प्रधानमंत्री नरेंद्र मोदी ह कहिन कि सरकारी काम अउ योजना मनके सफलता बर सुशासन सबले महत्वपूर्ण हे अउ एखरे माध्यम ले योजना मनके लाभ आखरी मनखे तक पहुंचाय जा सकथे। बजट के पाछू – अंतिम छोर तक पहुंच/कोई भी नागरिक पीछे ना छूटे- विसय म वीडियो संदेस के माध्यम ले वेबिनार ल संबोधित करत प्रधानमंत्री ह कहिन कि सरकार ह अइसे प्रयास करत हे कि समाज के आखरी मनखे तक लाभ पहुंचे।
प्रधानमंत्री ह जनजाती समुदाय अउ देश के ग्रामीण इलाका मन म आखरी मनखे तक पहुचे के मंत्र म तुरते अमल लाये बर जोर दीन। ओमन ह कहिन कि सरकार देश के जनजाती लोगन के विकास बर हरसंभव काम करत हे। ए बछर के केंद्रीय बजट जनजाती विकास बर समर्पित हे। प्रधानमंत्री ह कहिन कि एकलव्य आदर्श आवासीय विद्यालय एखर उदाहरण हरय।
श्री मोदी ह कहिन कि केंद्र के योजना आखरी मनखे तक पहुंचे के लक्ष्य ल ध्यान म राखत विकसित करे गेहे।
भाजपा घेराव
भारतीय जनता पार्टी के दुर्ग अउ भिलाई इकाई डहार ले संयुक्त रूप ले काली अठाईस फरवरी के मुख्यमंत्री भूपेश बघेल के पाटन स्थित निवास के घेराव करे जाही। संगेसंग अहिवारा विधायक के निवास के घलो घेराव करे के निर्णय ले गेहे। भाजपा कार्यकर्ता मनह आरोप लगाय हे कि प्रदेश म कांग्रेस सरकार के कार्यकाल आपराधिक घटना मन म सरलग बढ़ोत्तरी होवत हे। संगेसंग सड़क दुर्घटना अउ अवैध शराब के मामला म घलो बाढ़े हे।
एति गौरेला-पेण्ड्रा-मरवाही जिला म भाजपा डहार ले राज्य सरकार के कथित किसान विरोधी नीति मनके विरोध म किसान आक्रोश रैली के आयोजन करे गीस। रैली म पार्टी के प्रदेश अध्यक्ष अरूण साव घलो सामिल होइन।
अंतर्राष्ट्रीय महिला दिवस
अंतर्राष्ट्रीय महिला दिवस के मउका म आज राजधानी रायपुर के तेलीबांधा तलाब ले महिला सशक्तिकरण के संदेश ल लेके माइलोगिन मन ह बाइक रैली निकालिन। माइलोगिन मन ह रैली म गढ़बो सुपोषित छत्तीसगढ़ अउ बेटी बचाओ बेटी पढ़ाओ के संदेश घलो दीन। रैली तेलीबांधा तलाब ले शुरू होके पंद्रह किलोमीटर के दूरी तय करत वापिस तेलीबांधा तलाब म आके सिराइस।
रैली म महिला अउ बाल विकास मंत्री अनिला भेड़िया, छत्तीसगढ़ राज्य महिला आयोग के अध्यक्ष डॅाक्टर किरणमयी नायक, छत्तीसगए़ बाल संरक्षण आयोग के अध्यक्ष तेजकुंवर नेताम, जिला पंचायत रायपुर के अध्यक्ष डोमेश्वरी वर्मा, महिला बाल विकास विभाग के संचालक दिव्या मिश्रा, यूनिसेफ के राज्य प्रमुख जॉब जकारिया समेत बड़ संख्या म जनप्रतिनिधि अउ माइलोगिन मन सामिल होइन।
कृषि विवि मेडल
इक्कीसवां अखिल भारतीय अंतर कृषि विश्वविद्यालय खेल-कूद प्रतियोगिता म इंदिरा गांधी कृषि विश्वविद्यालय के खिलाड़ी मन ह ऐतिहासिक प्रदर्शन करीन हे। खिलाड़ी मन ह आने आने स्पर्धा म दू स्वर्ण, एक रजत अउ एक कांस्य पदक हासिल करत प्रतियोगिता म छठवां स्थान पाय हे।
खबर के मुताबिक भारतीय कृषि अनुसंधान संस्थान डहार ले ए बछर हरियाणा के हिसार म बीस ले चौबीस फरवरी तक भारतीय अंतर कृषि विश्वविद्यालयीन खेल-कूद प्रतियोगिता के आयोजन करे गे रीहिस, जेमा देशभर के छियांसठ कृषि विश्वविद्यालय के टीम मन ह सामिल होय रीहिन।
मतदाता जागरूकता
प्रदेश म अवइया विधानसभा चुनाव ल लेके केंद्रीय अउ राज्य निर्वाचन आयोग डहार ले प्रदेशभर म आने आने जागरूकता अभियान चलाये जात हे। अइसने राजनांदगांव जिला म वर्तमान म सतरा बछर ले जादा उमर वाले युवा मन ल जेखर उमर अवइया नवंबर महीना तक अठारा बछर या ओखर ले जादा हो जाही, उंखर नाम मतदाता सूची म जोड़े के मुहिम चलाये जात हे।
