राज्य सरकार डहार ले मध्यान्ह भोजन योजना म मिलेट्स ल सामिल करे के प्रस्ताव ल केन्द्र सरकार ह मंजूरी दे देहे। अब प्रधानमंत्री पोषण शक्ति योजना के तहत छत्तीसगढ़ के बारह जिला म सोया चिक्की के जघा म सप्ताह के चार दिन स्कूली लइका मन ल मिलेट्स ले तैयार खाद्य पदार्थ वितरित करे जाही।
लोक शिक्षण संचालनालय डहार ले केन्द्र सरकार ल ए योजना ल आंसिक रूप ले संसोधित करत हुए सोया चिक्की के जघा म मिलेट्स ले बने खाद्य सामग्री वितरित करे जाय के प्रस्ताव भेजे गे रिहीस। ए प्रस्ताव ल केन्द्र सरकार के डायरेक्टर पीएम पोषण डहार ले मंजूरी दे दे गेहे।
मुख्यमंत्री-बालोद
मुख्यमंत्री भूपेश बघेल आज बालोद जिला के ग्राम परसतराई म दिल्लीवार कुर्मी क्षत्रिय समाज के तिरपनवां वार्षिक अधिवेशन म सामिल होईन। ए मउका म ओमन किहीन कि नवा उद्योग नीति के तहत महात्मा गांधी रूरल इंडस्ट्रीयल पार्क-रीपा बर काली कैबिनेट के बइठका म नवा नीति के घोसना करे जाही। ओमन किहीन कि अब बड़े-बड़े उद्योगपति मन कस हमर गांव के युवा मन घलो रीपा के तहत गौठान म अपन कारोबार चलाके लाभ उठा सकहीं। श्री बघेल ह किहीन कि वर्तमान म गोबर ले बिजली पैदा करे के अलावा पेंट अउ कई उपयोगी सामान बनाय जात हे।
कारीकरम म मुख्यमंत्री ह गुंडरदेही म जिला सहकारी केन्द्रीय बैंक के साखा खोले के घोसना करीन। श्री बघेल ह दिल्लीवार कुर्मी समाज के सामाजिक भवन अउ विभिन्न निर्माण कार्य बर एक करोड़ रूपिया के रासि देके ऐलान घलो करीन।
एखर पहिली, मुख्यमंत्री ग्राम परसतराई म वीर शिरोमणि छत्रपति शिवाजी महाराज के प्रतिमा के अनावरण घलो करीन।
भाजपा-घेराव
भारतीय जनता पार्टी काली रायपुर पश्चिम विधानसभा सहित प्रदेस के ग्यारह विधानसभा क्षेत्र मन म मोर आवास-मोर अधिकार ल लेके विधायक निवास के घेराव करही। भाजपा के प्रदेश सह-प्रभारी नितिन नबीन ह कांकेर म, प्रदेस भाजपा अध्यक्ष अरूण साव ह महासमुंद म अउ वरिष्ठ विधायक बृजमोहन अग्रवाल ह राजिम म घेराव के नेतृत्व करही।
प्रदेस भाजपा महामंत्री विजय शर्मा ह बतईन कि अब तक तेईस विधानसभा क्षेत्र मनके घेराव करे जा चुके हे। ओमन प्रधानमंत्री आवास योजना ल लेके राज्य सरकार उपर निसाना साधत हे। ओमन किहीन कि प्रधानमंत्री नरेन्द्र मोदी ह गरीब मन ल पक्का मकान देना चाहत हे, लेकिन राज्य के कांग्रेस सरकार गरीब अउ प्रधानमंत्री के बीच म दीवार बनके खड़े हे। ओमन किहीन कि भाजपा विधानसभा स्तर म मोर आवास-मोर अधिकार ल लेके जनता के बीच म जावत हे। श्री शर्मा ह किहीन कि नब्बे विधानसभा क्षेत्र मन म घेराव के बाद भाजपा मोर आवास-मोर अधिकार के तहत जिला के बाद प्रदेस स्तरीय आंदोलन करही।
