छत्तीसगढ़ के मनोनीत राज्यपाल विश्व भूषण हरिचंदन तेईस फरवरी के शपथ ग्रहण करही। राजभवन म होवइया कारीकरम ल लेके तियारी सुरू होगे हे। मुख्य सचिव अमिताभ जैन ह काली नवा रईपुर म बइठका लेके राज्यपाल के आगमन समेत दूसर व्यवस्था के संबंध म अधिकारी मन ल निरदेस दीन। बइठका म राज्यपाल के सपथ ग्रहण समारोह बर बैठक व्यवस्था, सुरक्षा व्यवस्था समेत दूसर व्यवस्था के तियारी के संबंध म घलो विचार-विमर्स करे गीस।
उहें, पूर्व केन्द्रीय मंत्री अउ भाजपा के वरिष्ठ नेता रमेश बैस ह आज महाराष्ट्र के राज्यपाल पद के सपथ लीन। बॉम्बे उच्च न्यायालय के कार्यवाहक मुख्य न्यायाधीश एस.वी. गंगापुरवाला ह श्री बैस ल सपथ दिलईन। श्री बैस ह मुंबई के राजभवन म राखे गे समारोह म मराठी म सपथ लीन। ए मउका म मुख्यमंत्री एकनाथ शिंदे, विधानसभा अध्यक्ष राहुल नारवेकर, पर्यटन मंत्री मंगल प्रभात लोढ़ा अउ छत्तीसगढ़ के प्रदेस भाजपा अध्यक्ष अरूण साव उपस्थित रिहीन।
केन्द्र-गेहूं
केन्द्र सरकार ह महंगाई उपर काबू पाय बर खुला बाजार म ई-नीलामी बिक्री योजना के तहत गेहूं के आरक्षित मूल्य ल अउ कम कर देहे। कम कीमत अवइया महीना के इकतीस तारीख ले लागू रइही। आने-आने श्रेणी के गेहूं बर दू हजार एक सौ पचास रूपिया अउ दू हजार एक सौ पच्चीस रूपिया प्रति क्विंटल आरक्षित मूल्य निर्धारित करे गेहे। उपभोक्ता कार्य मंत्रालय ह केहे हे कि आरक्षित मूल्य म कमी ले उपभोक्ता मन ल गेहूं अउ एखर ले बने उत्पाद सस्ता दर म मिलही।
महाशिवरात्रि/माघी पुन्नी मेला
देसभर म महाशिवरात्रि के परब आज श्रद्धा अउ उछाह के संग मनाय जात हे। राजधानी रईपुर समेत प्रदेस के जम्मों शिवालय मन म बिहनिया ले जलाभिषेक अउ पूजा अर्चना बर श्रद्धालु मनके भीड़ देखे गीस। ए मउका म श्रद्धालु मन नदी म पुण्य स्नान घलो करीन। मुख्यमंत्री भूपेश बघेल ह महाशिवरात्रि के मउका म प्रदेसवासी मन ल बधाई अउ सुभकामना दीन हे।
महाशिवरात्रि म आज दुरूग जिला म शिवनाथ नदी के महमरा तट म शिव महोत्सव के आयोजन करे गीस। ए मउका म श्रद्धालु मन पुण्य स्नान करके भगवान शिव के आराधना करीन। ए महोत्सव म सहर विधायक अरूण वोरा अउ महापौर धीरज बाकलीवाल घलो सामिल होईन।
उहें, राजनांदगांव सहर म प्रजापिता ब्रम्हा कुमारी डहार ले भगवान शिव के सोभायात्रा निकाले गीस। उहें, सहर म आने-आने जघा मन म भंडारा के घलो आयोजन करे जात हे।
ओति, जांजगीर-चांपा के धार्मिक नगरी खरौद स्थित लक्ष्मणेश्वर मंदिर म आज बिहनिया ले भक्त मनके तांता लगे रिहीस। आठवीं सताब्दी म बने ए मंदिर म दर्सन खातिर देस-विदेस ले श्रद्धालु पहुंचत हवय।
