बिस्ब भूषण हरिचंदन छत्तीसगढ़ के नवा राज्यपाल होही। ओमन अनुसुईया उइके के जघा लीही। सुश्री उइके ल मणिपुर के राज्यपाल बनाय गेहे। राष्ट्रपति द्रौपदी मुर्मू ह आज बारह ठिन राज्य के राज्यपाल अउ एक झिन उप राज्यपाल के नियुक्ति करीन। उहें, महाराष्ट्र के राज्यपाल भगत सिंह कोश्यारी अउ लद्दाख के उप-राज्यपाल राधाकृष्ण माथुर के त्यागपत्र ल स्वीकार कर ले गेहे।
झारखंड के राज्यपाल रमेश बैस महाराष्ट्र के नया राज्यपाल होही। अरूणाचल प्रदेस के राज्यपाल ब्रिगेडियर बी.डी. मिश्रा लद्दाख के उप-राज्यपाल बनाय गेहे। उहें, के.ति. परनाइक ल अरूणाचल प्रदेस के राज्यपाल के जिम्मेदारी दे गेहे। पूर्व न्यायाधीश एस. अब्दुल नजीर ल आंध्रप्रदेश के राज्यपाल नियुक्त करे गेहे। उहें, लक्ष्मण प्रसाद आचार्य ल सिक्किम के अउ सी.पी. राधाकृष्णन ल झारखंड के राज्यपाल बनाय गेहे। उहें, शिवप्रताप शुक्ला हिमाचल प्रदेस के अउ गुलाबचंद कटारिया असम के राज्यपाल होही। मणिपुर के राज्यपाल ला. गणेशन अब नागालैंड के राज्यपाल होही। बिहार के राज्यपाल फागू चौहान ल मेघायल के जिम्मेदारी दे गेहे। उहें, हिमाचल प्रदेस के राज्यपाल राजेन्द्र विश्वनाथ आर्लेकर बिहार के राज्यपाल होही।
छत्तीसगढ़ के नव-नियुक्त राज्यपाल श्री हरिचंदन ओड़िसा के रहइया हरय। ओमन भुवनेश्वर अउ चिल्का विधानसभा ले पांच बार विधायक रिहीन हे। ओमन बछर उन्नीस सौ इकहत्तर म जनसंघ के संग अपन सियासी पारी सुरू करीन। ओमन कई ठिन विभाग के मंत्री घलो रिहीन। श्री हरिचंदन बछर उन्नीस सौ अस्सी ले अठासी तक ओड़िसा भाजपा के अध्यक्ष घलो रहि चुके हे। ओमन वरिष्ठ वकील, कवि अउ साहित्यकार घलो हवय। ओमन कई ठिन पुस्तक घलो लिखे हवय। श्री हरिचंदन के राज्यपाल नियुक्त होय म मुख्यमंत्री भूपेश बघेल अउ पूर्व मुख्यमंत्री डॉक्टर रमन सिंह ह उनला बधाई अउ सुभकामना दीन हे।
प्रधानमंत्री-महर्षि दयानंद जयंती
प्रधानमंत्री नरेन्द्र मोदी ह किहीन कि अमृत काल म घलो देस के प्राथमिकता उही हरय, जउन महर्षि दयानंद के रिहीस। श्री मोदी ह नई दिल्ली म आज महर्षि दयानंद के दू सौवां जयंती के उपलक्ष्य म बछर भर चलइया समारोह के सुभारंभ करीन। ओमन किहीन कि गरीबहा अउ वंचित मन ल आगू बढ़ाना उंखर सरकार के मुख्य प्राथमिकता हरय। श्री मोदी ह यहू किहीन कि आज देस के नोनी मन राफेल असन लड़ाकू विमान घलो उड़ावत हे।
प्रधानमंत्री-योग
