संसद के बजट सत्र के दूसरइया चरण काली ले सुरू होही। ए सत्र के दूसर भाग म कुल 17 बइठक होही अउ 6 अप्रैल तक चलही। बजट सत्र एक महीना के लंबा छुट्टी के बाद फेर ले सुरू होवत हे।
बतादन कि संसद के बजट सत्र 31 जनवरी के सुरू होय रिहीस। बजट सत्र के पहिली चरण 13 फरवरी तक चले रिहीस अउ ए बेरा कुल 10 बइठक होय रिहीस।
ऐति, छत्तीसगढ़ विधानसभा के बजट सत्र घलो होरी तिहार के बाद काली ले फेर सुरू होवत हे। 6 मार्च के विधानसभा म मुख्यमंत्री भूपेश बघेल ह अवइया बछर बर बजट पेस करे रिहीस। एखर बाद सदन के कार्यवाही ल 12 मार्च तक बर स्थगित कर दे गे रिहीस।
सामाजिक/आर्थिक-सर्वे
छत्तीसगढ़ म अवइया 1 अप्रैल ले ग्रामीण परिवार मनके सामाजिक अउ आर्थिक सर्वें सुरू होही। एखर सेती मुख्यमंत्री भूपेश बघेल ह मुख्य सचिव ल पंचायत अउ ग्रामीण विकास विभाग के माध्यम ले तैयारी सुरू करे के निरदेस दीन हे। ओमन सर्वे दल के गठन, जरूरी प्रसिक्षण, सर्वे म सामिल हितग्राहीमूलक योजना के नांव, सर्वे प्रपत्र के प्रारूप अउ सर्वे के बेरा मिले जानकारी इही महीना के 20 तारीख तक दे बर किहीन हे। सर्वे म बीते 12 बछर तक केन्द्र अउ राज्य सरकार के विकास कारज अउ ग्रामीण परिवार के जीवन म होय आर्थिक-सामाजिक परभाव के जानकारी सकेले जाही, जेखर ले चिन्हित पात्र परिवार मन ल सरकारी योजना के लाभ देवाय जा सकही।
बतादन कि मुख्यमंत्री ह विधानसभा म बछर 2011 ले देस म जनगणना नइ होय के सुरता देवावत छत्तीसगढ़ म सर्वे कराय के घोसना करे रिहीन, जेखर सुरूवात 1 अप्रैल ले होवइया हे।
आरएसएस-प्रतिनिधि सभा
राष्ट्रीय स्वयंसेवक संघ के अखिल भारतीय प्रतिनिधि सभा आज ले हरियाणा के पानीपत म सुरू होगे हे। सभा के सुभारंभ सर संघचालक डॉक्टर मोहन भागवत अउ सरकार्यवाह दत्तात्रेय होसबोले ह करीन। 14 मार्च तक चलइया ए सभा म देसभर ले 34 संगठन के 1400 ले जादा प्रतिनिधि भाग लेवत हे। सभा उपर गोठबात करत डॉक्टर मोहन भागवत ह किहीन कि संघ के लक्ष्य अवइया एक बछर म 1 लाख जघा तक पहुंचना हे।
विधिक जागरूकता-कार्यशाला
मुख्यमंत्री भूपेश बघेल ह आज रइपुर म छत्तीसगढ़ राज्य महिला आयोग के डहार ले आयोजित ‘विधिक जागरूकता प्रसिक्षण सिविर सह कार्यशाला‘ के सुभारंभ करीन। ए मउका म मुख्यमंत्री ह किहीन कि महिला मन ले जुड़े कतकोन बिसय उपर अपन दायित्व के निर्वहन करइया मनके कारज ए कार्यसाला ले अउ जादा निखरही। संगे बढ़िया तालमेल अउ सहयोग ले लक्ष्य ल झटकुन हासिल करे जा सकही। ए कार्यसाला म जउन मास्टर ट्रेनर्स तैयार करे जाही, ओमन महिला अपराध रोकथाम म अपन भूमिका निभाही।