ऐति, महानदी, पैरी अउ सोंढूर नदी के त्रिवेणी संगम म आयोजित राजिम माघी पुन्नी मेला म आज बिहनिया हजारों मनखे मन स्नान करके कुलेश्वर महादेव के पूजा करीन। ए मेला के आज समापन होवत हे। मुख्यमंत्री भूपेश बघेल समापन समारोह म सामिल होही।
उहें, मुख्यमंत्री काली रईपुर के महोबा बाजार स्थित मीडिया सिटी पहुंचीन अउ उहां शिवलिंग प्राण प्रतिष्ठा समारोह म सामिल होईन। ए मउका म ओमन मीडिया सिटी म नवा बने शिवालय परिसर के लोकार्पण करीन।
कांग्रेस-राष्ट्रीय अधिवेशन
भारतीय राष्ट्रीय कांग्रेस के पच्यासीवां अधिवेशन नवा रईपुर म चौबीस ले छब्बीस फरवरी तक होही। अधिवेशन के तैयारी ल लेके प्रदेस कांग्रेस कमेटी कोति ले बइठका आयोजित करे जात हे। इही कड़ी म काली राजधानी स्थित राजीव भवन म कम्युनिकेशन समिति, आवास समिति, कंट्रोल रूम समिति अउ प्रचार-प्रसार समिति के बइठका होईस। बइठका म कार्ययोजना उपर विचार-विमर्स करे गीस अउ पदाधिकारी मन ल जिम्मेदारी सौंपे गीस।
नाबार्ड-संगोष्ठी
राष्ट्रीय कृषि अउ ग्रामीण विकास बैंक-नाबार्ड डहार ले काली नवा रईपुर म राज्य ऋण संगोष्ठी के आयोजन करे गीस। कारीकरम म नाबार्ड के मुख्य महाप्रबंधक डॉक्टर ज्ञानेन्द्र मणि ह बतईन कि ए वित्तीय बछर म राज्य के बैंक ऋण बर छियालीस हजार संतावन करोड़ रूपिया के प्रावधान करे गेहे। ओमन साख योजना प्रक्रिया म स्टेट फोकस पेपर के महत्व के बारे म जानकारी दीन।
संगोष्ठी म भारतीय रिजर्व बैंक के क्षेत्रीय निदेशक रेनी अजीत अउ अपेक्स बैंक के अध्यक्ष बैजनाथ चंद्राकर ह स्टेट फोकस पेपर के अनावरण करीन।
मिलेट्स कार्निवाल
राजधानी रईपुर के सुभाष स्टेडियम म ए दिन म मिलेट्स कार्निवाल के आयोजन करे जात हे। तीन दिन के ए कार्निवाल म काली मुख्यमंत्री भूपेश बघेल सामिल होईन अउ ओमन लोगन मन ल अपन खानपान म मिलेट्स ले बने व्यंजन ल सामिल करे के अपील करीन। ए मउका म मुख्यमंत्री ह किसान मन ले मिलेट्स के उत्पादन ल बढ़ाय बर किहीन। ओमन यहू किहीन कि राजधानी रईपुर समेत प्रदेस के छै ठिन जघा मन म मिलेट्स कैफे खोले जाही, जेखर संचालन महिला स्व-सहायता समूह डहार ले करे जाही।
उहें, वन मंत्री मोहम्मद अकबर ह किहीन कि ए कार्निवाल के माध्यम ले लोगन मन ल मिलेट्स के खूबी पता चलही। ओमन किहीन कि कोदो, कुटकी अउ रागी सेहत बर बहुत फायदेमंद हरय। रईपुर स्थित इंदिरा गांधी कृषि विश्वविद्यालय के कुलपति डॉक्टर गिरीश चंदेल ह बतईन कि विश्वविद्यालय कोति ले कोदो, कुटकी अउ रागी के नौ प्रजाति विकसित करे गेहे। संघरा विश्वविद्यालय म करीबन तीन सौ क्विंटल बीज उपलब्ध हवय।
