बस्तर संभाग म पाछु कुछ दिन के दउरान भारतीय जनता पार्टी के स्थानीय नेता अउ कार्यकर्ता मनके हत्या के विरोध म पार्टी ह आज राजधानी रईपुर के संग प्रदेस के आने-आने जिला अउ ब्लॉक मुख्यालय मन म चार सौ ले जादा जगह म चक्काजाम करीन। ए दउरान कार्यकर्ता मन ह राज्य सरकार के खिलाफ नाराबाजी घलो करीन।
रईपुर के शंकर नगर म पार्टी अध्यक्ष अरूण साव ह चक्काजाम के नेतृत्व करीन। ए मउका म श्री साव ह कहिन कि जब भी कांग्रेस के सरकार बनथे, राजनीतिक हत्या के सिलसिला सुरू हो जथे। एखर विरोध म आज पूरा प्रदेस म चक्काजाम करे जात हे। उहें, रईपुर के कटोरा तालाब म कांग्रेस के प्रदेस अध्यक्ष मोहन मरकाम के गाड़ी घलो चक्काजाम म फंस गीस, जेला दूसर रद्दा ले रवाना करे गीस। ए दउरान पुलिस अउ भाजपा कार्यकर्ता मनके बीच झूमाझटकी घलो होईस।
उहें, दुर्ग जिला म भाजपा कार्यकर्ता मन ह महिला मोर्चा के संग राष्ट्रीय राजमार्ग क्रमांक-तिरपन नेहरू नगर टोल प्लाजा तीर चक्काजाम करीन। भिलाई अध्यक्ष बृजेश बिचपुरिया के नेतृत्व म करे गे चक्काजाक के कारण सड़क के दूनों तरफ गाड़ी के लंबा कतार लग गीस।
ओति, बलरामपुर-रामानुजगंज जिला म पूर्व मंत्री रामविचार नेताम के नेतृत्व म बस स्टैंड चउक तीर राष्ट्रीय राजमार्ग-तिरालीस म चक्काजाम करीन। एखर कारण झारखंड, अंबिकापुर के संगेसंग रामानुजगंज म घलो आना-जाना प्रभावित होईस।
ऐति, जांजगीर-चांपा जिला म नेता प्रतिपक्ष नारायण चंदेल के नेतृत्व म भाजपा कार्यकर्ता मन ह बीटीआई चउक तीर चक्काजाम करीन।
मिलेट कार्निवाल
मुख्यमंत्री भूपेश बघेल ह आज रईपुर के सुभाष स्टेडियम म तीन दिवसीय मिलेट्स कार्निवाल के सुभारंभ करीन। ए मउका म मुख्यमंत्री ह कहिन कि छत्तीसगढ़ मिलेट्स के हब हे। इहां कोदो, कुटकी अउ रागी के समर्थन मूल्य घोसित करे गेहे। एखर ले किसान मनके उत्साह बाढ़ीस अउ पहिली ही बछर म पचपन हजार क्विंटल मिलेट्स के खरीदी करे गेहे। ओमन ह बतईन कि आज एक लाख पैंसठ हजार हेक्टेयर क्षेत्र म मिलेट्स के खेती होवत हे। पहिली सिर्फ सत्तर हेक्टेयर क्षेत्र म एखर खेती होवत रिहीस। श्री बघेल ह मिलेट्स ल मध्यान्ह भोजन म सामिल करे के बात किहीन।
उन्नीस फरवरी तक चलइया ए कार्निवाल के आयोजन मिलेट ल लोगन मनके रोज के खाना म सामिल करे अउ एखर पोसक तत्व बर जन-जागरूकता लाय के उद्देश्य ले करे जात हे। एखर आयोजन राज्य लघु वनोपज संघ अउ आई.आई.एम.आर. हैदराबाद डहार ले करे जात हे। कार्निवाल म आम मनखे मिलेट ले बने खाना-खजाना के आनंद उठज्ञ सकही। संगेसंग स्टार्ट-अप डहार ले अपन पैकेज्ड मिलेट उत्पाद मनके प्रदर्सन करे गीस। कार्निवाल म जन-जागरूकता बर शैक्षणिक संस्थान मन डहार ले नुक्कड़ नाटक अउ स्थानीय लोक कलाकार मन डहार ले रोज संझा सांस्कृतिक कारीकरम के प्रस्तुति दे जाही। उहें, देस के चर्चित शेफ मन मिलेट ले नवा-नवा पकवान बनाना घलो सिखाही।
