होली तिहार के छुट्टी के बाद छत्तीसगढ़ विधानसभा के बजट सत्र आज ले एक घांव फेर सुरू होगे। सदन म आज कांग्रेस अध्यक्ष मोहन मरकाम ह प्रश्नकाल म जिला खनिज न्यास निधि-डीएमएफ के मुद्दा उठावत अपनेच सरकार ल घेरीन। श्री मरकाम ह कोंडागांव म डीएमएफ फंड के बंटवारा म करीबन सात करोड़ रूपिया के गड़बड़ी के आरोप लगावत मंत्री रविन्द्र चौबे ल विधानसभा के कमेटी ले जांच कराय के मांग करीन। एखर जवाब म श्री चौबे ह किहीन कि राज्य स्तर के अधिकारी ले जांच कराके एखर रिपोर्ट एक महीना के भीतर दे जाही। रिपोर्ट आय के बाद दोसी मनके खिलाफ कार्रवाई करे जाही।
प्रश्नकाल म विधायक बृजमोहन अग्रवाल ह जल संसाधन विभाग म संविदा नियुक्ति के मामला ल उठईन। ओमन पूछीन कि विभाग म कतका झिन ल सब इंजीनियर अउ एखर ले जुड़े पद म संविदा नियुक्ति दे गेहे। जवाब म मंत्री रविन्द्र चौबे ह बतईन कि जल संसाधन विभाग म एक मार्च ले सत्ताईस झिन इंजीनियर मन ल आने-आने पद म संविदा नियुक्ति दे गेहे।
विस बजट सत्र-शून्यकाल
राज्य विधानसभा म सून्यकाल के दउरान विपक्षी सदस्य अजय चंद्राकर अउ बृजमोहन अग्रवाल ह राज्यपाल के अभिभाषण उपर छेड़छाड़ के मुद्दा ल लेके सत्तापक्ष ल घेरीन। ओमन आरोप लगईन कि राज्यपाल ह जउन भासन पढ़े हे, ओमा पूरा के पूरा बात ल जस के तस नइ बताय गेहे। विपक्षी सदस्य मन ह बतईन कि राज्यपाल ह जउन अभिभाषण ल पढ़ीन, ओमा हिन्दी अउ अंग्रेजी के कॉपी म अंतर हवय। सदस्य मन मुख्यमंत्री अउ संसदीय कार्यमंत्री उपर विशेषाधिकार हनन के घलो आरोप लगईन, जेखर बाद सदन म दूनों पक्ष के बीच जमके हंगामा होईस। एला देखत सदन के कार्यवाही ल दस मिनट बर रोक दे गीस।
राष्ट्रीय युवा सम्मेलन
प्रधानमंत्री नरेन्द्र मोदी ह किहीन हे कि भारत के युवा मन ल मजबूत बनाय के उद्देश्य ले पाछु कुछ साल म एक सशक्त पारिस्थितिकी तंत्र विकसित करे गेहे। प्रधानमंत्री के संदेस ल आज नई दिल्ली के विज्ञान भवन म राष्ट्रीय युवा सम्मेलन के दउरान पढ़े गीस। ए संदेस म प्रधानमंत्री ह केहे हे कि सरकार के प्रयास राष्ट्र के सामूहिक विश्वास के संग युवा मनके आसा अउ अकांक्षा ल जोड़े उपर केन्द्रित हे।
दू दिन तक चलइया राष्ट्रीय युवा सम्मेलन आज ले सुरू होईस, जउन ह भारत के जी-ट्वेंटी अध्यक्षता के तहत शहरी यू-टवेंटी अउ युवा-वाई-ट्वेंटी के प्राथमिकता वाले क्षेत्र मन उपर गोठबात करे बर युवा प्रतिभा मन ल एके संघरा लाय जाही।
राष्ट्रीय युवा सम्मेलन के आयोजन नेशनल इंस्टीट्यूट ऑफ अर्बन अफेयर्स डहार ले आवास अउ शहरी कार्य मंत्रालय के संगेसंग युवा कार्य विभाग के मदद ले करे जात हे।
बेरोजगारी भत्ता
