आज दिनभर के खबर ल अपन गुरतुर छत्तीसगढ़ी भाखा म पढ़व

कोरोना संक्रमण के बाढ़त मामला ल देखत रायपुर अउ दुर्ग जिला के कलेक्टर ह छै अगस्त तक तालाबंदी बढ़ाय जाय के संबंध म आदेश जारी कर देहे। फेर तिहार ल देखत एखर नियम म थोरिक छूट दे गेहे। एमा काली उनतीस अउ तीस जुलाई के दू दिन बर किराना के दुकान बीहनिया छै ले दस बजे तक खुला रीही। ये दुकान ले ईद अउ राखी परब ले जुड़े जीनिस बिसाय जा सकही। दुकानदार अउ लेवइया दूनों ल मास्क अउ सोशल डिस्टेस्ंिाग के नियम के पालन करना जरूरी हे। इकतीस जुलाई ले ये जिला मन म पहिली असन बीहनिया छै ले दस बजे तक सिरिफ सागभाजी, दूध, फल-फलहरी, अउ अंडा, मटन, मछली बेचे जा सकही। घर म दूध बटइया मन ह बीहनिया छै ले साढ़े नौ बजे तक अउ संझा पांच ले सात बजे तक अपन काम कर सकही। उंहें ठेला म फल अउ सागभाजी बेचइया मन घलो बीहनिया दस बजे तक ही अपन कारोबार कर सकही।

रायपुर अउ बीरगंाव नगर निगम के सबो सरकारी अउ प्रायवेट बैंक म मंझनियंा तीन बजे तक काम होही। जिला प्रशासन ह मवेशी मन बर चारा के धियान ल राखत पैट्स अउ इक्वेरियम के दुकान ल बीहनिया नौ ले साढ़े नौ अउ संझा के पांच ले साढ़े पांच बजे तक खोले के छूट देहे। संगेसंग टेलिकाम, इंटरनेट अउ आईटी संस्थान म काम करत लोगन पहिली असन काम कर सकही। उंहें तालाबंदी के बेरा खाये पीये के जीनिस के संग मिठई, दवई, चिकित्सा उपकरण समेत जम्मों जरूरी जीनिस आॅनलाईन मंगाये जा सकही। पेट्रोल अउ गैस सिलेण्डर मंझनियंा तीन बजे तक मिलही।

बिलासपुर जिला के बिल्हा अउ बोदरी नगरीय निकाय क्षेत्र म छै अगस्त के रतिहा बारा बजे तक बर तालाबंदी बढ़ाय के फैसला ले गेहे। फेर ये बेरा म किराना दुकान ल संझा पांच ले सात बजे तक खोले के मंजूरी दे गेहे।

एति कोरबा जिला प्रशासन ह छै अगस्त तक तालाबंदी लागू करे के संबंध म निर्देश जारी करे हे। सूरजपुर जिला के नगरीय क्षेत्र म तालाबंदी इकतीस जुलाई तक बढ़ा दे गेहे अउ सीमा ल सील करे गेहे। इही बीच जांजगीर चंापा जिला के कलेक्टर अउ पुलिस अधीक्षक ह नैला के वार्ड क्रमांक पांच के कंटेनमेंट जोन के जांच करीन अउ अधिकारी मन ल ये कंटेनमेंट जोन म अवई जवई म रोक लगाये अउ साफ सफई राखे के जरूरी निर्देश दीन।

बिलासपुर के संेट्रल जेल म इक्कीस झिन कैदी अउ सात झिन प्रहरी मनके कोरोना जांच रिपोर्ट पाॅजीटिव आय हे। ओमन ल अस्पताल म भर्ती कराय जात हे। राजधानी रायपुर म कंाग्रेस नेता सुबोध हरितवाल के कोरोना जांच रिपोर्ट पाॅजीटिव आय हे। ओमन ल इलाज बर रायपुर के एम्स म भर्ती कराय गेहे। उंखर पिता अउ पत्नी दूनों पहिलीच कोरोना संक्रमित पाय गे रीहिन जेखर इलाज होवत हे।

दुर्ग जिला म घलो पाछू रतिहा कोरोना संक्रमित बत्तीस झिन नवा मरीज मिले हे। एके दिन म जिला म तिरपन मामला आगू आइस। संक्रमित मरीज म महाराणा प्रताप चैक के बीएसएफ कैम्प के दस झिन जवान अउ छावनी थाना के दू आरक्षक सामिल हे। शहर के होटलमान के तीर तखार ले आठ झिन मराज पाय गेहे। ए क्षेत्र ल कंटेनमेंट जोन बनाय जात हे।

महासमुंद जिला म ट्रू नाॅट मशीन ले जांच म पांच झिन नवा कोरोना मरीज के पुष्टि होय हे। एमा ले एक झिन पाछू दिन कोलकाता ले लहुटे रीहिस। उंहें छै झिन मरीज आज ठीक होगे। जउन ल अस्पताल ले छुट्टी दे दे गेहे। कबीरधाम जिला म पुलिस के एक जवान समेत कोरोना संक्रमित पांच नवा मरीज मिले हे । पाछू चैबीस घंटा म प्रदेश म कोरोना संक्रमण के दू सौ पैंतालिस नवा कोरोना मरीज मिले हे ।

इही बीच राज्य सरकार ह कोरोना संक्रमण के रोकथाम बर नवा रायपुर के मंत्रालय अउ विभागाध्यक्ष कार्यालय ल अवइया छै अगस्त तक बंद राखे के आदेश जारी करे हे।

