मुख्यमंत्री भूपेश बघेल काली छह मार्च के मंझनिया साढ़े बारह बजे विधानसभा म अवइया वित्तीय बछर बर ई-बजट पेस करही। ए बजट भासन ल दूरदर्शन अउ आकाशवाणी ले सोझे प्रसारित करे जाही।
इहां ए बतादन कि छत्तीसगढ़ विधानसभा के बजट सत्र एक मार्च ले चालू होय हे, जउन ह अवइया चौबीस मार्च तक चलही।
एम्स-दीक्षांत समारोह
अखिल भारतीय आयुर्विज्ञान संस्थान एम्स रईपुर के पहलइया दीक्षांत समारोह अवइया सात मार्च के राखे गेहे। ए दीक्षांत समारोह के माईपहुना केन्द्रीय स्वास्थ्य अउ परिवार कल्याण राज्यमंत्री डॉक्टर भारती प्रवीण पवार होही। ए मउका म सांसद सुनील सोनी, अरूण साव अउ सरोज पांडेय विशिष्ट पहुना रूप म सामिल होही। एम्स रईपुर के निदेसक प्रोफेसर डॉक्टर नितिन एम. नागरकर ह आज पत्रकार मन ले गोठबात करत बतईन कि दीक्षांत समारोह बेरा मेडिकल नर्सिंग अउ स्नातकोत्तर पाठ्यक्रम के करीबन आठ सौ पचास झिन विद्यार्थी मन ल डिग्री दे जाही। संगे दस झिन मेधावी विद्यार्थी मन ल गोल्ड मेडल घलो दे जाही। दीक्षांत समारोह बेरा जउन पढ़ के निकले लइका मन ल डिग्री मिलही, ओमा पांच ठिन बैच के चार सौ पच्चीस झिन चिकित्सा स्नातक, दू सौ बयानवे झिन नर्सिंग विद्यार्थी, एक सौ बीस झिन पीजी विद्यार्थी, आठ झिन एम.एस.सी. नर्सिंग विद्यार्थी अउ पांच झिन मास्टर ऑफ पब्लिक हेल्थ पाठ्यक्रम के विद्यार्थी सामिल रइही।
ए मउका म एम्स रईपुर के डीन एकेडमिक प्रोफेसर आलोक चंद्र अग्रवाल ह बतईन कि ए संस्थान म बछर दू हजार बारह म मेडिकल विद्यार्थी मनके पहलइया बैच ह एडमिसन ले रिहीस, ओ बेरा कुल सीट पचास ठन रेहे रिहीस। बाद म ए सीट ह बाढ़के एक सौ पच्चीस होगे हे। एखर संगे एम्स रईपुर म पीजी पाठ्यक्रम के एक सौ संतावन सीट घलो हे। दीक्षांत समारोह ह सात मार्च के बिहनिया नौ बजे ले सुरू होही।
संगेसंग काली छह मार्च के एम्स रईपुर के पूर्व के पांच बैच मनके विद्यार्थी मनके मिलन समारोह घलो होही।
गरीब आवास योजना
मुख्यमंत्री भूपेश बघेल ह किहीन हे कि राज्य सरकार ह प्रदेस के सबो पात्र हितग्राही मन ल पक्का घर देवाय बर प्रतिबद्ध हे। ओमन किहीन कि केन्द्र सरकार ह कहूं अगर आवास योजना के पात्र हितग्राही मनके सर्वें नइ कराही, त राज्य सरकार ह अवइया एक अप्रैल ले तीस जून बीच पात्र हितग्राही मनके सर्वें कराही। उहें, श्री बघेल ह काली विधानसभा म राज्यपाल के अभिभाषण उपर कृतज्ञता ज्ञापन प्रस्ताव उपर होय चर्चा के जवाब देत रिहीन। चर्चा बाद राज्यपाल के अभिभाषण खातिर कृतज्ञता ज्ञापन के प्रस्ताव पारित करे गीस।