मिलेट्स-कार्निवाल
राजधानी रायपुर म आयोजित छत्तीसगढ़ मिलेट कार्निवाल के अंतिम दिन आज नागपुर के प्रसिद्ध शैफ डॉक्टर नितिन शिंदे ह उपास म खाय बर मिलेट्स के फलाहार बनईन। एमा मिलेट्स भंगर, पनीर अउ मूंगफली दाना के फलाहार बर्नियाड पनीर कटलेट वीथ पीनट चटनी सामिल हे। ओमन बतईन कि उपास म कार्बोहाईट्रेड साबुदाना के बजाय उच्च प्रोटीनयुक्त मिलेट ले बने व्यंजन मन ल सामिल करना चाही, ताकि थकान महसूस झन होवय। ओमन अपन रेसिपि बनाके लोगन मन ल खिलईस अउ मिलेट्स ल पकाय के सही तरीका बतावत हुए दर्सक मन ल टिप्स घलो दीन।
उहें, होटल प्रबंधन संस्थान-आई.एच.एम. रायपुर के छात्र-छात्रा मन नुक्कड़-नाटक के जरिया रोज के खानपान म मिलेट्स के महत्व ल बतईन। तेरह छात्र-छात्रा मन डहार ले प्रस्तुत नाटक के प्रस्तुतिकरण ल लोगन मन खूब पसंद करीन। ए दउरान देखइया मन ल नारा के जरिया मिलेट्स के फायदा के बारे म घलो बताय गीस। छात्र-छात्रा मन बतईन कि खाना म मिलेट्स ल सामिल करना जरूरी हे। एमा विटामिन, फाइबर, मिनरल अउ एन्जाईम के मात्रा जादा होथे। एखर अलावा एमा मैक्रो अउ माइक्रो जइसन बेहतरीन पोषक तत्व घलो पाय जाथे।
गोधन एम्पोरियम
गोबर ले निर्मित उत्पाद मनके बिक्री बर अंबिकापुर म महिला मन ह विशेष शोरूम सुरू करे हे। एला गोधन एम्पोरियम के नाव दे गेहे। ए एम्पोरियम म वर्मी कम्पोस्ट के संगेसंग गौ-काष्ठ, अगरबत्ती, छेना अउ गोबर ले निर्मित पेंट के बिक्री करे जात हे। अंबिकापुर के मुख्य चौराहा म ए एम्पोरियम ह सफलतापूर्वक संचालित होवत हे। एखर जिम्मेदारी पूरा महिला मनके हाथ म हे। गोधन एम्पोरियम म काम करइया महिला मन ल अब तक बारह लाख रूपिया ले जादा के आमदनी होय हे।
राजिम माघी पुन्नी मेला-समापन
महानदी, पैरी अउ सोंढूर नदी के त्रिवेणी संगम म आयोजित राजिम माघी पुन्नी मेला के काली समापन होगे। ए मउका म मुख्यमंत्री भूपेश बघेल ह किहीन कि देस म कोनों जघा अइसना आयोजन नइ होवय। राज्य सरकार ह आस्था के केन्द्र ल विकसित करे के काम करत हे। इहां के नृत्य-संगीत मन ल घलो सहेजे के काम चलत हे।
उहें, कार्यक्रम ल संबोधित करत धर्मस्व अउ पर्यटन मंत्री ताम्रध्वज साहू ह किहीन कि आने वाला बछर म साठ एकड़ आरक्षित भूमि उपर माघी पुन्नी मेला लगही। एखर बर सौ करोड़ रूपिया के रासि लागही। टेंडर के प्रक्रिया सुरू कर दे गेहे।
संस्कृति मंत्री अमरजीत भगत ह किहीन कि राजिम आस्था, विश्वास अउ संस्कृति के समागम आय।
