राज्यपाल-एक साल
छत्तीसगढ़ के राज्यपाल अनुसुईया उइके के कामकाज के आज पहिली साल पूरा होगे। पाछु साल आजे के दिन सुश्री उइके ह छत्तीसगढ़ के राज्यपाल के रूप म पदभार संभाले रिहीन। ए मउका म सुश्री उइके ह ट्वीट करके एक बछर म प्रदेस के लोगन मन ले मिले मया उपर कृतज्ञता जताय हे।
राज्यपाल ह अपन ट्वीट म लिखे हवय कि ओमन ल जउन कामकाज सौंपे गेहे, ओला निभाय बर ओमन पूरा परयास करत हवय। उहें, मुख्यमंत्री भूपेश बघेल ह राज्यपाल के एक बछर के कामकाज पूरा होय उपर ओमन बधाई दे हवय।
ऐति, विधानसभा अध्यक्ष डाॅक्टर चरणदास महंत के संगेसंग नेता प्रतिपक्ष धरमलाल कौशिक ह घलो बधाई अउ सुभकामना दे हवय।
मुख्यमंत्री-चंदखुरी-कौशिल्या मंदिर
मुख्यमंत्री भूपेश बघेल ह किहीन हे कि माता कौशिल्या के जनम भूमि चंदखुरी म जल्दीच मंदिर बनाय जाही। मुख्यमंत्री ह आज चंदखुरी म मंदिर जाके पूजा-पाठ करीन अउ ओमन मंदिर के खूबसूरती के संगेसंग परिसर के विकास बर परियोजना के जानबा लीन।
ए मउका म मुख्यमंत्री ह किहीन कि दर्सन करे बर अवइया श्रद्धालु मनके सुविधा उपर बिसेस ध्यान दे जाही। मुख्यमंत्री ह किहीन कि चंदखुरी म पन्द्रह करोड़ रूपिया के लागत ले ए परिसर म कामकाज कराय जाही।
कोरोना मरीज
प्रदेस म आज घलो आने-आने जिला ले कोरोना संक्रमित नवा मरीज मिले के पुष्टि होय हे। राजधानी रईपुर म आज प्रदेस कांग्रेस कमेटी के अध्यक्ष अउ विधायक मोहन मरकाम के बंगला ले पांच झिन लोगन मन कोरोना पाॅजिटिव आय हे। जेमा मरकाम के भाई, उंखर गोसाईन के संगेसंग भतीजा के रिपोर्ट पाॅजिटिव आय हे।
ओति, कबीरधाम जिला म पाछु रतिहा पांच झिन नवा कोरोना मरीज मिले हे। त जांजगीर-चांपा जिला म मस्तुरी क्षेत्र के गांव रिसदा म एक झिन कोरोना संक्रमित मरीज मिले हे।
ऐति, कोरिया जिला के गांव तेंदुआ म एक झिन कोरोना संक्रमित मिले के पुष्टि होय हे।
उहें, राजनांदगांव जिला म पाछु रतिहा इक्कीस झिन नवा कोरोना संक्रमित मरीज के पहिचान करे गेहे, जेमा चैदह झिन आईटीबीपी के जवान सामिल हे।
लाॅकडाउन
महासमुंद जिला के तीन अउ नगरीय निकाय क्षेत्र मन म सरलग बाढ़त कोराना संक्रमण ल देखत लाॅकडाउन के बेरा ल छह अगस्त तक बर बढ़ा दे गेहे। एखर पहिली तीन ठिन सहर, महासमुंद, बागबाहरा अउ बसना म इकतीस जुलाई तक लाॅकडाउन लगाय गे रिहीस। अब जिला के तीन नवा नगरीय निकाय सरायपाली, पिथौरा अउ तुमगांव सीमा क्षेत्र म छह अगस्त तक लाॅकडाउन रइही।
ऐति, मुंगेली जिला म घलो लाॅकडाउन छह अगस्त तक बढ़ा दे गेहे। रक्षाबंधन ल देखत काली बिहनिया छह बजे ले दस बजे तक जम्मों किराना, मिठाई अउ राखी के दुकान खुल्ला रइही।
