राज्य सरकार ह भारतीय पुलिस सेवा के चार झिन अधिकारी मनके तबादला कर देहे। गृह विभाग कोति ले जारी करे गे आदेस के अनुसार एंटी करप्शन ब्यूरो रायपुर के डीआईजी पारूल माथुर ल इही पद म छत्तीसगढ़ सशस्त्र बल के सरगुजा रेंज म पदस्थ करे गेहे। अइसने, मुख्यमंत्री सुरक्षा म तैनात पुलिस अधीक्षक प्रखर पांडेय ल एंटी करप्शन ब्यूरो के रायपुर मुख्यालय म डीआईजी बनाय गेहे।
ऐति, सारंगढ़-बिलाईगढ़ जिला के पुलिस अधीक्षक राजेश कुकरेजा ल छत्तीसगढ़ सशस्त्र बल के भिलाई स्थित पहला बटालियन के सेनानी के जिम्मा सौंपे गेहे। उहें, कोरबा के छत्तीसगढ़ सशस्त्र बल के तेरहवां बटालियन के सेनानी आशुतोष सिंह ल सारंगढ़-बिलाईगढ़ जिला के पुलिस अधीक्षक बनाय गेहे।
निरंजन दास-प्रभार
राज्य सरकार ह सेवानिवृत्ति प्रशासनिक अधिकारी निरंजन दास ल हाले म सूचना प्रौद्योगिकी विभाग के सचिव के पदस्थ करे रिहीन। आज जारी करे गे आदेस के अनुसार ओमन ल राज्य नागरिक आपूर्ति निगम अउ राज्य बेवरेज कॉर्पोरेशन के प्रबंध संचालक के संगेसंग वाणिज्यक कर विभाग के सचिव अउ आबकारी विभाग के आयुक्त के अतिरिक्त प्रभार घलो सौंपे हे।
आकांक्षी जिला-रिपोर्ट
केन्द्र सरकार के आकांक्षी जिला संबंधित योजना म विकास कार्य के आधार म छत्तीसगढ़ के नारायणपुर ल देस के पांच ठिन सर्वश्रेष्ठ जिला म चौथा स्थान मिले हे। भारत सरकार के नीति आयोग डहार ले देसभर के एक सौ बारह ठिन आकांक्षी जिला म चलत विकास कार्य ल लेके बेरा-बेरा म रिपोर्ट जारी करे जाथे। इही कड़ी म दिसंबर दू हजार बाईस के रिपोर्ट म नारायणपुर जिला के प्रदर्सन अच्छा पाय गीस। रिपोर्ट म विकास संबंधित सबो कामबूता ल देखे के बाद नारायणपुर ल देस म चौथा स्थान दे गीस। उहें, स्वास्थ्य अउ पोषण के श्रेणी म नारायणपुर जिला ल तीसर स्थान मिले हे।
अस्पताल-औषधि केन्द्र
केन्द्रीय स्वास्थ्य मंत्री मनसुख मांडविया ह कहिन हे कि सरकार ह देसभर के सरकारी अस्पताल म एकीकृत औषधि केन्द्र खोलही। ए जम्मों केन्द्र म आयुर्वेद अउ आधुनिक चिकित्सा ले मरीज मनके इलाज करे जाही। श्री मांडविया ह काली आयुष मंत्री सर्बानंद सोनोवाल के संग दिल्ली के सफदरजंग अस्पताल म एकीकृत औषधि केन्द्र के उदघाटन करीन।
कवर्धा-स्वास्थ्य केन्द्र-प्रमाण पत्र
कवर्धा के शहरी प्राथमिक स्वास्थ्य केन्द्र ल केन्द्रीय स्वास्थ्य मंत्रालय डहार ले जारी करे गे राष्ट्रीय गुणवत्ता आश्वासन प्रमाण पत्र मिले हे। ए प्रमाण पत्र कोनों भी स्वास्थ्य केन्द्र ल चिकित्सा संबंधी बारह ठिन क्षेत्र म अच्छा कामबूता करे बर दे जाथे।