पहिली एखर बर एक जनवरी ल आधार बनाये जात रीहिस हे । फेर ए बखत ए अवधि ल बढ़ाके एक अप्रैल, जुलाई अउ अक्टूबर कर दे गेहे। जेखर ले वर्तमान म जउन युवा सतरा बछर के या ओखर ले जादा हेही, वोमन मतदान करे बर पात्र हो जाही। एखर बर स्कूल कॉलेज मन ल प्रपत्र जारी कर दे गेहे। ऑनलाइन फारम भरे के सुविधा घलो दे गेहे।
खबर के मुताबिक राजनांदगांव जिला के चार विधानसभा क्षेत्र मन म करीबन आठ लाख मतदाता हे।
जवान अंतिम संस्कार
छत्तीसगढ़ सशस्त्र बल के शहीद प्रधान आरक्षक संजय लकड़ा के आज जशपुर जिला के बाम्हनपुरा गांव म राजकीय सम्मान के संग अंतिम संस्कार करे गीस। ए मउका म जशपुर विधायक विनय भगत, कलेक्टर डॅाक्टर रवि मित्तल अउ पुलिस अधीक्षक डी. रविशंकर मौजूद रीहिन।
खबर के मुताबिक काली नारायणपुर जिला के ओरछा थाना क्षेत्र के बटुम इलाका म संयुक्त माओवादी अभियान के दउरान विस्फोटक के चपेट म आय ले प्रधान आरक्षक संजय लकड़ा शहीद होगे रीहिन।
दीपक पटेल गोल्ड मैडल
छत्तीसगढ़ राज्य पॉवर लिफ्टिंग अउ बेंच प्रेस प्रतियोगिता म कोरबा के रेलवे स्टेशन म कुली के काम करइया दीपक पटेल ह गोल्ड मेडल पाय हे। एखर पहिली दीपक ह कोलकाता अउ असम म होय प्रतियोगिता म घलो गोल्ड मेडल पाके प्रदेश के नाव रोशन कर चुके हे। श्री पटेल ह कोरबा रेल्वे स्टेशन म कुली के काम करथे। उंहे इही जिला के सुरेश अनंत ह घलो प्रतियोगिता म सफलता हासिल करे हे।
खबर के मुताबिक दुर्ग जिला म पाछू अठारा ले इक्कीस फरवरी तक ए प्रतियोगिता के आयोजन करे गीस।
हाथी सतर्कता
महासमुंद वन मंडल परिक्षेत्र म हाथी मनके विचरण ल लेके वन विभाग ह अलर्ट जारी करे हे। विभाग ह सोशल मीडिया के माध्यम ले अलर्ट जारी करके खिरसाली, केशलडीह, तालाझर, नांदबारू, सुकुलबाय, रायकेरा, अचानकपुर, बरौदा, रायमुडा, झाखरमुडा, फुसेराडीह के ग्रामीण मन ल सतर्क रेहे बर केहे हे। संगेसंग जंगल डहार नइ जाय के अपील करे हे।
राज्यपाल पर्वतारोही मुलाकात
राज्यपाल विश्वभूषण हरिचंदन ले आज राजभवन म मध्यप्रदेश के राजगढ़ के एथलीट अउ पर्वतारोही आशा मालवीय ह सौजन्य भेंट करीन। राज्यपाल ह सुश्री मालवीय ल महिला सशक्तिकरण के उद्देश्य ले करे जात उंखर साइकिल यात्रा बर शुभकामना दीन अउ उंखर प्रयास के सराहना करीन।
खबर के मुताबिक आशा मालवीय अब तक दस राज्य म लगभग नौ हजार किलोमीटर के यात्रा पूरा कर चुके हे।
पारंपरिक मेला
कोण्डागांव म अवइया अठाईस फरवरी के पारंपरिक मेला के आयोजन करे जाही। ए मेला के शुरूआत सत्ताईस फरवरी के निशा जात्रा ले होही। कलेक्टर दीपक सोनी अउ पुलिस अधीक्षक दिव्यांग पटेल ह आज मेला के तैयारी के जायजा लीन। ए दौरान कलेक्टर ह सबो विभाग ल व्यवस्था सुनिश्चित करे के निर्देश दीन। खबर के मुताबिक मेला म विभागीय प्रदर्शनी घलो लगाय जाही।
अउ अब थोरकुन समाचार सार म-
– अविभाजित मध्यप्रदेश के पूर्व मुख्यमंत्री पंडित श्यामाचरण शुक्ल के आज जयंती हरय। ए मउका म मुख्यमंत्री भूपेश बघेल ह अपन निवास कार्यालय म उंखर छायाचित्र म फूलमाला चघाके ओमन ल नमन करीन।
– बीजापुर जिला म कलेक्टर अउ जिला पंचायत के मुख्य कार्यपालन अधिकारी ह आईपीएस जागरूकता रथ ल हरा झण्डी दिखाके रवाना करीन।
– कोरबा जिला के पसान क्षेत्र म जंगली सुअर के हमला ले अपन बेटी ल बचाय के दउरान होय संघर्ष म माइलोगिन के मउत होगे। उंहे सुअर ह घलो दम तोड़ दीस।