मुख्यमंत्री भूपेश बघेल ह आज दंतेवाड़ा प्रवास के दउरान फागुन मड़ई के अंतर्गत देवी-देवता के बिदाई समारोह म सामिल होईन। ए मउका म ओमन दंतेवाड़ा जिला के विकास बर कतकोन घोसना करीन। मुख्यमंत्री ह किहीन कि गीदम म बनईया मेडिकल कालेज के नामकरण मां दंतेश्वरी के नाम म करे जाही। ओमन किहीन कि दंतेवाड़ा ले जवईय्या शंखनी-डंकनी नदिया म रिवर फ्रंट बनाय जाही। ए मउका म श्री बघेल ह गीदम ल नवा राजस्व अनुभाग के दर्जा देके घोसना घलो करीन।
एखर, पहिली फागुन मड़ई म आज दंतेश्वरी समेत आने-आने देवी देवता मनके बिदाई ले जुड़े पारंपरिक रसम अउ विधान पूरा करे गीस। ए मड़ई म छत्तीसगढ़ के आने-आने क्षेत्र ले आय आदिवासी मनके संगे-संग ओड़िसा अउ तेलंगाना क्षेत्र के साढ़े आठ सौ ले जादा देवी-देवता ल बिदाई दे गीस।
मड़ई म सामिल होय के बाद मुख्यमंत्री ह मां दंतेश्वरी मंदिर घलो गीन उंहा देवी मां के पूजा-अर्चना कर प्रदेस के खुसहाली के कामना करीन। ए मउका म उद्योग मंत्री कवासी लखमा, बस्तर विधानसभा क्षेत्र के सांसद दीपक बैज अउ स्थानीय विधायक देवती महेन्द्र कर्मा समेत स्थानीय जनप्रतिनिधि घलो मौजूद रिहीन।
मुख्यमंत्री-दैनिक वेतनभोगी
मुख्यमंत्री भूपेश बघेल ह किहीन हे कि प्रदेस के जम्मों विभाग ले दैनिक वेतनभोगी अउ संविदा कर्मचारी मनके पूरा जानकारी मिले के बादेच एंखर सेवा मनके संबंध म कोनों फइसला ले जाही। आज दंतेवाड़ा जाय के पहिली रईपुर म पत्रकार मन ले गोठबात करत मुख्यमंत्री ह बतईन कि अभी तक चौंतीस विभाग ले दैनिक वेतनभोगी अउ संविदा कर्मचारी मनके संबंध म जानकारी मिले हे। उहें, आने-आने विभाग ले जानकारी मिलना बाकी हे। ओमन किहीन कि राज्य सरकार डहार ले संविदा कर्मचारी अउ दैनिक वेतनभोगी मनके सेवा के संबंध म विचार बर आने-आने समिति बनाय गे रिहीस। ए समिति मनके बइठका हो चुके हे। राज्य सरकार ह ए संबंध म कोनों भी फइसला लेके पहिली समिति के रिपोर्ट म घलो विचार करही।
हाईकोर्ट-शिक्षक
छत्तीसगढ़ उच्च न्यायालय ह सिक्षक मनके पदोन्नति के संबंध म अपन फैसला म केहे हे कि प्रधान पाठक ले व्याख्याता बने सिक्षक मन ल प्राचार्य के पद म पदोन्नति बर उंखर प्रधान पाठक के कार्यकाल ल घलो अनुभव म जोड़े जाय। ए संबंध म सिक्षक संगठन डहार ले दायर करे गे आने-आने याचिका के सुनवाई करत अदालत ह एक ठिन छोड़के जम्मों याचिका ल खारिज कर देहे।
खबर के मुताबिक राज्य सरकार ह पंचायत सिक्षक मनके पदोन्नति बर पांच बछर के समय-सीमा ल सिथिल करत तीन बछर कर दे रिहीस। राज्य सरकार के ए फइसला ल लेके कुछेक सिक्षक संगठन मन ह उच्च न्यायालय म याचिका लगाय रिहीस। एखर सेती सिक्षक मन ले जुड़े जम्मों पदोन्निति उपर लग गे रिहीस। करीबन तीन महीना पहिली उच्च न्यायालय ह आने-आने याचिका मनके आखिरी सुनवाई के बाद ए बिसय उपर अपन फैसला सुरक्षित राख ले रिहीस।
माओवादी मुठभेड़
सुकमा जिला म आज सुरक्षा बल अउ माओवादी मनके बीच मुठभेड़ होय के खबर मिले हे। जिला के पुलिस अधीक्षक सुनील शर्मा ह बतईन हे कि कोबरा बटालियन अउ एसटीएफ के जवान डब्बामर्का सिविल ले तलासी अभियान म निकले रिहीस हे। इही, दउरान माओवादी मन ह ओखर उपर गोलीबारी करीन।
सुरक्षा बल के जवाबी फायरिंग म पांच ले छै माओवादी मनके घायल होय के दावा करे गेहे। जवान मन ह बड़ मात्रा ले विस्फोटक अउ आने-आने जीनिस बरामद करे हे।
पुलिस अधीक्षक ह बतईन हे कि मुठभेड़ म कोबरा बटालियन के निरीक्षक मुनेश कुमार मीणा अउ आरक्षक अमित मोड़क ल चोट आय हे। जेला इलाज बर जिला मुख्यालय के अस्पताल म भेजे गेहे। ओमन बतईन हे कि सुरक्षा बल मनके वापसी बर कोबरा बटालियन, एसटीएफ अउ रिजर्व पुलिस के अलावा टुकड़ियों ल भेजे गेहे।
