छत्तीसगढ़ उच्च न्यायालय ह आरक्षण संशोधन विधेयक म हस्ताक्षर नइ होय के संबंध म राजभवन सचिवालय ल जारी नोटिस उपर रोक लगा देहे। बतादन कि छत्तीसगढ़ हाईकोर्ट ह राजभवन सचिवालय ल आरक्षण संशोधन विधेयक म हस्ताक्षर नइ होय के संबंध म नोटिस जारी करे रीहिस। एखर बाद नोटिस के विरूद्ध राजभवन सचिवालय कोति ले हाईकोर्ट म रिकॉल एप्लीकेशन देगे रीहिस। ए रिकॉल एप्लीकेशन के माध्यम ले उच्च न्यायालय म दलील देगे रहिस कि भारत के संविधान म उल्लेखित अनुच्छेद दू सौ के अनुरूप विधानसभा डहार ले पारित कोनो विधेयक ल राज्यपाल अनुमति दे सकत हे, रोक सकत हे, राष्ट्रपति के विचार बर आरक्षित रख सकत हे। राज्यपाल के प्रतिनिधि के रूप म सचिव ल घलो ए आशय के नोटिस जारी नइ करे जा सकय।
उंहे जगदलपुर स्थित अमर वाटिका म घलो शहीद वीर गुण्डाधुर समेत जम्मों वीर सपूत मनके स्मरण करे गीस। ए मउका म बस्तर पुलिस डहार ले संभाग के जम्मों जिला म भूमकाल सद्भावना दौड़ के आयोजन करे गीस। उंहे नाटक अउ दूसर कार्यक्रम के माध्यम ले विद्यार्थी अउ युवा मन ल शहीद वीर गुण्डाधुर अउ बस्तर के दूसर महानायक मनके बारे म जानकारी दे गीस।
कोंडागांव जिला म घलो भूमकाल स्मृति दिवस के अवसर म सद्भावना दौड़ के आयोजन करे गीस। ए मउका म प्रदेश कांग्रेस अध्यक्ष मोहन मरकाम घलो मौजूद रहिन।
प्रदेश के मुख्य सचिव अमिताभ जैन ह राम वनगमन परिपथ के काम म तेजी लाय के निर्देश दीन। ओमन मंत्रालय म पर्यटन विभाग के अधिकारी मनके बइठका लेके राम वनगमन परिपथ के काम के समीक्षा करीन। श्री जैन ह जउन जिला म राम वनगमन परिपथ के काम करे जात हे। उंहा के कलेक्टर मन ल ए काम ल सर्वोच्च प्राथमिकता ले पूरा करे बर कीहिन। ओमन कहिन कि लोक निर्माण विभाग, पर्यटन मंडल, वन विभाग समेत दूसर विभाग मनले समन्वय के साथ काम ल जल्दी पूरा कराय जाय।
पूर्व केंद्रीय मंत्री अरविंद नेताम अउ प्रदेश कांग्रेस कमेटी के प्रभारी संगठन महामंत्री अमरजीत चावला ल कांग्रेस के अनुशासन समिति ह नोटिस जारी करे हे। अनुशासन समिति के सदस्य तारिक अनवर ह पार्टी विरोधी गतिविधि ल लेके दूनो नेता मनले जवाब मांगे हे।
लोकसभा सांसद संतोष पांडेय ह राज्य सरकार उपर वादाखिलाफी करे के आरोप लगाइन हे । ओमन कीहिन कि प्रदेश के कांग्रेस सरकार अपन करे गे वादा ल आज तक पूरा नइ कर पाय हे। उंहे केंद्र सरकार डहार ले संचालित कतकोन योजना मनके लाभ घलो प्रदेश के जनता तक नइ पहुंचे देत हे।
ओमन कीहिन कि प्रधानमंत्री आवास योजना के तहत प्रदेश म सोला लाख मकान बनाना रीहिस, फेर राज्य सरकार कोति ले राज्यांश नइ दे जाय के सेती गरीब मनके मकान के सपना पूरा नइ हो पाय हे।
सांसद श्री पांडेय ह राज्यसभा म प्रदेश ले बाहर के लोगन मन ल प्रतिनिधित्व दे जाय बर सवाल उठाइन। संघरा ओमन लगभग पांच सौ चालीस करोड़ रूपिया के कोयला घोटाला के आरोप लगावत राज्य सरकार उपर निशाना साधीन।
