प्रधानमंत्री नरेन्द्र मोदी ह किहीन हे कि बछर दू हजार तेईस-चौबीस के बजट म सबले जादा महत्व युवा वर्ग अउ उंखर भविष्य ल दे गेहे। श्री मोदी ह नई दिल्ली म आज कौशल अउ सिक्षा के माध्यम ले युवा सशक्तिकरण बिसय म एक ठिन वेबिनार ल संबोधित करीन। श्री मोदी ह किहीन कि बजट म, सिक्षा व्यवस्था ल व्यावहारिक अउ उद्योग के अनुकूल बनाय म ध्यान केन्द्रित करे गेहे।
श्री मोदी ह किहीन कि नवा तकनीक के सहायता ले कक्षा मन ल आधुनिक बनाय जावत हे। केन्द्र सरकार ह कक्षा ले अलग हटके युवा मनके प्रसिक्षण कार्यक्रम उपर बल देवत हे। ओमन किहीन कि प्रसिक्षुता ल बढ़ावा दे ले विद्यार्थी मन भविष्य बर तैयार हो सकही। श्री मोदी ह किहीन कि प्रधानमंत्री कौशल विकास योजना के चौथा चरण ले अवइया बेरा म लाखों युवा कुसल बन सकही। उहें, प्रधानमंत्री विश्वकर्मा सम्मान योजना ले हस्तशिल्प जइसन पारंपरिक उद्योग सशक्त होही अउ उत्पादक मन ल नवा बाजार घलो मिलही।
केन्द्रीय मंत्री-युवा संवाद
केन्द्रीय सूचना प्रसारण, खेल अउ युवा मामला मंत्री अनुराग सिंह ठाकुर ह आज रईपुर म नेहरू युवा केन्द्र डहार ले आयोजित एक कार्यक्रम म ‘‘इंडिया एट द रेट-दो हजार सैंतालीस‘‘ म युवा मन ले गोठबात करीन। ए मउका म केन्द्रीय मंत्री ह किहीन कि रोजगार बर शिक्षा म कौशल विकास ल अउ बढ़ावा दे जात हे। ओमन किहीन कि नवा सिक्षा नीति म अवइया रोजगार ल ध्यान म राखत ओखरे अनुरूप पाठ्यक्रम ल प्रोत्साहित करे जात हे। प्रधानमंत्री ह युवा शक्ति ल स्टार्टअप के माध्यम ले स्व-रोजगार डहार प्रेरित करे हे। उहें, स्व-सहायता समूह मन ल घलो आर्थिक मदद करे जावत हे।
कार्यक्रम के दउरान श्री ठाकुर ह विद्यार्थी अउ सिक्षक मन बर बनाय गे बहुउपयोगी मोबाइल ऐप्लीकेशन के सुभारंभ करीन। ए मोबाइल ऐप के उपयोग ले विद्यार्थी अउ सिक्षक विश्वविद्यालय ले संबंधित जम्मों काम मोबाइल फोन ले कर सकही।
कार्यक्रम म रायपुर के सांसद सुनील सोनी अउ रायपुर दक्षिण के विधायक बृजमोहन अग्रवाल बिसेस रूप ले मौजूद रिहीन। श्री रावतपुरा सरकार विश्वविद्यालय के कुलपति डॉक्टर एस.के. सिंह अउ नेहरू युवा केन्द्र के राज्य संचालक श्रीकांत पांडेय ह कार्यक्रम के उद्देश्य उपर प्रकास डालीन।
ए मउका म सांस्कृतिक कार्यक्रम के आयोजन घलो करे गीस, जेमा राज्य स्तरीय कलाकार मन ह अपन प्रस्तुति दीन।
वहीं, केन्द्रीय मंत्री अनुराग सिंह ठाकुर ह आज रईपुर म यूथ-ट्वेंटी परामर्श कार्यक्रम म घलो सामिल होईन। ए कार्यक्रम भारतीय प्रबंध संस्थान-आईआईएम रईपुर डहार ले आयोजित करे जावत हे।
मुठभेड़-जवान शहीद
सुकमा जिला के जगरगुंडा म सुरक्षा बल अउ माओवादी मनके बीच होय मुठभेड़ म डीआरजी के तीन जवान शहीद होगे। जिला के पुलिस अधीक्षक सुनील शर्मा ह बतईन कि जगरगुंडा-कुंदेड़ के बीच डीआरजी के जवान सड़क निर्माण कार्य के सुरक्षा अउ माओवादी विरोधी अभियान म निकले रिहीन। इही बेरा घात लगाय बइठे माओवादी मन सुरक्षाबल उपर फायरिंग सुरू कर दीन। जवान मन घलो जवाबी कार्रवाई करीन। ए घटना म ए.एस.आई. रामुराम नाग, सहायक आरक्षक कुंजाम जोगा अउ सैनिक वैंजम भीमा सहीद होगे। उहें, पुलिस ह ए मुठभेड़ म पांच ले छह माओवादी मनके मारे जाय के दावा करत हे।