राज्य शासन के रोजगार विभाग ह प्रदेश के बेरोजगार युवा मन ल पच्चीस सौ रूपिया बेरोजगारी भत्ता देके आदेश जारी कर देहे। आदेश के मुताबिक बारहवीं पास बेरोजगार मन ल अवइया महीना ले ए भत्ता हर महीना दे जाही। एक साल म कोनो बेराजगार युवा मन ल नौकरी नइ मिलय त अइसन स्थिति म ए भत्ता ल एक साल बर अउ बढ़ा दे जाही। बेरोजगारी भत्ता बर उही युवा मन पात्र होही, जेखर परिवार के साल के आमदनी ढाई लाख रूपिया ले कम होही।
जानबा के मुताबिक मुख्यमंत्री ह पाछू दिन प्रदेश के बेरोजगार युवा मन ल बेरोजगारी भत्ता देके घोषणा करे रीहिन।
लोकसभा-ईएसआईसी
केन्द्र सरकार ह किहीन हे कि कर्मचारी राज्य बीमा निगम-ईएसआईसी ह देस के जम्मों जिला मन म कर्मचारी राज्य बीमा योजना ल आगू बढ़ाय के फइसला करे हे। आज लोकसभा म एक ठिन लिखित उत्तर म केन्द्रीय श्रम अउ रोजगार राज्यमंत्री रामेश्वर तेली ह किहीन कि कर्मचारी राज्य बीमा योजना ह ए महीना के एक तारीख ले लक्ष्यद्वीप ल छोड़के जम्मों राज्य अउ केन्द्रसासित प्रदेस मन ल अधिसूचित करे जात हे। ओमन किहीन कि देस के कुल सात सौ चवालीस जिला जउन हवय, ओमा ले कर्मचारी राज्य बीमा योजना के सुविधा ल छह सौ नौ जिला म दे गेहे। जेमा ले चार सौ तिरासी जिला मन ल ए बीमा के पूरा लाभ दे गेहे अउ एक सौ अट्ठाईस जिला मन ल ए योजना के थोरबहुत लाभ मिले हे।
भाजपा-विधानसभा घेराव
मोर आवास मोर अधिकार अभियान के तहत भारतीय जनता पार्टी ह पन्द्रह मार्च के विधानसभा के घेराव करही। पार्टी के प्रदेश अध्यक्ष अरूण साव, महामंत्री केदार कश्यप, मोर आवास मोर अधिकार आंदोलन के प्रदेश संयोजक विजय शर्मा अउ रायपुर शहर जिला अध्यक्ष जयंती पटेल के संगेसंग अउ बड़का नेता मन ए अभियान म शामिल होही। पंद्रह मार्च के विधानसभा घेराव के पहिली भाजपा नेता मन डहार ले पिरदा चौक म एक ठिन सभा घलो राखे गेहे। उंहे भाजपा के प्रदेश सह प्रभारी नीतिन नवीन ह कीहिन हे कि पंद्रह मार्च के होवइया ए अभियान म जनता मन ह राज्य सरकार ले अपन आवास के हिसाब मांगही।
एति राजनांदगांव म सांसद संतोष पांडेय अउ संगठन प्रभारी डॉक्टर बालमुकुंद देवांगन के अगुवई म विधानसभा स्तर के बइठका होईस। बइठका म मोर आवास-मोर अधिकार ले छूटे हितग्राही मन ल संग लेके विधानसभा के घेराव करे के योजना बनाय गीस। सांसद श्री पांडेय ह बतईन कि राजनांदगांव विधानसभा क्षेत्र ले करीबन दू हजार कार्यकर्ता अउ हितग्राही मन ल रईपुर ले जाय जाही।
कांग्रेस प्रदर्शन
केंद्र सरकार के आर्थिक नीति के विरोध म आज कांग्रेस ह देशभर म प्रदर्शन करीन। राजधानी रायपुर म घलो कांग्रेस के बड़का नेता अउ कार्यकर्ता मन ह अंबेडकर चौक म विरोध प्रदर्शन करीन। जेखर बाद प्रदेश अध्यक्ष मोहन मरकाम के संगेसंग ग्यारा झिन नेता के प्रतिनिधि मंडल मन ह राजभवन पहुंचीन। जिहां राज्यपाल ले मिलके ओमन ल ज्ञापन सौंपीन। ए विरोध प्रदर्शन म कांग्रेस के प्रदेश प्रभारी कुमारी शैलजा, मुख्यमंत्री भूपेश बघेल प्रभारी सचिव डॅाक्टर चंदन यादव, सप्तगिरी शंकर उल्का, संयुक्त सचिव विजय जांगिड़ समेत प्रदेश के बड़का नेता मन सामिल होइन।
