राज्य विधानसभा म आज सून्यकाल के दउरान प्रधानमंत्री आवास योजना के मुद्दा ल लेके काली प्रदर्सन के दउरान भाजपा कार्यकर्ता मन उपर कथित रूप ले बम अउ आंसु गैस फेंके के मामला गूंजीस। भाजपा सदस्य मन ह एमा चर्चा कराय के मांग करीन, फेर आंसदी डहार ले चर्चा ले इंकार करे जाय म भाजपा सदस्य मन ह हल्ला-गुल्ला सुरू कर दीन। एखर बाद सदन के कार्यवाही स्थगित कर दे गीस। नेता प्रतिपक्ष नारायण चंदेल ह किहीन कि लोकतंत्र म दमनकारी नीति बर कोनो जघा नइ हे। ओमन आरोप लगईन कि भाजपा कार्यकर्ता मन ल लक्ष्य करत बम फेंके गे रिहीस अउ आंसू गैस के गोला छोड़ा गीस, जेखर ले कुछेक कार्यकर्ता मन घायल होय हे।
उहें, ए मुद्दा म प्रदेस के पूर्व मुख्यमंत्री डॉक्टर रमन सिंह ह आरोप लगईन कि भाजपा के प्रदर्सनकारी मन ल लक्ष्य करत बम फेंके के घटना स्वीकार करे योग्य नइ हे। ओमन किहीन कि प्रधानमंत्री आवास योजना बर राज्य के अंस नइ देके सेती हितग्राही अपन घर ले वंचित होय हे। ओमन किहीन कि ए मुद्दा म स्थगन प्रस्ताव के तहत चर्चा कराय जाना चाही। फेर, विधानसभा उपाध्यक्ष संतराम नेताम ह एला अग्राह्य कर दीस। एखर बाद विपक्षी सदस्य मनके हल्ला-गुल्ला के सेती सदन के कार्यवाही पांच मिनट बर स्थगित कर दे गीस।
विस-बेरोजगारी मुद्दा
आज सदन म बेरोजगारी के मुद्दा म विपक्ष ह सरकार ल घेरे के कोसिस करीन। ए बिसय म सरकार ह सदन म स्वीकार करीन कि जउन संस्था के आधार म बेरोजगारी के आंकड़ा तय करे जाथे, ओला सरकारी मान्यता नइ हे। सरकार के ए बयान म विपक्ष ह सवाल करीन कि जब संस्था ल मान्यता नइ हे, त उंखर आकड़ा के आधार बनाके सरकार डहार ले विज्ञापन काबर जारी करे गीस। ए मुद्दा म विपक्ष के आने सदस्य मन घलो पूरक प्रश्न करीन। पूरक प्रश्न के संख्या ल लेके जब विभागीय मंत्री अमरजीत भगत ह आसंदी के ध्यान आकर्षित करीन, त विधानसभा अध्यक्ष डॉक्टर चरणदास महंत ह मंत्री के कथन म आपत्ति जतावत किहीन कि जउन बिसय आंसदी ल गंभीर लगही, ओमा कतको पूरक प्रश्न पूछे के मंजूरी दे जा सकत हे। ए मुद्दा म नेता प्रतिपक्ष नारायण चंदेल ह किहीन कि रोजगार के वास्तविक आंकड़ा ल सदन म पेस नइ करे जावत हे। ए मुद्दा म मुख्यमंत्री घलो सदन म जानकारी दीन। फेर, ए जवाब ले असंतुष्ट विपक्ष ह सदन ले बहिर्गमन कर दीन।
रेणुका सिंह-राज्यसभा
केन्द्रीय जनजातीय कार्य राज्यमंत्री रेणुका सिंह ह किहीन हे कि अनुसूचित जनजाति अउ जनजातीय क्षेत्र मनके विकास बर सरकार बिसेस कार्ययोजना लागू करत हे। राज्यसभा म काली ओमन किहीन कि जनजातीय कार्य मंत्रालय के अतिरिक्त इकचालीस मंत्रालय अउ विभाग हर बछर अपन आने-आने योजना म जनजातीय विकास बर घलो बिसेस प्रावधान करथे। ओमन बतईन कि ए परियोजना सिक्षा, स्वास्थ्य, कृषि, सिंचाई, आवास, सड़क, बिजली अउ कौसल विकास ले जुड़े हे।
