छत्तीसगढ़ विधानसभा म बजट सत्र के दूसर दिन आज चालू वित्तीय बछर बर प्रस्तुत करीबन चार हजार एक सौ तिरालीस करोड़ रूपिया के तृतीय अनुपूरक बजट पारित कर दे गीस। ए अनुपूरक बजट म पीये के पानी, सड़क, स्वास्थ्य, सिंचाई, आवास, भू-जल संरक्षण, आजीविका, औद्योगिक प्रशिक्षण, कस्टम मिलिंग समेत आने-आने मद म अतिरिक्त रासि के प्रावधान राखे गेहे। ए रकम ल मिलाके अब वित्तीय बछर दू हजार बाईस-तेईस के मुख्य बजट के आकार एक लाख पन्द्रह हजार तीन सौ पच्यासी करोड़ रूपिया होगे हे। अनुपूरक बजट म राजस्व व्यय बर दू हजार पांच सौ पचहत्तर करोड़ रूपिया अउ पूंजीगत व्यय बर एक हजार पांच सौ उनहत्तर करोड़ रूपिया के प्रावधान राखे गेहे।
मुख्यमंत्री भूपेश बघेल ह सदन म तृतीय अनुपूरक बजट बर करे गे प्रावधान के जानकारी देवत बतईन कि जल जीवन मिशन म करीबन चौबीस लाख ग्रामीण परिवार ल घरेलू नल कनेक्शन दे बर निर्माणाधीन काम बर नौ सौ करोड़ रूपिया के अतिरिक्त प्रावधान हे। उहें, मछली पालक मन ल कृषि पंप के जिनीस, मुफम म विद्युत सुभीता के फायदा दे बर कृषक जीवन ज्योति योजना म तीन सौ इकचालीस करोड़ रूपिया के अतिरिक्त प्रावधान होय हे। एखर संगेसंग प्रधानमंत्री ग्राम सड़क योजना म बनत रद्दा बर तीन सौ इक्कीस करोड़ रूपिया अउ राष्ट्रीय स्वास्थ्य मिशन योजना बर दू सौ पचास करोड़ रूपिया राखे गेहे। मुख्यमंत्री ह किहीन कि अनुपूरक बजट म प्रधानमंत्री आवास योजना-ग्रामीण खातिर एक सौ सोलह करोड़ रूपिया के प्रावधान हे। उहें, राष्ट्रीय आजीविका मिशन योजना बर साठ करोड़ उनसठ लाख रूपिया के प्रावधान करे गेहे।
सुप्रीम कोर्ट-मुख्य निर्वाचन आयुक्त
सुप्रीम कोर्ट ह आज फइसला सुनाय हे कि मुख्य निर्वाचन आयुक्त अउ निर्वाचन आयुक्त मनके नियुक्ति राष्ट्रपति कोति ले प्रधानमंत्री, लोकसभा म विपक्ष के नेता अउ भारत के मुख्य न्यायाधीश के एक समिति के सलाह म करे जाही। न्यायमूर्ति के एम. जोसफ के अगुवई वाले पांच न्यायाधीश के संविधान पीठ ह किहीन कि ए संबंध म संसद कोति ले कानून नइ बने तक ए पैनल लागू रिही। ए पीठ भारत के निर्वाचन आयोग के सदस्य मनके नियुक्ति प्रक्रिया म सुधार के मांग वाले याचिका उपर सुनवाई करत रिहीन।
सेना-भर्ती
भारतीय सेना म जे.सी.ओ. अउ ओ.आर. पद म भर्ती बर अभी ऑनलाइन रजिस्ट्रेशन होवत हे। ए ऑनलाइन रजिस्ट्रेशन ज्वाइन इंडियन आर्मी वेबसाइट म होवत हे। रजिस्ट्रेसन करवाय के आखिरी तारीख अवइया पन्द्रह मार्च हे। सेना भर्ती कार्यालय रईपुर के निदेसक कर्नल नरेन्द्र प्रसाद सेमल्टी ह आज मीडिया ले गोठबात करत बतईन कि भर्ती प्रक्रिया म उही उम्मीदवार सामिल हो सकही, जउन मन अपन रजिस्ट्रेसन करवाय हे।
रजिस्ट्रेसन करवाय बर उम्मीदवार तीर आधार कारड अउ दसवीं के सर्टिफिकेट होना जरूरी हे। रजिस्ट्रेसन के बेरा परीक्षा फीस के रूप म पांच सौ रूपिया के भुगतान होना हे, जेमा ले उम्मीदवार ल सिरिफ ढाई सौ रूपिया ही दे बर पड़ही। बाकी रकम सेना कोति ले वहन करे जाही। भुगतान के बाद उम्मीदवार ल रोल नंबर दे जाही। छत्तीसगढ़ राज्य के उम्मीदवार बर रईपुर, भिलाई, दुरूग अउ बिलासपुर म ऑनलाइन परीक्षा ले जाही। ऑनलाइन सी.ई.ई. परीक्षा म सफल उम्मीदवार ल भर्ती रैली म सामिल होय के मउका मिलही, जिहां उंखर सारीरिक दक्षता अउ स्वास्थ्य के आधार म अंक मिलही। आखिरी मेरिट लिस्ट ऑनलाइन सी.ई.ई. अउ सारीरिक परीक्षा के अंक ल मिलाके तय होही। सेना भर्ती कार्यालय ह जम्मों इच्छुक उम्मीदवार मन ल केहे हे कि ए भर्ती प्रक्रिया निष्पक्ष हरय अउ एमा कोनों भी किसम के बाहिरी लोगन के हस्तक्षेप संभव नइ हे। एखर सेती कोनों भी दलाल के चंगुल म झन फंसय।
राजभाषा सम्मेलन
