आज दिनभर के खबर ल अपन गुरतुर छत्तीसगढ़ी भाखा म पढ़व

विस बजट सत्र
 
छत्तीसगढ़ विधानसभा के बजट सत्र आज ले शुरू होगे । सत्र के शुरूआत राज्यपाल विश्वभूषण हरिचंदन के अभिभाषण ले होइस। राज्यपाल ह अपन अभिभाषण म कीहिन कि आदिवासी मनके हित म प्रदेश म पेसा कानून बर नियम बनाय गेहे। राज्य सरकार ह न्याय के अवधारणा ल व्यापक विस्तार देत जेल म बंद अउ अनावश्यक मुकदमा बाजी म उलझे आदिवासी मनके रिहाई निश्चित करे हे। संगेसंग उंखर आर्थिक अउ सामाजिक रूप ले मजबूत करे बर कतकोन उपाय करीन हे।
उंहे आदिवासी युवा मन बर फाइटर्स बल म भर्ती के काम शुरू होगे हे। ओमन कीहिन कि तेरा बछर ले बंद तीन सौ स्कूल के जीर्णोद्धार करत एला फेर ले शुरू करे गेहे। ये प्रयास के सेती बस्तर माओवादी हिंसा ले मुक्त होके विकासगढ़ के रूप म नवा पहिचान पावत हे। राज्यपाल ह कीहिन कि राज्य सरकार ह संस्कृति अउ परंपरा के संरक्षण करत अइसन उपाय करे हे, जेखर ले अभी के पीढ़ी गौरवान्वित होवत हे। भलुक अवइया पीढ़ी बर घलो एक परिपाटी बन सकही। एखरे सेती प्रदेश के तीज-तिहार ल बढ़ावा दे जावत हे। ओमन यहू कीहिन कि गांव के लोगन के परंपरा कौशल विकास ले तैयार आने आने उत्पाद बनाय म मदद दे ले गांव के लोगन आर्थिक रूप ले आत्मनिर्भर बनत हे।
राज्य सरकार के कतकोन कल्याणकारी योजना के गोठबात करत राज्यपाल ह कीहिन कि पाछू चार बछर म राज्य म गरीब, आदिवासी, किसान अउ मजदूर समेत जम्मों वर्ग के कल्याण बर कतकोन कार्यक्रम चलाये गेहे। जेखर बने नतीजा आगू आवत हे। राज्यपाल के अभिभाषण के बादे आज सदस्य मन कोति ले अभिभाषण म कृतज्ञता ज्ञापन प्रस्ताव प्रस्तुत करे गीस। उंहे मुख्यमंत्री ह वर्तमान वित्तीय बछर के तीसर अनुपूरक अनुमान घलो सदन म पेस करीन। ये बजट सत्र चौबीस मार्च तक चलही अउ कुल चौदा बइठका होही। मुख्यमंत्री छै मार्च सोमवार के अवइया वित्तीय बछर बर बजट पेस करही।

नेता प्रतिपक्ष-बयान

विधानसभा म नेता प्रतिपक्ष नारायण चंदेल ह किहीन कि बजट सत्र के बेरा विपक्ष कोति ले राज्य सरकार ले प्रदेस के जरूरी मुद्दा म जुवाब मांगे जाही। श्री चंदेल ह पत्रकार मन ले गोठबात करत किहीन कि प्रधानमंत्री आवास योजना के मुद्दा एक बड़े बिसय हे। ओमन किहीन कि आने-आने विभाग के दैनिक वेतनभोगी अउ संविदा करमचारी मन नियमितीकरण के मांग करत हे। ए मुद्दा म राज्य सरकार ले स्थिति स्पष्ट करे बर केहे जाही। ओमन आरोप लगईन कि राज्य सरकार के देरी के सेती प्रदेस के जनता मन ल ए योजना म मिलइया मकान अभी तक नइ मिले हे। ए मुद्दा ल बजट सत्र के बेरा उठाय जाही। श्री चंदेल ह किहीन कि राज्य सरकार ह प्रदेस के करीबन दस लाख युवा मन ल बेरोजगारी भत्ता देके घोसना करीन हे। एखर हिसाब घलो राज्य सरकार ले मांगे जाही। ओमन आरोप लगईन कि प्रदेस म कानून व्यवस्था चिंता जनक हवय। उहें, ओमन राज्य सरकार उपर भ्रष्टाचार ल बढ़ावा देके आरोप घलो लगईन हे।