मुख्यमंत्री-अर्बन रूरल इंडस्ट्रियल पार्क
मुख्यमंत्री भूपेश बघेल ह कहिन हे कि ग्रामीण क्षेत्र मन म स्थापित करे गे महात्मा गांधी रूरल इंडस्ट्रियल पार्क के जइसे सहरी क्षेत्र मन म घलो युवा मन ल रोजगार उपलब्ध कराय बर ‘अर्बन इंडस्ट्रियल पार्क के स्थापना करे जाही। मुख्यमंत्री ह ए बात काली राजनांदगांव के सासकीय दिग्विजय स्वशासी स्नातकोत्तर महाविद्यालय के वार्षिक उत्सव अउ पदक वितरण कार्यक्रम ल संबोधित करत हुए कहिन।
ए बेरा म मुख्यमंत्री ह बछर दू हजार बाईस के मेधावी अउ आने-आने प्रतियोगिता के विजेता छात्र-छात्रा मन ल पदक प्रदान करके सम्मानित करीन। ए दउरान मुख्यमंत्री ह महाविद्यालय म अहाता निर्माण अउ खेल मैदान बर साठ लाख रूपिया के देके घोसना करीन।
बातों-बातों-में
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत भारत ल जी ट्वंटी के अध्यक्षता मिले उपर केंद्रित रीही । एमा राज्य के पूर्व निर्वाचन आयुक्त अउ सामाजिक, राजनीतिक विश्लेषक डॅाक्टर सुशील त्रिवेदी के भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली अट्ठारह फरवरी के बिहनिया दस बजके तीस मिनट म करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
हुक्का बार-संचालन
राज्य सरकार ह हुक्का बार के संचालन ल अवैध घोषित कर देहे। ए अधिनियम तुरते लागू होगे हे। एखर तहत हुक्का बार संचालन करत पाय जाय म संबंधित उपर विरूद्ध गैर-जमानतीय अपराध दर्ज करके कार्रवाई करे जाही। उहें, हुक्का बार म धुम्रपान करत पाय जाने वाला मन उपर घलो जुर्माना के र्कारवाई के प्रावधान हे। हुक्का बार संचालन के रोकथाम बर अधिनियम म संसोधन करत हुए कठोर प्रावधान करे गेहे।
जानबा के मुताबिक प्रदेस के आने-आने भोजनालय, होटल, रेस्टोरेंट के संग दूसर जगह मन म संचालित हुक्का बार म फ्लेवरयुक्त सामग्री के अलावा तम्बाकू अउ दूसर मादक द्रव्य के उपयोग करे जाय के सिकायत मिलत रिहीस। एला देखते हुए मुख्यमंत्री भूपेश बघेल ह हुक्का बार म कठोर कार्रवाई करे अउ सबो हुक्का बार ल बंद कराय के निरदेस दे रिहीन। मुख्यमंत्री के निरदेस के बाद सिगरेट अउ आने तम्बाकू उत्पाद अधिनियम म जरूरी संसोधन करे गेहे। एखर तहत राज्य म कोनों भी प्रकार के हुक्का बार के संचालन ल प्रतिबंधित कर दे गेहे।
कोदो/कुटकी-खरीदी
राज्य म कोदो, कुटकी अउ रागी के खरीदी अब पच्चीस फरवरी तक करे जाही। छत्तीसगढ़ राज्य लघु वनोपज सहकारी संघ ले मिले जानबा के अनुसार पहिली ए तारीख पन्द्रह फरवरी निर्धारित रिहीस। अइसने, एखर पहिली निर्धारित भंडारण अवधि अट्ठाईस फरवरी म घलो बढ़ोतरी करत हुए एला अब दस मार्च कर दे गेहे।