आधार-संशोधन
भारतीय विशिष्ट पहचान प्राधिकरण ह लोगन मन ल अपन आधार कार्ड म निःशुल्क ऑनलाइन संसोधन करे के मंजूरी दे देहे। आकाशवाणी समाचार के संग बिसेस गोठबात म प्राधिकरण के मुख्य कार्यकारी अधिकारी सौरभ गर्ग ह बतईन कि लोगन मन ल जरूरी सुविधा देके उद्देश्य ले ए फइसला ले गेहे। श्री गर्ग ह किहीन कि ए सुविधा पन्द्रह मार्च ले अवइया चौदह जून तक सिरिफ ‘‘माई आधार‘‘ पोर्टल म निःसुल्क रइही।
सेना भर्ती
भारतीय सेना म जे.सी.ओ. अउ ओ.आर. पद म भर्ती बर अभी ऑनलाइन रजिस्ट्रेसन होवत हे। ए ऑनलाइन रजिस्ट्रेसन ‘‘ज्वाईन इंडियन आर्मी‘‘ वेबसाइट म चलत हे। रजिस्ट्रेसन करवाय के आखिरी तारीख बीस मार्च हवय।
सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि ए भर्ती प्रक्रिया म उही उम्मीदवार मन सामिल होही, जउन मन अपन रजिस्ट्रेसन करवा लेहे। रजिस्ट्रेसन करवाय बर उम्मीदवार तीर आधार कारड अउ दसवीं के सर्टिफिकेट होना जरूरी हे।
प्रदेस म अपराध मनके अन्वेषण बर अब नार्को टेस्ट के सुविधा घलो सुरू होही। काली विधानसभा म अपन विभाग के अनुदान मांग उपर चर्चा के जवाब देवत गृहमंत्री ताम्रध्वज साहू ह बतईन कि नार्को टेस्ट बर जरूरी कामकाज पूरा कर ले गेहे अउ रईपुर के एम्स अस्पताल के संग मिलके ए टेस्ट बर जरूरी मसीन घलो मंगा ले गेहे। गृह मंत्री ह किहीन कि ए सुविधा के सुरू होय ले अब बड़े अपराध म इस्तेमाल होवइया नार्को टेस्ट बर प्रदेस ले बाहिर नइ जाना पड़ही।
माओवादी-समाचार
दंतेवाड़ा जिला के मंगनार इलाका म काली पुलिस अउ माओवादी के बीच मुठभेड़ होय के खबर मिले हे। एमा कखरो घायल होय के सूचना नइ मिले हे। पुलिस ल मंगनार इलाका म माओवादी मनके मौजूद होय के खबर रिहीस हे। इही आधार म मालेवाही थाना ले डीआरजी के टीम तलासी अभियान म निकले रिहीस। पुलिस बल के मंगनार इलाका म पहुंचतेच माओवादी मन उंखर उपर गोलीबारी सुरू कर दीन। सुरक्षा बल के जवाबी कार्रवाई के दउरान माओवादी मन उहां ले भगा गे। सुरक्षा बल के जवान मन ह घटना जघा ले विस्फोटक अउ दूसर जिनीस बरामद करे हे।
हाथी-विचरण
महासमुंद जिला के सीमावर्ती गांव मन म तीन दंतैल हाथी के विचरण ल देखत वन विभाग ह ग्रामीण मन ल सचेत कर देहे। वन विभाग के मुताबिक ए तीनों हाथी महासमुंद के जीवतरा अउ कोना गांव के जंगल म पाछु कुछेक दिन ले घूमत हे। एखर सेती धनसुली, मोरधा, कोना, खट्टी, केशवा, परसदा अउ लभराकला जइसे तीरतखार के गांव वाले मन ल सतर्क रेहे के संगेसंग जंगल कोति जाय बर मना करे गेहे। वन अधिकारी के मुताबिक ये हाथी आज रतिहा गरियाबंद जिला म प्रवेस कर सकत हे। एखर सेती गरियाबंद जिला के बम्हनदेही, बोरिद, गुंडरदेही अउ सरकड़ा गांव मन म घलो मुनादी कराके गांव वाले मन ल सतर्क कर दे गेहे।