बोर्ड परीक्षा

छत्तीसगढ़ माध्यमिक सिक्षा मंडल के बारहवीं बोर्ड के परीक्षा आज ले सुरू होगे हे। मंडल के सचिव प्रोफेसर व्ही.के. गोयल ह बतईन कि दसवीं के परीक्षा काली ले सुरू होही। परीक्षा ल बने ढंग ले कराय बर सबो जिला म पर्याप्त संख्या म परीक्षा केन्द्र बनाय गेहे। एमा ले राज्यभर के करीबन डेढ़ सौ संवेदनशील केन्द्र मन म सुरक्षा के जादा व्यवस्था करे गेहे। एमा सबले जादा उनचास संवेदनशील केन्द्र कांकेर जिला म हवय। ओमन बतईन कि बारहवीं के बोर्ड परीक्षा म करीबन सवा तीन लाख विद्यार्थी मन सामिल होवत हे। उहें, काली ले सुरू होवइया दसवीं के परीक्षा म करीबन साढ़े तीन लाख विद्यार्थी सामिल होही।
आजे ले पंडित रविशंकर शुक्ल विश्वविद्यालय के आने-आने पाठ्यक्रम के वार्षिक परीक्षा सुरू होगे हे। एखर बर रईपुर समेत आने जिला के महाविद्यालय ल परीक्षा केन्द्र बनाय गेहे।

भाजपा-घेराव

भाजपा कोति ले ए बखत मोर आवास-मोर अधिकार कार्यक्रम म प्रदेसभर म राज्य सरकार के खिलाफ विरोध-प्रदर्शन करे जात हे। एमा दुरूग के सांसद विजय बघेल के अगुवई म भाजपा कार्यकर्ता मन ह मुख्यमंत्री भूपेश बघेल के पाटन के निवास अउ लोक स्वास्थ्य यांत्रिकी मंत्री गुरू रूद्रकुमार के भिलाई चरौदा स्थित निवास के घेराव करे के परयास करीन। ए दउरान प्रदर्सन करइया मन ल मुख्य रद्दा म रोके बर पुलिस कोति ले बैरीकेट्स लगा दे गे रिहीस। ए मउका म कार्यकर्ता मन संग बोलत सांसद विजय बघेल ह किहीन कि प्रधानमंत्री आवास योजना म प्रदेस के हितग्राही मन ल उंखर हिस्सा के मकान नइ मिले ले राज्य सरकार के नाकामी दिखत हे। ओमन किहीन कि ए मुद्दा ल लेके भाजपा कोति ले अवइया पन्द्रह मार्च के रईपुर म विधानसभा के घेराव करे जाही।
ओति, गरियाबंद जिला के सिकासेर बांध के पानी किसान मन ल दे जाय के मांग करत क्षेत्रीय सांसद चुन्नीलाल साहू अउ विधायक डमरूधर पुजारी के अगुवई म किसान मन ह आज रईपुर म जल संसाधन मंत्री रविन्द्र चौबे के निवास तीर प्रदर्सन करीन।
इही बीच, अवइया विधानसभा अउ लोकसभा चुनाव ल देखत भाजपा कोति ले प्रदेसभर म बूथ सशक्तिकरण अभियान सुरू करे गेहे। एमा मुंगेली जिला के करीबन साढ़े छह सौ मतदान केन्द्र म कार्यकर्ता मन ल सक्रिय करे बर आज मुंगेली म कार्यसाला राखे गीस। कार्यकर्ता मन ल संबोधित करत विधानसभा म विपक्ष के उप नेता डॉक्टर कृष्णमूर्ति बांधी ह किहीन कि बूथ स्तर म कार्यकर्ता मन ल सक्रिय बनाके पार्टी के जीत के रद्दा तय करे जा सकथे।

