भारतीय जनता पार्टी के जम्मों सातों ठन मोर्चा प्राकोष्ठ के प्रदेस कार्यसमिति के बइठका ल आज रईपुर के कुशाभाऊ ठाकरे परिसर म राखे गीस। ए बइठका म प्रदेस प्रभारी ओम माथुर, सह प्रभारी नितिन नबीन, प्रदेस अध्यक्ष अरूण साव, पूर्व मुख्यमंत्री डॉक्टर रमन सिंह, नेता प्रतिपक्ष नारायण चंदेल, क्षेत्रीय संगठन महामंत्री अजय जामवाल, संगठन महामंत्री पवन साय अउ मुख्य प्रवक्ता अजय चंद्राकर के संगेसंग प्रदेस के जम्मों मोर्चा-प्रकोष्ठ के पदाधिकारी अउ कार्यसमिति के सदस्य मन ह सामिल होईस। बइठका के बाद पत्रकार मन ले गोठबात करत भाजपा अध्यक्ष अरूण साव ह किहीन कि पार्टी के जम्मों मोर्चा मन ह अपन-अपन वर्ग के लोगन मन ले जानकारी लेके उंखर समस्या ल लेके आंदोलन करही। ओमन किहीन कि राज्य के कांग्रेस सरकार ह जम्मों वरग मन संग वादाखिलाफी करे हे।
एखर पहिली, भाजपा के संयुक्त मोर्चा पदाधिकारी मनके काली राखे गे बइठका म क्षेत्रीय संगठन महामंत्री अजय जामवाल ह पार्टी पदाधिकारी मन ल अवइया विधानसभा चुनाव ल ध्यान म राखत रणनीति बनाय बर किहीन।
उहें, प्रदेस महामंत्री विजय शर्मा ह बतईन हे कि भाजपा कोर ग्रुप के संग ‘‘छत्तीसगढ़ बचाव-कांग्रेस भगावो‘‘ अभियान टीम के बइठका राखे गीस। ए दउरान प्रदेस महामंत्री ओ.पी. चौधरी, केदार कश्यप अउ कई झिन पदाधिकारी मन ह सामिल होईन।
प्रधानमंत्री-संसदीय दल बैठक
प्रधानमंत्री नरेन्द्र मोदी ह किहीन कि सरकार के हर बजट म गरीब मनके हित ल ध्यान म राखे गेहे। नई दिल्ली म भाजपा संसदीय दल के बइठका म श्री मोदी ह किहीन कि केन्द्रीय बजट म समाज के जम्मों वरग के मनखे मन ल ध्यान म राख के बजट पेस करे गेहे।
भेंट-मुलाकात
भेंट-मुलाकात कारीकरम के दउरान मुख्यमंत्री भूपेश बघेल ह आज रईपुर जिला के आरंग विधानसभा क्षेत्र के भानसोज अउ समोदा गांव पहुंचीन। ए मउका म ओमन आरंग विधानसभा क्षेत्र म छियासी करोड़ छैसठ लाख रूपिया के विकास काम के लोकार्पण अउ भूमिपूजन करीन। ए मउका मुख्यमंत्री ह समोदा ल उप-तहसील के दर्जा देके, केन्द्रीय बैंक के साखा खोले अउ नवा कालेज बनाय के घोसना करीन। संगेसंग ओमन अमोदी गांव म उप स्वास्थ्य केन्द्र खोले, भैंसा म पुलिस चौकी सुरू करे, भानसोज म बैंक के साखा खोले अउ चंदखुरी म स्वामी आत्मानंद अंग्रेजी माध्यम स्कूल बनाय के घलो घोसना करीन। ओमन किहीन कि नगर पंचायत मंदिर हसौद के सरकारी प्राथमिक स्वास्थ्य केन्द्र ल सामुदायिक स्वास्थ्य केन्द्र के रूप म विकसित करे जाही।
राष्ट्रीय-पुरस्कार
छत्तीसगढ़ सरकार ल ई-गवर्नेंस के क्षेत्र म राष्ट्रीय स्तर म एक ठन अउ इनाम बर चुने गेहे। ‘‘छत्तीसगढ़ डी.एम.एफ. ऑनलाइन पोर्टल‘‘ ल कम्म्यूटर सोसायटी ऑफ इंडिया सी.एस.आई, एस.आई.जी. डहार ले परियोजना केटेगेरी के तहत ‘‘अवॉर्ड ऑफ एक्सीलेंस‘‘ दे जाही। ए इनाम ल पच्चीस मार्च के नई दिल्ली म राखे गे एक ठिन कारीकरम म दे जाही। ए इनाम खातिर मुख्यमंत्री भूपेश बघेल ह खनिज विभाग के अधिकारी अउ करमचारी मन ल बधाई दीन हे।
शिक्षक-सम्मान
शिक्षा के क्षेत्र म बहुत बढ़िया काम करे खातिर कोरिया जिला के सकड़ा गांव के सरकारी प्राथमिक स्कूल के सहायक सिक्षक रूद्रप्रताप सिंह राणा ल नई दिल्ली म लाइव्स रियल हीरोज ऑफ इंडिया अवार्ड ले सम्मानित करे गेहे। सिक्किम के राज्यपाल गंगा प्रसाद अउ योग गुरू आचार्य प्रद्युम्न ह ओमन ल ए सम्मान दीन।
