केन्द्र सरकार ह कुछेक राज्य अउ केन्द्रसासित प्रदेस म सांस ले जुड़े बीमारी इंफ्लुएंजा के बाढ़त मामला के सेती सबो राज्य अउ केन्द्रसासित प्रदेस ल एक ठिन चिट्ठी लिखीन हे। केन्द्रीय स्वास्थ्य सचिव राजेश भूषण ह चिट्ठी म केहे हे कि इंफ्लुएंजा के मामला ल देखत श्वसन संबंधी एकीकृत निगरानी तंत्र के दिसा-निरदेस के पालन करना चाही। ओमन ह ए संबंध म राज्य मन ले आम लोगन के बीच जागरूकता फैलाय बर घलो किहीन। ओमन किहीन कि हाथ धोय बर अउ संक्रमण के रिपोर्ट जल्दी ले जल्दी दे जाय बर प्रोत्साहन दे जाना चाही। अस्पताल मन म दवा अउ ऑक्सीजन, कोविड अउ इंफ्लुएंजा वैक्सीन के पर्याप्त इंतजाम राखे बर किहीन। केन्द्रीय सचिव ह किहीन कि एकीकृत रोग निगरानी कार्यक्रम के इकाई मन ल सबो मामला के नमूना जांच बर भेजना चाही।
इही बीच, केंद्रीय स्वास्थ्य मंत्रालय एक ठन बयान म केहे हे कि ए बुखार ह इंफ्लुएंजा एच-थ्री एन-टू वायरस के सेती फइलत हे। लइका अउ सियान मन ल एखर ले जादा खतरा हे। भारतीय आयुर्विज्ञान अनुसंधान परिषद ह संक्रमण ले बांचे बर परामर्स जारी करे हे, जेमा केहे गेहे कि लोगन ल साबुन ल हाथ धोना चाही। एखर अलावा मास्क पहिनना चाही अउ भीड़भाड़ वाले जघा म नई जाना चाही। पीड़ित लोगन ल पर्याप्त मात्रा म तरल पदार्थ लेना चाही अउ बुखार अउ दरद रहे म पैरासिटामॉल लेना चाही।
मुख्यमंत्री-प्रधानमंत्री मुलाकात
छत्तीसगढ़ के मुख्यमंत्री भूपेश बघेल ह काली नई दिल्ली म प्रधानमंत्री नरेन्द्र मोदी ले मुलाकात करके जल्दी ले जल्दी जनगणना कराए के आग्रह करीन। ए दउरान श्री बघेल ह प्रधानमंत्री ले जीएसटी क्षतिपूर्ति, कोल रायल्टी संघरा आने-आने लंबित मांग उपर घलो चरचा करीन।
मुख्यमंत्री ह बतईन कि बछर दू हजार गियारा के बाद जनगणना नई होय ले हितग्राही मनके चयन म परेसानी आवत हे। कई झन पात्र हितग्राही मन योजना मनके फायदा ले वंचित होवत हे। ए संबंध म ओमन ह पहली घलो प्रधानमंत्री ल चिट्ठी लिखे रिहीन।
मुख्यमंत्री ह बतईन कि सितंबर महीना म जी-ट्वेंटी के चौथा स्थायी वित्त कार्य समूह के बइठका छत्तीसगढ़ म होवइया हे। एखर तियारी के बारे म प्रधानमंत्री ले गोठबात करे गीस। श्री बघेल ह बतईन कि जी-ट्वेंटी के पहुना मन बर विस्व स्तर के बेवस्था बर ओमन तियार हे।
भाजपा-घेराव
मोर आवास-मोर अधिकार के तहत भारतीय जनता पार्टी डहार ले अवइया पन्द्रह मार्च के रईपुर म विधानसभा के घेराव करे जाही। नेता प्रतिपक्ष नारायण चंदेल ह आज जांजगीर म राखे गे प्रेसवार्ता म बतईन कि मोर आवास-मोर अधिकार के तहत ए आंदोलन म भाजपा कार्यकर्ता मनके संगेच आवास योजना के हितग्राही मन घलो बड़ संख्या म सामिल होही। ओमन बतईन कि आवास के मुद्दा ल लेके भाजपा डहार ले चरणबद्ध आंदोलन करे जावत हे।
उहें, भाजपा विधायक बृजमोहन अग्रवाल अउ पार्टी के पदाधिकारी मन ह आज पार्टी कार्यालय एकात्म परिसर म प्रदेसव्यापी विधानसभा घेराव के पोस्टर के विमोचन करीन।
मुख्यमंत्री बाल उदय योजना
प्रदेस म बाल देख-रेख संस्था मन ले बाहर जाने वाला बालक-बालिका मनके पुनर्वास बर मुख्यमंत्री बाल उदय योजना सुरू करे जाही। राज्य सासन ह बाल संप्रेक्षण गृह ले बाहिर जाय के उमर ल अट्ठारा ले बढ़ाके इक्कीस बछर करत पुनर्वास योजना बनाय हे। एमा सिक्षा, कौशल विकास, रोजगार अउ आवास के संघरा बाल देखरेख संस्था ले बाहर जवइया अट्ठारह ले जादा उमर के लइका मन ल पुनस्थापित करे बर राज्य सरकार मदद दीही।
मुख्यमंत्री वृक्ष संपदा योजना