सेना भर्ती-पंजीयन तारीख
भारतीय सेना म जे.सी.ओ. अउ ओ.आर. पद म भर्ती बर ऑनलाइन रजिस्ट्रेसन के तारीख पन्द्रह ले बढ़ाके बीस मार्च कर दे गेहे। ए ऑनलाइन रजिस्ट्रेसन ‘‘ज्वाईन इंडियन आर्मी‘‘ वेबसाइट म होवत हे। सेना म भर्ती बर लिखित परीक्षा पन्द्रह अप्रैल के बाद होही। लिखित परीक्षा म पास होय उम्मीदवार मन ल भर्ती रैली म सामिल होय के मउका मिलही।
सेना भर्ती कार्यालय ह जम्मों उम्मीदवार मन ल सूचना देहे कि ए भर्ती प्रक्रिया निष्पक्ष हवय, एमा काखरो पहुंच के जरूरत नइ हे।
पुलिस-पदस्थापना
राज्य सरकार ह राज्य पुलिस सेवा के आठ अधिकारी मनके नवा पदस्थापना के सूची जारी करे हे। आदेस के मुताबिक रइपुर के अतिरिक्त पुलिस अधीक्षक कीर्तन राठौड़, सुकमा के एएसपी ओम प्रकाश चंदेल अउ बीजापुर के एएसपी गौरव रामप्रवेश राय ल एसीबी मुख्यालय रायपुर म पदस्थ करे गेहे। उहें, जगदलपुर के उप सेनानी नीरज चंद्राकर ल रइपुर ग्रामीण के एएसपी बनाय गेहे। रईपुर के उप पुलिस अधीक्षक मनोज धु्रव अब रइपुर के नगर पुलिस अधीक्षक होही। त उहें, उरला रईपुर म पदस्थ नगर पुलिस अधीक्षक राजीव शर्मा ल पुलिस मुख्यालय रईपुर अउ सिविल लाइन रइपुर म नगर पुलिस अधीक्षक वीरेन्द्र चतुर्वेदी ल जिला विशेष शाखा रइपुर म उप पुलिस अधीक्षक बनाय गेहे। अइसने, रईपुर के जिला विशेष साखा म पदस्थ उप पुलिस अधीक्षक अविनाश मिश्रा ल उरला रईपुर म नगर पुलिस अधीक्षक नियुक्त करे गेहे।
हादसा
राजनांदगांव जिला के छोटा मानपुर चेकपोस्ट म पाछु रतिहा परिवहन विभाग के दू झिन सुरक्षाकर्मी मन उपर कार चढ़ाय के मामला आगू आय हे। हमर संवाददाता ले मिले जानबा के मुताबिक काली रतिहा गाड़ी मनके जांच करे जात रिहीस। इही दउरान कार म सवार दू झिन लोगन मन ह चेक पोस्ट म तैनात दू झिन सुरक्षा कर्मी मन उपर कार ल चढ़ा दीन। ए घटना म एक झिन सुरक्षा कर्मी ह गंभीर रूप ले घायल होगे हे। पुलिस ह दूनों आरोपी मन ल गिरफ्तार कर लेहे।
एक्सपोर्ट आउटरीच कार्यक्रम
नवा रायपुर म आज एक्सपोर्ट आउटरीच कार्यक्रम के आयोजन करे गीस। कार्यक्रम म निर्यातक अउ निवेशक मन ह छत्तीसगढ़ ले निर्यात बढ़ाय बर होय तियारी उपर गोठबात करीन। कार्यक्रम म छत्तीसगढ़ ले निर्यात वाले उत्पाद अउ निर्यातक मन ल दे जाय सरकारी सुविधा के जानबा के संगेसंग सुझाव घलो दे गीस ।
कार्यक्रम म रायपुर कलेक्टर डॅाक्टर सर्वेश्वर नरेंद्र भूरे ह कीहिन कि छत्तीसगढ़ ह देश म चांउर के संगेसंग आने उत्पाद मनके प्रमुख निर्यातक वाले राज्य हरय। जानबा के मुताबिक केंद्र सरकार के विदेश व्यापार निदेशालय डहार ले जिला मन ल एक्सपोर्ट हब के रूप म विकसित करे के उद्देश्य ले निर्यात बढ़ाय के संभावना वाले देश के पचहत्तर ठिन जिला मन म अइसन कार्यक्रम चलाये जात हे।