छत्तीसगढ़ के नवा राज्यपाल विश्व भूषण हरिचंदन ह तेईस फरवरी के राज्यपाल पद के सपथ लीहीं। राजभवन के दरबार हॉल म होवइया ए कारीकरम म छत्तीसगढ़ उच्च न्यायालय के मुख्य न्यायाधीश अरूप कुमार गोस्वामी ह ओमन ल पद अउ गोपनीयता के सपथ देवाही।
उहें, राज्यपाल अनुसुईया उइके ल आज रईपुर के माना स्थित स्टेट हैंगर म बिदाई दे गीस। ओमन ल स्वामी विवेकानंद हवाई अड्डा म गॉड ऑफ ऑनर घलो दे गीस। ए मउका म मुख्यमंत्री ह गुलदस्ता भेंट करके ओमन ल बिदाई दीन। मुख्यमंत्री के संगेसंग विधानसभा अध्यक्ष डॉक्टर चरणदास महंत, गृह मंत्री ताम्रध्वज साहू, सांसद ज्योत्सना महंत अउ विधायक बृजमोहन अग्रवाल घलो आय रिहीन। जानबा के मुताबिक सुश्री अनुसुईया उइके ल मणिपुर के राज्यपाल बनाय गेहे।
पीएम-ग्राम पर्यटन
प्रधानमंत्री नरेन्द्र मोदी ह लोगन मन ले बिसेस कर युवा मन ले बढ़िया पर्यटन ग्राम प्रतियोगिता म भाग ले के संगेसंग देस के बड़का पर्यटन क्षमता के प्रदर्सन करे के बिनती करे हे। ए प्रतियोगिता के उद्देश्य अइसन गांव मन ल सम्मानित करना हे, जउन मन स्थानीय कला, संस्कृति अउ रहन-सहन ल बढ़ावा देथे। ए प्रतियोगिता ले आर्थिक पर्यावरणीय, सामाजिक स्थिरता, स्वास्थ्य अउ सुरक्षा के संगेसंग कतकोन आने क्षेत्र के घलो मूल्यांकन हो सकही। जिला, राज्य अउ राष्ट्रीय स्तर म ए प्रतियोगिता के आयोजन करे जाही।
जी-ट्वेंटी सम्मेलन
भारत एसो जी-ट्वेंटी के अध्यक्षता करत हे, जेमा देस म आने-आने सम्मेलन राखे जावत हे। उहें, अवइया आठ महीना के दउरान देस के आने-आने राज्य के वाय-ट्वेंटी सम्मेलन घलो होवत हे। वाय-ट्वेंटी आधिकारिक युवा ग्रुप हरय, जेमा जी-ट्वेंटी देस के युवा मन ल एक ठिन बढ़िया मउका देके उद्देश्य ले राखे जात हे। ए सम्मेलन के आयोजन छत्तीसगढ़ म घलो चुने गे सत्ताईस कालेज अउ बिलासपुर के घासीदास केन्द्रीय विश्वविद्यालय म सोलह फरवरी ले सुरू होगे हे, जउन ह पच्चीस फरवरी तक चलही। ए दउरान युवा मन ले जुड़े कतकोन कारीकरम होवत हे।
सर्किट हाउस/ट्रांजिट हॉस्टल
मुख्यमंत्री भूपेश बघेल ह आज नवा रईपुर सेक्टर-चौबीस म नवा बने सर्किट हाउस के लोकार्पण करीन। सात मंजिल के ए सर्किट हाउस ह दू एकड़ म करीबन चौबीस करोड़ रूपिया ले खरचा ले बने हे।
उहें, मुख्यमंत्री ह नवा रईपुर के सेक्टर-तीस म अधिकारी मनके रेहे बर बने ट्रांजिट हॉस्टल के घलो लोकार्पण करीन। तीन मंजिल के बने ए हॉस्टल म करीबन साढ़े नौ करोड़ रूपिया के खरचा आय हे।
भाजपा-घेराव
