केंद्रीय सूचना अउ प्रसारण मंत्री अनुराग सिंह ठाकुर एक दिन के प्रवास म काली रायपुर आवत हे। सबले पहिली ओमन रायपुर म रावतपुरा सरकार विश्वविद्यालय म राखे गे युवा संवाद कारीकरम म सामिल होके एला संबोधित करही। एखर बाद केंद्रीय मंत्री भारतीय प्रबंधन संस्थान आईआईएम रायपुर म राखे गे वाय-20 कारीकरम म सामिल होही। कारीकरम म सामिल होय के बाद काली संझा केंद्रीय मंत्री रायपुर ले हैदराबाद बर रवाना हो जाही।
बतादन कि देशभर म आज ले चौबीस मार्च तक युवा उत्सव के आयोजन करे जात हे। एखर तहत आने आने जिला म नेहरू युवा केंद्र संगठन डहार ले कार्यक्रम राखे जाही। छत्तीसगढ़ म जगदलपुर, कोरबा, कोरिया, राजनांदगांव, अउ सरगुजा जिला म युवा उत्सव के आयोजन होही।
इही बीच भारत बछर दू हजार तेइस म जी-20 के अध्यक्षता करत हे। इही कड़ी म भारतीय प्रबंधन संस्थान आईआईएम रायपुर म आजले छब्बीस फरवरी तक शांति अउ सुलह विसय के संग वाय-20 समिट के आयोजन करे जात हे।
यूथ – 20 कार्यक्रम
वाय-ट्वेंटी समिट के तहत कोरिया जिला के बैकुण्ठपुर स्थित शासकीय रामानुज प्रताप सिंह देव स्नातकोत्तर महाविद्यालय म जिला स्तरीय भाषा अउ निबंध प्रतियोगिता के आयोजन करे गीस। प्रतियोगिता म आने आने महाविद्यालय के प्रतिभागी शामिल होइन।
उंहे दुर्ग के शासकीय विश्वनाथ यादव तामस्कर स्नातकोत्तर स्वशासी महाविद्यालय म घलो जिला स्तरीय भाषण अउ पोस्टर निर्माण प्रतियोगिता राखे गीस। एमा जिला के सोला महाविद्यालय मनके इकतीस विद्यार्थी शामिल होइन। विजेता प्रतिभागी काली पच्चीस फरवरी के आईआईएम रायपुर म आयोजित राज्य स्तरीय कार्यक्रम म शामिल होही।
कांग्रेस अधिवेशन
कांग्रेस के पच्यासीवां राष्ट्रीय अधिवेशन आज ले राजधानी रायपुर म शुरू होगे हे। अधिवेशन के पहिली दिन आज बीहनिया पार्टी के राष्ट्रीय अध्यक्ष मल्लिकार्जुन खड़गे के अध्यक्षता म कांग्रेस स्टीयरिंग कमेटी-सी.डब्लू.सी. के बइठका होइस।
बइठका के बाद अखिल भारतीय कांग्रेस कमेटी के संचार विभाग के प्रमुख जयराम रमेश ह पत्रकार वार्ता म बताइन कि बइठका म सी.डब्लू.सी के चुनाव, पार्टी के संविधान संशोधन समेत महाधिवेशन म चर्चा बर रखइया विसय उपर गोठबात होइस। बइठका म निर्णय ले गीस कि पार्टी के राष्ट्रीय अध्यक्ष सी.डब्लू.सी के सदस्य के मनोनयन करही।
उंहे ए बेरा कांग्रेस सब्जेक्ट कमिटी के बइठका चलत हे। एमा पार्टी के राष्ट्रीय अध्यक्ष मल्लिकार्जुन खड़गे, पूर्व अध्यक्ष सोनिया गांधी अउ राहुल गांधी के अलावा महासचिव के.सी. वेणुगोपाल समेत सब्जेक्ट कमिटी के सदस्य मन सामिल होवत हे।
ग्रामीण तकनीकी केंद्र