आरएसएस-वार्षिक बैठक

राष्ट्रीय स्वयंसेवक संघ आर.एस.एस. के वार्षिक बइठका अवइया बारह ले चौदह मार्च तक हरियाणा के पानीपथ म होही। ए बइठका म चालू वित्तीय बछर के कामकाज के समीक्षा करे जाही। संगेसंग अवइया बछर के बेरा संघ के कार्ययोजना म गोठबात होही। बइठका म संघ के सर संघचालक डॉक्टर मोहन भागवत समेत आने राष्ट्रीय पदाधिकारी भाग लीहीं।

ओपीएस-एनपीएस निर्देश

राज्य सरकार ह जुन्ना अउ नवा पेंशन योजना के संबंध म एक महत्ता के निर्देश जारी करे हे। एमा कोनो शासकीय कर्मचारी के रिटायर होय या मउत होय के स्थिति म कोन से पेंशन योजना म उंखर सेवा संबंधी प्रकरण के निपटारा करे जाही । ए संबध म दिशा-निर्देश दे गेहे।
एमा जुन्ना पेंशन योजना लागू होय म मउत या अशक्त होय के प्रकरण म परिवार पेंशन या अशक्त पेंशन के भुगतान सरकारी कर्मचारी या ओखर उत्तराधिकारी ल दे जाही। कहूं ये प्रकरण म शासकीय सेवक या ओखर उत्तराधिकारी ल नवा पेंशन योजना म बने रेहे के विकल्प दे जात हे। त एखर नियामक संस्था एन.एस.डी.एल. ले कोष अउ लेखा संचालनालय म मिले पूरा रकम शासकीय सेवक या ओखर उत्तराधिकारी ल लहुटाय जाही।

सिंहदेव चिकित्सा महाविद्यालय

प्रदेश म तीन चिकित्सा महाविद्यालय म बुनियादी संसाधन के बढ़वार बर चिकित्सा शिक्षा विभाग ह निर्माण काम के संगेसंग चिकित्सक अउ प्राध्यापक मनके भर्ती के मंजूरी दे देहे। चिकित्सा शिक्षा मंत्री टी.एस. सिंहदेव ह बिलासपुर, रायगढ़ अउ दुर्ग के चिकित्सा महाविद्यालय के स्वशासी समिति के बइठका म आने आने प्रस्ताव ल मंजूरी दीन।
श्री सिंहदेव ह बिलासपुर के छत्तीसगढ़ इंस्टीट्यूट ऑफ मेडिकल साइंस -सिम्स, दुर्ग के चंदूलाल चंद्राकर स्मृति चिकित्सा महाविद्यालय अउ रायगढ़ के शासकीय चिकित्सा महाविद्यालय के स्वशासी समिति के अलग-अलग बइठका लीन। ओमन जम्मों मेडिकल  कॉलेज के स्वशासी समिति के बइठका हर तीन महीना म राखे के निर्देश दीन।
बइठका म दुर्ग के चंदूलाल चंद्राकर स्मृति चिकित्सा महाविद्यालय म एंबुलेंस देवाय के संगेसंग कम्पयूटर अउ आने उपकरण बिसाय के प्रस्ताव ल मंजूरी दे गीस। उंहे बिलासपुर के सिम्स मेडिकल कॉलेज म सौ झिन नर्स के नियुक्ति के अनुमोदन करे गीस।
रायगढ़ मेडिकल कॉलेज के बजट प्रस्ताव के संगेसंग उंहा प्राध्यापक मनके भर्ती ल  घलो बइठका म मंजूरी दे गीस।

वाहन पंजीयन

प्रदेश म परिवहन विभाग कोति ले अब नवा गाड़ी के पंजीयन छै महीना बर करे जाही। ये अस्थायी पंजीयन गाड़ी के अधिकृत विक्रेता कोति ले देवाय जाही। परिवहन मंत्री मोहम्मद अकबर ह आने आने वाहन डीलर अउ ट्रांसपोर्ट संचालक मनके मांग म ये पहन करे हे। एमा परिवहन विभाग कोति ले अस्थायी पंजीयन के सुविधा ऑनलाईन अर्जी ले देवाय जावत हे। एखर पहिली अस्थायी पंजीयन के वैधता एक महीना के होवत रीहिस। एखर बाद गाड़ी बिसइया मन ल स्थायी पंजीयन कराय बर पड़य।