भारतीय जनता पार्टी के राष्ट्रीय अध्यक्ष जे.पी. नड्डा आज एकदिवसीय प्रवास म जगदलपुर पहुंचीन। ओमन ह भाजपा कोर कमेटी के बइठका लीन अउ फेर एक जनसभा ल संबोधित करत हुए राज्य के कांग्रेस सरकार उपर जोरदरहा निसाना साधीन।
ओखर बाद श्री नड्डा नारायणपुर पहुंच के माओवादी हमला म मारे गे भाजपा जिला उपाध्यक्ष सागर साहू ल श्रद्धांजलि दीन। ए मउका म पूर्व मुख्यमंत्री डॉक्टर रमन सिंह, प्रदेस अध्यक्ष अरूण साव घलो उपस्थित रिहीन। खबर के मुताबिक काली रतिहा माओवादी मन ह छोटेडोंगर म श्री साहू के गोली मारके हत्या कर दे रिहीन।
प्रसार भारती-सीईओ
प्रसार भारती के मुख्य कार्यकारी अधिकारी गौरव द्विवेदी ह किहीन हे कि जल्दी ही छत्तीसगढ़ के जनजातीय बहुल बस्तर इलाका म आकाशवाणी डहार ले स्थानीय बोली म समाचार के प्रसारण सुरू करे जाही।
अपन छत्तीसगढ़ प्रवास के दउरान आज रईपुर के दूरदर्शन केन्द्र म दूरदर्शन अउ आकाशवाणी के बड़का अधिकारी मनके बइठका के दउरान प्रसार भारती सीईओ ह किहीन कि केन्द्र सरकार ह आकाशवाणी अउ दूरदर्शन के विस्तार बर करीब ढाई हजार करोड़ रूपिया उपलब्ध कराय हे। ओमन किहीन कि प्रसार भारती के हरसंभव कोसिस हवय कि दूरदर्शन अउ आकाशवाणी अपन समाचार अउ मनोरंजन संबंधी कारीकरम के माध्यम ले जादा ले जादा लोगन तक पहुंचे।
श्री द्विवेदी ह आज रईपुर दूरदर्शन केन्द्र म विभिन्न अनुभाग अउ स्टूडियो के निरीक्षण करके उहां उपलब्ध सुविधा के जायजा लीन।
भेंट-मुलाकात
मुख्यमंत्री भूपेश बघेल ह आज अभनपुर विधानसभा क्षेत्र के तामासिवनी अउ खोरपा गांव म आम लोगन ले भेंट-मुलाकात करीन। ओमन ह करीब छियासठ करोड़ अड़तीस लाख रूपिया के आने-आने कार्य के लोकार्पण अउ भूमिपूजन करीन। ए मउका म ओमन ह तामासिवनी म कालेज, उप स्वास्थ्य केन्द्र के नवा भवन बनाय अउ मिलाई म जिला सहकारी बैंक के साखा खोले समेत आने-आने विकास कार्य के घोसना करीन। ए कार्यक्रम म मुख्यमंत्री ह समाज कल्याण विभाग अउ कृषि विभाग के हितग्राही मन ल सामान घलो बांटीन।
मुख्यमंत्री-मीडिया कॉन्फ्रेंस
मुख्यमंत्री भूपेश बघेल ह किहीन हे कि छत्तीसगढ़ म पत्रकार मनके सुरक्षा बर कानून बनाय के दिसा म तेजी ले पहल करे जात हे अउ अवइया बजट सत्र म एखर बर कानून बनाय के प्रस्ताव लाय जाही।
श्री बघेल काली रईपुर म फेडरेशन ऑफ पीटीआई डहार ले आयोजित नेशनल मीडिया कॉन्फ्रेंस ल संबोधित करत रिहीन। ओमन ह किहीन कि अभी के समय म असंसदीय सब्द के उपयोग ल पूर्णतः हतोत्साहित करे के जरूरत हे अउ सदन के गरिमा ल बनाय राखे बर मर्यादित व्यवहार के पालन जरूरी हवय। मुख्यमंत्री ह किहीन कि लोकतंत्र म मीडिया के महत्वपूर्ण भूमिका होथे। लोकतंत्र अउ मीडिया आधुनिक युग म न केवल एक-दूसर के पूरक हवय, बल्कि एक दूसर के बिना उंखर कोनों अस्तित्व ही संभव नइ हे। कॉन्फ्रेंस म देस के आने-आने राज्य अउ केन्द्रसासित प्रदेस के पत्रकार मन जुरे रिहीस।
हज-आवेदन
बछर दू हजार तेईस के हज यात्रा बर ऑनलाइन आवेदन के प्रक्रिया काली ले सुरू होगे हे, जेखर बर अवइया दस मार्च तक आवेदन दे जा सकथे। ऑनलाइन आवेदन अउ दिसा-निरदेस हज कमेट ऑफ इंडिया के वेबसाइट म उपलब्ध हवय। जादा जानकारी बर छत्तीसगढ़ राज्य हज कमेटी रईपुर के टेलीफोन नंबर – 0 7 7 1 – 4 2 6 6 6 4 6 म संपर्क करे जा सकथे।
डॉक्टर-कार्यभार
स्वास्थ्य विभाग ह प्रदेस के आने-आने सरकारी अस्पताल म पदस्थ करे गे एम.बी.बी.एस. अनुबंधित चिकित्सा अधिकारी मन ल कार्यभार ग्रहण करे बर केहे हे। अइसना नइ करइया डॉक्टर मन उपर अनुशासनात्मक कार्रवाई करे जाही। खबर के मुताबिक एक सौ नौ डॉक्टर मन ह पदभार ग्रहण नइ करे हे।
