अखिल भारतीय आयुर्विज्ञान संस्थान-एम्स रईपुर के पहिली दीक्षांत समारोह आज होईस। ए मउका म केन्द्रीय स्वास्थ्य अउ परिवार कल्याण राज्यमंत्री डॉक्टर भारती प्रवीण पवार ह किहीन कि कोरोना महामारी के दउरान अउ ओखर बाद घलो एम्स रईपुर ह तीन हजार ले जादा मरीज मनके इलाज करे हे। डॉक्टर पवार ह बतईन कि एम्स रईपुर म न सिरिफ छत्तीसगढ़ के मरीज मनके इलाज होवत हे। फेर, पड़ोसी राज्य महाराष्ट्र, ओड़िसा, मध्यप्रदेश, उत्तरप्रदेश, झारखंड के अलावा पंजाब के मरीज मन घलो एम्स रईपुर पहुंचत हे। ओमन बतईन कि अभी तक बत्तीस लाख ले जादा मरीज मनके इलाज एम्स रईपुर म करे गेहे अउ हर दिन करीबन तीन हजार ले जादा मरीज मनके इलाज ओपीडी म करे जावत हे। ओमन बतईन कि इलाज के संग एम्स रईपुर म रिसर्च के काम घलो बड़े पैमाना म करे जावत हे। एम्स रईपुर ह राष्ट्रीय स्तर के एक हजार ले जादा सोध पत्र प्रस्तुत करीन हे।
ए मउका म केन्द्रीय राज्यमंत्री ह एम्स रईपुर म दंत चिकित्सा विभाग के सुरूवात घलो करीन।
दीक्षांत समारोह म आठ सौ पचास विद्यार्थी मन ल डिग्री प्रदान करे गीस। उहें, दस विद्यार्थी मन ल गोल्ड मेडल ले सम्मानित करे गीस। कार्यक्रम म सांसद अरूण साव, सुनील सोनी अउ सरोज पांडेय के अलावा केन्द्रीय स्वास्थ्य सचिव राजेश भूषण, स्वास्थ्य सेवा के महानिदेशक प्रोफेसर डॉक्टर अतुल गोयल, केन्द्रीय स्वास्थ्य मंत्रालय के अतिरिक्त सचिव अउ आर्थिक सलाहकार जयदीप कुमार मिश्रा मौजूद रिहीन।
उहें, केन्द्रीय राज्यमंत्री ह रईपुर के पचपेड़ी नाका के केन्द्र सरकार के क्षेत्रीय कुष्ठ प्रशिक्षण अउ अनुसंधान संस्थान के दोबार बने ऑपरेसन थियेटर के घलोक लोकार्पण करीन। एखर पहिली, डॉक्टर पवार ह सहर के राजातालाब के हेल्थ एंड वेलनेस सेंटर अउ जिला अस्पताल के पैथालॉजी सेंटर के अवलोकन करीन।
केन्द्र-दिशा/निर्देश
केन्द्र सरकार ह मशहूर हस्ती, सोसल मीडिया म काम करइया अउ वचुअर्ल प्लेटफॉर्म के माध्यम ले लोगन के बीच प्रभाव बनाने वाला मन बर दिसा-निरदेस जारी करीन हे। ‘‘प्रचार-जाने कैसे‘‘ नाव के ए दिसा-निरदेस के उद्देश्य ए निश्चित करना हे कि उत्पाद अउ सेवा के पक्ष म प्रचार करत खानी ए मन ह अपन दर्सक ल भटकावय झन अउ उपभोक्ता संरक्षण अधिनियम के अनुपालन करयं। दिसा-निरदेस म केहे गे हवय कि प्रचार के भासा सरल अउ स्पष्ट होना चाही। सर्त म विज्ञापन, प्रायोजित सहयोग अउ सुल्क के संग प्रचार जइसन सब्द के उल्लेख होना चाही।
स्कूल शिक्षा-पुरस्कार
