राज्यपाल शपथ
केंद्रीय मंत्रिमंडल ह बछर दू हजार बाईस-तेईस बर अनिवार्य जूट पैकेजिंग मानदंड ल आज मंजूरी दे देहे। नियम के अनुसार खाये के जीनिस ल पूरा अउ शक्कर के बीस प्रतिशत जरूरी रूप ले जूट के बोरी म पैक करे जाही। उंहे केंद्रीय मंत्रिमंडल ह भारत के बाइसवां विधि आयोग के कार्यकाल ल इकतीस अगस्त दू हजार चौबीस तक बढ़ाय ल स्वीकृति दे देहे।
केंद्र सरकार ह सबो राज्य सरकार अउ केंद्र शासित प्रदेश ल निर्देश देहे कि ओमन ह ग्रेड वन प्रवेश परीक्षा बर उम्र सीमा ल छै बछर ले जादा करय। शिक्षा मंत्रालय के स्कूल शिक्षा अउ साक्षरता विभाग ह एखर बारे म राज्य अउ केंद्र शासित प्रदेश ल चिट्ठी लिखे हे। मंत्रालय ह कहिन हे कि राष्ट्रीय शिक्षा नीति दू हजार बीस के उद्देश्य देश म राष्ट्रीय स्तर म लइका मनके भविष्य ल मजबूत बनाना हे। शुरूआती चरण बर सबो लइका मनके सीखे के पांच बछर तक के अवसर होथे । एमा तीन साल के प्री-स्कूल शिक्षा अउ दू बछर के प्राथमिक ग्रेड-वन अउ ग्रेड-टू सामिल हरय।
छत्तीसगढ़ प्रदेश भाजपा अध्यक्ष अरूण साव के नेतृत्व म चलत प्रदेश व्यापी अभियान मोर आवास मोर अधिकार आंदोलन ल लेके भारतीय जनता पार्टी ह प्रदेश भर म प्रदर्शन करत हे। एखर चलत भाजपा विधायक बृजमोहन अग्रवाल के अगवाई म रायपुर के शंकर नगर म बने कृषि मंत्री रविंद्र चौबे के निवास के घेराव करीन। ए बेरा म बड़का संख्या म भाजपा कार्यकर्ता मन ह नाराबाजी करत प्रदर्शन करीन।
अभियान के चलत भाजपा नेता मन ह आज रायपुर समेत दस ठिन विधानसभा क्षेत्र म जनता के बीच जाके प्रधानमंत्री आवास योजना ले वंचित लोगन मन ल उंखर हक दिलाय बर राज्य सरकार ले संघर्ष करे अउ ओ जम्मों वंचित मन ल आवास दिलाय के बात केहे हे।
प्रदेश भाजपा सह प्रभारी नीतिन नबीन ह कबीरधाम जिला के कवर्धा विधानसभा क्षेत्र म ए अभियान के चलत वंचित लोगन मनले भेंट करीन। उंहे राज्यसभा सांसद सरोज पांडेय ह कोरबा जिला के कटघोरा विधानसभा क्षेत्र के लोगन करा पहुंचीन । एखर अलावा पूर्व विधानसभा अध्यक्ष धरमलाल कौशिक ह बिलासपुर जिला के बिल्हा विधानसभा क्षेत्र, प्रदेश भाजपा महामंत्री ओ.पी. चौधरी ह रायगढ़ जिला के खरसिया विधानसभा क्षेत्र म क्षेत्रीय विधायक अउ राज्य केबिनेट मंत्री उमेश पटेल के निवास के घेराव करीन।