सोहन पोटाई-निधन
कांकेर लोकसभा क्षेत्र के पूर्व सांसद अउ वरिष्ठ आदिवासी नेता सोहन पोटाई के निधन होगे। रईपुर के एम्स अस्पताल म उंखर पाछु कुछ दिन ले इलाज चलत रिहीस हे। जिहां ओमन आखरी सांस लीन। श्री पोटाई बछर 1998 म पहिली घांव कांकेर लोकसभा सीट ले भाजपा के टिकट म चुने गे रिहीस हे। एखर बाद 1999, 2004 अउ 2009 म घलो ओमन भाजपा प्रत्यासी के रूप म कांकेर लोकसभा सीट ले जीत हासिल करे रिहीन। बाद म ओमन सर्व आदिवासी समाज के अध्यक्ष के रूप म आदिवासी मनके हित बर काम करीन।
राज्यपाल विश्वभूषण हरिचंदन अउ मुख्यमंत्री भूपेश बघेल ह श्री पोटाई के निधन म गहरा दुख जतईन हे। राज्यपाल ह दिवंगत आत्मा ल सांति देके संग ए दुख के बेरा म सोक परिवार वाले मन ल धीरज रखे बर ईश्वर ले प्रार्थना करीन।
उहें, मुख्यमंत्री ह अपन सोक संदेस म किहीन हे कि सोहन पोटाई ह आजीवन आदिवासी समाज के हित बर संघर्ष करीन। ओमन किहीन कि उंखर निधन पूरा प्रदेस बर एक अपूरणीय क्षति आय।
बिलासपुर के सांसद अउ प्रदेस भाजपा अध्यक्ष अरूण साव ह घलो घलो सोहन पोटाई के निधन म दुख व्यक्त करीन हे। सोक संदेस म श्री साव ह किहीन हे कि ओमन संसदीय कार्यकाल के बाद समाजसेवी के रूप म घलो आदिवासी समाज के सेवा म जुटे रिहीन। श्री साव ह किहीन कि श्री पोटाई के निधन ले आदिवासी समाज ह एक अच्छा नेता खो दीस।
सेना-भर्ती
भारतीय सेना म जे.सी.ओ. अउ ओ.आर. पद म भर्ती खातिर ए बेरा ऑनलाइन रजिस्ट्रेशन करे जावत हे। ए ऑनलाइन रजिस्ट्रेशन ’’ज्वाइन इंडियन आर्मी’’ वेबसाइट म होवत हे। रजिस्ट्रेसन कराय खातिर अब सिरिफ 06 दिन बांचे हवय जेखर आखिरी तारीख अवइया 15 मार्च हवय। सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि भर्ती प्रक्रिया म उहीच उम्मीदवार सामिल हो सकही, जउन मन अपन रजिस्ट्रेसन करवाय होही।
रजिस्ट्रेसन करवाय खातिर उम्मीदवार करा आधार कार्ड अउ दसवीं के सर्टिफिकेट होना जरूरी हवय। छत्तीसगढ़ राज्य के उम्मीदवार खातिर रायपुर, भिलाई-दुरूग अउ बिलासपुर म ऑनलाइन परीक्षा आयोजित करे जाही। ऑनलाइन सी.ई.ई. परीक्षा म सफल उम्मीदवार मन ल भर्ती रैली म सामिल होय के मउका मिलही।
जिहां, उंखर मनके शारीरिक दक्षता अउ स्वास्थ्य के स्थिति के आधार म ओमन ल अंक दे जाही। अंतिम मेरिट लिस्ट ऑनलाइन सी.ई.ई. अउ शारीरिक परीक्षा के अंक मन ल मिलाके तय करे जाही। सेना भर्ती कार्यालय ह जम्मों इच्छुक उम्मीदवार मन ल बतईन कि ए भर्ती प्रक्रिया पूरा तरह ले निष्पक्ष हवय। अउ एमा, कोनों भी तरह के बाहरी हस्तक्षेप नई हो सकय।
दुर्घटना
कबीरधाम जिला के सहसपुर लोहारा क्षेत्र म होय सड़क हादसा म दू झिन भाई मनके मउकाच म मउत होगे। ए दुर्घटना त तब होईस जब लोहार जावत बेरा गलत दिसा ले आवत एक ठिन गाड़ी ह उंखर फटफटी ल अपन चपेट म ले लीस। ए हादसा म दूनों भाई के मउकाच म मउत होगे।
उहें, जांजगीर-चांपा जिला के बनारी गांव म स्पीड ब्रेकर के तीर एक ट्रैक्टर के पीछू फटफटी टकरा गे। ए हादसा म फटफटी म बइठे एक झिन युवक के मउका म मउत होगे। उहें, युवक के भाई गंभीर रूप ले घायल होगे हे, जेला जिला अस्पताल म भर्ती कराय गेहे। ए दूनों भाई होली मनाके घर लहुटत रिहीस।
अउ अब थोरकुन समाचार सार म-
– नेहरू युवा केन्द्र डहार ले जगदलपुर के कुम्हरावण्ड स्थित कृषि महाविद्यालय म जिला स्तरीय युवा उत्सव के आयोजन करे जाही।