राष्ट्रीय विधिक सेवा प्राधिकरण नई दिल्ली के निर्देश म प्रदेश के जम्मों न्यायालय म काली ग्यारा फरवरी के राष्ट्रीय लोक अदालत के आयोजन करे जाही। लोक अदालत म राजीनामा योग्य प्रकरण, चेक बाउन्स, बैंक रिकवरी, जमीन विवाद, विद्युत, जलकर, संपत्ति कर अउ राजस्व प्रकरण के निराकरण पक्षकार मनके आपसी सहमति ले करे जाही।
रायपुर संभाग के जम्मों जिला मन म कक्षा दसवीं अउ बारहवीं बोर्ड परीक्षा के मॉडल प्रश्न पत्र अभ्यास बर विद्यार्थी मन ल उपलब्ध कराय जाही। शिक्षा विभाग के संभागीय संयुक्त संचालक ह जम्मों जिला शिक्षा अधिकारी मनले कीहिन कि कक्षा दसवीं अउ बारहवीं के विद्यार्थी मन बर विषय विशेषज्ञ मन डहार ले मॉडल प्रश्न पत्र तियार कराय गेहे। ये मॉडल प्रश्न पत्र स्कूल के माध्यम ले विद्यार्थी मन ल उपलब्ध कराय जाही। संगरा ये मॉडल प्रश्न पत्र वेबसाइट म घलो मौजूद हरय।
राष्ट्रीय परीक्षा एजेंसी एनटीए केंद्रीय विश्वविद्यालय मन म स्नातक पाठ्यक्रम म दाखिला बर सम्मिलित प्रवेश परीक्षा सीयूईटी यूजी दू हजार तेईस – इक्कीस मई ले आयोजित करे जाही। परीक्षा बर आवेदन पत्र ऑनलाईन जमा करे के प्रक्रिया शुरू होगे हे। आवेदन करे के आखरी तारीख बारा मार्च हरय।
प्रादेशिक समाचार एकांश डहार ले समसामयिक विषय म आधारित साप्ताहिक कार्यक्रम ‘‘बातों-बातों-में‘‘ ए बखत छत्तीसगढ़ ले पद्मश्री पुरस्कार बर चयनित काष्ठशिल्प कलाकार अजय कुमार मंडावी ले लेगे भेंटवार्ता प्रसारित करे जाही। एखर प्रसारण आकाशवाणी के रायपुर केन्द्र डहार ले काली ग्यारह फरवरी के बिहनिया साढ़े दस बजे ले करे जाही। एला छत्तीसगढ़ के जम्मों आकाशवाणी केन्द्र एके संगरा रिले करही।
नई पेंशन योजन-एनपीएस अथवा पुराना पेंशन योजना-ओपीएस के चयन बर नवा रायपुर म एक दिन के कार्यशाला के आयोजन करे गीस। ए मउका म वरिष्ठ अधिकारी मन एनपीएस अउ ओपीएस ल लेके तकनीकी पहलू मनके जानकारी दीन अउ अधिकारी कर्मचारी मनके सवाल अउ शंका के समाधान करीन।
कार्यशाला म वरिष्ठ कोषालय अधिकारी आलोक राय ह बताइन कि एक नवंबर दू हजार चार ले इकतीस मार्च दू हजार बाईस के बीच नियुक्त शासकीय सेवक मन ल एनपीएस या ओपीएस म बने रहे बर कोनो एक विकल्प के चयन करना होही। विकल्प चयन के आखरी तारीख चौबीस फरवरी निर्धारित करे गेहे।
छत्तीसगढ़ प्रीमियर लीग-सीपीएल टी-20 प्रतियोगिता काली ले शुरू होही। ए प्रतियोगिता छत्तीसगढ़ क्रिकेट कौंसिल अउ वीर स्पोर्ट्स क्लब के संयुक्त तत्वावधान म अंबिकापुर, बिलासपुर, भिलाई अउ नवा रायपुर म एक संग आयोजित कराय जात हे। एमा कुल ग्यारा टीम भाग लीही, जेमा आठ टीम पुरूष वर्ग अउ तीन ठिन टीम महिला मनके होही । ए प्रतियोगिता के समापन छब्बीस फरवरी के होही।