मुख्यमंत्री घोषणा
रायपुर म राखे गे नगरीय प्रशासन अउ विकास विभाग के गौरव समागम म मुख्यमंत्री भूपेश बघेल ह कई ठिन महत्वूपर्ण घोषणा करीन। ओमन राज्य के जम्मों नगरीय निकाय के विकास बर करीबन एक हजार करोड़ रूपिया देके एलान करीन। एमा ले रायपुर नगर निगम ल सौ करोड़ अउ बिलासपुर नगर निगम ल पचास करोड़ रूपिया दे जाही। उंहे चुंगी कर ल छब्बीस रूपिया ले बढ़ाके पैंतीस रूपिया करे के घोषणा करीन। मुख्यमंत्री ह कीहिन कि रायपुर, भिलाई अउ बिलासपुर म शहरी महिला आजीविका केंद्र शुरू करे जाही।
युवा मन ल रोजगार देवाय बर रायपुर अउ भिलाई म साफ्ॅटवेयर अउ हार्डवेयर सुविधा वाले बीपीओ सेंटर खोले जाही। भिलाई म विश्व स्तरीय सेंट्रल लाइब्रेरी कम रीडिंग जोन विकसित करे जाही। उंहे जम्मों नगर निगम अउ नगर पालिका म अर्बन कार्टेज अउ सर्विस इंडस्ट्रीज पार्क बनाय जाही। मुख्यमंत्री ह कीहिन कि शहर के बाजार क्षेत्र म सीसीटीवी कैमरे लगाये के संग आधुनिक शौचालय बनाए जाही।
उंहें नगर निगम म स्मार्ट हेल्थ कियोस्क स्थापित करे जाही, जिहां मुफ्त म बीपी, शुगर, अउ ब्लड टेस्ट के सुविधा मिलही। मुख्यमंत्री ह रायपुर शहर के जल भराव वाले क्षेत्र म ड्रेनेज सिस्टम बनाय के घोषणा घलो करीन। एखरे संग भूमि विकास नियम के सरलीकरण करे जाही। रायपुर म होय गौरव समागम म प्रदेशभर के नगरीय निकाय मनके जनप्रतिनिधि मन शामिल होइन। ए मउका म श्री बघेल ह सुघ्घर काम करइया निकाय मन ल पुरस्कार दीन।
कांग्रेस महाअधिवेशन
राजधानी रायपुर म प्रस्तावित भारतीय राष्ट्रीय कांग्रेस के महाअधिवेशन के तियारी जोरदरहा चलत हे। तैयारी के जायजा लेबर पार्टी के प्रदेश प्रभारी कुमारी शैलजा अउ मुख्यमंत्री भूपेश बघेल के मौजूदगी म काली रायपुर म स्वागत समिति अउ उप समिति मनके बइठका होइस। बइठका म प्रदेश अध्यक्ष मोहन मरकाम, राष्ट्रीय कांग्रेस अध्यक्ष के सलाहकार सफल जी., प्रभारी सचिव वामची रेड्डी अउ सप्तगिरी शंकर उल्का समेत आने अने पदाधिकारी मौजूद रीहिन।
बइठका म प्रदेश प्रभारी कुमारी शैलजा ह बताइन कि महाअधिवेशन म कांग्रेस वर्किंग कमेटी के चुनाव घलो होही। उंहे अधिवेशन के आखरी दिन छब्बीस फरवरी के जनसभा आयोजित करे जाही।
स्वागत भाषण म प्रदेश कांग्रेस अध्यक्ष ह बताइन कि चौबीस फरवरी ले शुरू होवइया ए महाअधिवेशन म राष्ट्रीय अध्यक्ष मल्लिकार्जुन खड़गे, पूर्व राष्ट्रीय अध्यक्ष सोनिया गांधी अउ राहुल गांधी समेत कई बड़का नेता मन शामिल होही।
भाजपा प्रदर्शन
प्रधानमंत्री आवास योजना उपर रोक, कानून व्यवस्था, स्वास्थ्य सुविधा जइसन कतकोन मुद्दा ल लेके भारतीय जनता पार्टी के दुर्ग जिला इकाई ह आज विरोध प्रदर्शन करीन। शहर के सिविल लाइन इलाका म पार्टी नेता मनके अगवई म पदयात्रा निकाले गीस। आंदोलनकारी मन ह विधायक अरूण वोरा के निवास के घेराव करीन अउ विधायक ले मिलके प्रधानमंत्री आवास योजना के तहत फंड जारी करे अउ कानून व्यवस्था म सुधार लाये संबंधी मांग ल लेके चर्चा करीन।
अग्निवीर भर्ती अधिसूचना
भारतीय सेना म अग्निवीर भर्ती बर काली सोला फरवरी ले ऑनलाईन आवेदन के प्रक्रिया शुरू होही। ए संबंध म अधिसूचना जारी कर दे गेहे। अधिसूचना भारतीय सेना के वेबसाईट – डब्लू डब्लू डब्लू डॅाट ज्वाईन इंडियन आर्मी डॅाट एनआईसी डॅाट इन म उपलब्ध हे। अग्निवीर के भर्ती, जनरल, तकनीकी, क्लक,र् ट्रेड्समैन दसवीं पास अउ ट्रेड्समैन आठवीं पास के पद बर जारी करे गेहे।
सेना भर्ती कार्यालय रायपुर म बताय गेहे कि सेना म अग्निवीर भर्ती बर ऑनलाईन आवेदन के प्रक्रिया अवइया पंद्रह मार्च तक चलही।
माओवादी समर्पण