राजभाषा विभाग डहार ले हिन्दी के प्रचार-प्रसार ल बढ़ावा दे बर क्षेत्रीय सम्मेलन राखे जात हे। एमा काली रईपुर के शहीद स्मारक भवन म क्षेत्रीय राजभासा सम्मेलन राखे जाही, जेमा केन्द्रीय गृह राज्यमंत्री अजय कुमार मिश्रा अउ निशीथ प्रामाणिक संघरही। ए जानकारी आज रईपुर म पत्रकारवार्ता म राजभाषा विभाग के निदेसक बी.एल. मीणा ह दीन। ओमन बतईन कि सम्मेलन म केन्द्र सरकार के कार्यालय, बैंक अउ उपक्रम ल छियानवे श्रेणी म इनाम दे जाही।
दसवीं बोर्ड-परीक्षा
छत्तीसगढ़ माध्यमिक सिक्षा मंडल के कक्षा दसवीं के बोर्ड परीक्षा आज ले सुरू होगे। आज पहिली पेपर हिन्दी भासा के रिहीस। ए परीक्षा म प्रदेसभर के तीन लाख सैंतीस हजार ले जादा परीक्षार्थी सामिल होवत हे। एखर बर दू हजार चार सौ आठ परीक्षा केन्द्र बनाय गेहे। दसवीं के परीक्षा म रईपुर जिला ले सबले जादा परीक्षार्थी सामिल होवत हे।
उहें, बारहवीं के परीक्षा काली ले सुरू होय हे। ए परीक्षा म नकल रोके बर उड़नदस्ता टीम बनाय गेहे, जउन परीक्षा केन्द्र म जाके जांच करत हे।
स्वर्ण प्राशन
रोग प्रतिरोधक क्षमता बढ़ाय बर काली तीन मार्च के रईपुर के शासकीय आयुर्वेद महाविद्यालय चिकित्सालय म लइका मन ल स्पर्ण प्रासन कराय जाही। आयुर्वेद महाविद्यालय चिकित्सालय म हर पुष्य नक्षत्र तिथि म सून्य ले सोलह बछर तक लइका मन ल स्वर्ण प्रासन कराय जाथे। चिकित्सालय के कौमारभृत्य बाल रोग विभाग म बिहनिया नौ बजे ले मंझनिया तीन बजे तक एखर सेवन कराय जाथे। ए औषधि लइका मनके सारीरिक अउ मानसिक विकास म मदद करथे।
आकांक्षी जिला-पोषण आहार
प्रदेस के दस आकांक्षी जिला म बालिका मनके स्वास्थ्य संबंधी देखभाल अउ पूरक-पोषण आहार देवाय बर राज्य सरकार जल्दी पहल करही। बेटी बचाओ-बेटी पढ़ाओ योजना ल राज्य के जम्मों जिला म बढ़वार करे के योजना हे। ए जानकारी महिला अउ बाल विकास मंत्री अनिला भेंडिया ह काली रईपुर म महिला सुरक्षा अउ पोषण जागरूकता कार्यसाला म बोलत बतईन। साइंस कालेज परिसर म राखे गे ए कार्यसाला म माईलोगिन मन ल आत्मरक्षा के तौर-तरीका सिखोय गीस। संगेसंग ओमन ल साइबर क्राईम ले बचाव अउ महिला अधिकार कोति जागरूक घलो करे गीस।
होली-स्पेशल ट्रेन
होली के मउका म दुरूग, बिलासपुर अउ गया-पटना के बीच यात्री ट्रेन म होवइया भीड़ ल ध्यान म राखत एक होली स्पेशल सुपरफास्ट ट्रेन चलाय जाही। एक फेरा बर ए ट्रेन दुरूग-पटना-दुरूग के बीच चलाय जाही। ए ट्रेन दुरूग ले छै मार्च अउ लहुटत बेरा पटना ले नौ मार्च के छूटही।
संस्कृति मंत्री-समीक्षा
नवा रईपुर के पुरखौती मुक्तांगन म नवा साज-सज्जा करके एला अउ सुघ्घर बनाय जाही। संस्कृति मंत्री अमरजीत भगत ह विभागीय काम के समीक्षा के बेरा अधिकारी मन ले किहीन कि पुरखौती मुक्तांगन म पर्यटक मन बर सुभीता बढ़ाय जाय। ओमन पर्यटक बर ऑनलाइन टिकिट के व्यवस्था करे अउ टिकिट काउंटर के संख्या बढ़ाय के निरदेस घलो दीन। उहें, चिन्हारी योजना के समीक्षा करत श्री भगत ह जादा ले जादा स्थानीय कलाकार मन ल मउका देके बात किहीन।
राष्ट्रीय शोध संगोष्ठी
‘छत्तीसगढ़ के क्षेत्रीय राजवंश‘ बिसय म राष्ट्रीय शोध संगोष्ठी काली ले रईपुर के महंत घासीदास स्मारक संग्रहालय म सुरू होही। पुरातत्व, अभिलेखागार अउ संग्रहालय विभाग कोति ले राखे गे ए संगोष्ठी पांच मार्च तक चलही। विभागीय अधिकारी मन ह बतईन कि प्रदेस के क्षेत्रीय राजवंश ले संबंधित मिले स्त्रोत के सोध अध्ययन ले अभी के इतिहास के आने-आने पक्ष ल आगू लाय अउ क्षेत्रीय इतिहास लेखन के समस्या म गोठबात करे के उद्देश्य ले ए संगोष्ठी राखे जात हे। एमा छत्तीसगढ़ समेत महाराष्ट्र, मध्यप्रदेश, बिहार अउ ओड़िसा के अध्येता घलो सामिल होही।