राज्य सरकार डहार ले मुख्यमंत्री वृक्ष संपदा योजना के चलत निजी भुंइया म वृक्षारोपण बर इच्छुक अउ पात्र हितग्राही मन ल पांच एकड़ भुंइया म पेड़ लगाय बर अनुदान दे जाही। योजना के अंतर्गत टीशू कल्चर सागौन, चंदन, क्लोनल नीलगिरी, मीलिया डूबिया, टीशू कल्चर बांस अउ आने उपयोगी प्रजाति के पौधा लगाय जाह। राज्य म निजी भुंइया म व्यावसायिक उद्देश्य ले वृक्षारोपण ल प्रोत्साहित करे बर वन विभाग ले जुड़े अधिकारी मन बर राज्य स्तरीय कार्यशाला के आयोजन करे गीस। जेमा बताय गीस कि पांच एकड़ ले जादा भुंइया होय म पचास प्रतिशत अनुदान दे जाही।
कार्यशाला म वृक्षारोपण विशेषज्ञ प्रेमलाल जैन, रायपुर कलेक्टर समेत नगर निगम अउ वन विभाग के वरिष्ठ अधिकारी मन मौजूद रीहिन।
गुजरात म आठ ले सतरा मार्च तक होवइया नेशनल तीरंदाजी स्पर्धा म कोंडागांव जिला के तीन झिन खिलाड़ी छात्रा मन ह प्रदर्शन करही। एमा रमिता सोरी, सुशीला नेताम, अउ सावित्री मंडावी ह सामिल हरय।
ए खिलाड़ी मन ह राज्य स्तरीय सीनियर तीरंदाजी स्पर्धा म अपन प्रतिभा के सुघ्घर प्रदर्शन करे रीहिन। ए तीनो छात्रा मन कोंडागांव के शासकीय गुण्डाधुर कॉलेज म पढ़त हे। उंहे जिला कलेक्टर दीपक सोनी संग कतकेन अधिकारी मन ह ए तीनो छात्रा म ल बधाई दीन हे।
अवइया विधानसभा चुनई ल देखत प्रचार प्रसार बर प्रदेश म राष्ट्रीय स्तर के नेता मनके अवई जवई शुरू होगे हे। एखर चलत अवइया पांच मार्च के आम आदमी पार्टी के राष्ट्रीय संयोजक अउ दिल्ली के मुख्यमंत्री अरविंद केजरीवाल के संग पंजाब के मुख्यमंत्री भगवंत मान ह घलो रायपुर आही।
– मुख्यमंत्री भूपेश बघेल ह आज अपन रायपुर के निवास कार्यालय म छत्तीसगढ़ राज्य के प्रथम स्वप्नदृष्टा स्वर्गीय डॅाक्टर खूबचंद बघेल के पुण्यतिथि म ओमन ल श्रद्धांजलि अर्पित करीन।
– सेना के छत्तीसगढ़ अउ ओडिशा सब एरिया डहार ले चौबीस फरवरी के नवा रायपुर स्थित मिलिट्री स्टेशन म सेवा निवृत्त सैनिक मन बर रैली के आयोजन करे जाही।
– राज्य महिला आयोग डहार ले आज अंबिकापुर के कलेक्ट्रेट सभाकक्ष म जन सुनवाई होइस। आयोग अध्यक्ष किरणमयी नायक के आगू तीन ठिन जिला के संतावन ठिन मामला ल राखे गीस, जेमा ले दस मामला के निराकरण कर दे गेहे।
– राजनांदगांव जिला के छुइखदान करा लकड़ी ले भरे एक ठिन ट्रक ह अनियंत्रित होके पलट गे । ए घटना म ट्रक म सवार एक झिन मनखे के मउत होगे, त उंहे छै लोगन मन ल चोट आय हे।
– कोरबा म शासकीय स्कूल शिक्षक डहार ले वेतन विसंगति के मांग ल लेके करे जात हड़ताल के असर लइका मनके पढ़ई म दिखत हे। जेखर ले गांव-गंवई के शिक्षा बेवस्था ह बड़ प्रभावित होवत हे।
– बालोद जिला के गुण्डरदेही थाना क्षेत्र म पाछू रतिहा एक ठिन रद्दा हादसा म चार झिनके मउत होगे। जेमा एक झिन माइलोगिन अउ ओखर बेटा समेत दू झिन आने मनखे सामिल हे।