर रियायती दर म भूमि अउ बिजली के सुविधा घलो दे जाही। ओमन यहू किहीन कि बकरी अउ भेड़ पालन बर घलो युवा मन ल प्रसिक्षित करे जाही।
मुख्यमंत्री वृक्ष संपदा योजना
प्रदेस म ‘‘मुख्यमंत्री वृक्ष संपदा योजना‘‘ के सुरूवात काली इक्कीस मार्च ले करे जाही। ए योजना म प्रदेसभर के हर जिला ले एक-एक स्थान म समारोह के रूप म सुभारंभ कार्यक्रम के आयोजन करे जाही। योजना के तहत टिशू कल्चर सागौन, चंदन, क्लोनल नीलगिरी, मिलिया डुबिया, टिशू कल्चर बांस अउ आने उपयोगी प्रजाति के पौधा लगाय जाही।
‘‘मुख्यमंत्री वृक्ष संपदा योजना‘‘ के संबंध म लोगन ल जानकारी दे बर जगदलपुर स्थित वन विद्यालय म वृत्त स्तरीय कार्यशाला के आयोजन करे गीस। कार्यसाला म पूर्व केन्द्रीय मंत्री अरविंद नेताम अउ जगदलपुर वन वृत्त के मुख्य वन संरक्षक मोहम्मद शाहिद समेत वन अधिकारी अउ किसान सामिल होईन। कार्यसाला म निजी भूमिधारक अउ आने-आने संस्था मनके प्रतिनिधि मन ल योजना के प्रावधान के जानकारी देवत जिज्ञासा मनके समाधान करे गीस अउ ओमन ल वृक्षारोपण करे बर प्रोत्साहित करे गीस।
युवा संवाद
केन्द्रीय खेल मंत्रालय के नेहरू युवा केन्द्र संगठन डहार ले ‘‘युवा संवाद-भारत दो हजार सैंतालीस के आयोजन एक अप्रैल ले इकतीस मई तक देशभर म करे जाही। एला देखत जिला स्तर म आने-आने समुदाय आधारित संस्था मन ले कार्यक्रम करे बर आवेदन पत्र आमंत्रित करे गेहे। एखर तहत संस्था मन ल युवा मन म सकारात्मक सोच विकसित करे बर कार्यक्रम आयोजित करना होही। नेहरू युवा केन्द्र कोति ले आयोजन के बाद आयोजक मन ल बीस हजार रूपिया के रासि दे जाही। इच्छुक संस्था रईपुर के रोहणीपुरम म स्थित नेहरू युवा केन्द्र के कार्यालय म सत्ताईस मार्च तक आवेदन कर सकत हे।
माओवादी-आगजनी
कांकेर जिला म आलापरस गांव के तीर माओवादी मन ह पाछु रतिहा सड़क निर्माण काम म लगे बारह ठिन गाड़ी म आगी लगा दीन। बस्तर रेंज के पुलिस महानिरीक्षक सुंदरराज पी. ह बतईन कि ए घटना म कोनों के हताहत होय के जानकारी नइ हे। माओवादी मन ह आलापरस अउ गुंदुल गांव के बीच सड़क निर्माण कार्य म लगे दू ठिन जेसीबी, दू बुलडोजर अउ आठ ठिन ट्रैक्टर म आगी लगा दीन।
भोरमदेव महोत्सव
कबीरधाम जिला म काली दू दिवसीय भोरमदेव महोत्सव के सुभारंभ होईस। पहिली दिन काली जिला कलेक्टर जनमेजय महोबे ह महोत्सव के बारे म जानकारी दीन। ओमन कहिन कि इहां सालभर देस संग बिदेस के पर्यटक आथे। महोत्सव के दउरान छत्तीसगढ़ी संस्कृति म आधारित कारीकरम प्रस्तुत करे गीस। उहें, बॉलीबुड सिंगर जाकिर हुसैन, पंडवानी गायिका ऋतु वर्मा अउ छत्तीसगढ़ी कलाकार सुनील तिवारी ह घलो कारीकरम के प्रस्तुति दीन। भोरमदेव महोत्सव के आखिरी दिन आज स्थानीय कलाकार अपन प्रस्तुति दीहीं।
अउ अब थोरकुन समाचार सार म-
– केन्द्रीस सूचना अउ प्रसारण मंत्री अनुराग सिंह ठाकुर ह कहिन कि ए बछर पन्द्रह अगस्त तक देसभर म एक हजार खेलो इंडिया केन्द्र सुरू कर दे जाही। एमा ले नौ सौ पैंतालीस केन्द्र मन ल मंजूरी दे जा चुके हे। श्री ठाकुर काली नागपुर प्रेस क्लब म आयोजित ‘‘प्रेस से मिलिए‘‘ कारीकरम म बोलत रिहीन।
– मुख्यमंत्री भूपेश बघेल ह रानी अवंतीबाई लोधी के बलिदान दिवस म ओमन ल नमन करे हे। अपन संदेस म मुख्यमंत्री ह कहिन कि रानी अवंतिबाई लोधी ह बछर अट्ठारह सौ संतावन के क्रांति म महत्वपूर्ण भूमिका निभईन। उंखर साहस अउ बलिदान हमेसा लोगन ल प्रेरित करत रइही।
– जिला रोजगार अउ स्वरोजगार मार्गदर्शन केन्द्र रईपुर डहार ले काली इक्कीस मार्च के जुन्ना पुलिस मुख्यालय परिसर म बिहनिया ग्यारह बजे ले सिक्षित बेरोजगार मन बर प्लेसमेंट कैम्प के आयोजन करे जाही।
अउ
– गरियाबंद जिला म मोहेरा पुल के तीर अज्ञात वाहन के ठोकर ले मोटर सायकल सवार एक झिन युवक के मउत होगे।