प्रधानमंत्री नरेन्द्र मोदी ह देस के रहवइया मन ले भारत ल साफ-सुफा राखे म योगदान देके संगे प्लास्टिक के जघा उनहा कपड़ा के थैली बउरे खातिर अपील करे हे। आज आकाशवाणी ले मन की बात कारीकरम म ओमन किहीन कि स्वच्छ भारत अभियान ल देस म जन भागीदारी के मायने ल बदल देहे। प्रधानमंत्री ह ए बात उपर खुसहाली देखईन हे कि ई-संजीवनी ऐप ले इलाज बर सलाह-मसविरा मांगने वाले मनके संख्या म दस करोड़ रूपिया ल पार कर देहे। श्री मोदी ह एला एक ठिन बड़का उपलब्धि बतईन हे।
प्रधानमंत्री ह डिजिटल भुगतान बर यूपीआई के महत्ता उपर गर्व करत किहीन कि अब एला कई ठिन देस ह अपनावत हवय।
प्रधानमंत्री ह आज मन की बात के अंठानयवां कड़ी म ए कारीकरम के अब तक सफर के चरचा करीन। ओमन ए बात उपर खुसयारी देखावत किहीन कि ए कारीकरम ह लोक भागीदारी यानि आम जनता के एक ठिन असाधारण मंच बन गेहे। श्री मोदी ह हाले म दे गे उस्ताद बिस्मिल्लाह खान युवा पुरस्कार के उल्लेक्ष घलो करीन। ए पुरस्कार ल संगीत अउ निष्पादन यानि परफॉमेंस कला के क्षेत्र म उदीयमान कलाकार मन ल दे जाथे।
प्रधानमंत्री ह देसवासी मन ल होही के सुभकामना घलो दीन। ओमन किहीन कि लोगन मन ल वोकल फॉर लोकल यानि उही जघा के बने जिनीस ल बउरे के संग तिहार मनाय के संकल्प सुरता राखना चाही।
केन्द्रीय मंत्री-युवा ट्वेंटी सम्मेलन
केन्द्रीय सूचना, प्रसारण अउ युवा कार्यक्रम मंत्री अनुराग सिंह ठाकुर ह किहीन हे कि युवा-ट्वेंटी सम्मेलन म भारत ह न सिरिफ अपन बात राखे बर, भलूक दुनिया भर के जवान लइका मनके बात सुने बर घलो तैयार हे। श्री ठाकुर ह काली रईपुर म युवा-ट्वेंटी परामर्श कारीकरम म किहीन कि युवा शक्ति यानि जवान लइका मनके ताकत ह देस के वर्तमान अउ भविष्य ल बनइया हरय। युवा-ट्वेंटी कारीकरम के आयोजन रईपुर के भारतीय प्रबंधन संस्थान-आईआईएम म राखे ग रिहीस।
श्री ठाकुर ह किहीन कि हमन ल अपन धरोहर, इतिहास, कला, संस्कृति अउ परंपरा उपर गर्व होना चाही। फेर ओमन जवान लइका मन ले अइसन बात ले सतर्क रेहे के आरो दीन, जउन ह देस ल तोड़े के मइनता रखथे। केन्द्रीय मंत्री श्री ठाकुर ह जवान लइका मन ले भारत ल एक ठिन विकसित राष्ट्र बनाय म अपन हरसंभव योगदान देके अपील करीन।
कांग्रेस-अधिवेशन
कांग्रेस के राष्ट्रीय अध्यक्ष मल्लिकार्जुन खड़गे ह पार्टी कार्यकर्ता मनले आह्वान करे हे कि ओमन जमीन स्तर म संगठित होके काम करय। ओमन किहीन कि कांग्रेस ल किसान, गरीबहा अउ अल्पसंख्यक मनके संग खड़ा होना हे। रईपुर म राखे गे कांग्रेस के पच्यासीवां अधिवेशन के समापन समारोह ल म बोलत श्री खड़गे ह किहीन कि भाजपा के खिलाफ विचारधारा के लड़ाई तेज करना होही अउ कांग्रेस ह एखर बर एकजुट होके लड़े खातिर तैयार हे।
कांग्रेस के राष्ट्रीय अध्यक्ष ह यहू किहीन कि निजीकरण, महंगाई अउ बेरोजगारी के मुकाबला करना होही। ओमन मिंझरा अर्थव्यवस्था के जरूरत बतईन। ओमन कांग्रेस के राष्ट्रीय अधिवेशन के आयोजन अच्छा तरीका ले होय म जम्मों झन के प्रति आभार जतईन। ओमन किहीन कि राष्ट्रीय अधिवेशन म राखे गे छह प्रस्ताव उपर चरचा होय हे अउ बछर दू हजार चौबीस म पार्टी के संविधान म जउन संसोधन होय हे, ओखर मुताबिक काम करे जाही। श्री खड़गे ह बतईन कि पार्टी के संविधान म होय संसोधन मुताबिक अब कांग्रेस वर्किंग कमेटी म पच्चीस के जघा पैंतीस झिन सदस्य होही।
समापन कारीकरम म बोलत पार्टी के पूर्व राष्ट्रीय अध्यक्ष राहुल गांधी ह पार्टी के बड़का नेता अउ कार्यकर्ता मन ले आह्वान करीन कि ओमन संगठन ल मजबूबत बनाय बर तपस्वी असन काम करय। उहें, पार्टी के महासचिव प्रियंका गांधी ह किहीन कि कार्यकर्ता मनके मेहनते ले सफलता मिलही अउ सबो झिन ल एकजुट होके काम करना होही।