प्रधानमंत्री नरेन्द्र मोदी ह योग ल कई ठिन बिसय म अनुसंधान के माध्यम ले लोकप्रिय बनाय म बल देहे। एक ट्वीट के जवाब म श्री मोदी ह किहीन कि योग अउ भारतीय जुन्ना चिकित्सा पद्धति ल एक ठिन अइसन भासा के माध्यम ले लोकप्रिय बनाय के जरूरत हे, जउन ह पूरा दुनिया के समझ म आ सकय।
एनटीपीसी-सम्मेलन
राष्ट्रीय ताप विद्युत निगम-एनटीपीसी डहार ले काली ले रईपुर म इंडियन पावर स्टेशन-दू हजार तेईस नाव ले ‘‘पावर प्लांट को-एंड एम‘‘ सम्मेलन राखे जात हे। तीन दिन वाले ए सम्मेलन ह राजधानी रईपुर के पंडित दीनदयाल उपाध्याय ऑडिटोरियम म होही। काली तेरह फरवरी के बिहनिया दस बजे ए सम्मेलन के सुभारंभ केन्द्रीय विद्युत, नवीन अउ नवीकरणीय ऊर्जा मंत्री आर.के. सिंह ह करही। ए मउका म केन्द्रीय विद्युत अउ भारी उद्योग राज्यमंत्री कृष्णपाल अउ केन्द्रीय ऊर्जा सचिव आलोक कुमार घलो मौजूद रइही। ए बछर ए सम्मेलन के थीम ‘‘बदलते ऊर्जा परिदृश्य में भरोसेमंद और टिकाऊ विद्युत उत्पादन के लिए रणनीति‘‘ हे। ए सम्मेलन ह पन्द्रह फरवरी तक ले चलही। ए दउरान ऊर्जा संबंधी क्षेत्र के प्रोफेशनल्स, सोधकर्ता, मैन्युफेक्चरर, सर्विस देवइया अउ इंजीनियर मन आगू आवत टेक्नोलॉजी बारे म अपन विचार अउ अनुभव बताही।
राष्ट्रीय लोक अदालत
राष्ट्रीय विधिक सेवा प्राधिकरण नई दिल्ली के निरदेस म प्रदेस के सबो न्यायालय मन म काली राष्ट्रीय लोक अदालत राखे गीस। लोक अदालत म राजीनामा योग्य प्रकरण, चेक बाउंस, बैंक रिकवरी, जमीन विवाद, बिजली, पानी, टैक्स, संपत्ति कर अउ रेवन्यू वाले प्रकरण मनके निपटारा पक्षकार मनके आपसी सहमति ले करे गीस।
छत्तीसगढ़ उच्च न्यायालय के मुख्य न्यायाधीश अउ छत्तीसगढ राज्य विधिक सेवा प्राधिकरण के संरक्षक अरूप कुमार गोस्वामी ह जगदलपुर म ए बछर के पहली नेशनल लोक अदालत के अवलोकन करीन।
भेंट-मुलाकात
मुख्यमंत्री भूपेश बघेल ह काली अभनपुर विधानसभा क्षेत्र के तामासिवनी अउ खोरपा गांव म आम जनता ले भेंट मुलाकात करीन। ए दउरान ओमन अब्बड़ अकन घोसना घलो करीन, जेमा नगर पंचायत अभनपुर ल नगर पालिका के दर्जा देवई अउ तीस ठिन दसना वाले अस्पताल के संख्या ल पचास ठिन दसना वाले करे के संगे गांव बेंद्री म नवा उप स्वास्थ्य केन्द्र खोले के घोसना करीन। संगे कोलर अउ टेकारी गांव म उप स्थास्थ्य केन्द्र बर नवा बिल्डिंग बनाय के संगे सासकीय हायर सेकेंडरी स्कूल, छछानपैरी के नाव स्वर्गीय आशाराम डहरिया के नाव म रखे के ऐलान करीन। उहें, ग्राम खोरपा म उप-तहसील कार्यालय अउ स्वामी आत्मानंद अंग्रेजी माध्यम स्कूल खोले के संग आईटीआई के निर्माण अउ सारखी गांव म जिला सहकारी बैंक के साखा खोले के घोसना घलो करीन।
माओवादी-समाचार