मैनपाट महोत्सव
सरगुजा जिला के मैनपाट म आयोजित तीन दिवसीय मैनपाट महोत्सव काली संपन्न होईस। समापन कारीकरम ल संबोधित करत हुए संस्कृति मंत्री अमरजीत भगत ह कहिन कि छत्तीसगढ़ी के संस्कृति ल सहेजे अउ सवारे म ए महोत्सव कतकोन सफल होय हे। ए महोत्सव ह सरगुजा अंचल ल नवा पहिचान देहे। एखर माध्यम ले लोक कलाकार अउ रंगकर्मी मन ल अच्छा मंच मिले हे। ओमन ह कहिन कि मैनपाट म पर्यटन सुविधा के लगातार विस्तार करे जात हे। इहां हवाई पट्टी बने ले सुविधा अउ बाढ़ही। संगेसंग सैलानी मनके संख्या म घलो बढ़ोतरी होही।
डहरिया-आरंग कॉलेज
नगरीय प्रशासन मंत्री डॉक्टर शिवकुमार डहरिया काली रईपुर जिला के आरंग स्थित शासकीय बद्रीप्रसाद लोधी स्नातकोत्तर महाविद्यालय के वार्षिक स्नेह सम्मेलन म सामिल होईन। ए मउका म ओमन महाविद्यालय के विकास बर एक करोड़ रूपिया देके घोसना करीन। संगेसंग ओमन कालेज म अड़तालीस लाख रूपिया के लागत ले बनने वाला कम्प्यूटर लैब के भूमिपूजन करीन। ए मउका म डॉक्टर डहरिया ह कालेज बर भूमि दान करइया मनियारी बाई लोधी के प्रतिमा के अनावरण घलो करीन।
महाशिवरात्रि/माघी पुन्नी मेला
काली महाशिवरात्रि हे। ए मउका म देसभर के शिव मंदिर मन म रूद्राभिषेक के संग बिसेस पूजा-अर्चना करे जाही। राजधानी रईपुर के संग प्रदेस के शिव मंदिर मन ल आकर्षक ढंग ले सजाय जावत हे।
उहें, माघी पूर्णिमा ले सुरू होय राजिम माघी पुन्नी मेला के काली समापन होही। काली बिहनिया ले आने-आने अखाड़ा अउ मठ मन ले आमंत्रित करे गे साधु-संत अउ श्रद्धालु मन ल डहार ले पुण्य स्नान करे जाही। एखर बर प्रसासन डहार ले मेला स्थल म बिसेस इंतजाम करे गेहे।
अउ अब थोरकुन समाचार सार म-
– नवा रईपुर स्थित इंस्टीट्यूट ऑफ होटल मैनेजमेंट म प्रवेस के प्रक्रिया सुरू होगे हे। पर्यटन विभाग के अधीन संचालित ए संस्थान म होटल प्रबंधन के तीन बछर के पाठ्यक्रम के संग चार बछर के पाठ्यक्रम के विकल्प अउ स्नातक के संग डेढ़ बछर के डिप्लोमा पाठ्यक्रम संचालित करे जात हे।
– राजस्व संबंधी प्रकरण के निराकरण बर काली रईपुर जिला के धरसीवां तहसील म राजस्व सिविर के आयोजन करे गीस। ए दउरान नामांतरण, खाता विभाजन अउ सीमांकन के संग एक सौ पंचानवे आवेदन मिलीस, जेमा ले एक सौ तेरह आवेदन के तुरते निराकरण करे गीस।
– छत्तीसगढ़ लोक सेवा आयोग डहार ले व्यवहार न्यायाधीश के परीक्षा छब्बीस फरवरी के रायपुर के निर्धारित सैंतीस केन्द्र मन म ले जाही। परीक्षा बर साढ़े सोलह हजार अभ्यर्थी मन आवेदन करे हे।
अउ
– जिला रोजगार अउ स्वरोजगार मार्गदर्शन केन्द्र, रईपुर डहार ले इक्कीस फरवरी के पुराना पुलिस मुख्यालय परिसर म प्लेसमेंट कैम्प के आयोजन करे जाही। एखर माध्यम ले सौ ले जादा पद म भर्ती करे जाही।