जिला के मुख्य चिकित्सा अधिकारी डॉक्टर सुजॉय मुखर्जी ह बतईन कि कवर्धा के प्राथमिक स्वास्थ्य केन्द्र म चिकित्सा संबंधी सेवा के सरलग विस्तार करे जात हे।
बंदोबस्त-त्रुटि सुधार
राज्य सरकार ह राजस्व विभाग के अधिकारी मन ल अवइया दू महीना के भीतरी भूईंया ले जुड़े सबो त्रुटि मन ल सुधार करे के निरदेस दीन हे। मुख्यमंत्री के सचिव डॉक्टर एस. भारतीदासन ह रईपुर जिला के आरंग म कतकोन विभाग के अधिकारी मनके बइठका लीन अउ किहीन कि बंदोबस्त ले संबंधित गलती मन ल प्राथमिकता के आधार म ठीक करे जाय।
पीएससी-प्रारंभिक परीक्षा
छत्तीसगढ़ लोक सेवा आयोग डहार ले बछर दू हजार बाईस बर राज्य सेवा प्रारंभिक परीक्षा बारह फरवरी के दू सत्र म प्रदेसभर के अट्ठाईस ठिन जिला के निर्धारित परीक्षा केन्द्र म होही। ए संबंध म छत्तीसगढ़ लोक सेवा आयोग ह कहिन हे कि दिव्यांग अभ्यर्थी जउन मन सह-लेखक रखे जाय के विकल्प देहे, ओमन जरूरी प्रमाण पत्र के संग काली नौ फरवरी तक अपन परीक्षा केन्द्र ले संबंधित जिला के कलेक्टर कार्यालय म जरूर संपर्क करय। उहें, निर्धारित करे गे तिथि के निकल जाय के बाद मिले वाले आवेदन नइ ले जाही।
माओवादी-समाचार
बीजापुर अउ सुकमा जिला ले लगे गुंडम अउ छूटवाई के जंगल म पुलिस अउ माओवादी मनके बीच करीबन एक घंटा तक मुठभेड़ होईस। पुलिस के अनुसार डीआरजी, एसटीएफ अउ कोबरा बटालियन के संयुक्त टीम ह तर्रेम थाना क्षेत्र के जंगल म तलासी अभियान बर निकले रिहीन। तभे उहां राहत माओवादी मन ह पुलिस जवान मन उपर गोलीबारी सुरू कर दीन। तभे अपन बचाव करत हुए पुलिस मन ह घलो गोलीबारी करीन। एखर बाद जवान मन ह उहां कुछु माओवादी मन ल घेराबंदी करके पकड़ीन। त उहें, कुछु आने माओवादी मन ह भाग गीन। पकड़े गे माओवादी मन ले पूछताछ करे जात हे। घटनास्थल ले माओवादी मन डहार ले बउरे जाय वाले विस्फोटक, डेटोनेटर अउ कतकोन सामान जब्त करे गेहे।
इही बीच, बीजापुर जिला म माओवादी मनके खिलाफ कुछु बछर पहिली चलाय गे सलवा जुडुम अभियान के प्रमुख नेता रेहे मधुकर राव के काली निधन होगे। जानबा के अनुसार वारंगल के एक ठिन निजी अस्पताल म ओमन ल भर्ती कराय गे रिहीस, जिहां ओखर मउत होगे।
माओवादी-सहयोगी गिरफ्तार
धमतरी अउ गरियाबंद पुलिस ह अपन संयुक्त अभियान म माओवादी मनके चार झिन सहयोगी मन ल गिरफ्तार करे हे। पकड़े गे आरोपी मन प्रतिबंधित माओवादी मन ल उंखर बउरती के सामान देके काम करत रिहीन। ए जम्मों आरोपी मन ल रिमांड म जेल भेज दे गेहे।
