भारतीय राष्ट्रीय कांग्रेस के पच्यासीवां अधिवेशन चौबीस ले छब्बीस फरवरी तक नवा रईपुर म होही। कारीकरम के मुताबिक अधिवेशन म पच्चीस फरवरी के विषय समिति डहार ले अनुमोदित प्रस्ताव ल राखे जाही। जेखर बाद इही दिन प्रतिनिधि मनके सत्र सुरू होही। कांग्रेस कमेटी ह प्रदेस के जम्मों पार्टी सदस्य मन ल एमा सामिल होय के निरदेस देहे।
बइठका के तियारी के जानबा ले बर कांग्रेस के छत्तीसगढ़ प्रभारी कुमारी सैलजा ह आज रईपुर पहुंचीन। ओमन पार्टी के प्रदेस मुख्यालय राजीव भवन म सम्मेलन ल लेके आने-आने समिति के सदस्य मन ले बइठका लीन।
भाजपा-धरना प्रदर्शन
बस्तर संभाग म पाछु दिन होय भारतीय जनता पार्टी के कोनों-कोनों नेता मनके हत्या के विरोध म पार्टी ह प्रदेसस्तर म सोलह अउ सत्रह फरवरी के आंदोलन करे के फइसला लेहे। भाजपा महामंत्री केदार कश्यप ह बतईन कि पार्टी कार्यकर्ता मन ह सोलह फरवरी के बस्तर मुख्यालय जगदलपुर म रैली निकाल के पुलिस महानिरीक्षक आफिस के आगू धरना प्रदर्शन करही। त उहें, सत्रह फरवरी के बस्तर के बारह विधानसभा क्षेत्र ल छोड़के प्रदेस के जम्मों अठहत्तर विधानसभा क्षेत्र मन म मंझनिया दू बजे संझा पांच बजे तक चक्काजाम करे जाही।
भाजपा अल्पसंख्यक-हज
भारतीय जनता पार्टी अल्पसंख्यक मोर्चा के प्रदेस अध्यक्ष शकील अहमद ह हज यात्रा ल सरल बनाय बर प्रधानमंत्री ल धन्यवाद दे हवय। नवा नियम के मुताबिक अब हज यात्रा करइया मनखे मन ल हज यात्रा के अरजी बर कोनों प्रकार के पइसा दे बर नइ पड़य। संगेसंग नियम म माईलोगिन मन ल एकल्ला हज यात्रा जाय के घलो छूट दे गेहे। ए बदलाव ले अब हज यात्री मनके करीबन पचास हजार रूपिया के बचत होही।
पुलवामा हमला-शहीद श्रद्धांजलि
राष्ट्र बछर दू हजार उन्नीस म जम्मू-कश्मीर के पुलवामा म आजे के दिन शहीद होय केन्द्रीय रिजर्व पुलिस बल के जवान मन ल श्रद्धांजलि देवत हे। प्रधानमंत्री नरेन्द्र मोदी ह सहीद जवान मन ल श्रद्धांजलि देवत एक ठिन ट्वीट म किहीन कि देस ह ए साहसी नायक मनके बलिदान कभू नइ भुलाय।
जानबा के मुताबिक बछर दू हजार उन्नीस म आजे के दिन एक ठिन आत्मघाती विस्फोट म सीआरपीएफ के चालीस झिन जवान सहीद होगे रिहीस।
परिवहन सुविधा केन्द्र
राज्य म सेकेंड हैण्ड गाड़ी मनके खरीदी-बिक्री बर अब आटीओ दफ्तर जाय के जरूरत नइ पड़य। परिवहन विभाग ह एखर बर आधार ऑथेंटिकेशन नाव ले नवा सुविधा सुरू करे हे। परिवहन आयुक्त दीपांशु काबरा ह बतईन कि अब गाड़ी के खरीदी-बिक्री करइया मन ल तीर के परिवहन सुविधा केन्द्र जाके जल्दीच अपन नाव ट्रांसफर करा सकथे। एखर बर सुविधा केन्द्र म संचालक मनके फीस के संगेसंग उपरहा सौ रूपिया दे बर पड़ही।