ओति, दुरूग जिला म जिला प्रसासन ह कोरोना संक्रमण ले निपटे बर पूरा तियारी करे हे। एखर बर प्रसासन ह सात्र सूत्रीय कारीकरम बनाय हे। जिला म टेस्टिंग के क्षमता ल बढ़ा दे गेहे। अब रोजे ग्यारह सौ टेस्ट होवत हे। टेस्टिंग बर टूª-नाॅट मसीन लगाय गेहे अउ संगेसंग घर-घर जा के सर्वे के अभियान घलो चलाय जात हे।
त उहें, राजनांदगांव म कोरोना संक्रमण ल देखत कलेक्टर ह जम्मों अधिकारी अउ करमचारी मन ल अपन-अपन पदस्थापना वाले जघा म रेहे के निरदेस दे हवय। आज लाॅकडाउन म प्रतिबंध के बाद सहर म चैदह ठिन दुकान खुल्ला रिहीस, जेला प्रसासन ह सील कर देहे अउ संगेसंग पुलिस ह जउन मनखे ह मास्क नइ लगाय रिहीस, उंखर मन उपर चलानी कार्रवाई करीन।
एनटीपीसी-उपलब्धि
देस के सबले बड़का विद्युत उत्पादक कंपनी एनटीपीसी ह काली नौ सौ ससत्तर मिलियन यूनिट ले जादा के उत्पादन करके नवा सफलता पाय हे। एनटीपीसी के पांच पावर स्टेसन छत्तीसगढ़ के लारा, कोरबा अउ सीपत, ओड़िसा के लालचेर कनिहा अउ हिमाचल प्रदेस के कोलडेम हाइड्रो ह बढ़िया प्रदर्सन करत पूरा के पूरा प्लांट लोड फैक्टर-पीएलएफ हासिल करे हे। एनटीपी के पाछु साल बारह मार्च के नौ सौ पैंतीस मिलियन यूनिट उत्पादन के रिकार्ड हवय।
रक्षाबंधन-डाक
अवइया तीन अगस्त के रक्षाबंधन के परब मनाय जाही। कोरोना संक्रमण के दउर म घलो डाक विभाग ह राखी मन ल बने बेरा म पहुंचावत हे। एखर बर बिलासपुर डिवीजन के डाकघर म एक ठिन स्पेशल गाड़ी चलाय जात हे। जउन ह बिलासपुर, रईपुर अउ नागपुर के बीच चलत हे। ए गाड़ी ह क्षेत्र के डाकघर मन म राखी मन ल पहुंचाय के काम करत हे। त उहें, बिलासपुर म डाक विभाग ह चार जघा म राखी सकेले बर पीला डब्बा लगाय हे।
मुठभेड़-जवान घायल
बीजापुर जिला म आज सुरक्षा बल अउ माओवादी मनके बीच होय मुठभेड़ म डिस्ट्रिक्ट रिजर्व गार्ड-डीआरजी के एक झिन जवान घायल होगे। घायल जवान ल अस्पताल म भर्ती कराय गेहे।
पुलिस अधीक्षक कमलोचन कश्यप ह घटना के पुष्टि करत बतईन कि बासागुड़ा थाना क्षेत्र ले जिला पुलिस अउ डीआरजी के टीम ह तलाशी अभियान म निकले रिहीन। इही दउरान आउटपल्ली के जंगल म पहिली ले घात लगाय बइठे माओवादी मन ह सुरक्षा बल मन उपर गोलीबारी सुरू कर दीन। दूनों कोति ले होय गोलीबारी म डीआरजी के एक झिन जवान घायल होगे। मुठभेड़ के बाद ए जघा म तलाशी अभियान सुरू कर दे गेहे।
ईद-कुर्बानी