उहें, धमतरी जिला के चरगांव, तुमबाहरा अउ गजकन्हार वन गांव म घलो जंगली हाथी मनके हलचल देखे जावत हे। वन विभाग ह गांव वाले मन ल सचेत रेहे चेतावनी देहे।
राष्ट्रीय संगोष्ठी
आजादी के अमृत महोत्सव के तहत रईपुर के पंडित रविशंकर शुक्ल विश्वविद्यालय म इतिहास विभाग डहार ले काली ले उन्नीस मार्च तक तीन दिवसीय राष्ट्रीय संगोष्ठी के आयोजन करे जाही। एमा राष्ट्रीय आंदोलन अउ सुभाषचंद्र बोस के संगेसंग आजाद हिन्दी फौज के बिसेस संदर्भ म सोध पत्र पढ़े जाही।
अउ अब पेस हे मौसम के हाल-
पश्चिमी द्रोणिका के प्रभाव ले प्रदेस म अवईया तीन-चार दिन तक गर्मी कमती रहे के संभावना हे। मौसम विभाग के मुताबिक द्रोणिका के सेती प्रदेस म ए दिन बदली छाए हे। उहें, रईपुर, जगदलपुर अउ मुंगेली समेत कुछेक जघा म आज गरज-चमक के संग सिटिर-साटर पानी गिरे के खबर मिले हे। अवइया चौबीस घंटा के दउरान प्रदेस के मैदानी इलाका म बदली छाए रहे के संग कुछेक जघा म थोर बहुत बूंदाबांदी होय के संभावना हे। उहें, एक-दू जघा म आंधी-तूफान के संग करा गिरे के घलो आसार हे।
अउ अब थोरकुन समाचार सार म-
– प्रयास आवासीय विद्यालय म अवइया सिक्षा सत्र के तहत जम्मों वर्ग के विद्यार्थी मन के नवमीं कक्षा म प्रवेस बर ऑनलाइन आवेदन उनतीस मार्च तक मंगाय गेहे। एखर बर प्रवेस परीक्षा तीस अप्रैल के होही।
– रईपुर के हिदायतुल्लाह राष्ट्रीय विधि विश्वविद्यालय म काली ले उन्नीस मार्च तक ‘‘राष्ट्रीय मूट कोर्ट प्रतियोगिता‘‘ के आयोजन करे जाही।
– मुंगेली म जिला पुलिस डहार ले ए बेरा महिला जागरूकता सप्ताह मनाय जावत हे। एखर तहत माईलोगिन मन ल उंखर सुरक्षा अउ अधिकार के बिसय म जानकारी दे जावत हे।
– अंबिकापुर के गांधीनगर थाना क्षेत्र म सकालो गांव के तीर ट्रक के टक्कर ले फटफटी म बइठे दू झिन नाबालिग छात्र मनके मउकाच म मउत होगे। घटना के बाद गांव वाले मन अंबिकापुर-प्रतापपुर रद्दा म चक्काजाम कर दीन। प्रसासन के समझाईस के बाद गांव वाले मन प्रदर्सन ल खतम करीन।
– जांजगीर-चांपा जिला के नेगुरडीह गांव म कार के टक्कर ले सड़क किनारे आगी तापत एक झिन मनखे के मउत होगे। उहें, एक झिन आने मनखे घायल होगे हे।
– रईपुर के देवपुरी इलाका म ट्रक के टक्कर ले दुपहिया सवार स्टाफ नर्स के मउकाच म मउत होगे।
अउ
– जगदलपुर म पुलिस ह अंतर्राज्यीय गिरोह के तीन झिन सदस्य ल चारामा ले गिरफ्तार करके उंखर तीर ले सैंतीस किलो गांजा बरामद करे हे।