आईईडी विस्फोट-जवान शहीद
नारायणपुर जिला म आज बिहनिया आईईडी विस्फोट होय ले छत्तीसगढ़ ससस्त्र बल-सीएएफ के प्रधान आरक्षक संजय लकड़ा सहीद होगे।
मिले जानकारी मुताबिक माओवादी मन डहार ले बैनर-पोस्टर लगाय के सूचना मिले बाद ओरछा थाना क्षेत्र ले डीआरजी अउ सीएएफ के संघरा टीम ह गश्त म निकले रिहीस। तभे बटुमपारा के टेकरी गांव म आईईडी ब्लास्ट होय ले एक झिन जवान घायल होगे। घायल जवान ल तुरते ओरछा अस्पताल ले जाय गीस, जिहां इलाज बेरा उंखर मउत होगे। सहीद जवान जशपुर जिला के रहवइया रिहीन। फेर घटना बाद ले इलाका म सर्चिंग बढ़ा दे गेहे।
उहें, कांकेर जिला के आमाबेड़ा थाना क्षेत्र के उसेली बाजार म माओवादी मनके हमला ले सेना के एक झिन जवान सहीद होगे। मिले जानकारी मिताबिक बड़ेतेवरा गांव के रहवइया ए जवान ह करीबन हफ्ताभर पहिली छुट्टी म घर आय रिहीस। जब ए जवान ह उसेली के मुर्गा बाजार गे रिहीस, तभे माओवादी मन ओखर गोली मारके हत्या कर दीस। डीएसपी डॉक्टर अनुराग झा ह घटना के पुष्टि करत बतईन कि जवान उपर तीन झिन माओवादी मन हमला करे रिहीस।
इही बीच, पुलिस महानिदेशक अशोक जुनेजा अउ केन्द्रीय रिजर्व पुलिस बल के अतिरिक्त पुलिस महानिदेशक ह सुकमा जिला म जगरगुंडा क्षेत्र म काली होय माओवादी हमला बारे म जानबा सकेले बर आज घटना जघा के मुआयना करीन। बड़का पुलिस अधिकारी मनके संगे बस्तर अउ सुकमा जिला के पुलिस अधीक्षक समेत आने अधिकारी घलो मौजूद रिहीन। श्री जुनेजा ह घटना जघा के जायजा ले बाद अधिकारी मन ले ए बारे म चर्चा करीन। ओमन ए जघा म तैनात पुलिस जवान मन ल मुलाकात करके उंखर हौसला बढ़ईन। ए इलाका म बड़का स्तर ले सर्चिंग अभियान चलाय जात हे। फेर ए हमला म सामिल माओवादी मनके चिन्हारी करे के संगे ओमन ल खोजे जावत हे।
अंतर्राष्ट्रीय महिला दिवस-कार्यक्रम
अंतर्राष्ट्रीय महिला दिवस के मउका म महिला अउ बाल विकास विभाग डहार ले काली ले चार मार्च तक कई ठिन कारीकरम राखे जाही। एही कड़ी म राजधानी रईपुर के शंकर नगर के बीटीआई मैदान म काली ले राज्य स्तरीय महिला मड़ई लगाय जाही। ए मड़ई म स्व-सहायता समूह के माईलोगिन मन डहार ले बनाय गे जिनीस मनके प्रदर्सनी लगाके बेचे जाही। एखर संगेसंग सत्ताईस फरवरी के बिहनिया तेलीबांधा तरिया ले माईलोगिन मनके बाइक अउ स्कूटर रैली निकाले जाही। एक मार्च के पंडित दीनदयाल उपाध्याय ऑडिटोरियम म महिला सुरक्षा अउ पोषण जागरूकता उपर कार्यसाला राखे जाही। संगे चार मार्च के राज्य स्तरीय महिला सम्मेलन घलो होही।
अउ अब थोरकुन समाचार सार म-
– सक्ती जिला म फास्ट ट्रैक कोर्ट ह नाबालिग नोनी ले दुष्कर्म के एक झिन आरोपी ल बीस बछर वाले सश्रम कारावास के सजा सुनाय हे।
– कांकेर जिला के चारामा थाना क्षेत्र म केतकीपारा पुल तीर रोड एक्सीडेंट म फटफटी सवार एक झिन मनखे के मउत होगे। उहें, एक झिन आने मनखे घायल होगे।
– भारतीय किसान संघ डहार ले किसान मनके समस्या ल लेके काली रईपुर के बूढ़ातालाब स्थित धरनास्थल म विरोध प्रदर्शन करे जाही।
– समाज कल्याण विभाग डहार ले जगदलपुर म तीन मार्च के सीनियर सिटीजन मन ल सहायक उपकरण मुफत म बांटे जाही।
अउ
– जांजगीर-चांपा जिला म अंतर्राज्यीय चोर गिरोह के छै झिन सदस्य समेत आठ झिन मनखे ल गिरफ्तार करे गेहे। एखर मन तीर ले चौबीस लाख रूपिया ले जादा के चोरी के सामान, हथियार अउ मोटर साइकिल बरामद होय हे।