मुख्यमंत्री भूपेश बघेल इक्कीस मार्च के विश्व वानिकी दिवस के मउका म ‘‘मुख्यमंत्री वृक्ष संपदा योजना’’ के सुरूआत करही। ऐमा प्रदेसभर के हरके जिला म आयोजन कराए जाही। वाणिज्यिक वृक्षारोपण ल बढ़ावा दे खातिर छत्तीसगढ़ म मुख्यमंत्री वृक्ष संपदा योजना के तियारी जोर-सोर ले चलत हे। ए संबंध म मुख्य सचिव अमिताभ जैन ह प्रदेस के सब्बों कलेक्टर अउ वनमंडल अधिकारी मन ल चिट्ठी लिखके जरूरी तियारी करे के निरदेस दीन हे।
नगरीय निकाय-राशि
प्रदेस के सबो एक सौ सत्तर नगरीय निकाय म आने-आने विकास काम बर एक हजार करोड़ रूपिया के स्वीकृति के आदेस नगरीय प्रसासन विभाग डहा ले जारी कर दे गेहे। नगर निगम म रईपुर ल सौ करोड़ रूपिया, भिलाई ल साठ, बिलासपुर ल पचास, दुरूग ल पच्चीस, भिलाई-चरौदा, अंबिकापुर, जगदलपुर ल बीस-बीस, रिसाली, राजनांदगांव, रायगढ़, कोरबा ल पन्द्रह-पन्द्रह करोड़ अउ बीरगांव, धमतरी अउ चिरमिरी नगर निगम बर दस-दस करोड़ रूपिया के रासि मंजूर करे गेहे।
अइसने, सबो चवालीस नगर पालिका मन ल पांच-पांच करोड़ रूपिया अउ सबो एक सौ बारह नगर पंचायत बर तीन-तीन करोड़ रूपिया के रासि जारी करे गेहे।
सेना-भर्ती
भारतीय सेना म जे.सी.ओ. अउ ओ.आर. पद म भर्ती खातिर ए बेरा ऑनलाइन रजिस्ट्रेशन करे जावत हे। ए ऑनलाइन रजिस्ट्रेशन ’’ज्वाइन इंडियन आर्मी’’ वेबसाइट म होवत हे। रजिस्ट्रेसन कराय खातिर अब सिरिफ चार दिन बांचे हवय, जेखर आखिरी तारीख अवइया 15 मार्च हवय। सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि भर्ती प्रक्रिया म उहीच उम्मीदवार सामिल हो सकही, जउन मन अपन रजिस्ट्रेसन करवाय होही। सेना भर्ती कार्यालय ह जम्मों इच्छुक उम्मीदवार मन ल बतईन कि ए भर्ती प्रक्रिया पूरी तरह ले निष्पक्ष हवय। अउ एमा, कोनों भी तरह के बाहरी हस्तक्षेप नई हो सकय।
रायगढ़ पुलिस जन चेतना अभियान
रायगढ़ पुलिस डहार ले जन चेतना जागरूकता अभियान के सुरूवात करे गेहे। जिला के वरिष्ठ पुलिस अधीक्षक सदानंद कुमार ह धरमजयगढ़ अउ कापू थाना के सीमा के ग्राम खम्हार म एखर सुरूवात करीन। ए अभियान म लोगन ल साइबर ठगी ले बांचे के उपाय, नसा के दुष्पपरिणाम अउ यातायात नियम बर जागरूक करे जावत हे। जन चेतना सिविर म लोगन ल साइबर ठगी के बारे म बताय गीस कि ओमन ह अपन बैंक खाता, एटीएम, ओटीपी अउ दूसर व्यक्तिगत जानकारी कोनों भी अनजान व्यक्ति ल मोबाइल म सेयर झन करय। बैंक ले कभू ओटीपी या केवाईसी अपटेड बर फोन नइ करे जाय।
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन रिले करही। ए बखत के अंक म ‘‘कोरबा‘‘ जिला के गतिविधि के बारे म जानकारी दे जाही।
अउ अब थोरकुन समाचार सार म-
– विधानसभा अध्यक्ष डॉक्टर चरणदास महंत ह जांजगीर-चांपा जिला के नगर पंचायत सारागांव म विद्युत उप संभाग कार्यालय के सुभारंभ के संगेच करीबन पौने दू करोड़ रूपिया के आने-आने विकास काम के लोकार्पण अउ भूमिपूजन करीन।
– छत्तीसगढ़ राज्य हज कमेटी के चेयरमेन मोहम्मद असलम खान ह बतईन कि हज कमेटी ऑफ इंडिया मुंबई के सर्कुलर-चार ले मिले सूचना के अनुसार हज म जाय बर आवेदन के तिथि ल दस ले बढ़ाके बीस मार्च कर दे गेहे।
– पर्यटन ल बढ़ावा दे बर अउ पर्यटन गतिविधि ले जुड़े निजी अउ सासकीय संस्था मन ल फायदा देवाय खातिर छत्तीसगढ़ टूरिज्म बोर्ड डहार ले बिलासपुर म क्षेत्रीय कार्यालय सह-पर्यटन सूचना केन्द्र सुरू करे गेहे।
– मतांतरण के खिलाफ समाज ल जागरूक करे बर अउ सामाजिक समरसता बर संत मन डहार ले निकाले गे पदयात्रा काली राजनांदगांव पहुंचीस, जिहां जगह-जगह पदयात्रा के स्वागत करे गीस। ए दउरान महावीर चौक म धर्मसभा के आयोजन घलो करे गीस।
अउ
– राजनांदगांव जिला के ग्राम देववाड़वी-मुरेर के बीच मोटर साइकिल के पेड ले टकराय के सेती एक झिन मनखे के मउत होगे। उहें, इही जिला के दनगढ़ गांव म घलो दू फटफटी के बीच भिंड़त होय ले एक झिन मनखे के मउत होगे।