छत्तीसगढ़ के राज्यपाल सुश्री अनुसूइया उइके के कार्यकाल के पहिली बछर काली पूरा होथे। पाछू बछर उनतीस जुलाई के सुश्री उइके ह छत्तीसगढ़ के राज्यपाल के रूप म पदभार संभालीन। अपन एक बछर के यात्रा अउ छत्तीसगढ़ के लोगन मुख्य रूप ले आदिवासी वर्ग के कल्याण बर अपन विचार ल लेके राज्यपाल ह आकाशवाणी संग विशेष गोठबात करीन।

ये विशेष भेंटवार्ता के प्रसारण आकाशवाणी केंद्र रायपुर कोति ले काली उनतीस जुलाई के बीहनिया साढ़े दस बजे ले करे जाही। एला छत्तीसगढ़ स्थित आकाशवाणी के जम्मों केेंद एक संगरा रिले करही। ये भेंटवार्ता मीडियम वेव के संगेसंग एफ.एम. म घलो सुने जा सकही।

पंचायत अउ ग्रामीण विकास विभाग ह मानसून के बेरा गौठान म छायादार पौधा लगाए के निर्देश देहे। संगेसंग वर्मी कम्पोस्ट यूनिट, स्व सहायता समूह बर शेड अउ जरूरी जीनिस के काम ल झटकीन करे बर केहे हे।

विभागीय मंत्री टी.एस. सिंहदेव के निर्देश म प्रमुख सचिव गौरव द्विवेदी ह मनरेगा के जम्मों जिला कार्यक्रम समन्वयक मन ल ए संबंध म चिट्ठी जारी करे हे। जेमा केहे गेहे कि गौठान म लगाए गे पौधा के देखभाल अउ रख रखाव के जिम्मेवारी गौठान संचालन समिति के होही।

येे बेरा माओवादी मनके खिलाफ कार्रवाई करे बर सुरक्षा बल ह राज्य के माओवाद प्रभावित क्षेत्र म अलर्ट जारी करे हे। माओवादी मन ल पकड़े बर छत्तीसगढ़ के संग महाराष्ट्र अउ मध्यप्रदेश पुलिस घलो सीमावर्ती क्षेत्र म गश्त करत हे। राज्य के सीमावर्ती जिला राजनंादगंाव अउ कबीरधाम जिला म पुलिस कोति ले माओवादी मनके खिलाफ संयुक्त अभियान चलाये जात हे।

राजनंादगंाव के बोरतलवा थाना क्षेत्र म माओवाद प्रभावित जगा म सुरक्षा बल ह आज गश्त करीन। संगेसंग छुरिया अउ औंधी क्षेत्र म घलो पुलिस ह जगा जगा तलाशी अभियान शुरू कर देहे। खबर के मुताबिक आजले माओवादी मनके शहीदी सप्ताह शुरू होय हे।

इही बीच बीजापुर जिला म आज बीहनिया सुरक्षा बल अउ माओवादी मनके बीच मुठभेड़ होगे। सुरक्षा बलके जवाबी कार्रवाई के बाद माओवादी मन उंहा ले भाग निकलीन । मउका ले दस ठिन पिट्ठू, तीन ठिन टेंट, एक कुकर बम अउ दवई के संग माओवादी साहित्य बरामद करे गेहे।

उंहें दंतेवाड़ा जिला के किरंदुल थाना क्षेत्र म सुरक्षा बल ह माओवादी मन कोति ले बनाय गे शहीद स्मारक ल तोड़े म सफलता हासिल करीन।

महासमुंद जिला म नकली नोट खपइया एक गिरोह पकड़ म आगे । इंखर तीर ले पांच सौ अउ सौ रूपिया के इक्कीस लाख सत्ताईस हजार रूपिया के नकली नोट बरामद करे जा चुके हे। ए मामला म पांच झिन ल गिरप्तार करे गेहे।

गिरोह के मुखिया बलौदाबाजार के सरसींवा म पिं्रटिंग पे्रस चलात रीहिस। ये हत्या के मामला म पहिली घलो जेल जा चुके हे।

पुलिस के मुताबिक नदीमोड़ अउ बेलसोड़ा फाटक तीर कुछएक लोगन कोति ले नकली नोट के सौदा करे के सूचना मिले रीहिस। सायबर सेल के टीम अउ सीटी कोतवाली पुलिस ह इलाका के घेराबंदी करके गाड़ी के जांच शुरू कर दीन । इही बेरा फटफटी सवार दू झिन मनखे तीर ले ये नकली नोट बरामद करे गीस।

उंहें इही जिला म फल ले भरे गाड़ी म गंाजा तस्करी होय के मामला आगू आय हे। मउका ले पांच लाख रूपिया के एक कुंटल गांजा जब्त करे गेहे। गांजा तस्करी के आरोप म पंजाब के तीन झिन मनखे ल गिरप्तार करे गेहे।

मौसम विभाग ह अवइया चैबीस घंटा के दउरान प्रदेश म कुछएक जगा म भारी बरसा होय अउ एक दू जगा म गाज गिरे के चेतावनी देहे।

मौसम विभाग के मुताबिक हिमालय के तरई म एक मानसून द्रोणिका सक्रिय हे, संगेसंग एक आने द्रोणिका बिहार ले ओडिशा के उत्तरी क्षेत्र तक बने हे। जेखर परभार ले प्रदेश के कतकोन क्षेत्र म पाछू चैबीस घंटा म बरसा होही अउ काली तक मौसम अइसने बने रेहे के आसार हवय। राजधानी रायपुर म आज मंझनिया बाद बदली छाइस अउ तेज बरसा होइस।