प्रदेश के ग्रामीण औद्योगिक केंद्र रिपा म अब भाभा एटॉमिक रिसर्च सेंटर बार्क मुंबई के सहयोग ले ग्रामीण तकनीक के प्रदर्शन अउ प्रशिक्षण देबर ग्रामीण तकनीकी केंद्र स्थापित करे जाही। ए केंद्र मन म बहत्तर ले जादा ग्रामीण अर्थव्यवस्था म आधारित उद्यम तकनीक के प्रशिक्षण युवा मन ल दे जाही। बार्क कोति ले इंहा मास्टर ट्रेनर घलो तियार करे जाही।
राज्य योजना आयोग के उपाध्यक्ष अजय सिंह के अध्यक्षता म होय योजना आयोग के बइठका म रिपा म ग्रामीण तकनीकी केंद्र के स्थापना अउ गोबर ले विद्युत उत्पादन के आधुनिकतम तकनीक अउ इकाई मनके विस्तार ल लेके सार्थक चर्चा होइस। बइठका म यहू निर्णय ले गीस कि रायपुर के इंदिरा गांधी कृषि विश्वविद्यालय म मुख्य ग्रामीण तकनीकी केंद्र स्थापित करे जाही। ए केंद्र मन म फल-सब्जी अउ वनोपज ले आने आने प्रकार के खाद्य सामग्री बनाय के विधि अउ दूसर विधा के संबंध म प्रशिक्षण दे जाही।
बतादन कि राज्य के तीन सौ गौठान मन म रूरल इंडस्ट्रियल पार्क बनाय जाथे। एखर बर राज्य शासन डहार ले तीन सौ करोड़ रूपिया के मंजूरी दे गेहे।
दुर्घटना
बलौदाबजार-भाटापारा जिला म पाछू रतिहा होय एक सड़क हादसा म दू लइका समेत ग्यारा मनखे मनके मउत होगे। उंहे ग्यारा झिन दूसर मन घायल होगे। हमर संवाददाता ह बताइन कि ग्राम खिलोरा निवासी एक परिवार पिकअप म सवार होके बिहाव समारोह म सामिल होय बर अर्जुनी गांव गे रीहिन। उंहा ले लहुटत बेरा देर रतिहा ग्राम खम्हरिया करा तेज रफ्तार ट्रक अउ पिकअप ले जोरदरहा टक्कर होय के सेती मउकाच म दू लइका समेत ग्यारा लोगन मनके मउत होगे। फेर ग्यारा झिन दूसर मन घायल होगे, जेमा ले तीन के हालत गंभीर बने हे। घायल मन ल जिला अस्पताल म भर्ती कराय गेहे, उंहे गंभीर हालत के लोगन मन ल रायपुर रेफर करे गेहे। बताय जात हे कि मृतक एके परिवार के सदस्य रीहिन।
प्रधानमंत्री नरेंद्र मोदी ह बलौदाबाजार भाटापारा जिला म होय सड़क हादसा म दुख जताइन हे। ओमन दुर्घटना म हरएक मृतक के परिजन मन ल प्रधानमंत्री राष्ट्रीय राहत कोष ले दू-दू लाख रूपिया अउ घायल मन ल पचास-पचास हजार रूपिया के अनुग्रह राशि देके घोषणा करीन हे। श्री मोदी ह शोक संतप्त परिवार के प्रति संवदेना जतात घायल मनके जल्दी ठीक होय के कामना करीन हे। उंहे राज्यपाल विश्वभूषण हरिचंदन अउ मुख्यमंत्री भूपेश बघेल ह घलो ए दुर्घटना म गहरा दुख जताय हे।
मुख्यमंत्री ह मृतक के परिजन मन ल चार-चार लाख रूपिया अउ घायल मन ल एक-एक लाख रूपिया के सहायता राशि देके घोषणा करे हे। मुख्यमंत्री ह जिला प्रशासन के अधिकारी मन ल घटना म घायल मनखे मन ल बने इलाज के सुविधा उपलब्ध कराय के निर्देश दीन हे।
दुर्घटना 02