मुख्यमंत्री ह चर्चा के जवाब देवत किहीन कि बछर दू हजार ग्यारह म जनगणना होय रिहीस। पाछु बारह बछर म केन्द्र अउ राज्य प्रवर्तित योजना मनके लागू होय ले आम नागरिक मनके जीवन म का परिवर्तन होय हे। एखर जानकारी जरूरी हे, जेखर ले पात्र हितग्राही मन ल योजना के लाभ देवाय जा सकय। ओमन केन्द्र सरकार ल सुझाव दीन कि सबले आगू तो बारह बछर म बने पक्का आवास समेत आने योजना के आंकलन करे जाय। श्री बघेल ह विपक्षी सदस्य मन तीर केन्द्र सरकार ले जनगणना बर आग्रह करे खातिर संगे चले बर घलो किहीन। ओमन किहीन कि प्रधानमंत्री ग्रामीण आवास योजना के चलत प्रदेस म आठ लाख चवालीस हजार मकान पूरा होगे हवय।
फेर, एखर पहिली भाजपा सदस्य मन मुख्यमंत्री के भासन के दउरान सदन ले बहिर्गमन यानि बाहिर निकल गीन। बड़का विधायक अउ पूर्व मंत्री बृजमोहन अग्रवाल ह आरोप लगईन कि राज्य सरकार डहार ले संसदीय परंपरा मन ल तोड़े जावत हे। ओमन किहीन कि संविधान मुताबिक राज्यपाल के भूमिका उपर कहूं जघा चरचा नइ हो सकय। फेर, मुख्यमंत्री ह राज्यपाल के अभिभाषण के प्रस्ताव के जवाब देवत राज्यपाल के भूमिका उपर चरचा करीन, जउन ह राज्यपाल पद के अपमान हरय। संगे संविधान के उल्लंघन घलो हरय।
भाजपा-बैठक
भारतीय जनता पार्टी के प्रदेस प्रभारी ओम माथुर ह किहीन हे कि भाजपा डहार ले चलाय जावत ‘मोर आवास-मोर अधिकार‘ ल जनता के बड़भारी समर्थन मिलत हे। गरीब जनता के आवास बर लड़ई वाले ए अभियान के चलत अवइया पन्द्रह मार्च के विधानसभा ल घेरे जाही। ओमन दावा करीन कि अवइया चुनाव म कांग्रेस सरकार ल घुचाय बर पार्टी के हरेक कार्यकर्ता तैयार हे।
काली चंपारण म होय संभागीय बइठका म बोलत श्री माथुर ह किहीन कि भाजपा ह आम लोगन के पार्टी हरय। पाछु आठ बछर म प्रधानमंत्री नरेन्द्र मोदी के अगुवई म देस ह सामर्थ्यवान अउ आत्मनिर्भर बने हे। देस के आर्थिक स्थिति ल मजबूत होय हे अउ हरेक कार्यकर्ता के समाज म सम्मान बाढ़े हे। उहें, प्रदेस अध्यक्ष अरूण साव ह राज्य सरकार उपर आरोप लगाय हे कि ओ ह प्रदेस ल भ्रष्टाचार अउ नक्सलवार के गढ़ बना दे हवय।
ऐति, रईपुर के प्रदेस भाजपा कार्यालय एकात्म परिसर म राखे गे पत्रकारवार्ता म बोलत प्रदेस भाजपा अध्यक्ष अरूण साव ह यहू आरोप लगईन कि प्रदेस के कांग्रेस सरकार ह गरीब तनके आवास ल झटक ले हवय। ओमन आंकड़ा पेस करत किहीन कि बछर दू हजार अट्ठारह के पहिली साढ़े सात लाख ले जादा आवास बनाय गे रिहीस। फेर, कांग्रेस सरकार बने बाद ले आवास काम बंद पड़े हवय।
महिला सम्मेलन-घोषणा