कांकेर जिला म आज सुरक्षा बल अउ माओवादी मनके बीच होय मुठभेड़ म पांच झिन माओवादी के घायल होय के खबर हे। जिला के पुलिस अधीक्षक शलभ सिन्हा ह बतईन कि आज बिहनिया सुरक्षा बल के टीम तलाशी अभियान म निकाले रिहीन। इही दउरान जंगल म पहिली ले घात लगाय बइठे माओवादी मन सुरक्षा बल मन उपर फायरिंग सुरू कर दीस। तहां जवान मन डहार ले घलो होय जवाबी कार्रवाई म माओवादी मन जंगल के ओधा लेके भगा गीन।
उहें, बीजापुर जिला के आवापल्ली उसूर रद्दा म सुरक्षा बल मनके टीम ह तीन किलो वजनी आईईडी बरामद करीन हे, जेला बम निरोधक दस्ता ह मउकाच म निष्क्रिय कर दीस।
ओति, दंतेवाड़ा जिला म माओवादी मन एक झिन पूर्व सरपंच के हत्या कर दीस। मिले जानकारी मुताबिक बारसूर थाना क्षेत्र के गांव हितामेटा के पूर्व सरपंच ह अपन पारिवारिक काम ले नारायणपुर जिला के गांव मुरूरवाड़ा गे रिहीन, जिहां माओवादी मन बीते रतिहा चाकू ले हमला करके ओखर हत्या कर दीस।
साहित्य अकादमी-आयोजन
साहित्य अकादमी छत्तीसगढ़ संस्कृति परिषद डहार ले ‘‘घृणा के समय म प्रेम‘‘ बिसय म दू दिन वाले कारीकरम राखे गीस। पहिली दिन काली देसभर के नामी लेखक, कवि अउ चिंतक मन कारीकरम म सामिल होईन अउ ए बेरा के घृणा वाले माहौल उपर संसो जतावत एखर विरूद्ध सरलग काम करे के जरूरत उपर जोर दीन।
साहित्य अकादमी के अध्यक्ष ईश्वर सिंह दोस्त ह स्वागत भासन म किहीन कि आज समाज म जउन तरह ले नफरत के माहौल बनत हे, ओ बेरा आपसी प्रेम अउ भाईचारा के मनखे मनके चेत ल सुरक्षित राखे म काय भूमिका हे, एखर उपर गोठबात जरूरी हे।
विश्व रेडियो दिवस
काली तेरह फरवरी के विश्व रेडियो दिवस हरय। एखर पहिली आज संझा बेरा म ओल्ड लिसनर्स ग्रुप ऑफ छत्तीसगढ़ डहार ले राजधानी रईपुर म एक ठिन कारीकरम राखे गीस। लिसनर्स ग्रुप के अध्यक्ष मोहन लाल देवांगन ह बतईन कि कारीकरम म पूर्व जिला पंचायत अध्यक्ष अशोक बजाज माईपहुना अउ लक्ष्मीनारायण लाहोटी ह एखर पगरइति करीन। कारीकरम आकाशवाणी रईपुर के प्रोग्राम एक्जीक्यूटिव शाहिद हुसैन, वरिष्ठ उद्घोषक संजय पांडेय, प्रकाश उदय अउ के. किरण सिंह बिसेस रूप ले मौजूद रिहीन। कारीकरम के संचालन शशिकांत यादव अउ चंपेश्वर गोस्वामी ह करीन।
हॉकी-प्रतियोगिता
राजनांदगांव म खेले जावत महंत राजा सर्वेश्वर दास अखिल भारतीय हॉकी प्रतियोगिता म सांई सुंदरगढ़ के टीम ह रेलवे बिलासपुर ल पांच-एक ले हरईस। उहे,ं दूसर मुकाबला म सांई एक्सीलेंसी लखनऊ ह राउरकेला के पाम्पोस हॉस्टल ल तीन-दो ले हरईस। ए तरह ले ए दूनों टीम मन आखिरी आठ म अपन जघा बना लेहे।