आज दिनभर के खबर ल अपन गुरतुर छत्तीसगढ़ी भाखा म पढ़व

पोषण पखवाड़ा

पांचवा पोषण पखवाड़ा काली ले सुरू होवत हे। केंद्रीय महिला अउ बाल विकास मंत्रालय के आयोजन बेरा देसभर म अब्बड़ अकन कार्यक्रम होही। एखर उद्देस्य पोसन के महत्ता बारे म जन आंदोलन अउ जन भागीदारी के माध्यम ले जागरूकता बगराना अउ पौष्टिक खानपान के आदत ल बढ़ावा देना हे।
पोषण अभियान के शुभारंभ प्रधानमंत्री नरेंद्र मोदी ह आठ मार्च दू हजार अठारा म करे हवय। ए बछर के पोषण पखवाड़ा के विसय हरय- सबके लिए पोषण : स्वस्थ भारत की ओर बढ़ते कदम। बछर दू हजार तेइस ल अंतर्राष्ट्रीय मोटा अनाज वर्ष घोषित होय के सेती ए बछर श्रीअन्न ल लोकप्रिय बनाय उपर विसेस ध्यान दे जात हे।
एति महिला अउ बाल विकास विभाग डहार ले लइका अउ माइलोगिन मनके पोषण अउ सेहत ले जुड़े जागरूकता अउ आदत म सुधार लाये बर काली ले तीन अप्रैल तक पोषण पखवाड़ा मनाये जाही। ये दउरान जागरूकता रथ डहार ले प्रमुख पंचायत अउ हाट बाजार म एखर ले जुड़े वीडियो देखाके लोगन ल जागरूक करे जाही। पोषण पखवाड़ा के दउरान मिलेट्स के फायदा बताके एखर उपयोग बर लोगन ल प्रेरित करे जाही।

मुख्यमंत्री लोकार्पण

मुख्यमंत्री भूपेश बघेल ह आज कांकेर जिला अस्पताल म राखे गे एमआरआई मसीन के बटन दबाके शुभारंभ करीन। एखरे संग कांकेर जिला अस्पताल प्रदेस के पहिलइया जिला अस्पताल  बन गेहे, जिहां एमआरआई जांच के सहूलियत होही।
ए मउका म ओमन कीहिन कि प्रदेस म मेडिकल  सहूलियत के विस्तार ले स्वस्थ छत्तीसगढ़ के संकल्प ल मजबूत आधार मिलत हे। इंहा ए बतादन कि एमआरआई मसीन ल करीबन छै करोड़ उनचास लाख रूपिया के लागत ले लगाय गेहे।
एखर आगू मुख्यमंत्री ह कांकेर जिला के नरहरपुर विकासखंड के गांव करप म राखे गे कोसरिया समाज के महासम्मेलन अउ शपथ ग्रहरण समारोह म सामिल होइन। ए मउकाम ओमन कांकेर जिला के विकास बर एक सौ तैंतालिस करोड़ बयानबे लाख रूपिया के कई ठिन काम के लोकार्पण करीन।

रेलवे छत्तीसगढ़

रेलवे ह छत्तीसगढ़ म ब्रॉडगेज नेटवर्क के विद्युतीकरण के काम पूरा कर लेहे। एक हजार एक सौ सत्तर किलोमीटर लाईन के विद्युतीकरण ले इलेक्ट्रिक इंजन के संचालन अउ रख रखाव के लागत कम होही, परिवहन यानि लवई लेजई ह पर्यावरण मुताबिक होही, संगे बाहिर ले मंगाये कच्चा तेल उपर निर्भरता कमती होही। रेल मंत्रालय ह केहे हे कि खनिज, कृषि उत्पाद अउ आने जीनिस मन ल छत्तीसगढ़ ले देस के दूसर हिस्सा मन म पठोय म रेल नेटवर्क के बड़का  रोल हवय।

भाजपा बूथ सशक्तिकरण

भारतीय जनता पार्टी ह अवइया विधानसभा चुनाव के तैयारी ल देखत बूथ सशक्तिकरण महाअभियान सुरू करे हे। ए सिलसिला म मुंगेली जिला के सबो एक सौ दू सक्ति केंद्र मन म भाजपा पदाधिकारी मन कार्यकर्ता मनके बइठका लेके बूथ सशक्तिकरण बर पार्टी डहार ले जारी होय चौबीस किसम के काम के बारे म जानकारी दीन।
बइठका म मौजूद जम्मों बूथ अध्यक्ष अउ हरएक बूथ के ग्यारा झिन प्रमुख कार्यकर्ता माइलोगिन अउ युवा प्रतिनिधि मन ल  ए सबो काम ल दस दिन भीतर पूरा करे बर केहे गेहे।
भाजपा जिला अध्यक्ष शैलेष पाठक ह बताइन कि सबो शक्ति केंद्र मन म भाजपा विस्तारक मन डहार ले राष्ट्रपति के अभिभाषण ल पढ़े गीस उंहें  संगठनात्मक अउ रचनात्मक कार्य बर कार्यकर्ता मन ल दिसा-निर्देस दे गीस। ओमन बताइन कि जिला के दू ठिन विधानसभा के नौ ठियां मंडल जगा म ए काम ल सक्ति केंद्र के माध्यम ले बूथ तक पठोय जात हे।

माओवादी आत्मसमर्पण

सुकमा जिला म आज एक लाख रूपिया के एक झिन इनामी माओवादी ह पुलिस के आगू अत्समर्पण कर दीस। खबर के मुताबिक पुलिस डहार ले चलाए जावत पुना नर्कोम अभियान ले प्रभावित होके कोंटा इलाका म सक्रिय जनमिलिशिया कमांडर ह पुलिस अधीक्षक के आगू आत्मसमर्पण करे हे। ये माओवादी ह कई ठिन अपराधिक गतिविधि म सामिल रीहिस हे। पुलिस अधीक्षक सुनील शर्मा ह आत्मसमर्पण करे माओवादी ल सासन के पुर्नवास नीति के लाभ देवाय के आस्वासन दीन हे।