गरियाबंद के पुलिस अधीक्षक अमित तुकाराम काम्बले अउ धमतरी के एसपी प्रशांत ठाकुर ह बतईन कि माओवादी मनके ए सहयोगी मनके बारे म मुखबिर ले मिले सूचना के आधार म दूनों जिला के टीम ल जंगल वाले जघा म तलासी अभियान म भेजे गे रिहीस, उहां राहत आरोपी मन ह पूछताछ के बेरा माओवादी मन बर कामबूता करना अउ कतकोन जिनीस ल पहुंचाय के बात ल स्वीकार करीन। इही आधार म उंखर मनके गिरफ्तारी होईस। पुलिस अधीकारी मन ह बतईन कि आरोपी मन करा ले बारह नग वॉकीटॉकी के अलावा माओवादी मनके वर्दी, पर्चा अउ साहित्य, मोबाइल फोन संगेसंग मोटर साइकिल घलो जब्त करे गेहे।
नेहरू युवा केन्द्र-संसद महोत्सव
नेहरू युवा केन्द्र संगठन कोति ले काली रईपुर म राज्य युवा संसद महोत्सव के आयोजन करे गीस। जेमा प्रदेस के सबो जिला ले चुने गे दो-दो प्रतिभागी मन ह हिस्सा लीन। ए कारीकरम ऑनलाइन आयोजित होय रिहीस। एमा रईपुर के माहिरा खान ह विजेता बनीस। उहें, दृष्टि सिंह ल दूसर अउ परिधि शर्मा ल तीसर स्थान मिलीस। ए तीनों विजेता प्रतिभागी संसद के केन्द्रीय कक्ष म होवइया राष्ट्रीय कार्यक्रम म छत्तीसगढ़ के प्रतिनिधित्व करत हुए प्रधानमंत्री के संग बातचीत करही।
उहें, ए कार्यक्रम म दुर्ग विधायक अरूण वोरा ह वीडियो संदेस के माध्यम ले सबो प्रतिभागी मन ल सुभकामना दीन हे। कार्यक्रम म नेहरू युवा केन्द्र के राज्य निदेशक श्रीकांत पांडेय समेत कतकोन जिला के पदाधिकारी मन घलो सामिल होईन।
ऑनलाइन-सट्टा आरोपी गिरफ्तार
दुरूग पुलिस के सहयोग ले उत्तरप्रदेश के नोएडा पुलिस ह ऑनलाइन सट्आ के अंतर्राष्ट्रीय कारोबार के खुलासा करत हुए सोलह झिन आरोपी ल गिरफ्तार करे हे। ए सबो आरोपी मन उत्तरप्रदेश के रहइया बताय गेहे। पुलिस ह इंखर करा ले सौ ठिन मोबाइल फोन, लैपटॉप अउ इलेक्ट्रॉनिक जिनीस के अलावा बड़का संख्या म एटीएम कार्ड अउ सिम कार्ड ल जब्त करे हे। पुलिस ह ए कार्रवाई के बेरा बाईस ठिन खाता म मिले लगभग दू करोड़ रूपिया के लेनदेन ल घलो रोके म सफलता हासिल करीन।
हाथी उत्पात
कोबरा जिला के ग्रामीण क्षेत्र म पाछु कुछु दिन ले जंगली हाथी मनके डेरा हे। एखर सेती उहां रइहया लोगन मन म दहसत के माहौल हे। जिला के हरदीबाजार अउ रेकी इलाका म बारह हाथी अउ छह उंखर लइका ल एक संग किंजरत देखे गे रिहीस। पाछु रतिहा ए जंगली हाथी के सेती एक झिन मनखे ह घायल होगे रिहीस।
ऐति, जांजगीर-चांपा जिला के अमलीपाली अउ सोनडीह गांव म घलो हाथी के उत्पात ले उहां रहइया लोगन अउ किसान मन ल बड़का नुकसान होय हे।