आज अंतर्राष्ट्रीय महिला दिवस मनाय जावत हे। माईलोगिन मनके समाजिक, आर्थिक, राजनीतिक अउ सांस्कृतिक उपलब्धि मनके जशन मनाय खातिर हर बछर 8 मार्च के वैश्विक स्तर म अंतर्राष्ट्रीय महिला दिवस मनाय जाथे।
अंतर्राष्ट्रीय महिला दिवस के मउका म प्रधानमंत्री नरेन्द्र मोदी ह देश के नारी शक्ति के उपलब्धि मन खातिर कृतज्ञता व्यक्त करिन हवय। अपन एक ठीन ट्वीट संदेश म श्री मोदी ह नवा भारत खातिर नारी शक्ति के महत्व उपर जोर देवत किहीन हे कि देस के आगू बाढ़े म माईलोगिन मनके बहुत सुघ्घर भूमिका हवय। ओमन किहीन कि सरकार महिला सशक्तिकरण खातिर काम करत रइहीं। अंतर्राष्ट्रीय महिला दिवस के मउका म आज राजधानी रायपुर समेत प्रदेस म आने-आने कारीकरम के आयोजन करे जावत हवय।
होली-01
रंग, प्रेम अउ खुसी के तिहार होरी आज प्रदेस के जम्मों जघा म पारंपरिक तरीका ले बड़ उछाह के संग मनाय जावत हे। जम्मों प्रदेस बड़ उछाह अउ उल्लास के रंग म डूबे हवय। दिनभर लोगन मन ह रंग के मस्ती म डूबे रिहीन। जगह-जगह नगाड़ा के थाप अउ फाग गीत सुनाई देवत हे। सहर हो या गांव, जम्मों जगह बिहनिया ले होरी के टोली मन घूम-घूम के एक-दूसर ल रंग अउ गुलाल लगाके बधाई देवत हवय। आज बिहनिया लइका अउ युवा मन जम्मों चउक-चउराहा म अवइया-जवइया मनखे मन उपर पिचकारी अउ रंग गुलाल छिछके होरी के आनंद लेवत रिहीन।
उहें, आने-आने सामाजिक संस्था मन ह पर्यावरण जागरूकता के चलत मनखे मन ल सूखा होरी खेले बर प्रेरित करीन। ए संस्था के कार्यकर्ता अउ पदाधिकारी मन गुलाल लगाके एक-दूसर ल होरी के बधाई दीन।
छत्तीसगढ़ म बस्तर ले सरगुजा तक होरी के आने-आने तरीका के रंग नजर आवत हे। बस्तर म ए दारी हमेसा के जइसन होली म जनजातीय संस्कृति अउ परंपरा मनके आने-आने झलक देखे ल मिलीस। बस्तर म होरी के सुरूवात दंतेवाड़ा के फागुन मेला ले होथे। ए परंपरा के अनुसार सुद्ध माटी अउ पलास के फूल ले बने रंग ल दंतेश्वरी देवी अउ, मेला म प्रतीकात्मक रूप ले आय बड़ अकन देवी-देवता ल चढ़ाय जाथे। ए मउका म सांकेतिक होरी बारे जाथे। उहें, फागुन मेला के दूसर दिन बस्तर के पहला होरी माड़पाल म बारे जाथे। प्रदेस म पुलिस प्रसासन डहार ले चउक-चउराहा मन म कड़ा निगरानी राखे गे रिहीस।
होली-02
होरी के मउका म राष्ट्रपति द्रौपदी मुर्मू, उप राष्ट्रपति जगदीप धनखड़ अउ प्रधानमंत्री नरेन्द्र मोदी ह देसवासी मन ल बधाई दीन। राष्ट्रपति ह एक संदेश म कीहिन कि होरी स्नेह अउ आपसी भाईचारा के तिहार हरय अउ हमर आने-आने समाज के जीवंत रंग अउ सौहार्द के प्रतीक हरय। उपराष्ट्रपति ह होरी ल जीवन के उत्सव बतावत किहीन कि होली के रंग देस के समृद्धि, संस्कृति अउ विविधता के याद दिलाथे। उंहे, प्रधानमंत्री ह अपन एक ठिन ट्वीट म कामना करीन कि सबो झन के जीवन म खुसी अउ उछाह के रंग हमेशा भरे रहाय।