रईपुर म राखे गे ए मिलेट्स कार्निवाल म उनचास स्टॉल लगाय गेहे, जेमा पच्चीस छत्तीसगढ़ के अउ चौबीस दूसर राज्य मनके हरय। एमा सात राज्य के प्रतिनिधि घलो सामिल होवत हे।
कोदो/कुटकी-कार्यशाला
छत्तीसगढ़ राज्य ग्रामीण आजीविका मिशन-बिहान डहार ले मोटा अनाज के उत्पादन, प्रसंस्करण अउ उपभोग ल बढ़ावा दे अउ एखर प्रचार-प्रसार बर काली राज्य स्तरीय कार्यशाला सह-प्रशिक्षण के आयोजन करे गीस। रईपुर के निमोरा स्थित ठाकुर प्यारेलाल ग्रामीण विकास संस्थान म राखे गे ए कार्यशाला म कोदो, कुटकी अउ रागी जइसे मोटा अनाज के बारे म जानकारी दे गीस।
आरटीई-लोक शिक्षण संचालनालय
निःशुल्क बाल शिक्षा अधिकार अधिनियम-आरटीई के तहत आर्थिक रूप ले कमजोर वर्ग के लइका मनके स्कूल म प्रवेस अउ सुल्क प्रतिपूर्ति रासि के भुगतान के संचालन अब ले फेर लोक शिक्षण संचालनालय ल सौंपे गेहे। पहिली ए जिम्मेदारी राज्य परियोजना कार्यालय समग्र शिक्षा ल सौंपे गे रिहीस। ए संबंध राज्य शासन डहार ले जारी पत्र म केहे गेहे कि निजी स्कूल मन ल मान्यता दे अउ निरस्त करे संबंधी अधिकार जिला सिक्षा अधिकारी के होथे अउ जिला सिक्षा अधिकारी लोक शिक्षण संचालक के प्रत्यक्ष नियंत्रण म काम करथे।
अउ अब थोरकुन समाचार सार म-
– संत अउ महान आध्यात्मिक गुरू स्वामी रामकृष्ण परमहंस के आज जयंती हरय। ए मउका म मुख्यमंत्री भूपेश बघेल ह ओमन ल नमन करीन।
– कोरिया जिला सत्र न्यायालय ह तीस जनवरी दू हजार इक्कीस के होय हत्या के मामला म आरोपी दंपत्ति ल आजीवन कारावास के सजा सुनाय हे।
– जशपुर जिला के पत्थलगांव म ढलाई के दउरान सेन्टरिंग प्लेट गिरे ले ओमा दब के एक मजदूर के मउत होगे। उहें, नौ झिन दूसर मजदूर मन घायल होगे, जेमन ल पत्थलगांव के अस्पताल म भर्ती कराय गेहे। एमा ले एक मजदूर के हालत गंभीर हवय।
– बिलासपुर जिला के बेलगहना थाना क्षेत्र के करवा गांव म पति-पत्नी के लास घर म मिले हे। पुलिस मामला के जांच म जुट गेहे।
– जिला रोजगार अउ स्व-रोजगार मार्गदर्शन केन्द्र रईपुर डहार ले इक्कीस फरवरी के पुराना पुलिस मुख्यालय परिसर म प्लेसमेंट कैंप राखे जाही, जेखर माध्यम ले सौ ले जादा पद म भर्ती करे जाही।
– रईपुर के बैरन बाजार स्थित शासकीय सह शिक्षा पॉलीटेक्निक कॉलेज म एक निजी कंपनी डहार ले रोजगार मेला के आयोजन करे गीस। एमा तकनीकी परीक्षा के बाद इकसठ विद्यार्थी मनके चयन साक्षात्कार बर होईस।
अउ
– अनुसूचित जाति, जनजाति अउ अन्य पिछड़ा वर्ग के पोस्ट मैट्रिक छात्रवृत्ति के तहत त्रुटि सुधार के आखिरी तारीख दस मार्च निर्धारित करे गेहे।