आज दिनभर के खबर ल अपन गुरतुर छत्तीसगढ़ी भाखा म पढ़व

रायपुर म आयोजित बृद्धिजीवी सम्मेलन म केंद्रीय मंत्री अर्जुन राम मेघवाल ह सामिल होइन । ये दउरान ओमन ह केंद्रीय बजट उपर चर्चा करत कहिन कि कोरोना के बाद कई विकसित देश के अर्थव्यवस्था चौपट होगे रीहिस, फेर भारत ह जम्मों विश्व म तेज गति ले विकास करइया देश बन गेहे अउ केंद्र सरकार के कल्याणकारी योजना मनले भारत विश्वगुरू बन जाही ।

ए कार्यक्रम म लोकसभा सांसद सुनील सोनी, पूर्व मंत्री पुन्नूलाल मोहिले, अमर अग्रवाल, केदार कश्यप समेत व्यापारिक संगठन के पदाधिकारी अउ अर्थशास्त्री मन मौजूद रीहिन।

एति संवाददाता मन ल संबोधित करत कीहिन कि ये समावेशी विकास के बजट हे । केंद्रीय मंत्री ह मनरेगा के विसय उपर छत्तीसगढ़ सरकार उपर भ्रम फैलाय के आरोप लगाइन ।

भिलाई इस्पात संयंत्र के निदेशक प्रभारी अर्बिन दास गुप्ता ह केंद्रीय बजट उपर प्रतिक्रिया देत कीहिन कि ये बजट देश बर प्रगतिशील बजट हे। अधोसंरचना मद म जादा निवेश करे जावत हे, जेखर ले अर्थव्यवस्था आगू बाढ़ही। अधोसंरचना मद म राशि खर्चा करे के सेती सड़क, रेल, ब्रिज, पुल अउ एयरपोर्ट के निर्माण होही। एखर ले अर्थव्यवस्था म बड़का प्रभाव देखे ल मिलही। इस्पात-उद्योग समेत सबो वर्ग ल फायदा होही अउ रोजगार के अवसर घलो बाढ़ही।

बीजापुर जिला म माओवादी मन उसूर के भाजपा मंडल अध्यक्ष नीलकंठ कक्केम के हत्या कर दीन। श्री कक्केम पारिवारिक कार्यक्रम म सामिल होय बर अपन पैतृक गांव गे रीहिन। इही बेरा माओवादी मन उंखर उपर हमला कर दीन।

एति कोंडागांव पुलिस ह बयानार-केरमापाल रद्दा म मडानार अउ पेरमापाल के बीच दस किलो के आईईडी बम बरामद करीस, जेला मउका म ही बम विरोधक दस्ता ह नष्ट कर दीस।

उंहें दंतेवाड़ा जिला के अरनपुर थाना क्षेत्र के पोटाली के जंगल ले सुरक्षा बल मन एक झिन माओवादी ल गिरप्तार करीन हे।

नवा रायपुर अटल नगर म विश्व स्तरीय कबर संस्थान के निर्माण करे जाही। इंहा एके जगा स्मारक के संग संग्रहालय अउ शोधपीठ घलो होही । मुख्यमंत्री भूपेश बघेल ह काली खरसिया म आयोजित कार्यक्रम म ए घोषणा करीन हे। ए दउरान ओमन पंथश्री हुजूर मुकुंदमणिनाम साहेब स्मृति महोत्सव अउ एकोत्तरी चौका आरती महायज्ञ म घलो शामिल होइन । ये मउका म मुख्यमंत्री ह कीहिन कि कबीर साहेब ह आज ले छै सौ साल पहिली जउन सीख दे रीहिन, वो ह आज घलो समाज ल रद्दा दिखइया हे।

छत्तीसगढ़ उच्च न्यायालय ह स्कूल शिक्षा विभाग म सहायक शिक्षक संवर्ग ले प्रधान पाठक प्राथमिक शाला के पदोन्नति मामला म सुनवाई करत प्रधान पाठक प्राथमिक शाला के एक-एक पद याचिकाकर्ता मन बर खाली राखे के निर्देश दीन हे। याचिकाकर्ता के मुताबिक गरियाबंद जिला के मैनपुर विकासखंड म सहायक शिक्षक पंचायत पद बर बछर दू हजार पांच म उंखर नियुक्ति करे गे रीहिस।

राजधानी रायपुर म अब बड़का धरना-प्रदर्शन बूढ़ातालाब के आगू नइ होही। जिला प्रशासन ह बड़का धरना प्रदर्शन बर नवा रायपुर के तूता गांव म राज्योत्सव मैदान के आगू जगा बना देहे।

कलेक्टर डॅाक्टर सर्वेश्वर नरेंद्र भूरे ह बताइन कि जनभावना अउ सुविधा ल देखत धरना स्थल ल नवा रायपुर के राज्योत्सव मैदान के आगू ले जाय गेहे। एखर बर जिला प्रशासन ह आदेश जारी कर देहे। अब बूढ़ातालाब के आगू वाले जगा म सिरिफ एक सौ या ओखर ले कम लोगन ही आंदोलन कर सकही। चयनित जगा म आवागमन, पार्किंग, बिजली व्यवस्था, प्राथमिक उपचार के संग सबो प्रकार के निस्तारी सुविधा उपलब्ध कराय गेहे। बतादन कि बूढ़ा तालाब धरना स्थल के सेती परमुख जगा सिटी कोतवाली, पुरानी बस्ती रद्दा म जाम लग जात रीहिस अउ लोगन मन ल परसानी होत रीहिस।