जानबा के मुताबिक प्रदेस म परिवहन विभाग ह पांच सौ सुविधा केन्द्र खोले हे, जेमा रईपुर जिला म करीबन पचास सुविधा केन्द्र सामिल हे।
माशिमं-हेल्पलाइन नंबर
छत्तीसगढ़ माध्यमिक शिक्षा मंडल हाईस्कूल अउ हायर सेकेंडरी व्यावसायिक परीक्षा ले जुड़े समस्या मनके निपटारा बर इक्कीस फरवरी ले हेल्पलाइन नंबर जारी करे जात हे। छात्र, शिक्षक अउ पालक मन इतवार अउ छुट्टी के दिन छोड़के बिहनिया साढ़े दस बजे ले संझा साढ़े पांच बजे तक मंडल के टोल फ्री नंबर – एक आठ शून्य शून्य दो तीन तीन चार तीन छह तीन म अपन समस्या के समाधान ले सकथे।
माध्यमिक शिक्षा मंडल के सचिव प्रोफेसर व्ही.के. गोयल ह बतईन कि हेल्पलाइन के माध्यम ले बिसय-बिसेसज्ञ मन छात्र मनके परीक्षा ले जुड़े समस्या मनके निपटारा अउ ओमन ल सलाह दीहीं।
स्कूली छात्र-मउत
कांकेर जिला म पाछु नौ फरवरी के सड़क हादसा म घायल होय एक झिन स्कूली लइका के आज रईपुर म इलाज के दउरान मउत होगे। जानबा के मुताबिक कोरर थाना क्षेत्र म स्कूल के लइका मन ल लेके जावत ऑटो ल टरक ह टक्कर मार दे रिहीस। ए घटना म सात झिन लइका मनके मउत होगे रिहीस। उहें, गंभीर रूप ले घायल एक झिन छात्र ल इलाज बर रईपुर लाय गे रिहीस।
नारायणपुर-स्वास्थ्य बैठक
नारायणपुर जिला के ओरछा विकासखंड म सिरहा अउ गुनिया मनके स्वास्थ्य ले जुड़े जानबा दे बर एक ठिन बइठका बुलाय गीस। एसडीएम प्रदीप वैद्य के अगुवई म होय ए बइठका म स्वास्थ्य विभाग के डॉक्टर मन डहार ले ओमन ल आने-आने रोग के लक्षण, संस्थागत प्रसव अउ लइका मनके टीकाकरण के बारे म जानबा दे गीस। संगेसंग परमुख बीमारी मनके लक्षण के पहिचान करके मरीज मन ल अस्पताल भेजे बर घलो समझाय गीस।
मुंगेली-महिला जागरूकता अभियान
मुंगेली जिला पुलिस डहार ले माईलोगिन अउ नोनी मन ल जागरूक करे के उद्देश्य ले एक ठिन अभियान चलाय जात हे, जेमा स्कूल अउ कॉलेज मन म नोनी मन ल गुड टच-बैड टच ले जुड़े जानबा दे जात हे। संगेसंग थाना चौकी प्रभारी मन डहार ले अपन क्षेत्र के साप्ताहिक बाजार म जाके माईलोगिन अउ नोनी मनके सुरक्षा ले जुड़े ‘‘अभिव्यक्ति ऐप‘‘ के जानबा दे जात हे।
ट्रेन परिचालन
दक्षिण पूर्व रेलवे के चक्रधरपुर रेल मंडल के लोटापहाड़-चक्रधरपुर सेक्सन के बीच सत्रह फरवरी के सुधार काम होही, जेखर सेती कोनों-कोनों रेलगाड़ी के अवई-जवई प्रभावित होही। इही दिन टाटानगर-इतवारी एक्सप्रेस नइ चलय। एखर अलावा दुर्ग-राजेन्द्रनगर साउथ बिहार एक्सप्रेस करीबन डेढ़ घंटा देरी ले छुटही। उहें, सोलह फरवरी के मुंबई-हावड़ा दुरूतों एक्सप्रेस अउ योगनगरी ऋर्षिकेश-पुरी उत्कल एक्सप्रेस ल ओखर निर्धारित स्टेसन के पहिलीच रोक दे जाही।
