आरक्षण मामला म छत्तीसगढ़ उच्च न्यायालय डहार ले राज्यपाल सचिवालय ल दे गे नोटिस ल चुनौती देवत सचिवालय ह केहे हे कि राज्यपाल अउ राष्ट्रपति ल पक्षकार नइ बनाय जा सकय। सचिवालय ह कोर्ट म एक ठन आवेदन देहे, जेमा केहे गे हवय कि आर्टिकल तीन सौ इकसठ म कोनों भी केस म राष्ट्रपति या राज्यपाल ल पक्षकार नइ बनाय जा सकय। आवेदन म नोटिस ल वापस ले बर केहे गे हवय। आज ए मामला म बहस के बाद हाईकोर्ट ह फइसला ल सुरक्षित राखे हे। राज्यपाल सचिवालय ह नोटिस म स्टे के मांग करे हे।
दुर्घटना
कांकेर जिला म आज होय एक ठिन सड़क हादसा म सात झन स्कूली लइका मनके मउत होगे। उहें, एक झिन दूसर लइका अउ ऑटो चालक ह गंभीर रूप ले घायल होगे हे।
मिले जानकारी के अनुसार जिला के जंजालीपारा के एक ठिन प्राईवेट स्कूल के आठ झिन लइका मन ह एक ठिन ऑटो रिक्सा म बइठ के स्कूल ले घर लहुटत रिहीन। इही दउरान कोरर तीर चरामा रद्दा म टरक ह ऑटो ल जोरदार टक्कर मार दीस। ए हादसा म ऑटो म बइठे पांच झिन लइका मनके मउकाच म मउत होगे। उहें, दू झन दूसर लइका मनके इलाज के दउरान मउत होगे। ए हादसा म घायल एक झन लइका अउ ऑटो चालक ल कोरर के प्राथमिक स्वास्थ्य केन्द्र ले जाय गीस, जिहां ले ओमन ल कांकेर जिला अस्पताल भेजे गे हवय।
मुख्यमंत्री भूपेश बघेल ह ए दुर्घटना बर गहरा दुख जतईन हे। ओमन ह प्रसासन ल मृत लइका मनके परिवार वाला मन ल हरसंभव मदद दे जाय के अउ घायल मनके इलाज बर बने सुविधा देवाय के निरदेस दीन हे।
उहें, सक्ती जिला के तौलीपाली गांव म अज्ञात वाहन के टकराय ले फटफटी म बइठे दू झन लोगन के मउत होगे।
पीडीएस-केरोसिन
केन्द्रीय पेट्रोलियम मंत्रालय डहार ले छत्तीसगढ़ ल सार्वजनिक वितरण प्रणाली-पीडीएस म फरवरी महिना बर पांच हजार एक सौ अड़तालीस किलो लीटर केरोसिन बांटे गेहे। एमा पीडीएस बर पांच हजार निन्यानवे अउ हॉकर मन बर उनचास किलो लीटर केरोसिन सामिल हे।
खाद्य विभाग डहार ले जारी पत्र म केहे गे हवय कि पीडीएस म चलत सबो अंत्योदय अउ प्राथमिकता वाले रासन कार्डधारीमन ल एखर पात्रता होही। नगरीय क्षेत्र के रासन कार्डधारी मन बर एखर पात्रता होही। नगरीय क्षेत्र के रासन कार्डधारी मन बर जादा ले जादा दू लीटर, गंवई क्षेत्र म अवइया अनुसूचित क्षेत्र के रासनकार्ड धारी मन ल जादा ले जादा तीन लीटर अउ गैर अनुसूचित क्षेत्र के रासनकार्ड धारी मन ल जादा ले जादा दू लीटर केरोसिन दे जाही। उहें, हॉकर मन ल पच्यासी लीटर के मान ले अलग से आबंटन जारी करे गेहे। एमन ल निर्धारित उचित मूल्य के दुकान के आगू खड़े होके रासनकार्ड धारी मन ल केरोसिन बांटे बर केहे गे हवय।
स्कूल-मरम्मत