इही बीच, अइसना दस अनुबंधित चिकित्सा अधिकारी मन के खिलाफ बॉंड के पूरा पइसा वसूली के कार्रवाई प्रक्रियाधीन हवय।
भिलाई-हत्या
भिलाई के खुर्सीपार म कथित रूप ले एक झिन मनखे ह अपन पत्नी समेत तीन झन बेटी मन उपर जानलेवा हमला कर दीस, एमा एक झिन नोनी के मउत होगे। उहें, बाकी मनके हालत नाजुक बने हुए हे।
दुरूग पुलिस अधीक्षक डॉक्टर अभिषेक पल्लव ह बतईन कि पाछु रतिहा आरोपी ह पारिवारिक लड़ाई-झगड़ा के चलते अपन पत्नी अउ तीन झिन बेटी मन उपर लाठी अउ तलवार ले हमला कर दीस। जानकारी पातेच पुलिस ह मउका म पहुंचीन अउ आरोपी ल गिरफ्तार कर लीस।
दुर्घटना
प्रदेस म पाछु चौबीस घंटा म दू आने-आने सड़क दुर्घटना म छह झिन मनखे के मउत होगे अउ दू झन घायल होगे हे।
मिले जानकारी के अनुसार बिलासपुर जिला म आज तेज रफ्तार मेटाडोर के टक्कर ले मोटर साइकिल सवार पति-पत्नी अउ बेटी के मउत होगे। उहें, एक आने बेटी गंभीर रूप ले घायल होगे। ए हादसा सकरी थाना क्षेत्र म ओ समय होईस, जब ए परिवार ह बेलपान मेला जावत रिहीस।
उहें, सरगुजा जिला के बसंतपुर थाना क्षेत्र के अंबिकापुर-बनारस मार्ग म पाछु रतिहा दू मोटर साइकिल म होय टक्कर म एक माईलोगिन समेत तीन मनखे के मउत होगे। उहें, एक महिला गंभीर रूप ले घायल होगे हे।
पीएससी-प्रारंभिक परीक्षा
छत्तीसगढ़ लोक सेवा आयोग डहार ले काली बारह फरवरी के राज्य सेवा प्रारंभिक परीक्षा के आयोजन दू पाली म करे जाही। एखर बर अट्ठाईस जिला म परीक्षा केन्द्र बनाय गेहे, जेमन म पहिली पाली के परीक्षा बिहनिया दस बजे ले मंझनिया बारह बजे तक अउ दूसरइया पाली के परीक्षा मंझनिया तीन बजे ले संझा पांच बजे तक राखे जाही। ए दारी पीएससी के माध्यम ले एक सौ नवासी पद मन बर भर्ती करे जाही।
नारायणपुर-मिलेट्स कैफे
नारायणपुर म जिला के पहिली मिलेट्स केफे सुरू होगे हे। ए कैफे के उद्घाटन पाठ्य-पुस्तक निगम के अध्यक्ष शैलेष नितिन त्रिवेदी ह रामकृष्ण मिशन आश्रम म आयोजित दू दिवसीय किसान मेला के मउका म करीस। ए कैफे ल कृषि विज्ञान केन्द्र के तकनीकी मार्गदर्शन म स्व-सहायता समूह के माईलोगिन मन कोति ले चलाय जात हे। इहां रागी, कोदो अउ कुटकी ले बने आने-आने पकवान के स्वाद ले जा सकथे।
खेलो इंडिया-छत्तीसगढ़ पदक
मध्यप्रदेश के उज्जैन म आयोजित ‘खेलो इंडिया यूथ गेम्स‘ म छत्तीसगढ़ के मलखंब खिलाड़ी मन जोरदरहा प्रदर्सन करत हुए टीम चैंपियन के खिताब अपन नाम करीन। एमा राखे गे आने-आने खेल म कुल सोलह पदक घलो जीते हे। एमा एक स्वर्ण, एक रजत अउ चौदह ठिन कांस्य पदक सामिल हे। ए उपलब्धि म मुख्यमंत्री भूपेश बघेल अउ खेल तथा युवा कल्याण मंत्री उमेश पटेल ह सबो खिलाड़ी मन ल बधाई अउ सुभकामना दीन हे।
खैरागढ़ विवि
खैरागढ़ के इंदिरा कला और संगीत विश्वविद्यालय ह कर्नाटक के कलबुर्गी म राखे गे छत्तीसवां इंटरयूनिवर्सिटी साउथ-ईस्ट जोन यूथ फेस्टिवल गुलफेस्ट म ओवरऑल चैंपियनशिप के खिताब अपन नाम करीस। विश्वविद्यालय के प्रतिभागी मन ह ए महोत्सव म संगीत, दृश्यकला अउ नृत्यकला के क्षेत्र म सुघ्घर प्रदर्सन करीन। एखरे संग थिएटर, लोक संगीत, नृत्य, पेंटिंग समेत आने-आने विधा म घलो इहां के कलाकार मन ह अपन प्रस्तुति ले लोगन मनके मन हर लीस। विश्वविद्यालय के कुलपति पद्मश्री डॉक्टर मोक्षदा चंद्राकर ह ए उपलब्धि बर प्रतिभागी मन ल बधाई अउ सुभकामना दीन हे।