राज्यपाल विश्व भूषण हरिचंदन अउ मुख्यमंत्री भूपेश बघेल ह जवान मनके सहादत म गहरा सोक व्यक्त करत ओमन ल श्रद्धांजलि दीन। ओमन सहीद के परिजन मनके प्रति संवेदना व्यक्त करत किहीन कि जवान मनके सहादत व्यर्थ नइ जाय। प्रदेस ह उंखर सहादत बर हमेसा कर्जदार रइही।
कांग्रेस-राष्ट्रीय अधिवेशन
नवा रईपुर म आयोजित कांग्रेस के राष्ट्रीय महाधिवेशन म आज दूसर दिन पार्टी के संविधान म बदलाव बर प्रस्ताव पेस करे गीस। पार्टी के वरिष्ठ नेता अंबिका सोनी ह संवैधानिक प्रस्ताव पेस करीन। संविधान संसोधन कमेटी के संयोजक रणदीप सुरजेवाला ह कांग्रेस के संविधान म संसोधन के प्रस्ताव के अनुमोदन करत एखर जानकारी दीन। ओमन बतईन कि पार्टी के जम्मों पद म पचास प्रतिसत आरक्षण लागू करे जाही। एमा अनुसूचित जाति, अनुसूचित जनजाति, अन्य पिछड़ा वर्ग समेत महिला अउ युवा मन ल जगह दे जाही। श्री सुरजेवाला ह किहीन कि देस के जनता अउ कार्यकर्ता मनके जनभावना के अनुरूप पार्टी के संविधान म पच्यासी संसोधन करे गेहे।
मन की बात
प्रधानमंत्री नरेन्द्र मोदी ह काली बिहनिया ग्यारह बजे आकाशवाणी ले ‘‘मन की बात‘‘ कार्यक्रम म देस-बिदेस के श्रोता मन ले अपन विचार साझा करही। ए मासिक रेडियो कार्यक्रम के अंठानवें कड़ी रइही। मन की बात कार्यक्रम के प्रसारण हर महीना के आखिरी इतवार के करे जाथे।
अंतर्राष्ट्रीय महिला दिवस-कार्यक्रम
अंतर्राष्ट्रीय महिला दिवस के मउका म महिला अउ बाल विकास विभाग डहार ले अवइया सत्ताईस फरवरी ले चार मार्च तक राजधानी रईपुर म आने-आने कारीकरम के आयोजन करे जाही। ए दउरान शंकर नगर के बीटीआई मैदान म राज्य स्तरीय महिला मड़ई के आयोजन होही। उहें, चार मार्च के राज्य स्तरीय महिला सम्मेलन घलो होही।
मड़ई म स्व-सहायता समूह के माईलोगिन मन डहार ले बनाय गे उत्पाद के प्रदर्सनी लगाके बेचे जाही। एखर संगेसंग सत्ताईस फरवरी के बिहनिया तेलीबांधा तरिया ले माईलोगिन मनके बाइक अउ स्कूटर रैली निकाले जाही अउ एक मार्च के पंडित दीनदयाल उपाध्याय ऑडिटोरियम म महिला सुरक्षा अउ पोषण जागरूकता उपर कार्यसाला राखे जाही।
जिले की चिट्ठी
प्रादेशिक समाचार एकांश आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र मन रिले करही। ए बखत के अंक म ‘‘बस्तर‘‘ जिला के गतिविधि के बारे म जानकारी दे जाही।
थलसेना लिखित परीक्षा
भारतीय थल सेना डहार ले छत्तीसगढ़ के सोल्जर तकनीकी नर्सिंग असिसटेंट अउ नर्सिंग असिसटेंट वेट के लिखित परीक्षा काली छब्बीस फरवरी के आयोजित करे जाही। ये परीक्षा नवा रायपुर स्थित आर्मी रिक्रूटमेंट ऑफिस म होही। परीक्षा म सामिल होय बर आवेदक मन ल अपन संग थलसेना डहार ले जारी प्रवेश पत्र अउ आधार कार्ड लाना होही। आवेदक मन ल परीक्षा स्थल म बीहनिया चार बजे पहुंचे बर केहे गेहे।
अउ अब थोरकुन समाचार सार म-
– प्रदेस के वरिष्ठ पत्रकार अनल प्रकाश शुक्ल के निधन होगे। राज्यपाल विश्व भूषण हरिचंदन अउ मुख्यमंत्री भूपेश बघेल ह श्री शुक्ल के निधन म दुख जतावत पत्रकारिता म उंखर योगदान ल महत्वपूर्ण अउ अतुलनीय बतईन हे।
– समाज कल्याण विभाग डहार ले उभयलिंगी मनखे मनके कल्याण बर चलत योजना अउ कारीकरम म केन्द्रित राष्ट्रीय कार्यसाला सह सांस्कृतिक कारीकरम के आयोजन रईपुर के पंडित दीनदयाल उपाध्याय ऑडिटोरियम म सत्ताईस फरवरी के करे जाही।
अउ
– जिला रोजगार अउ स्व-रोजगार मार्गदर्शन केन्द्र डहार ले कवर्धा म सत्ताईस फरवरी के मंझनिया बारह बजे ले संझा चार बजे तक प्लेसमेंट कैम्प के आयोजन करे जाही।