छत्तीसगढ़ के राज्यपाल विश्वभूषण हरिचंदन अउ मुख्यमंत्री भूपेश बघेल ह घलो आम लोगन मन ल रंग के तिहार होरी के हार्दिक बधाई अउ अपन सुभकामना दीन।
तबादला
राज्य शासन ह जनसंपर्क विभाग के 25 झिन अधिकारी मनके तबादला करीस हे। जारी आदेस के मुताबिक जनसंपर्क संचालनालय रायपुर के संयुक्त संचालक संतोष मौर्य ल राज्य सूचना आयोग नवा रायपुर म प्रतिनियुक्ति म भेजे गे हवय। उंहे, सहायक संचालक विवेक कुमार सरकार के राजभवन ले सम्बद्धता खतम करत ओला जनसंपर्क संचालनालय रायपुर के जिम्मेदारी सौंपे गीस हे।
अइसनेच दुरूग के सहायक संचालक सौरभ शर्मा अउ जगदलपुर म उपसंचालक छगनलाल लोन्हारे ल जनसंपर्क संचालनालय रायपुर म पदस्थ करे गीस हे। जिला जनसंपर्क कार्यालय धमतरी के उपसंचालक इस्मत जहां दानी ल राज्य निर्वाचन आयोग रायपुर म प्रतिनियुक्ति दे गे हवय। एखरे संगे-संग नीलिमा अग्रवाल, रंजीत पुजारी, मृगेन्द्र सिंह सोरी, संगीता लकड़ा, सुनील त्रिपाठी समेत आने-आने अधिकारी मनके प्रभार मन म घलो फेर बदल करे गे हवय।
सेना-भर्ती
भारतीय सेना म जे.सी.ओ. अउ ओ.आर. पद म भर्ती खातिर ए बेरा ऑनलाइन रजिस्ट्रेशन करे जावत हे। ए ऑनलाइन रजिस्ट्रेशन ’’ज्वाइन इंडियन आर्मी’’ वेबसाइट म होवत हे। रजिस्ट्रेसन कराय खातिर अब सिरिफ 07 दिन बांचे हवय जेखर आखिरी तारीख अवइया 15 मार्च हवय। सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह बतईन कि भर्ती प्रक्रिया म उहीच उम्मीदवार सामिल हो सकही, जउन मन अपन रजिस्ट्रेसन करवाय होही।
रजिस्ट्रेसन करवाय खातिर उम्मीदवार करा आधार कार्ड अउ दसवीं के सर्टिफिकेट होना जरूरी हवय। छत्तीसगढ़ राज्य के उम्मीदवार खातिर रायपुर, भिलाई-दुरूग अउ बिलासपुर म ऑनलाइन परीक्षा आयोजित करे जाही। ऑनलाइन सी.ई.ई. परीक्षा म सफल उम्मीदवार मन ल भर्ती रैली म सामिल होय के मउका मिलही।
जिहां, उंखर मनके शारीरिक दक्षता अउ स्वास्थ्य के स्थिति के आधार म ओमन ल अंक दे जाही। अंतिम मेरिट लिस्ट ऑनलाइन सी.ई.ई. अउ शारीरिक परीक्षा के अंक मन ल मिलाके तय करे जाही। सेना भर्ती कार्यालय ह जम्मों इच्छुक उम्मीदवार मन ल बतईन कि ए भर्ती प्रक्रिया पूरा तरह ले निष्पक्ष हवय। अउ एमा, कोनों भी तरह के बाहरी हस्तक्षेप नई हो सकय।
सहकारिता मंत्री-समीक्षा