मुख्यमंत्री भूपेश बघेल ह किहीन हे कि माईलोगिन मनके नान्हें उद्योग मन बर लोन अउ सब्सिडी के सहुलियत देके पहल करे जाही, जेखर ले ओमन आर्थिक रूप ले मजबूत हो सकय। मुख्यमंत्री काली रईपुर म होय राज्य स्तरीय महिला सम्मेलन म बोलत ए बात किहीन। ओमन किहीन कि राज्य सरकार ह माईलोगिन मन ल हरेक क्षेत्र म आगू बाढ़े म मदद करत हे। श्री बघेल ह बतईन कि माईलोगिन मनके सशक्तिकरण यानि मजबूत होय खातिर राज्य सरकार ह अइसन योजना सुरू करे हे, जेखर ले ओखर मन तीर पइसा पहुंचे अउ उंखर आत्मविश्वास बाढ़य। उहें, राज्य सरकार ह महिला समूह मनके तेरह करोड़ रूपिया के करजा माफी करे हे। ऋण योजना म लोन के सीमा ल बढ़ाके चौदह लाख रूपिया कर दे गेहे।
रेलवे-सुविधा
रेलवे प्रसासन डहार ले दक्षिण पूर्व मध्य रेलवे के तहत अवइया सात ठिन स्टेसन म कतकोन अकन गाड़ी मनके छह महीना बर स्टॉपेज के सहुलियत दे जाही। टाटानगर-इतवारी-टाटानगर एक्सप्रेस ल अकलतरा, हीराकुंड एक्सप्रेस ल बूढ़ार, संतरागाछी-जबलपुर-संतरागाछी ल अनूपपुर स्टेसन म स्टॉपेज दे जाही। इही तरह, नर्मदा एक्सप्रेस ल घुटकू, दुर्ग-अंबिकापुर-दुर्ग एक्सप्रेस ल करगी रोड, बिलासपुर-भोपाल-बिलासपुर एक्सप्रेस के खोडरी म स्टॉपेज रइही। उहें, छत्तीसगढ़ एक्सप्रेस अउ कोरबा-रायपुर-कोरबा हसदेव एक्सप्रेस के स्टॉपेज बिल्हा म दे गेहे।
हज-सामान्य सभा
छत्तीसगढ़ राज्य हज कमेटी के चेयरमैन मोहम्मद असलम के पगरइति म काली रईपुर म बइठका राखे गे रिहीस। ए बइठका म हज व्यवस्था के संपादन अउ राज्य ले जवइया हज यात्री मन ल जादा ले जादा सहुलियत दे खातिर हज व्यवस्था के निर्धारण करे गीस।
स्वास्थ्य-बैठक
स्वास्थ्य अउ परिवार कल्याण मंत्री टी.एस. सिंहदेव ह काली रईपुर म सबो जिला मनके मुख्य चिकित्सा अउ स्वास्थ्य अधिकारी, जिला कार्यक्रम प्रबंधक अउ बड़का विभागीय अधिकारी मन संग बइठका म विभागीय कामकाज अउ योजना मनके समीक्षा करीन। ए मउका म श्री सिंहदेव ह मातृत्व स्वास्थ्य कार्यक्रम के चलत जादा ले जादा अस्पताल मनके लक्ष्य सर्टिफाइड के संगे सबो योजना अउ कार्यक्रम ले जुड़े डाटा ल पोर्टल म एंट्री करे के निरदेस दीन। ओमन जिला अस्पताल मन म बेरा-बेरा म पावर अउ फायर यानि बिजली अउ आगी के ऑडिट कराय बर घलो किहीन। बइठका म स्वास्थ्य विभाग डहार ले चलइया कई ठिन योजना अउ कार्यक्रम मनके जिलावार समीक्षा करे गीस अउ एखर जोरदरहा लागू होय खातिर जरूरी निरदेस अउ सुझाव दे गीस।
मुख्यमंत्री-वृक्ष संपदा योजना
प्रदेस म मुख्यमंत्री वृक्ष संपदा योजना के क्रियान्वयन के जोरदरहा तैयारी चलत हे। वन विभाग डहार ले अब तक ले उन्नीस हजार ले जादा हितग्राही मनके करीबन तीस हजार एकड़ निजी भूईंया म वृक्षारोपण बर पंजीयन कर ले गेहे। ए योजना के चलत किसान मनके आमदनी बढ़ाय खातिर किसान मनके सहमति ले उंखर भूईंया म कार्मिसियल वृक्षारोपण करे जाही।