स्कूल सिक्षा मंत्री डॉक्टर प्रेमसाय सिंह टेकाम ह किहीन हे कि प्रदेस के सबो सासकीय स्कूल के मरम्मत बर एक हजार करोड़ रूपिया दे जाही। संगेसंग स्कूल मनके पोतई गोबर पेंट ले करे जाही। डॉक्टर टेकाम ह सिक्षा विभाग के समीक्षा करत ए सबो काम ल अवइया सिक्षा सत्र ले पहिली पूरा करे बर किहीन। ओमन जिला सिक्षा अधिकारी मन ल मरम्मत करे के लइक सरकारी स्कूल मनके जानकारी सात दिन के भीतर विभागीय पोर्टल म दर्ज करे बर किहीन। डॉक्टर टेकाम ह किहीन कि जिला सिक्षा अधिकारी मन ह लइका मन ल सत-प्रतिसत उपस्थिति बर प्रेरित करय।
मुख्यमंत्री-पुस्तक विमोचन
मुख्यमंत्री भूपेश बघेल ह काली रईपुर म ‘‘तिरोहित तितुरघाट‘‘ पुस्तक के विमोचन करीन। ए पुस्तक धमधा के तितुरघाट म दू दर्जन ले जादा सती स्तंभ के पुरातात्विक साक्ष्य अउ ओखर बिसेसता उपर आधारित हे। एखर संपादन गोविंद पटेल ह करीन हे अउ भूमिका पुरातत्वविद् प्रभात सिंह ह लिखीन हे। ए पुस्तक म शिवनाथ नदी के तीर के पांच सौ बछर जुन्ना चतुर्भुजी तितुरघाट गांव के ऐतिहासिक तथ्य ल सामिल करे गेहे।
राज्यपाल-अनुमोदन
राज्यपाल सह कुलाधिपति अनुसुईया उइके ह छत्तीसगढ़ स्वामी विवेकानंद तकनीकी विश्वविद्यालय अधिनियम दू हजार चार म पी एच-डी. ले जुड़े धारा-उनचालीस म संशोधन प्रस्ताव के अनुमोदन कर दीन हे। अब विद्यार्थी मन ह पी एच-डी. करे बर बी.ई./बी.टेक. या एम.ई./एम टेक डिग्री ले जुड़े कोनों भी स्ट्रीम ल चुन सकत हे। अइसने, धारा-आठ दशमलव सात म घलो संसोधन करे गे हवय। एखर अनुसार यदि पी एच-डी. के अभ्यर्थी के चयन आरडीसी म नइ हो पाय हे या आडीसी म उपस्थित नइ हो पाय हे, त अइसन बिसेस मामला म अभ्यर्थी ह निर्धारित सुल्क के संग आरडीसी बर फेर आवेदन कर सकत हे।
उहें, राज्यपाल ह ऑडिनेंस फॉर बी.ई.-फोर ईयर डिग्री कोर्स के कंडिका नंबर-चार दशमलव दू के संसोधन प्रस्ताव के अनुमोदन घलो करीन हे। संसोधन के बाद अब ‘‘मैसिव ऑनलाईन ओपन कोर्स‘‘ के माध्यम ले उम्मीदवार मन डहार ले पाय गे नंबर, विश्वविद्यालय के इलेक्टिव विषय के विरूद्ध घलो चुने जा सकही। विश्वविद्यालय के कुलपति ह अइसन आवेदन उपर विचार करके फइसला लीही। राज्यपाल के अनुमोदन के बाद ए संसोधन ह प्रभावी होगे हवय।
भाजपा-आरोप
भारतीय जनता पार्टी के प्रदेस अध्यक्ष अरूण साव ह छत्तीसगढ़ के कांग्रेस सरकार उपर किसान मन ले छल करे के आरोप लगईन हे। ओमन किहीन कि यूपीए सासन म बछर दू हजार नौ ले दू हजार चौदह तक समर्थन मूल्य म कुल साढ़े चार लाख करोड़ रूपिया के भुगतान होईस। फेर, एनडीए सरकार म बछर दू हजार चौदह ले दू हजार बाईस तक चौदह करोड़ पच्चीस लाख रूपिया के भुगतान करे गेहे। उहें, धान खरीदी म यूपीए सासन म ए दउरान करीबन तीन लाख करोड़ के भुगतान होईस। फेर मोदी सरकार के कार्यकाल म करीबन नौ लाख करोड़ रूपिया के भुगतान होय हे। श्री साव ह बतईन कि समर्थन मूल्य म खरीदी के लाभ लेवइया किसान मनके संख्या लगातार बाढ़त हे। ओमन किहीन कि राज्य के कांग्रेस सरकार डर गे हवय अउ सच ल छुपाय के परयास करत हे, तेखरे सेती सही आंकड़ा ल जारी नइ करत हे।