एति दुर्ग जिला के पाटन थाना क्षेत्र अंतर्गत ग्राम तर्रा म तेज रप्तार ट्रक बिजली खंभा ल तोड़त एक मकान म घुसगे। ए हादसा म ट्रक चालक अउ परिचालक समेत ओमा सवार जम्मों तीन मनखे मनके मउत होगे। पाटन थाना प्रभारी ह बताइन कि घर मालिक अउ ओखर परिवार सुरक्षित हरय।
उंहे कोरबा जिला म पाछू रतिहा रिसदी रोड म दू ट्रक के बीच होय आमने सामने के टक्कर म दूनो वाहन चालक के मउत होगे। मिले जानकारी अनुसार बाल्को ले राखड़ लेके आवत तेज रप्तार हाईवा अउ उरगा कोति ले पीडीएस के चांउर लावत ट्रक के बीच टक्कर होगे। एखर बाद दूनो गाड़ी म आगी लगगे, जेमा दूनो वाहन चालक के जले ले मउत होगे।
अइसने राजनांदगांव जिला के ग्राम टेडेसरा म सड़क पार करे के बेरा चार पहिया वाहन के चपेट म आय ले एक महिला के मउत होगे।
विश्व पुस्तक मेला
विश्व पुस्तक मेला काली ले नई दिल्ली के प्रगति मैदान म शुरू होही। केंद्रीय शिक्षा मंत्री धर्मेन्द्र प्रधान मेला के उद्घाटन करही। आजादी का अमृत महोत्सव थीम उपर आधारित ए बछर के पुस्तक मेला म फ्रांस अतिथि देश के रूप म शामिल होही। मेला के दउरान कई ठिन साहित्यिक अउ सांस्कृतिक गतिविधि राखे जाही। मेला म ए दारी एक हजार ले जादा प्रकाशक भाग लेवत हे। स्कूली लईका वरिष्ठ नागरिक अउ विकलांग मन बर प्रवेश निशुल्क हरय।
मुख्यमंत्री छात्रावास निर्माण
छत्तीसगढ़ सरकार प्रदेश के विद्यार्थी मनके सुविधा बर राजस्थान के कोटा म छात्रावास के निर्माण कराही। एखर बर मुख्यमंत्री भूपेश बघेल ह राजस्थान के मुख्यमंत्री अशोक गहलोत ल चिट्ठी लिखके निशुल्क भूखंड आबंटित करे के आग्रह करीन हे। श्री बघेल ह पत्र म लिखे हे कि राजस्थान के कोटा म आने आने राष्ट्रीय संस्थान म प्रवेश बर कोचिंग के बने बेवस्था होय के सेती छत्तीसगढ़ के विद्यार्थी बड़का संख्या म उंहा जाथे।
थलसेना लिखित परीक्षा
भारतीय थल सेना डहार ले छत्तीसगढ़ के सोल्जर तकनीकी नर्सिंग असिसटेंट अउ नर्सिंग असिसटेंट वेट के लिखित परीक्षा छब्बीस फरवरी के आयोजित करे जाही। ये परीक्षा नवा रायपुर स्थित आर्मी रिक्रूटमेंट ऑफिस म होही। परीक्षा म सामिल होय बर आवेदक मन ल अपन संग थलसेना डहार ले जारी प्रवेश पत्र अउ आधार कार्ड लाना होही। आवेदक मन ल परीक्षा स्थल म बीहनिया चार बजे पहुंचे बर केहे गेहे।
अस्पताल प्रमाणपत्र
केंद्रीय स्वास्थ्य मंत्रालय डहार ले छत्तीसगढ़ के दू ठिन शासकीय अस्पताल दुर्ग जिला चिकित्सालय अउ पाटन सामुदायिक स्वास्थ्य केंद्र ल मुस्कान कार्यक्रम के तहत राष्ट्रीय गुणवत्ता आश्वासन मानक प्रमाण पत्र- एन क्यू ए एस दे गेहे। ए अस्पताल मन ल लइका मन ल अच्छा स्वास्थ्य सेवा अउ ओमन ल बेहतर इलाज उपलब्ध कराय के सेती ए प्रमाण पत्र दे गेहे।