न्यायाधीश गौतम भादुड़ी ल छत्तीसगढ़ उच्च न्यायालय के कार्यवाहक मुख्य न्यायाधीश बनाय गेहे। राष्ट्रपति द्रौपदी मुर्मू ह आज छत्तीसगढ़ उच्च न्यायालय के मुख्य न्यायाधीश अरूप कुमार गोस्वामी के सेवानिवृत्ति के बाद वरिष्ठतम न्यायाधीश गौतम भादुड़ी ल कार्यवाहक मुख्य न्यायाधीश के रूप म नियुक्त करे हे। ए नियुक्ति काली ले प्रभावी होही।
गौरतलब हे कि केन्द्र सरकार ह पहली इलाहाबाद उच्च न्यायालय के न्यायाधीश रमेश कुमार सिन्हा ल छत्तीसगढ़ उच्च न्यायालय के मुख्य न्यायाधीश बनाय के अनुसंसा करे रिहीन। लेकिन आज छत्तीसगढ़ हाईकोर्ट म मुख्य न्यायाधीश अरूप कुमार गोस्वामी के बाद सबले वरिष्ठ न्यायाधीश गौतम भादुड़ी ल कार्यवाहक मुख्य न्यायाधीश बनाय के आदेस जारी करे गीस।
केन्द्रीय मंत्री-बस्तर
केन्द्रीय जनजातीय कार्य राज्यमंत्री विश्वेश्वर टुडू आज दंतेवाड़ा पहुंचीन। ए दउरान ओमन सर्किट हाउस म अधिकारी मनके बइठका लेके डीएमएफ अउ सीएसआर मद ले करे जात कार्य मनके समीक्षा करीन। संगेसंग ओमन जल जीवन मिशन के तहत सिंगल विलेज, मल्टी विलेज अउ अमृत सरोवर के बारे म जानकारी लीन। श्री टुडू ह अधिकारी मन ले पूछीन कि जिला म अब तक कतका ठन गांव तक पानी पहुंच गेहे। उहें, आश्रम-स्कूल मन म पढ़ाई अउ खेलकूद के उपलब्धि मनके संबंध म घलो जानकारी लीन। बइठका म ओमन केन्द्र सरकार डहार ले चलाय जात अलग-अलग योजना मनके बेहतर क्रियान्वयन करे के निरदेस दीन।
गौरतलब है कि केन्द्रीय राज्यमंत्री श्री टुडु काली ले बस्तर के तीन दिवसीय प्रवास म हावय।
राज्यपाल-कुलपति मुलाकात
राज्यपाल विश्वभूषण हरिचंदन ह विश्वविद्यालय के कुलपति मन ले विद्यार्थी मन ल गुणवत्तापूर्ण शिक्षा उपलब्ध कराय बर हरंसभव उपाय करे बर केहे हे। ए बात ओमन राज्य के अलग-अलग विश्वविद्यालय मनके कुलपति मन से मुलाकात के दौरान किहीन। ए दउरान राज्यपाल ह कुलपति मन ले विश्वविद्यालय के नैक ग्रेडिंग, शिक्षक अउ विद्यार्थी मनके संख्या सहित विभिन्न गतिविधि अउ समस्या मनके जानकारी लीन। ओमन अपन सचिव ल विभिन्न विश्वविद्यालय मनके लंबित दीक्षांत समारोह मनके जानकारी लेके जल्द ही समारोह के आयोजन करे बर किहीन। राज्यपाल ह किहीन कि विश्वविद्यालय मनके समस्या के संबंध म उनला राजभवन सचिवालय के माध्यम ले प्रतिवेदन प्रेषित करे जाय, ताकि उंखर निराकरण करे जा सकय।
राज्यपाल-पुलिस अधिकारी मुलाकात
राज्यपाल विश्वभूषण हरिचंदन ह आज राजभवन म नेताजी सुभाष चन्द्र बोस राज्य पुलिस अकादमी चंदखुरी रायपुर के निदेशक रतनलाल डांगी के नेतृत्व म भारतीय पुलिस सेवा के सात परिवीक्षाधीन अधिकारी मन ले मुलाकात करीन। ए दौरान राज्यपाल ह अधिकारी मन ले अपन कर्तव्य भली-भांति निभावत हुस देस अउ समाज के सेवा करे बर किहीन। ओमन किहीन कि पुलिस ल आम जनता संग मित्रवत व्यवहार करना चाही। संगेसंग पुलिस ल वंचित वर्ग के लोगन, आम जनता अउ विद्यार्थी मन से नियमित रूप ले मिलके उंखर समस्या जाने के प्रयास करना चाही। राज्यपाल ह किहीन कि दोषी मनके प्रति कठोर अउ निर्दोष मनके प्रति संवेदनापूर्वक काम करे ले पुलिस व्यवस्था के प्रति लोगन मनके विश्वास अउ जादा मजबूत होही।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत रायपुर म होय युवा-ट्वेंटी के सम्मेलन के संबंध म नेहरू युवा केन्द्र के निदेशक श्रीकांत पांडेय अउ यूथ ऑईकॉन प्रियंका बिस्सा के भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली ग्यारह मार्च के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
सेना-भर्ती