भाजपा-जिला संयोजक बैठक
भारतीय जनता पार्टी के प्रदेस सह-प्रभारी नितिन नबीन ह रईपुर के प्रदेस भाजपा कार्यालय कुशाभाऊ ठाकरे परिसर म सहकारिता प्रकोष्ठ, पंचायत, नगरीय निकाय अउ विधि प्रकोष्ठ संघरा ‘मोर आवास-मोर अधिकार‘ अभियान के जिला संयोजक मनके बइठका लीन। सहकारिता प्रकोष्ठ के काम के समीक्षा करत ओमन ह सहकारिता ले जुड़े खेती-किसानी के क्षेत्र म राज्य सरकार डहार ले करे जावत अनियमितता ल जनता के बीच उजागर करे के बात किहीन। श्री नबीन ह किहीन कि प्रदेस के सहकारी समिति मन म नियम विरूद्ध बइठे प्राधिकृत अधिकारी मन के कारनामा ल जनता के आगू लाय के अउ भंग समिति ल फेर गठित करे बर रणनीति बनाय जाय। उहें, नगरीय निकाय प्रकोष्ठ के पदाधिकारी मन ल निकाय म फोकस करे बर केहे गीस।
बइठका म मोर आवास-मोर अधिकार संघरा सबो जिला संयोजक मन ले उंखर पंचायत स्तर तक डाटा मंगवा के काम करे के अउ आंदोलन करे के रणनीति घलो बनाय गीस।
उहें, भाजपा के प्रदेस प्रभारी ओमप्रकाश माथुर अउ प्रदेस अध्यक्ष अरूण साव ह आज महासमुंद के भाजपा जिला कार्यालय म संगठन के आने-आने पदाधिकारी मनके बइठका म सामिल होईन। बइठका के बाद पत्रकार मन ले गोठबात करत श्री माथुर ह किहीन कि अवइया विधानसभा चुनाव म भाजपा छत्तीसगढ़ म पूरा बहुमत के संग सरकार बनाही।
संग्राम सिंह-पदक
दुरूग जिला म यातायात विभाग म पदस्थ टीआई संग्राम सिंह ह थाईलैंड म होय इंटरनेशनल मास्टर ओपन गेम्स म दू स्वर्ण अउ एक कांस्य पदक जीतीन हे। संग्राम सिंह ह दू सौ मीटर रिले रेस म गोल्ड मेडल अउ चार सौ मीटर दउड़ म कांस्य पदक हासिल करीन हे। ओमन ह एखर पहिली नासिक म होय नेशनल गेम्स म घलो स्वर्ण पदक जीते हवय। अब ओमन ह बैंकॉक म होवइया खेल म भाग लीहीं।
ट्रेन-परिचालन
मध्य रेलवे के पुणे रेलमंडल के पलासी-जरंडेश्वर सेक्सन म नॉन इंटरलॉकिंग काम के सेती कुछेक गाड़ी मनके अवई-जवई आठ फरवरी ले अट्ठारह मार्च तक परभावित रइही। एमा गोंदिया-श्री छत्रपति शाहू महाराज टर्मिनस एक्सप्रेस, कोल्हापुर-गोंदिया एक्सप्रेस, कामाख्या-कुर्ला एक्सप्रेस अउ कुर्ला-कामाख्या एक्सप्रेस सामिल हे।
उहें, रईपुर रेलमंडल के रईपुर-उरकुरा डबल लाइन विद्युतीकरण खंड के बीच रोड अंडरब्रिज बनाय के सेती आज रतिहा नौ बजे ले काली बिहनिया चार बजके पचास मिनट तक ए रद्दा म गाड़ी मनके अवई-जवई परभावित रइही।