कार्यक्रम म मुख्यमंत्री ह महिला आयोग के स्मारिका अउ ऑनलाइन सिकायत बर मोबाइल ऐप ‘छत्तीसगढ़ राज्य महिला आयोग‘ लॉन्च करीन। ए मउका म मुख्यमंत्री ह महिला मन ल अधिकार संपन्न, सुरक्षित अउ सशक्त बनाय के सपथ देवईन।
कार्यसाला ल संबोधित करत महिला अउ बाल विकास मंत्री अनिला भेंडिया ह किहीन कि बेरा के अनुरूप महिला अउ लइका मन ल अपन अधिकार के प्रति जागरूक होना जरूरी हे। महिला मन ल तुरते न्याय देवाय बर महतारी रथ के भ्रमण राज्यभर म कराय जावत हे। कार्यसाला म राज्य महिला आयोग के अध्यक्ष डॉक्टर किरणमयी नायक अउ बाल संरक्षण आयोग के अध्यक्ष तेजकुंवर नेताम घलो मौजूद रिहीन।
जवान-प्रमोशन
बस्तर संभाग म माओवादी मोर्चा म तैनात डीआरजी अउ सीएएफ के 77 जवान मनके ‘‘आउट ऑफ टर्न प्रमोसन‘‘ करे गीस हे। एमा 2 महिला कांस्टेबल घलो सामिल हे। एमा बीजापुर जिला म तैनात सबले जादा 21 जवान अउ दंतेश्वरी फाईटर के 2 महिला कांस्टेबल मन ल घलो प्रमोसन दे गेहे। राज्य म पहिली घांव महिला कांस्टेबल मन ल ए प्रमोसन दे गेहे।
बतादन कि सुकमा, दंतेवाड़ा, नारायणपुर अउ बस्तर जिला के थाना म पदस्थ ए जवान मन माओवादी मुठभेड़ म सामिल होके महत्वपूर्ण भूमिका निभाय रिहीन।
कांग्रेस-प्रदर्शन
केन्द्र सरकार के आर्थिक नीति के विरोध म कांग्रेस ह देसभर म प्रदर्सन करत हे। इही कड़ी म राजधानी रइपुर के अंबेडकर चउक म कांग्रेस कार्यकर्ता मन धरना-प्रदर्शन करही। एखर बाद राजभवन पहुंच के राज्यपाल ल ज्ञापन सौंपही। प्रदर्सन म अखिल भारतीय कांग्रेस कमेटी के महासचिव अउ छत्तीसगढ़ प्रभारी कुलारी सैलजा, मुख्यमंत्री भूपेश बघेल, प्रभारी सचिव चंदन यादव, सप्तगिरि शंकर उल्का समेत पीसीसी चीफ मोहन मरकाम होहीं सामिल।
मुख्यमंत्री-कलार महासभा
मुख्यमंत्री भूपेश बघेल ह आज रइपुर के साइंर्स कालेज मैदान म छत्तीसगढ़ कलार महासभा के महासम्मेलन म सामिल होइन। ए मउका म मुख्यमंत्री ह बहादुर माता कलारिन के जयंती म ऐच्छिक अवकाश अउ महुआ बोर्ड के स्थापना करे के घोसना करीन हे। ओमन किहीन कि उद्योग-व्यापार म कलार समाज ल कोनों नकार नइ सकय, फेर बिना सिक्षा के कोनों समाज आगू नइ बाढ़ सकय। हर समाज बर सिक्षा जरूरी हे।
एक भारत-श्रेष्ठ भारत
एक भारत-श्रेष्ठ भारत अभियान के तहत गुजरात ले आय पुलिस टीम ह जांजगीर-चांपा जिला के भ्रमण करीन। ए बेरा टीम ह शिवरीनारायण, खरौद मंदिर, मगरमच्छ संरक्षण पार्क के भ्रमण करीन अउ चांपा म कोसा उद्योग अउ कांस्य शिल्प के बारे म घलो जानकारी लीन।