मोर आवास-मोर अधिकार आंदोलन ल लेके भारतीय जनता पार्टी ह प्रदेस म प्रदर्सन करत हे। इही मउका म आज कवर्धा, कटघोरा, बिल्हा, खरसिया अउ नवागढ़ विधानसभा म कार्यकर्ता मन ह आंदोलन करीन। खरसिया के नंदेली गांव म भाजपा कार्यकर्ता मन ह उच्च सिक्षा मंत्री उमेश पटेल के घर के घेराव करीन। भाजपा ह काली विधायक बृजमोहन अग्रवाल के अगुवई म रईपुर म कृषि मंत्री रविन्द्र चौबे के घर के घेराव करही।
उहें, मनेन्द्रगढ़ म मोर आवास-मोर अधिकार योजना ले छूटे हितग्राही अउ भाजपा कार्यकर्ता मन डहार ले केल्हारी के एसडीएम कार्यालय के घेराव करे जाही।
बस संचालक-टैक्स माफ
राज्य सरकार ह बस संचालक मनके ढाई करोड़ रूपिया ले जादा के व्हीलबेस आधारित टैक्स ल माफ कर देहे। काली मुख्यमंत्री के अगुवई म होय राज्य कैबिनेट के बइठका म ए फइसला ले गीस। सरकार के ए फइसला के मुताबिक बछर दू हजार तेरह ले पहिली के पंजीकृत यात्री बस मन ले व्हीलबेस के गलत ढंग ले, ले जात टैक्स के सेती पूरा टैक्स ल माफ कर दे गेहे। परिवहन विभाग ले मिले जानबा के मुताबिक ए फइसला के बाद व्हीलबेस बर जारी अधिसूचना राखे गे तारीख ले लागू होही।
अंतर्राष्ट्रीय मातृभाषा दिवस
आज अंतर्राष्ट्रीय मातृभाषा दिवस हरय। केन्द्रीय गृह मंत्री अमित शाह ह ए मउका म देस के लोगन मन ल सुभकामना दे हवय। ट्वीट म ओमन किहीन कि ए दिन मातृभाषा ले जुड़े अउ एला बने ढंग ले आगू बढ़ाय के संकलप लेके दीन हरय। मातृभाषा के समृद्ध होय ले देस घलो समृद्ध होथे। गृह मंत्री ह किहीन कि हम जम्मों झिन ल मातृभाषा के जादा ले जादा परयोग करना चाही।
त ऐति, छत्तीसगढ़ म राज्य के आने-आने जगह म लइका मन डहार ले बोले जाय भासा अउ बोली म कहानी म आधारित ‘‘पॉडकास्ट‘‘ सुरू करे गीस। एखर परयोग कक्षा म करे जाही। ए कोर्स करे के बाद अधिकारी मन ल लइका मन ल उंखर भासा म पढ़ाय म मदद मिलही।
चारधाम यात्रा-पंजीयन
चारधाम यात्रा बर तीर्थयात्री मनके ऑनलाइन पंजीयन आज ले सुरू होगे हे। पंजीयन बर केन्द्रीय पर्यटन विभाग के पोर्टल आज बिहनिया सात बजे खुलही। गंगोत्री अउ यमुनोत्री धाम के यात्रा के औपचारिक घोसना तक तीर्थयात्री मन बद्रीनाथ अउ केदारनाथ धाम के पंजीकरण करा सकही। एखर ले तीर्थयात्री मन ल पंजीयन के संगेसंग मंदिर के खुले के घलो पूरा जानबा मिलही।
एसो केदारनाथ धाम के कपाट पच्चीस अप्रैल के अउ बद्रीनाथ धाम के कपाट सत्ताईस अप्रैल के खुलही।
मुख्यमंत्री सुपोषण योजना
