दक्षिण पूर्व मध्य रेलवे बर बजट दू हजार तेईस चोबीस म रिकॉर्ड आठ हजार चार सौ चार करोड़ रूपिया के प्रावधान करे गेहे। केंद्रीय रेलमंत्री अश्विनी वैष्णव ह वीडियो कॉन्फ्रेसिंग के माध्यम ले पत्रकार मनसे बातचीत करत हुए बताइन कि रेलवे म चलत विभिन्न परियोजना, नवा परियोजना कार्य अउ मद मन बर पाछू बछर के मुकाबला ये बजट म उन्नीस गुना जादा प्रावधान करे गेहे। रेलवे बर जारी करे गे ये बजट म मुख्यतः वंचित मन ल बढ़ावा दे उपर जोर दे गेहे।
श्री वैष्णव ह बताइन कि दक्षिण पूर्व मध्य रेलवे ले होके जाने वाला एनर्जी कारिडोर बर एक नवा लाईन कनेक्टिविटी परियोजना स्वीकृत करे गेहे। रेलमंत्री ह बताइन कि दक्षिण पूर्व मध्य रेलवे म अमृत भारत स्टेशन योजना के तहत अड़तालिस स्टेशन मन ल विकास बर चिन्हित करे गेहे। ये स्टेशन मन म वेटिंग हॉल, फूड स्टॉल अउ रिटेल आउटलेट ल एकीकृत करके बनाय जाही। ओमन बताइन कि बिलासपुर, रायपुर अउ दुर्ग स्टेशन ल पुर्नविकास योजना के तहत चिन्हित करे गेहे। ये तीनो स्टेशन मनके पुर्नविकास एयरपोर्ट के तर्ज म करे जाही।
मुख्यमंत्री भूपेश बघेल ह आज रायगढ़ जिला के खरसियां म प्रदेश के पहिली मोबाइल मिलेट कैफे मिलेट ऑन व्हील्स ल हरी झण्डी दिखाके रवाना करीन। ये मउका म ओमन रागी ले बने केक काटीन। मुख्यमंत्री ह कीहिन कि ये पहल ले मिलेट के उपभोग के प्रति लोगन मन म जागरूकता बाढ़ही। ओमन ये मोबाइल कैफे के संचालन करइया महिला समूह ल अपन शुभकामना दीन।
गौरतलब हे कि बछर दू हजार तेइस ल अंतर्राष्ट्रीय मिलेट ईयर के रूप म मनाये जात हे। इही कड़ी म जिला प्रशासन रायगढ़ के पहल म मिलेट ऑन व्हील्स कैफे के शुरूआत करे गेहे। जेन ह एक चलता फिरता मिलेट कैफे होही, जेमा रागी, कोदो कुटकी ले बने व्यंजन परोसे जाही।
मुख्यमंत्री भूपेश बघेल कांकेर जिला के भानुप्रतापपुर म गोंडवाना समाज के एक दिवसीय वार्षिक सम्मेलन म शामिल होइन। ये अवसर म मुख्यमंत्री ह चौदा करोड़ सैंतालिस लाख रूपिया के लागत के एक सौ छियांलिस विकास कार्य मनके लोकार्पण अउ भूमिपूजन करीन। श्री बघेल ह कांकेर के मेडिकल कालेज के नामकरण पूर्व प्रधानमंत्री इंदिरा गांधी के नाम म करे अउ भानुप्रतापपुर म खेल मैदान के नामकरण पूर्व विधानसभा उपाध्यक्ष मनोज मंडावी के नाम म करे के घोषणा करीन। एखरे संग ओमन चालकी मांझी बर दस-दस हजार रूपिया देके घोषणा करीन।
ये मउका म मुख्यमंत्री ह कीहिन कि आदिवासी संस्कृति अउ परंपरा ल संरक्षित करे के प्रयास राज्य सरकार ह लगातार करत हे। ओमन कहिन कि प्रदेश के सबो आदिवासी बोली मन ल लिपिबद्ध करे, लोक नृत्य, लोकगीत अउ पारंपरिक खेल मन ल संरक्षित करे अउ सहेजे के काम घलो करे जात हे। श्री बघेल ह कहिन कि देश के सबले बड़े मिलेट के प्लांट कांकेर जिला के नथिया नवागांव म हाल ही म प्रारंभ करे गेहे।
राज्यपाल अउ कुलाधिपति अनुसुईया उइके ह प्राध्यापक, डॅाक्टर आर.श्रीधर ल कंलिगा विश्वविद्यालय के नवा कुलपति नियुक्त करे हे। उंहे, डॅाक्टर सुमेर सिंह यादव ल आई.टी.एम. विश्वविद्यालय के कुलपति नियुक्त करे गेहे।
राजभवन सचिवालय डहार ले जारी आदेश के अनुसार डॅाक्टर संजय जे. डहरवाल ल पंडित रविशंकर शुक्ल विश्वविद्यालय रायपुर म टेक्नॉलाजी संकाय के नवा संकाय अध्यक्ष नियुक्त करे गेहे। अइसने डॅाक्टर सुशील हरी रामानी ल रायपुर होम्योपैथी चिकित्सा महाविद्यालय के संकाय अध्यक्ष नियुक्त करे गेहे। कुलाधिपति ह प्रोफेसर डॅाक्टर राजन यादव ल दृश्यकला संकाय के अधिष्ठाता नियुक्त करे हे। उंहे राज्यपाल ह हेमचंद यादव विश्वविद्यालय के कार्य परिषद म सदस्य मनके नियुक्ति घलो करे हे।