भारतीय सेना म जे.सी.ओ. अउ ओ.आर. पद म भर्ती खातिर ए बेरा ऑनलाइन रजिस्ट्रेशन करे जावत हे। ए ऑनलाइन रजिस्ट्रेशन ’’ज्वाइन इंडियन आर्मी’’ वेबसाइट म होवत हे। रजिस्ट्रेसन कराय खातिर अब सिरिफ पांच दिन बांचे हवय, जेखर आखिरी तारीख अवइया 15 मार्च हवय। सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि भर्ती प्रक्रिया म उहीच उम्मीदवार सामिल हो सकही, जउन मन अपन रजिस्ट्रेसन करवाय होही।
रजिस्ट्रेसन करवाय खातिर उम्मीदवार करा आधार कार्ड अउ दसवीं के सर्टिफिकेट होना जरूरी हवय। छत्तीसगढ़ राज्य के उम्मीदवार खातिर रायपुर, भिलाई-दुरूग अउ बिलासपुर म ऑनलाइन परीक्षा आयोजित करे जाही। ऑनलाइन सी.ई.ई. परीक्षा म सफल उम्मीदवार मन ल भर्ती रैली म सामिल होय के मउका मिलही।
जिहां, उंखर मनके शारीरिक दक्षता अउ स्वास्थ्य के स्थिति के आधार म ओमन ल अंक दे जाही। अंतिम मेरिट लिस्ट ऑनलाइन सी.ई.ई. अउ शारीरिक परीक्षा के अंक मन ल मिलाके तय करे जाही। सेना भर्ती कार्यालय ह जम्मों इच्छुक उम्मीदवार मन ल बतईन कि ए भर्ती प्रक्रिया पूरी तरह ले निष्पक्ष हवय। अउ एमा, कोनों भी तरह के बाहरी हस्तक्षेप नई हो सकय।
दुर्घटना
प्रदेस म बीते चौबीस घंटा के दउरान होय अलग-अलग सड़क दुर्घटना म बारह झिन के मउत होगे।
मिले जानकारी के अनुसार बालोद जिला म आज होय एक ठिन सड़क दुर्घटना म पांच झिन के मउत होगे। उहें, एक झिन गंभीर रूप ले घायल होगे हे। पुलिस के अनुसार डौंडी थाना क्षेत्र के ग्राम मरकाटोला करा भानुप्रतापपुर डहार ले आयरन भरके बालोद डहार जात ट्रक ह आगू ले आवत एक ठिन मोटर साइकिल अउ उंखर पीछू चलत कार ल जोरदार टक्कर मार दीस। ए हादसा अतका भीषण रिहीस कि कार अउ मोटर साइकिल के परखच्चा उड़ गे अउ ओमा सवार छह झिन के मउत होगे। गंभीर रूप ले घायल एक झिन मनखे ल डौंडी के अस्पताल म भर्ती कराय गेहे।
उहें, कोरिया जिला के कटघोड़ी गांव म दू ठन मोटर साइकिल के बीच जोरदार भिंड़त होय ले दू झिन के मउत होगे। इही जिला के बैकुंठपुर म दू ठन चारपहिया वाहन के भिंड़त होय ले एक झिन मउत होगे।
ऐति, सक्ती जिला के मालखरौदा थाना क्षेत्र के छपोरा गांव म ट्रक के चपेट म आय ले एक झिन छात्र के मउत होगे। बताय जात हे कि ग्राम कुरदा निवासी ए छात्र दसवीं के परीक्षा दे बर आय रिहीस।
उहें, राजनांदगांव जिला म देववाड़वी अउ मुरेर के बीच एक ठिन मोटर साइकिल पेड़ ले टकरा गे। ए हादसा म मोहला निवासी एक झिन के मउत होगे। इही जिला के ग्राम दनगढ़ म दू ठन मोटर साइकिल म भिंड़त होय ले एक झिन के मउका म ही मउत होगे। उहें, एक झन युवक गंभीर रूप ले घायल होगे।
ऐति, दुरूग जिला के भिलाई-सुपेला करा ट्रक के चपेट म आय ले साइकिल सवार एक झिन के मउत होगे।
जनपद पंचायत-चुनाव
धमतरी जनपद पंचायत म कांग्रेस के मनीषा साहू अध्यक्ष निर्वाचित होय हे। ओमन भाजपा समर्थित पूर्णिमा बनपेला ल आठ मत ले हरईन। मतदान म कांग्रेस समर्थित मनीषा साहू ल सोलह मत प्राप्त होय हे। उहें, पूर्णिमा बनपेला ल आठ वोट मिले हे। मतदान के दौरान कुल पच्चीस मे से चौबीस सदस्य मन मताधिकार के उपयोग करीन। जबकि पूर्व जनपद अध्यक्ष गुंजा साहू ह वोट डारे बर नइ पहुंचीन।
गौरतलब हे कि कांग्रेस अउ भाजपा के सदस्य मन मिलके पूर्व जनपद अध्यक्ष गुंजा साहू के खिलाफ अविश्वास प्रस्ताव लाय रिहीस।
अउ अब थोरकुन समाचार सार म-
– रेलवे स्टेसन के भीतरी अउ बाहरी क्षेत्र म हाईटेक सीसीटीवी कैमरा लगाय जाही। बिलासपुर रेंज के पुलिस महानिरीक्षक बद्रीनारायण मीणा ह आज रेंज के पुलिस अधीक्षक, रेलवे सुरक्षा बल अउ रेलवे पुलिस के वर्चुअल बइठका म ए संबंध म निरदेस दीन।
– कोरबा जिला के बांगो थाना क्षेत्र म पदस्थ एसआई नरेन्द्र लहरे के सव संदिग्ध परिस्थिति म मिले हे। पुलिस ह मामला के जांच करत हे।
अउ
– बीजापुर जिला के आवापल्ली-बासागुड़ा मार्ग म माओवादी मन पाछु रतिहा क्रशर प्लांट म तोड़फोड़ करे के बाद उहां आगी लगा दीन।