सहकारिता मंत्री डॉक्टर प्रेमसाय सिंह टेकाम ह प्रदेस के सहकारी बैंक मन म एटीएम के स्थापना अउ समिति मन म गोदाम निर्माण के काम निर्धारित समय सीमा म पूरा करे के निरदेस दीन हे। ए बात डॉक्टर टेकाम ह रायपुर म होय सहकारिता विभाग के समीक्षा बईठका म किहीन। बईठका के अधिकारी मन ह बतईन कि प्रदेस म सहकारी बैंक के करीबन 325 शाखा हवय। जेमा, 145 एटीएम संचालित हवय। अधिकारी मन ह बतईन कि 115 नवा एटीएम लगाय जाना हे। जेमा ले अब तक 42 एटीएम के स्थापना हो चुके हे। एला लेके डॉक्टर टेकाम ह बांचे 73 एटीएम के संगे-संग 725 सहकारी समिति मन म माइक्रो एटीएम 30 अप्रेल तक लगाय के निरदेस दीन।
माओवादी समाचार
कांकेर जिला म आई.ई.डी. के चपेट म आए ले एक झिन ग्रामीण के मउत होगीस। जानबा के मुताबिक माओवादी मन ह ए आई.ई.डी. ल जवान मन बर निशाना बनाय खातिर लगाय रिहीन।
ओति, धमतरी जिला के खल्लारी थाना क्षेत्र म माओवादी मन ह पाछु रतिहा एक झिन ग्रामीन के गला रेत के हत्या कर दीन। पुलिस अधिक्षक प्रशांत ठाकुर ह बतईन कि मारे गीस ग्रामीण चमेदा गांव के रहइया रिहीस। घटना के बाद पुलिस ह इलाका म सर्चिंग बढ़ा दे हवय।
एति, सुकमा जिला म पोंगा-भेज्जी गांव के सरपंच के हत्या के मामला म पुलिस ह आपसी दुश्मनी के संका जताय हवय। पुलिस के मुताबिक पोंगा-भेज्जी के सरपंच के 3 दिन पहिली लेनदेन ल लेके कोनों मनखे ले विवाद होय रिहीस ओमन बतईन कि सरपंच के हत्या के बाद ओखर दू पहिया गाड़ी ल घलो आगी लगा दे गे रिहीस।
आईबी चीफ-बैठक
सुकमा जिला के माओवाद प्रभावित एलमागुंडा कैम्प म इंटेलीजेंस ब्यूरो के निदेसक तपन डेका ह अधिकारी मनके बइठका लीन। ए दउरान ओमन हाल ही म सुकमा जिला म खोले गे सुरक्षाबल के नवा कैम्प के सुरक्षा के संगे-संग माअेवादी मनके खिलाफ चलाए जावत अभियान के समीक्षा घलो करीन। बइठका म छत्तीसगढ़ के डी.जी.पी. अशोक जुनेजा घलो उपस्थित रिहीन।
खेलकूद प्रतियोगिता
हरियाणा के पंचकूला म 10 ले 14 मार्च तक 26़वीं अखिल भारतीय वन खेलकूद प्रतियोगिता के आयोजन करे जाही। एमा, छत्तीसगढ़ के दू सौ ले जादा खिलाड़ी मन भाग लिंही। ए स्पर्धा म बैडमिंटन, क्रिकेट, एथलेटिक्स, बास्केटबॉल, फुटबॉल, तैराकी अउ टेनिस जइसन खेल मन ल सामिल करे गे हवय।
अउ अब थोरकुन समाचार सार म-
– मुंगेली जिला परसासन हा नर्सिंग एक्ट के पालन नई करे के आरोप मं एक ठिन अस्पताल के लाइसेंस रद्द कर दे हे।
– जांजगीर-चांपा जिला के नैला तीर रेलगाड़ी के चपेट म आए ले एक झिन मनखे के मउत होगे।
अउ
– दुरूग जिला के खुर्सीपार इलाका में दो गुट मन के बीच होय मारपीट म एक झिन मनखे के चाकू मारके हतिया कर दे गीस।