नशा मुक्ति अभियान

राज्य महिला आयोग के अध्यक्ष डॅाक्टर किरणमयी नायक ह मुख्यमंत्री भूपेश बघेल ल पाती पठोके राज्य के जनता ल नसापानी ले बचाय बर बड़का जन आंदोलन शुरू करे के आग्रह करे हे। ओमन पाती म केहे हे कि नसापानी ह जीवन बर हानिकारक हे। एखर ले समाज के सबो वर्ग ल नकसान उठाना पड़थे। श्रीमती नायक ह पाती म यहू कीहिन हे कि राज्य सरकार ह नसापानी ल रोके बर प्रयास करे हे। जेखर असर घलो होय हे, फेर एला जन आंदोलन बनाय के जरूरत हे। ओमन मुख्यमंत्री ले आग्रह करे हे कि सबो तरह के नसा ले आम लोगन  ल बचाय खातिर माइलोगिन मन ल जोड़के जन आंदोलन सुरू करे जाय।

सेना भर्ती

भारतीय सेना म जे.सी.ओ. अउ ओ.आर. पद म भर्ती बर ए बेरा ऑनलाइन पंजीयन होवत हे। ए ऑनलाइन रजिस्ट्रेसन ‘‘ज्वाईन इंडियन आर्मी‘‘ वेबसाइट म चलत हे। पंजीयन करवाय के आखिरी तारीख काली बीस मार्च हवय।
सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि ए भर्ती प्रक्रिया म उही उम्मीदवार मन सामिल होही, जउन मन अपन पंजीयन करवा लेहे। उंहे उम्मीदवार तीर आधार कारड अउ दसवीं के सर्टिफिकेट होना जरूरी हे।
सेना भर्ती कार्यालय ह सबो इच्छुक उम्मीदवार मन ल बताय हवय कि ये भर्ती प्रक्रिया पूरा तरीका ले निष्पक्ष हे अउ एमा कोनो भी प्रकार के हस्तक्षेप संभव नइ हे। एखर सेती ओमन ह कोनो भी दलाल के चंगुल म झन फंसय।

दुर्घटना

प्रदेस म पाछू चौबीस घंटा के दउरान होय आने आने जगा होय सड़क दुर्घटना म चार झिन मनखे के मउत होगे। उंहे बारा झिन मनखे घायल  होगे हे।
मिले जानकारी मुताबिक सक्ति जिला के डोंगिया गांव तीर एक ठिन हाइवा ह फटफटी ल टक्कर मार दीस। ए हादसा म फटफटी सवार दू झिन मनखे के मउकाच म मउत होगे। उंहे एक झिन आने मनखे घायल  होगे हे। पुलिस ह आरोपी ड्रायवर ल गिरप्तार कर लेहे।
ओति जांजगीर चांपा जिला के गावं धाराशिव म चारपहिया वाहन ह एक झिन लइका ल अपन चपेट म ले लीस। ए घायल लइका ल जिला अस्पताल  ले जाय गीस, जिहां डॅाक्टर मन ओला मृत घोषित कर दीन।
इही जिला के गांव सत्तीगुड़ी म एक ठिन टैंकर ह फटफटी ल टक्कर मार दीस, जेखर ले फटफटी म बइठे एक झिन नारी परानी के मउकाच म मउत होगे।   उंहे दू झिन आने मनखे मन गंभीर रूप ले घायल होगे।
एति राजिम-रायपुर रद्दा म आरंग तीर एक ठिन यात्री बस अउ टैंकर बीच भिडंत होगे, जेखर ले बस म बइठे नौ झिन यात्री घायल होगे। ओमन ल अस्पताल  म भर्ती कराय गेहे।

अउ अब सुनव मौसम के हाल  –

प्रदेस म आज घलो कई ठिन जगा म हवा गरेर के संग बरसा अउ करा गिरे के खबर हे। कबीरधाम जिला के चिल्फी घाटी म जोरदरहा पानी गिरे के सगे करा घलो गिरे हे। उंहे बस्तर संभाग के जगदलपुर अउ सुकमा म बीहनिया भारी पानी गिरे हे। इही पाय के तापमान ह खाल्हे घूच गे हवय।
मौसम विभाग मुताबिक चक्रीय चक्रवात के असर ले बादर अउ बरसा के हालत बने हे। फेर अवइया चौबीस घंटा दउरान प्रदेस के कतकोन जगा म थोरकुन ले जादा पानी गिर सकत हे। उंहे एक दू जगा म गरजई चमकई के संगे आंधी-तूफान अउ करा घलो गिर सकत हे।
अउ अब थोरकुन समाचार सार म-
– रायपुर जिला म काली बीस मार्च के होवइया जिला स्तरीय जन समस्या निवारण शिविर स्थगित होगे हे।

– जिला रोजगार अउ स्वरोजगार मार्गदर्शन केंद्र रायपुर डहार ले इक्कीस मार्च के पुराना पुलिस मुख्यालय परिसर म बीहनिया ग्यारा बजे ले शिक्षित बेरोजगार मन बर प्लेसमेंट कैंप राखे जाही।

अउ
– राजनांदगांव जिला के चिखली म बिना ब्याज के लोन देवाय के नाव म करीबन सात लाख रूपिया के ठगी के मामला आगू आय हे। पुलिस ह तीन झिन आरोपी के खिलाफ मामला दर्ज करके जाच शुरू कर देहे।