छत्तीसगढ़ म स्कूल सिक्षा के क्षेत्र म निकलर ऐप डहार ले पढ़ाई कराय बर स्कूल सिक्षा विभाग ल एमबिलियंथ पुरस्कार ले सम्मानित करे गेहे। छत्तीसगढ़ ल ए अवॉर्ड काली छह मार्च के नई दिल्ली म राखे गे कारीकरम म दे गीस। मुख्यमंत्री भूपेश बघेल अउ स्कूल सिक्षा मंत्री डॉक्टर प्रेमसाय सिंह टेकाम ह सिक्षा के क्षेत्र म सिक्षा के क्षेत्र म ए उपलब्धि बर स्कूल सिक्षा विभाग के प्रमुख सचिव डॉक्टर आलोक शुक्ला संघरा विभाग के पूरा टीम ल बधाई दीन हे।
खबर के मुताबिक साउथ एसिया म एमबिलियंथ अवॉर्ड मोबाईल के माध्यम ले आम जनता तक तकनीक के उपयोग करके जीवन ल सरल बनाय के दिसा म करे जावत प्रयास ल सम्मानित करथे। एखर सुरूवात बछर दू हजार दस म करे गे रिहीस।
अंतर्राष्ट्रीय महिला दिवस
काली अंतर्राष्ट्रीय महिला दिवस हे। ए मउका म प्रदेस म कतकोन कार्यक्रम कराय जाही। राज्यपाल विश्वभूषण हरिचंदन अउ मुख्यमंत्री भूपेश बघेल ह सबो माईलोगिन संघरा प्रदेस के जनता ल बधाई अउ सुभकामना दीन हे। राज्यपाल ह किहीन कि आज माईलोगिन मन ह अपन योग्यता, प्रतिभा अउ क्षमता के बल म हर क्षेत्र म सफलता के नवा कीर्तिमान बनईन हे। माईलोगिन मन ह देस के विकास म पूरा योगदान देवत हे। हमन ल नोनी मन ल सिक्षित करे बर अउ माईलोगिन मनके सम्मान बर हमेसा संकल्पित होना चाही।
उहें, महिला अउ बाल विकास मंत्री अनिला भेंडिया ह घलो अंतर्राष्ट्रीय महिला दिवस म सबो माईलोगिन मन ल अपन सुभकामना दीन हे।
सेना-भर्ती
भारतीय सेना म जे.सी.ओ. अउ ओ.आर. पद म भर्ती बर अभी ऑनलाइन रजिस्ट्रेशन होवत हे। ए ऑनलाइन रजिस्ट्रेशन ज्वाइन इंडियन आर्मी वेबसाइट म होवत हे। रजिस्ट्रेसन बर अब सिरिफ आठ दिन बाचे हे। पंजीयन करवाय के आखिरी तारीख अवइया पन्द्रह मार्च हे। सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह आज मीडिया ले गोठबात करत बतईन कि भर्ती प्रक्रिया म उही उम्मीदवार सामिल हो सकही, जउन मन अपन रजिस्ट्रेसन करवाय हे।
रजिस्ट्रेसन करवाय बर उम्मीदवार तीर आधार कारड अउ दसवीं के सर्टिफिकेट होना जरूरी हे।
होलिका दहन
प्रेम, भाईचारा अउ रंग के तिहार होली काली मनाये जाही। एखर पहिली आज रतिहा होलिका दहन घलो करे जाही। राजधानी रायपुर संघरा प्रदेश के आने आने जिला म एखर बर तियारी कर ले गेहे। ए बखत जागरूकता के सेती कतकोन जगा म लकड़ी के बदला छेना-कंडा के होली जलाये के तियारी करे गे हावय। उहें, कुछेक जघा म काली रतिहा होलिका दहन करे गीस।
ओति, बस्तर के रियासतकालीन होलिका दहन पंरपरानुसार पाछु रतिहा सबले पहिली माड़पाल गांव म मनाय गीस। एखर बाद जगदलपुर के मावली माता मंदिर के आगू पंरपरा अनुसार होलिका दहन करे गीस।