हज कमेटी ऑफ इंडिया के चेयरमैन ए.पी. अब्दुल्लाह कुट्टी ह रायपुर प्रवास के दउरान राज्य हज कमेटी के कार्यालय म प्रदेश के हज व्यवस्था के समीक्षा करीन। राज्य हज कमेटी के विशेष मांग म ओमन प्रदेश के हाजी मन ल हरसंभव सुविधा उपलब्ध कराय के आश्वासन दीन। ओमन कीहिन कि हज दू हजार तेईस बर आवेदन के प्रक्रिया आगामी हप्ता ले शुरू हो जाही।
ये मउका म राज्य हज कमेटी के चेयरमैन मोहम्मद असलम खान ह कमेटी डहार ले करे जात हज व्यवस्था अउ राज्य सरकार डहार ले दे जात सुविधा मनके जानकारी दीन।
महात्मा गांधी राष्ट्रीय ग्रामीण रोजगार गांरटी अधिनियम-मनरेगा के उचित कार्यान्वयन बर मजदूरी अउ सामग्री के भुगतान बर धन जारी करे बर केंद्र प्रतिबद्ध हे। केंद्रीय बजट दू हजार तेइस चोबीस म मनरेगा म बजट कटौती के मुद्दा उपर ग्रामीण विकास मंत्रालय ह स्पष्टीकरण जारी करे हे। मंत्रालय ह केहे हे कि योजना बर अतिरिक्त फंड के आवश्यकता होय ले वित्त मंत्रालय ले फंड उपलब्ध कराय के अनुरोध करे जाथे।
मंत्रालय ह कीहिन कि एखर से पता चलथे कि राज्य मन म वास्तविक धन बजट अनुमान के राशि ले काफी अधिक हे। चालू वित्त बछर दू हजार बाईस तेईस के दउरान घलो बजट अनुमान तिहत्तर हजार करोड़ रूपिया रीहिस, जेला संशोधित कर नवासी हजार करोड़ रूपिया ले जादा कर दे गेहे।
छत्तीसगढ़ के सोला झन बाल वैज्ञानिक मन ल उंखर शोध कार्य बर सराहना मिले हे। सत्ताईस ले इकतीस जनवरी तक गुजरात के अहमदाबाद म आयोजित राष्ट्रीय बाल विज्ञान कांग्रेस म भारत के अलग-अलग राज्य मनले लगभग बारा सौ बाल वैज्ञानिक मन ह भाग लीन। उंहे प्रदेश ले घलो सोला झन बाल वैज्ञानिक मन अपन भागीदारी निभाइन। एमा बारा झन नोनी अउ चार झन बाबू मन शामिल होइन। समापन सत्र म बाल वैज्ञानिक मन ल मेडल अउ प्रशस्ति पत्र प्रदान कर सम्मानित करे गीस।
बलौदाबाजार-भाटापारा जिला म आज होय एक सड़क दुर्घटना म चार झनके मउत होगे। मरने वाला म एक दस महीना के लइका घलो सामिल हे।
मिले जानकारी के अनुसार एमन फटफटी म सवार होके बलौदाबाजार के भरसेला गांव जात रीहिन, इही दउरान पेट्रोल पंप करा चारपहिया वाहन के ठोकर ले मोटर सायकिल सवार पति-पत्नि अउ लइका समेत एक आने महिला घायल होगे, जेनला इलाज बर पलारी अस्पताल ले जाय गीस। ए घटना म पति-पत्नि अउ लइका के संग आने महिला के घलो मउत होगे।
एति जांजगीर-चांपा जिला म होय सड़क हादसा म एक मनखे के मउकाच म मउत होगे। उंहे गंभीर रूप ले घायल दू झन आने मनखे मनके बिलासपुर म इलाज के दउरान मउत होगे।
आज विश्व कैंसर दिवस हे। दुनियाभर के लोगन मन ल कैंसर के खिलाफ लड़ाई म एकजुट करे बर विश्व कैंसर दिवस हर बछर चार फरवरी के मनाये जाथे।
इही कड़ी म प्रदेश के अलग-अलग कैंसर चिकित्सा संस्थान मन म कैंसर के प्रति जागरूकता के प्रसार बर विविध आयोजन करे गीस। राजधानी रायपुर के पंडित जवाहरलाल नेहरू चिकित्सा महाविद्यालय म स्थित क्षेत्रीय कैंसर संस्थान डहार ले आज मैराथन प्रतियोगिता के कैनेथान के आयोजन करे गीस। एखर अलावा कैंसर के विरूद्ध जागरूकता अभियान के तहत चित्रकला प्रतियोगता, कैंसर सर्वाइवर सम्मान पुरस्कार अउ प्रशस्ति पत्र वितरण कार्यक्रम घलो आयोजित करे गीस। ये मउका म क्षेत्रीय कैंसर संस्थान म इलाज ले स्वस्थ होय सौ झन मरीज मनके सम्मान करे गीस। एमा दू साल के लइका ले लेके अस्सी साल के सियान मन घलो सामिल हे।
गौरतलब हे कि विश्व कैंसर दिवस के मउका म रायपुर के क्षेत्रीय कैंसर संस्थान डहार ले तीस जनवरी ले तीन फरवरी तक रायपुर के अलावा महासमुंद, राजनांदगांव अउ कांकेर के शासकीय मेडिकल कॉलेज म कैंसर स्क्रीनिंग शिविर के आयोजन करे गीस। जेखर ले सैकड़ो मरीज मन लाभान्वित होइन।