सुकमा जिला म तीन झिन इनामी समेत तैंतीस माओवादी मन ह आत्मसमर्पण करे हे। ये जम्मों माओवादी मिलिशिया टीम के सदस्य हरय। एमा ले तीन माओवादी मन उपर एक-एक लाख रूपिया के इनाम घोषित रीहिस। ए माओवादी मन ह किस्टाराम थाना क्षेत्र के टोंडामर्का म पुलिस अधीक्षक सुनील शर्मा अउ सीआरपीएफ के डीआईजी सुनीत कुमार रॉय के आगू आत्मसमर्पण करे हे। समर्पण करइया माओवादी मन ल राज्य शासन के पुनर्वास नीति के फायदा दे जाही।
मेरी पॉलिसी मेरे हाथ
प्रदेश म किसान मन ल प्रधानमंत्री फसल बीमा योजना अउ पुनर्गठित मौसम आधारित फसल बीमा योजना के तहत पॉलिसी दे जावत हे। कृषि मंत्री रविंद्र चौबे ह आज रायपुर स्थित अपन निवास कार्यालय म किसान मन ल पॉॅलिसी बांटके – मेरी पॉलिसी मेरे हाथ – कार्यक्रम के शुभारंभ करीन। एखरे संग आज ले प्रदेश म जिला स्तर म सांसद, विधायक अउ कलेक्टर योजना के तहत बीमित किसान मन ल दू लाख तेईस हजार ले जादा अउ मौसम आधारित फसल बीमा योजना के तहत करीबन साढ़े तेरह हजार किसान मन ल पॉलिसी के वितरण करही।
नारायणपुर मसाहती सर्वे
नारायणपुर जिला के अबूझमाड़ क्षेत्र म मसाहती सर्वे होय के बाद एक कोति जिहां स्थानीय गांव वाले मन ल आसानी ले शासकीय योजना के फायदा मिलत हे। उंहे दूसर कोति किसान मन ल समर्थन मूल्य म धान बेचे के सुविधा घलो मिलही। अबूझमाड़ म पहिली घांव समर्थन कीमत म धान बेचइया करीबन सात सौ बीस किसान मन ल चार करोड़ बाईस लाख रूपिया के भुगतान करे गेहे।
मसाहती सर्वे नइ होय के सेती पहिली किसान मन ल औने पौन दाम म बिचौलिया मन ल धान बेचे बर पड़त रीहिस हे। नारायणपुर म एक सौ दस गांव के मसाहती सर्वे पूरा हो गेहे, अउ किसान मन ल मसाहती पट्टा दे गेहे। एखर ले सालो ले काबिज भूमि म खेती किसानी करइया किसान मन ल उंखर जमीन के मालिकाना हक मिले हे। उंहे गांव वाले मन ल राशन, बिजली, पानी, पेंशन समेत जम्मों मूलभूत सुविधा घलो सुघ्घर ढंग ले मिलत हे।
स्वास्थ्य मंत्री बैठक
स्वास्थ्य मंत्री टी.एस. सिंहदेव ह अपन बस्तर प्रवास के दूसरइया दिन आज जगदलपुर म जिला आयुर्वेद चिकित्सालय अउ शहरी प्राथमिक स्वास्थ्य केंद्र के निरीक्षण करीन। ओमन चिकित्सालय म ओपीडी के स्थिति अउ डॅाक्टर खूबचंद बघेल स्वास्थ्य सहायता योजना के तहत इलाज के बारे म लोगन ले जानकारी लेके संगेसंग चिकित्सा अधिकारी मन ले गोठबात करके अस्पताल म मानव संसाधन बढ़ाय के निर्देश दीन। ये मउका म श्री सिंहदेव ह बालिका दिवस म राखे गे चित्रकला प्रतियोगिता के विजेता मन ल इनाम दीन।
वन विभाग-अग्नि सीजन
गर्मी के मौसम म जंगल ल आगी ले बचाय बर वन विभाग ह रायपुर कंट्रोल रूम बनाय हे। जेखर टोल फ्री नंबर आय – एक आठ शून्य शून्य दू तीन तीन सात शून्य शून्य शून्य म कोनो भी मनखे आगी ले जुड़े घटना के सूचना दे सकत हे।
राजस्व शिविर
रायपुर जिला के राजस्व प्रकरण – नामांतरण, खाता विभाजन, सीमांकन, व्यपर्तन, किसान किताब, जाति प्रमाण पत्र, आय प्रमाण पत्र, निवास प्रमाण पत्र अउ आने आने राजस्व ले जुड़े प्रकरण के निराकरण बर तहसील कार्यालय म राजस्व शिविर लगाये जात हे।
इही कड़ी म काली सोला फरवरी के धरसीवां अउ तेईस फरवरी के आरंग म शिविर लगाये जाही।
चित्रकोट महोत्सव
जगदलपुर के चित्रकोट जलप्रपात के तट म काली ले तीन दिन के चित्रकोट महोत्सव शुरू होगे हे। कार्यक्रम म उद्योग मंत्री कवासी लखमा ह कीहिन कि चित्रकोट अउ बस्तर एक-दूसर के पर्याय बन गेहे अउ ये महोत्सव बस्तर के जनजातीय संस्कृति ल विश्व पटल म पहुंचाय के एक सुघ्घर मउका आय। उंहे सांसद दीपक बैज ह कीहिन चित्रकोट महोत्सव बस्तर म सांस्कृतिक कार्यक्रम के संग खेलकूद स्पर्धा घलो आयोजित करे जाही। एमा पूरा संभाग के प्रतिभागी शामिल होही। ओमन कीहिन कि बस्तर म पर्यटन के विकास के उद्देश्य स्थानीय युवा मन ल जादा ले जादा रोजगार देवाना हे।
महोत्सव के पहिली दिन काली बस्तर के आने आने क्षेत्र ले आए नर्तक दल मन ह पारंपरिक लोक नृत्य प्रस्तुत करीन।