प्रदेस म पाछु चार बछर के दउरान दू लाख पैंसठ हजार ले जादा लइका मन कुपोषण अउ डेढ़ लाख ले जादा माईलोगिन मन एनीमिया ले मुक्त होय हे। मुख्यमंत्री सुपोषण योजना के तहत एनीमिया प्रभावित मन ल आयरन, फोलिक एसिड अउ कृमिनाशक गोली दे जाथे।
जानबा के मुताबिक राज्य म कुपोषण ल खतम करे बर मुख्यमंत्री सुपोषण योजना सुरू करे गेहे। पाछु चार बछर के दउरान राज्य म कुपोषण के दर म पांच दमशलव छह-एक प्रतिसत के कमी आय हे। राष्ट्रीय परिवार स्वास्थ्य सर्वेक्षण के मुताबिक राज्य म कुपोषण के प्रतिसत इकतीस दमशलव तीन हवय, जउन ह कुपोषण के राष्ट्रीय औसत बत्तीस दशमलव एक प्रतिसत ले कम हे।
दुर्घटना
गौरेला-पेंड्रा-मरवाही जिला म आज बिहनिया तीर्थयात्री ले भरे बस के अनते-तनते होके पलटे ले बारह ले जादा यात्री मन घायल होगे, जेमा ले आठ झिन यात्री के हालत गंभीर बताय जात हे। ए बस ह अयोध्या ले रईपुर आवत रिहीस। इही दउरान लालपुर गांव के तीर तेजी ले चलत बस ह पलट गे। घटना के सूचना मिलतेच मउका म पुलिस ह घायल मन ल जिला अस्पताल पहुंचईन। बस म करीबन साठ यात्री सवार रिहीन।
अउ अब थोरकुन समाचार सार म-
– भिलाई म ए बेरा शहीद वीरनारायण सिंह इंडियन दिव्यांग क्रिकेट टी-ट्वेंटी कल प्रतियोगिता के मुकाबला होवत हे। प्रतियोगिता के फाइनल मेच चौबीस फरवरी के शहीद वीरनारायण सिंह अंतर्राष्ट्रीय क्रिकेट स्टेडियम म खेले जाही।
– राजधानी रईपुर म गोठबात के संगेसंग काव्यपाठ के दू दिन के साहित्यिक कार्यक्रम ‘‘स्त्री सृजन और सरोकार‘‘ होईस। ए कारीकरम म देसभर ले आय रचनाकार मन अपन विचार राखीन।
– दुरूग जिला म बकरी पालन ल बढ़ावा दे बर उस्मानाबादी बकरी के प्रजनन केन्द्र बनाय गेहे। ए केन्द्र, कामधेनु विश्वविद्यालय के उप केन्द्र के रूप म काम करही। ए केन्द्र ल पच्चीस बकरी अउ दू ठन बकरा दे गीस।
– स्कूल अउ कॉलेज के वार्षिक परीक्षा ल देखत दुरूग जिला प्रसासन ह लाउड स्पीकर, धुमाल अउ बैंड बाजा उपर रतिहा दस बजे के बाद बजाय बर रोक लगा देहे। ए रोक ह तीस जून तक जारी रइही।
– छत्तीसगढ़ चिकित्सा सिक्षा संचालनालय के नवा आफिस अटल नगर नवा रईपुर म चलाय जात हे।
– राजनांदगांव के औद्योगिक प्रसिक्षण संस्था म सुजुकी मोटर्स गुजरात प्राईवेट लिमिटेड डहार ले चौबीस फरवरी के बिहनिया दस बजे ले प्लेसमेंट कैम्प राखे जाही।
– नारायणपुर जिला के छोटेडोंगर थाना क्षेत्र म माओवादी मन ह रईपुर कोति जावत लोहा ले भरे एक ठिन टरक म बड़गांव के तीर आगी लगा दीन।
अउ
– दुरूग जिला के सुपेला पुलिस ह सात हजार नग ले जादा नसीला दवई के संग तीन झिन आरोपी मन ल गिरफ्तार करे हे।