खबर के मुताबिक सिक्षक रूद्रप्रताप सिंह राणा ह कोरोना काल म लइका मन ल सुरक्षित राखत पढ़ई ले जोड़े रिहीस।
रामविचार नेताम-आरोप
प्रदेस के पूर्व गृह मंत्री रामविचार नेताम ह बीजापुर अउ सुकमा जिला म भाजपा कार्यकर्ता मनके कथित हत्या म गुस्सा जतावत किहीन हे कि राज्य सरकार ह लोगन मनके जान के रक्षा करे म असफल होय हे। ओमन किहीन कि भाजपा नेता मन उपर गलत धारा लगाय के बाद अब उंखर हत्या घलो करे जात हे। श्री नेताम म आरोप लगईन कि प्रदेस म अपराधी मनके हौसला ह बुलंद हे। ओमन बतईन कि भाजपा के राष्ट्रीय अध्यक्ष जे.पी. नड्डा ह ग्यारह फरवरी के जगदलपुर आही।
कांग्रेस-प्रदर्शन
प्रदेस कांग्रेस अध्यक्ष मोहन मरकाम के अगुवई म कांग्रेस पदाधिकारी अउ कार्यकर्ता मन ह रईपुर समेत प्रदेसभर के आने-आने विकासखंड म स्थित एल.आई.सी. अउ स्टेट बैंक कार्यालय के आगू म धरना-प्रदर्सन करीन। श्री मरकाम ह आरोप लगईन कि कोनो-कोनो उद्योगपति मन ल कथित रूप ले संरक्षण दे खातिर एलआईसी अउ स्टेट बैंक जइसन सार्वजनिक कार्यालय मन म वित्तीय संकट के स्थिति बने हे। श्री मरकाम ह यहू किहीन कि ए मामला म केन्द्र सरकार ल श्वेत पत्र जारी करना चाही।
एम्स-योग कार्यशाला
अखिल भारतीय आयुर्विज्ञान संस्थान-एम्स रईपुर म राखे गे दू दिन के राष्ट्रीय योग कार्यशाला म देस के कई ठिन राज्य के संगेसंग सिंगापुर अउ बांग्लादेश ले आय अस्सी झन प्रतिभागी मन ह प्रसिक्षण म भाग लीन। ए मउका म छत्तीसगढ़ योग आयोग के अध्यक्ष ज्ञानेश शर्मा ह किहीन कि ए कारीकरम ले योग ल जाने के मउका मिलीन।
हॉकी प्रतियोगिता
राजनांदगांव के अंतर्राष्ट्रीय हॉकी स्टेडियम म काली ले महंत सर्वेश्वर दास स्मृति अखिल भारतीय हॉकी प्रतियोगिता के सुरूवात करे जाही। ए प्रतियोगिता म छत्तीसगढ़ के संगेसंग दूसर राज्य के बाईस ठन टीम ह भाग लीहीं। प्रतियोगिता म ए दारी भारतीय टीम के हॉकी खिलाड़ी मन घलो सामिल होही। सोलह फरवरी के आखिरी मुकाबला खेले जाही।
हाथी-विचरण
जांजगीर-चांपा जिला के दल्हा पहाड़ के जंगल म हाथी के एक ठन दल ह बिलासपुर जिला म पहुंच गेहे। गांव वाले मन ह हाथी के दल ल बिलासपुर के सोंठी जंगल घूमत देखीन हे। एखर सूचना ल वन विभाग के अधिकारी मन ल दे दे गेहे। वन विभाग के अधिकारी मन ह हाथी ल जंगल कोति भगाय के परयास करत हे।
अउ अब थोरकुन समाचार सार म-
– बीजापुर जिला म सीआरपीएफ के एक झिन जवान ह अपन आप ल गोली मारके आत्महत्या कर लीन। ए जवान ह केरल के रहवइया रिहीन अउ तीन दिन बाद छुट्टी ले वापिस बीजापुर आय रिहीन।
– दंतेवाड़ा जिला म एक झिन इनामी महिला नक्सली ह पुलिस के आगू म आत्मसमर्पण कर दीन। ए माओवादी ह अब्बड़ दिन ले नक्सली गतिविधि म सामिल रिहीन।
– रईपुर रेलमंडल के रईपुर-उरकुरा डबल लाइन के बीच अंडरब्रिज बनाय के सेती नौ फरवरी के रतिहा नौ बजे ले दस फरवरी के बिहनिया चार बजके पचास मिनट तक ए रद्दा म ट्रेन मनके अवई-जवई ह परभावित रइही।
– बिलासपुर जिला के पचपेड़ी थाना क्षेत्र म आज एक ठिन चारपहिया गाड़ी के चपेट म आय ले फटफटी सवार एक झिन माईलोगिन के मउत होगे। उहें, एक झिन जवान लइका ह गंभीर रूप ले घायल होगे हे।
अउ
– जांजगीर-चांपा जिला के तागा गांव म एक ठिन चरचकिया गाड़ी के टक्कर ले ई-रिक्शा म सवार पांच महीना के नानचुन लइका के मउत होगे। उहें, चार झन मनखे मन ल थोरबहुत चोट लगे हे।