प्रदेस म ईद के दिन कुर्बानी के छूट नइ राहय। समाचार पत्र मन म छपे ईद के दिन कुर्बानी बर छूट के खबर ल रईपुर जिला प्रसासन ह गलत बताय हे।
रईपुर कलेक्टर डाॅक्टर एस. भारतीदासन ह किहीन कि जिला म कोरोना संक्रमण ल रोके बर आदेस के पालन करना जम्मों लोगन मन ल जरूरी हे। कोनों भी परकार के पास जिला प्रसासन कोति ले नइ करे जाय। सासन के आदेस के पालन करत कम बेरा म ही पूरा कामकाज निपटाय बर पड़ही।
ओमन यहू बतईन कि छत्तीसगढ़ राज्य वक्फ बोर्ड डहार ले जारी अपन चिट्ठी म लाॅकडाउन के चलत नियम के पालन करत ईद के तिहार ल सादगी ले मनाय के अपील करे गेहे। वक्त बोर्ड के चिट्ठी म कोनों परकार के सार्वजनिक कारीकरम होय के जानबा नइ दे गेहे। ईदगाह मन म नमाज नइ पढ़े जाय। ईद मिलन के कारीकरम घलो नइ होवय। वक्फ बोर्ड डहार ले जारी अपील प्रदेस के जम्मों मस्जिद, ईदगाह अउ मदरसा मन बर हरय।
मौसम
मौसम विभाग ह अवइया चैबीस घंटा के दउरान के कोनों-कोनों जघा म भारी बरसा होय अउ एक-दू जघा म गरज-चमक के संग गाज गिरे के चेतावनी देहे।
मौसम विभाग के मुताबिक पश्चिम विदर्भ ले दक्षिण तटीय आंध्रप्रदेश तक तेलंगाना होवत एक ठिन द्रोणिका बने हे, जेखर सेती एक ठिन चक्रवाती घेरा उत्तर-पूर्व मध्यप्रदेश अउ ओखर तीर-तखार म बने हवय, जेखर असर ले प्रदेस के कतकोन जघा म हल्का ले मध्यम बरसा होवत हे।
ऐति, जांजगीर-चांपा जिला म शिवरीनारायण के गांव सलखन म खेत म काम करत एक झिन किसान उपर गाज गिरे ले उंखर मउत होगे।
अंतर्राष्ट्रीय बाघ दिवस
आज अंतर्राष्ट्रीय बाघ दिवस मनाय जात हे। बाघ मन ल ठीक-ठाक राखे के उद्देश्य ले लोगन मन म जागरूकता पैदा करे बर विश्व म हर साल उनतीस जुलाई के ए दिन ल मनाय जाथे। केन्द्रीय पर्यावरण मंत्री प्रकाश जावड़ेकर ह किहीन कि ताजा गणना के मुताबिक देस म बाघ मनके संख्या दू हजार नौ सौ सड़सठ हवय।
संक्षिप्त समाचार
अउ अब थोरकुन समाचार सार म-
– राज्य कृषक कल्याण परिषद के नवा अध्यक्ष सुरेन्द्र शर्मा ह आज रईपुर म अपन कामकाज संभालीन। ए मउका म कृषि अउ जल संसाधन मंत्री रविन्द्र चैबे ह ओमन ल बधाई अउ सुभकामना दीन।
– केन्द्रीय रिजर्व पुलिस बल-सीआरपीएफ के एक ठिन दल ह काली अखिल भारतीय आयुर्विज्ञान संस्थान-एम्स म रक्तदान करीन।
– राजनांदगांव जिला म अंबागढ़ चैकी के मालडोंगरी म जेसीबी लगाके गलत ढंग ले मुरूम निकलइया मनके खिलाफ कार्रवाई करे गेहे।
अउ
– महासमुंद पुलिस ह कोमाखान थाना क्षेत्र के टेमरी नाका के तीर गाड़ी चेंकिंग के दउरान छह लाख रूपिया के एक सौ तीस किलो गांजा बरामद करे हे। ए मामला म दू झिन लोगन मन ल गिरफ्तार करे गेहे।