इस बीच, सासकीय आयुर्वेदिक कॉलेज रईपुर के सह-प्राध्यापक डॉक्टर संजय शुक्ला ह रंग के ए तिहार ल सावधानी अउ सुरक्षा के संग मनाय के अपील करीन। ओमन बतईन कि ए बखत वातावरण म कतकोन पराग कण मौजूद रहिथे, जउन मन एलर्जी पैदा करथे। एखर सेती होलिका दहन म अगरू, आम, साल, नीम के सूखा टहनी अउ गुगुल, कपूर जइसन आयुर्वेदिक जड़ी-बड़ी के उपयोग हवन के रूप म करना चाही, जेखर ले वातावरण संक्रमण रहिथ हो सकय। डॉक्टर शुक्ला ह बतईन कि होली तिहार के दउरान लोगन ल रंग-गुलाल के संग खान-पान म लापरवाही के सेती कतकोन घांव तकलीफ झेले बर लगथे। ए बखत बाजार म मिलइया रंग अउ गुलाल म केमिकल रहिथे, जउन ह नुकसानदायक हो सकत हे। एखर सेती रंग के चयन म सावधानी बरते के जरूरत हे।
राज्यपाल विश्वभूषण हरिचंदन अउ मुख्यमंत्री भूपेश बघेल ह प्रदेशवासी मन ल होली के बधाई अउ शुभकामना दीन हे। राज्यपाल ह किहीन हे कि होली के तिहार देस के एकता ल मजबूत करे म अउ भाईचारा के भावना ल बढ़ाय म अपन बड़े भूमिका निभाथे। उहें, मुख्यमंत्री ह लोगन ले सुरिक्षत होली मनाय के अपील करीन हे।
प्रदेस भाजपा अध्यक्ष अरूण साव अउ नेता प्रतिपक्ष नारायण चंदेल ह घलो प्रदेसवासी मन ल होली तिहार के सुभकामना दीन हे।
होली-पुलिस बल तैनात
इही बीच, होली परब के दउरान कोनों भी अप्रिय घटना ल रोके बर पुलिस ह प्रदेसभर म सुरक्षा के कड़ा इंतजाम करे हे। संवेदनसील जघा म पुलिस अउ नगर सेना के जवान मन ल तैनात करे गेहे। उहें, पुलिस पेट्रोलिंग गाड़ी घलो प्रमुख रद्दा म सरलग घुमत हे।
इही कड़ी म दुरूग पुलिस ह होली अउ सबे-बारात म सांति व्यवस्था बनाय राखे बर आज फ्लैग मार्च निकालीन, जउन सहर के आने-आने रद्दा ले होके निकलीन।
ऐति, जांजगीर-चांपा जिला म असामाजिक तत्व मन उपर कार्रवाई बर बाज पुलिस टीम बनाय गे हवय। एमा महिला पुलिस मन ल घलो सामिल करे गेहे। संगेसंग पुलिस ह सहर म सांति व्यवस्था बनाय राखे बर फ्लैग मार्च घलो निकालीस।
अउ अब थोरकुन समाचार सार म-
– राज्य सहकारी निर्वाचन आयोग के आदेस म आंशिक संसोधन करत सहकारी संस्था मनके निर्वाचन के काम बर निर्धारित प्रक्रिया सुल्क म बढ़ोतरी करे गेहे। ए बढ़ोतरी अवइया इकतीस मार्च के बाद सरलग प्रस्तुत होवइया निर्वाचन प्रस्ताव उपर लागू होही।
– प्रदेस के इंडियन रेडक्रॉस सोसायटी डहार ले रईपुर के स्वामी विवेकानंद विमानतल कर्मी मन बर फर्स्ट-एड उपर तीन दिन के प्रसिक्षण कराय गीस।
– रईपुर के कचना इलाका म आज एक ठिन मोटर साइकिल के खाली प्लॉट म गिरे ले एमा बइठे दू झिन युवक मनके मउकाच म मउत होगे।
अउ
– धमतरी जिला के चारभाठा गांव म हाथी के हमला म एक झिन मनखे के मउत होगे।