ए अवसर म रामायण प्रतियोगिता के विजेता मन ल पुरस्कृत करे गीस। ए प्रतियोगिता म पहला स्थान हासिल करने वाला ज्ञानगंगा मानस परिवार बचेली दंतेवाड़ा ल पांच लाख रूपिया के चेक, स्मृति चिन्ह, प्रमाण-पत्र, रामायण ग्रंथ अउ राजकीय गमछा के संग सम्मानित करे गीस। उहें, दूसरइया पुरस्कार माधुरी महिला मंडल गरियाबंद ल मिले हे। ओमन ल तीन लाख रूपिया अउ तीसरइया स्थान हासिल करने वाला जांजगीर-चांपा जिला के मानस मंडली सरहर ल दू लाख रूपिया के चेक प्रदान करे गीस।
भाजपा अध्यक्ष-बयान
प्रदेस भाजपा अध्यक्ष अरूण साव ह आरोप लगाय हे कि राज्य के कांग्रेस सरकार विपक्ष ल दबाय के प्रयास करत हे। ओमन भाजपा कार्यकर्ता मन उपर एफ.आई.आर. दर्ज करे के मामला ल अलोकतांत्रिक बतावत हुए किहीन कि ए सरकार डरे हुए हे अउ लोकतंत्र के हत्या करे म तुले हे। श्री साव ह किहीन कि राज्य सरकार के दमनकारी नीति मन ले भाजपा कार्यकर्ता मन झूकने वाला नइ हे। ओमन किहीन कि भाजपा, लोकतांत्रिक तरीका ले छत्तीसगढ़ के जनता के हित बर संघर्ष करत रइही।
उहें, भाजपा प्रवक्ता संदीप शर्मा ह किहीन कि कांग्रेस करा चुनाव म जाय बर कोई मुद्दा नइ हे। एखरे सेती ओ ह भाजपा कार्यकर्ता मन उपर एफ.आई.आर. दर्ज कर डराय के प्रयास करत हे। ओमन किहीन कि माओवादी मन डहार ले भाजपा कार्यकर्ता मनके हत्या के विरोध म प्रदर्सन करइया कार्यकर्ता मनके खिलाफ एफ.आई.आर. दर्ज कर कार्यकर्ता मनके आवाज़ ल दबाय के प्रयास करे जात हे, जेला बर्दाश्त नइ करे जाय।
जवान-खुदकुशी
दंतेवाड़ा जिला म सीआरपीएफ के एक झन जवान ह अपनेच सर्विस रायफल ले खुद ल गोली मारके आत्महत्या कर लेहे। जिला के पुलिस अधीक्षक आर.के. बर्मन ह घटना के पुष्टि करत हुए बतईन कि बारसूर कैम्प म पदस्थ सीआरपीएफ के एक सौ पंचानवीं बटालियन के जवान गुनीन दास पाछु कुछ दिन पहिली ही छुट्टी ले लहुटे रिहीस। ए जवान असम के रहने वाला रिहीस।
उहें, इही जिला म नेरली कैम्प म पदस्थ सीआरपीएफ के दू सौ तीसवां बटालियन के पच्चीस झिन जवान फूडप्वाजनिंग के सिकार होगे हे। एमा ले पांच झन जवान ल अस्पताल म भर्ती कराय गेहे। उहें, बीस झन जवान मन ल प्रारंभिक उपचार के बाद छुट्टी दे दे गेहे।
खेल समाचार
भारतीय जूडो महासंघ के तत्वावधान म चेन्नई म आयोजित राष्ट्रीय कैडेट अउ सब जूनियर जूडो प्रतियोगिता म छत्तीसगढ़ के दू झन खिलाड़ी कोंडागांव के अनिल गोटा अउ भिलाई के तनु रानी साहू ह अपन-अपन वर्ग म कांस्य पदक हासिल करे हे। ए उपलब्धि म छत्तीसगढ़ जूडो संघ के पदाधिकारी मन ह ए खिलाड़ी अउ उंखर प्रसिक्षक मन ल बधाई अउ सुभकामना देहे।
गौरतलब हे कि ए प्रतियोगिता म देसभर के इकतीस टीम भाग ले रिहीस।