पुलिस क्रीडा प्रतियोगिता
राजधानी रईपुर म ए बेरा छत्तीसगढ़ पुलिस डहार ले राज्य स्तरीय खेल प्रतियोगिता चलत हे। तीन दिन तक चलइया ए प्रतियोगिता के सुभारंभ काली पुलिस महानिदेशक अशोक जुनेजा ह करीन। ए प्रतियोगिता म पुलिस के दस संभाग मनके सात सौ पन्द्रह खिलाड़ी मन भाग लेवत हे। प्रतियोगिता म कबड्डी, फुटबॉल, वॉलीबॉल, हैंडबॉल, बास्केबॉल, हॉकी, खो-खो, रस्साखींच अउ दउड़ के मुकाबला होवत हे। राज्य म पहिली घांव जवान मन बर ए प्रतियोगिता राखे गेहे।
बस्तर-फैम ट्रिप
बस्तर म सत्रह ले बीस फरवरी तक फैम ट्रिप के आयोजन करे जाही। एखर थीम हे – ‘‘देखो बस्तर‘‘। कांगेर घाटी राष्ट्रीय उद्यान के निदेशक धम्मशील गणविर ह बतईन कि एखर ले बस्तर म लोगन मनके पर्यटन अउ इकोटूरिज्म कोति ध्यान बाढ़ही। संगेसंग भारत के आने-आने राज्य ले लेखक, यूट्यूबर अउ फोटोग्राफर मन ल घलो बुलाय गेहे। ए कारीकरम के उद्देश्य देस अउ बिदेस म बस्तर के पहिचान ल आगू बढ़ाना हे।
अउ अब थोरकुन समाचार सार म-
– संघ लोक सेवा आयोग डहार ले उन्नीस फरवरी के इंजीनियरिंग सर्विस प्रारंभिक परीक्षा दू पाली म राखे गेहे।
– इंदिरा गांधी राष्ट्रीय मुक्त विश्वविद्यालय-इग्नू डहार ले जनवरी सत्र म ऑनलाइन नामांकन अउ एक घांव फेर पंजीयन के तारीख ल बढ़ाके बीस फरवरी कर दे गेहे।
– जवाहर नवोदय विद्यालय म कक्षा छठवीं म प्रवेस बर ऑनलाइन पंजीयन के काली आखिरी तारीख हरय। चयन परीक्षा उनतीस अप्रैल के होही।
– जिला रोजगार अउ स्वरोजगार मार्गदर्शन केन्द्र अंबिकापुर म सोलह फरवरी के बिहनिया ग्यारह ले मंझनिया एक बजे तक प्लेसमेंट कैम्प के आयोजन करे जाही।
– बीजापुर जिला म ग्रामीण स्वास्थ्य संयोजक अउ संयोजिका के संगेसंग कुल सोलह पद म गलत ढंग ले नियुक्ति के मामला म बीजापुर के मुख्य चिकित्सा अउ स्वास्थ्य अधिकारी सुनील भारती ल निलंबित कर दे गेहे।
– सुकमा जिला के ताड़मेटला इलाका म गश्त के दउरान सीआरपीएफ के जवान मन ह एक ठिन आईईडी बरामद करीन, जेला मउकाच म ब्लास्ट करके खतम कर दे गीस।
– राजनांदगांव जिला म बगदई नदी के तीर एक ठिन कार ह अनते-तनते होके रूख ले टकरा गे। ए घटना म अंबागढ़ चौकी रहइया एक झिन वकील के मउत होगे।
अउ
– जांजगीर-चांपा जिला के पामगढ़ म रद्दा बनाय, अवैध सराब बिक्री के संगेसंग आने-आने समस्या ल लेके इहां के विधायक इंदु बंजारे डहार ले सुरू करे गे अनिश्चितकालीन धरना के आज दूसर दिन हरय।