माघी पूर्णिमा के मउका म आज ले राजिम अउ शिवरीनारायण समेत प्रदेश के कतकोन जगा म पुन्नी मेला शुरू होगे हे। छत्तीसगढ़ के प्रयाग नाव ले प्रसिद्ध राजिम के महानदी, पैरी अउ सोण्ढूर नदी के त्रिवेणी संगम म श्रद्धालु मन डुबकी लगाइन अउ भगवान राजीव लोचन अउ कुलेश्वर महादेव के दर्शन करीन।

ये मेला अवइया अठारा फरवरी महाशिवरात्रि तक चलही। मेला जगा म श्रद्धालु मनके सुविधा बर विशेष व्यवस्था करे गेहे। संगे सुरक्षा बर पुलिस बल ल घलो तैनात करे गेहे। माघी पुन्नी मेला म हर दिन संझा लोक कलाकार मन पारंपरिक कला अउ संस्कृति ले जुड़े प्रस्तुती दीही।

उंहे जांजगीर-चांपा जिला के शिवरीनारायण म घलो पुण्य स्नान के संग माघी पुन्नी मेला शुरू होगे हे। ए मउका म महानदी शिवनाथ अउ जोंक नदी के त्रिवेणी संगम म श्रद्धालु मन डुबकी लगाके भगवान नर-नारायण के दर्शन करीन। महानदी के तट म आज ले सिरपुर महोत्सव के आयोजन घलो करे जावत हे।

मुख्यमंत्री भूपेश बघेल ह प्रदेशवासी मन ल राजिम माघी पुन्नी मेला अउ शिवरीनारायण मेला के बधाई दीन हे। ओमन कीहिन कि राजीम मेला छत्तीसगढ़ के आस्था के प्रतीक हे। ए मेला म छत्तीसगढ़ के धार्मिक परंपरा के संगेसंग लोक संस्कृति के दर्शन होथे।

बीजापुर जिला म माओवादी मन उसूर के भाजपा मंडल अध्यक्ष नीलकंठ कक्केम के हत्या कर दीन। श्री कक्केम पारिवारिक कार्यक्रम म सामिल होय बर अपन पैतृक गांव गे रीहिन। इही बेरा माओवादी मन उंखर उपर हमला कर दीन।

एति कोंडागांव पुलिस ह बयानार-केरमापाल रद्दा म मडानार अउ पेरमापाल के बीच दस किलो के आईईडी बम बरामद करीस, जेला मउका म ही बम विरोधक दस्ता ह नष्ट कर दीस।

उंहें दंतेवाड़ा जिला के अरनपुर थाना क्षेत्र के पोटाली के जंगल ले सुरक्षा बल मन एक झिन माओवादी ल गिरप्तार करीन हे।

नगरीय प्रशासन विभाग डहार ले अवइया पंद्रह फरवरी के नगरीय निकाय के महापौर अउ अध्यक्ष बर एक दिन के प्रबोधन कार्यक्रम के अयायोजन करे जाही। ए दउरान मुख्यमंत्री भूपेश बघेल ह सबो महापौर अउ अध्यक्ष मनले सोझे गोठबात करही।

कार्यक्रम म विभागीय अधिकारी मन ह सरकार के महत्वाकांक्षी योजना मनके जानकारी दीही। संगे मुख्यमंत्री स्लम स्वास्थ्य योजना, श्री धनवंतरी जेनेरिक मेडिकल स्टोर योजना, स्वच्छ भारत मिशन, सबके लिए आवास मिशन, शहरी आजीविका मिशन, अउ संपत्ति कर संग्रहण समेत कतकोन कारज म बढ़िया प्रदर्शन करइया निकाय मन ल पुरस्कार दे जाही।

जांजगीर-चांपा जिला के अकलतरा क्षेत्र म पकरिया गांव के तीर तखार म तेरह ठन हाथी के एक दल विचरण करत हे। एखर ग्रामीण मन म डर बइठगे हे। प्रशासन डहार ले सावधानी बरते बर पामगढ़-अकतरा मार्ग ल बंद करके आय जाय बर दूसर रद्दा बदले गेहे। संगे मउका म पुलिस प्रशासन के टीम घलो निगरानी करत हे। स्थानीय लोगन मन ल हाथी ले बांचे बर सतर्क रेहे बर केहे गेहे।

– रायपुर जिला के अभनपुर विकासखंड के ग्राम हसदा म जिला स्तरीय रामायण मंडली प्रतियोगिता के आयोजन करे गीस। एमा जिला के जम्मों विकासखंड के मंडली मन हिस्सा लीन।

– मुख्यमंत्री ह आज दामाखेड़ा म एक बड़का धर्मशाला बनाय के घोषणा करीन। संगे ओमन कीहिन कि दामाखेड़ा म दस किलोमीटर दायरा म अब तक कोनो भी स्पंज आयरन उद्योग नइ खोले जाही।

– स्वास्थ्य विभाग ह सघन टीबी अउ कुष्ठ खोज अभियान के दउरान काम म लापरवाही बरते उपर चौदा जिला के सैंतालिस पुरूष स्वास्थ्य कार्यकर्ता मनके खिलाफ अनुशासनात्मक कार्रवाई करे हे।

– दुर्ग पुलिस ह ग्रेटर नोएडा उत्तरप्रदेश म संचालित महादेव ऐप सट्टा के नौ झिन ऑपरेटर मन ल गिरप्तार कर लेहे। इंखर तीर ले तीन लैपटॉप, पंद्रह मोबाइल अउ रजिस्टर समेत आने सामग्री बरामद करे गेहे।