बतादन ए अभियान के तहत गुजरात ले 15 पुलिस के टीम छत्तीसगढ़ आय हे।
महिला कांग्रेस-बैठक
रइपुर म काली प्रदेस महिला कांग्रेस कार्यकारिणी के बइठक होइस। बइठक ल महिला कांग्रेस के राष्ट्रीय अध्यक्ष नेट्टा डिसूजा ह संबोधित करीन। ओमन किहीन कि देस म बाढ़त महंगाई ल लेके महिला कांग्रेस ह बीजेपी सांसद मनके घर के आगू जाही अउ थाली बजाके विरोध-प्रदर्सन करहीं। ओमन किहीन कि छत्तीसगढ़ के सरकार ह बढ़िया कारज करत हे अउ छत्तीसगढ़ मॉडल के चरचा चारों मुड़ा होवत हे। ओमन बतईन कि पार्टी के नव-नियुक्त जिला अध्यक्ष मन ल वर्धा के सेवाग्राम म 3 दिवसीय प्रसिक्षण घलो दे जाही।
ए बइठक म छत्तीसगढ़ महिला कांग्रेस प्रभारी सुनीता सेहरावत, राज्यसभा सांसद अउ महिला कांग्रेस के प्रदेस अध्यक्ष फूलोदेवी नेताम के संग महिला पदाधिकारी मौजूद रिहीन।
एसईसीएल-कोयला उत्पादन
बिलासपुर जिला म सीपत के एसईसीएल कोयला खदान म उत्पादन 150 मिलियन टन के पार पहुंच गेहे। एसईसीएल सीपत म वित्तीय बछर के समाप्ति के तीन हफ्ता के पहिली जादा उत्पादन ले अधिकारी-कर्मचारी म भारी उछाह दिखिस। कंपनी ह बीते बछर के तुलना म ए दरी कोयला उत्पादन म लगभग 18 प्रतिसत के बढ़ोतरी दर्ज करे हे।
ए मउका म एसईसीएल के सीएमडी डॉक्टर प्रेमसागर मिश्रा अउ निदेशक मंडल ह जम्मों टीम ल बधाई दीन हे।
माओवादी-समर्पण
बलरामपुर जिला म 7 माओवादी मन पुलिस के आगू आत्मसमर्पण कर दीन। एमा 3 महिला माओवादी घलो सामिल हे। आत्मसमर्पण करइया ए सबो माओवादी मन छत्तीसगढ़, बिहार अउ झारखंड म लंबा बेरा ले सक्रिय रिहीन हे। ए सबो माओवादी मन बलरामपुर एसपी मोहित गर्ग के आगू आत्मसमर्पण करीन हे। उहें, पुलिस ह आत्मसमर्पित सबो माओवादी मन ल तुरते आर्थिक सहायता के रासि दीन अउ ओमन ल राज्य सासन के कतकोन योजना के लाभ देवाय घलो गोठ किहीन हें।
सेना-भर्ती
भारतीय सेना म जे.सी.ओ. अउ ओ.आर. बर भर्ती खातिर ए बेरा ऑनलाइन पंजीयन करे जावत हे। ए ऑनलाइन पंजीयन ’’ज्वाइन इंडियन आर्मी’’ वेबसाइट म होवत हे। पंजीयन कराय खातिर अब सिरिफ तीन दिन बांचे हे। पंजीयन कराय के आखिरी तारीख अवइया 15 मार्च हे। सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि भर्ती प्रक्रिया म उही उम्मीदवार सामिल हो सकही, जउन पंजीयन करवाय होही। सेना भर्ती कार्यालय ह जम्मों इच्छुक उम्मीदवार मन ल बतईन कि ए भर्ती प्रक्रिया निष्पक्ष हे अउ एमा, कोनों भी तरह के बाहरी हस्तक्षेप नई हो सकय।