केन्द्रीय बजट-01
वित्तमंत्री ह किहीन कि पूंजीगत व्यय तैंतीस प्रतिसत बढ़ाके दस लाख करोड़ रूपिया करे गीस, जउन सकल घरेलू उत्पाद के तीन दशमलव तीन प्रतिसत होही। बजट म सात ठिन प्राथमिकता हे। एमा समावेशी विकास, अंतिम मनखे तक पहुंच बनाना, अवसंरचना अउ निवेस, सक्षमता लाना, हरित विकास, युवा शक्ति अउ वित्तीय क्षेत्र सामिल हे, जउन अमृत काल के बेरा सरकार के अगुवई करत सप्तऋषि असन काम करत हे।
आज पेस करे गे बजट म गांव-गंवई क्षेत्र म कृषि स्टार्टअप खोले बर कृषि बढ़ावा कोष बनाय जाही, जेमा किसान मनके आगू आवत चुनौती के नवाचार अउ ओखर समाधान देवाय जाही। मोटा अनाज मिलेट्स बर ‘‘श्री अन्न‘‘ वैश्विक केन्द्र बनाय बर भारतीय बाजारा अनुसंधान संस्थान हैदराबाद ल सबले बने केन्द्र के रूप म बढ़ावा दे जाही।
केन्द्रीय बजट-02
पशुपालन, डेयरी, मछली पालन बर कृषि ऋण ल बीस लाख रूपिया तक बढ़ाय जाही। सरकार प्रधानमंत्री मत्स्य संपदा योजना के एक नवा उपयोजना छह हजार करोड़ रूपिया के निवेस के संग सुरू करही। एमा मछुवारा, मछली बेवइया, सुक्ष्म अउ लघु उद्योग सक्षम बनही अउ बाजार के बढ़वार करे जा सकही।
बजट म सरकार ह स्वास्थ्य, शिक्षा अउ कौशल विकास बर कतकोन घोसना करे हे। दू हजार चौदह ले बने अभी तक एक सौ संतावन मेडिकल कालेज म ही एक सौ संतावन नवा नर्सिंग कालेज बनाय जाही।
बजट म बछर दू हजार सैंतालीस तक जनजातीय क्षेत्र म चालीस बछर तक के उमर वाले सात करोड़ लोगन के कौसल विकास करे जाही। बिसेस रूप ले जनजातीय समूह पी.वी.टी.जी. के सामाजिक आर्थिक परिस्थित म सुधार लाय बर प्रधानमंत्री पी.वी.टी.जी. विकास मिशन सुरू करे जाही। योजना म अवइया तीन बछर म पन्द्रह हजार करोड़ रूपिया के रकम देवाय जाही। सरकार अवइया तीन बछर म सात सौ चालीस एकलव्य मॉडल आवासीय विद्यालय म अड़तीस हजार आठ सौ अध्यापक अउ सहायक करमचारी नियुक्त करही।
पीएम आवास योजना बर परिव्यय ल छियासठ प्रतिसत बढ़ाके उनयासी हजार करोड़ रूपिया ले जादा करे गेहे। वित्तमंत्री ह किहीन कि ए बजट म हरित विकास कोति बिसेस ध्यान दे गेहे। राज्य अउ केन्द्रसासित प्रदेस म रासायनिक खातू के संतुलित प्रयोग बर ‘‘प्रधानमंत्री-पृथ्वी माता पुर्नद्धार, जागरूकता, पोषण और सुधार‘‘ कार्यक्रम सुरू करे जाही। बजट म रेलवे बर अब तक के सबले जादा दू लाख चालीस हजार करोड़ रूपिया के पूंजीगत खरच के प्रावधान करे गेहे। आजादी के अमृत महोत्सव म नवा बचत योजना, महिला सम्मान बचत प्रमाण पत्र लाय जाही। एमा माईलोगन अउ नोनी मन ल दू बछर के बेरा म दू लाख रूपिया तक जमा रासि म साढ़े सात प्रतिसत ब्याज मिलही।
केन्द्रीय बजट-प्रतिक्रिया
प्रधानमंत्री नरेन्द्र मोदी ह केन्द्रीय बजट के प्रसंसा करत किहीन कि अमृतकाल के ए पहिली बजट ले विकसित भारत के महत्वाकांक्षा पूरा करे के मजबूत आधार बनही। ओमन किहीन कि बजट म समाज के वंचित लोगन ल प्राथमिकता दे गेहे। बजट ल गरीब किसान के सपना पूरा करइया बतईन।
ऐति, छत्तीसगढ़ म केन्द्रीय बजट ल लेके भाजपा अउ कांग्रेस के नेता मन ह अपन प्रतिक्रिया दीन हे। प्रदेस भाजपा अध्यक्ष अरूण साव ह किहीन कि ए बजट गांव, गरीब, किसान, युवा, माईलोगिन, सियान, पिछड़ा वरग, दलित अउ जनजातीय समाज समेत हर वरग के सोच ल पूरा करइया बजट हे। ओमन यहू किहीन कि ए बजट ह छत्तीसगढ़ बर कतकोन संभावना के दुवारी खोल देहे।
उहें, भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह किहीन कि ए बजट मध्यम वर्गीय परिवार ल राहत देवइया हरय। संगेसंग हर वरग बर ए बजट एक सुघ्घर कल लेके आय हे।
राज्यसभा सांसद सरोज पांडेय ह आम बजट ल भारत के मजबूती के बजट बतईन। ओमन किहीन कि एमा देस के सबो वरग ल ध्यान म राखे गेहे अउ ओमन ल देस के मुख्यधारा ले जुड़े के मउका दे गेहे।
दूसर कोति, मुख्यमंत्री भूपेश बघेल ह आम बजट ल निरासाजनक बतईन हे। ओमन किहीन कि बजट म किसान, आदिवासी मनके विकास बर कोनों किसम के प्रावधान नइ हे और न ही महंगाई अउ बेरोजगारी ल कमती करे बर कोनो योजना हे। ओमन यहू किहीन बजट म मिलेट्स ल बढ़ावा देके बात केहे गेहे, फेर समर्थन कीमत म कोनों किसम के गोठबात नइ होय हे। श्री बघेल ह किहीन कि बजट ले उम्मीद रिहीस कि प्रदेस के जगदलपुर अउ अंबिकापुर बर ट्रेन सुरू कराय के प्रावधान कराय जाही। फेर अइसन कोनो घोसना नइ करे गीस।
उहें, प्रदेस कांग्रेस अध्यक्ष मोहन मरकाम ह किहीन कि बजट म देस के किसान, युवा, माईलोगिन अउ आम जनता ल ठगे हे।
राज्यपाल-विवि विनियामक आयोग
राज्यपाल अनुसुईया उइके आज रईपुर म राखे गे छत्तीसगढ़ निजी विश्वविद्यालय विनियामक आयोग के स्थापना दिवस समारोह म सामिल होईन। समारोह म आयोग के ‘‘स्मारिका ज्ञानमृत‘‘ के विमोचन करीन अउ आयोग के हेल्पलाइन नंबर के घलो सुभारंभ करीन। संगेसंग राज्यपाल ह बछर दू हजार पच्चीस तक देस म चलाय जात प्रधानमंत्री टीबी मुक्त भारत अभियान के प्रचार-प्रसार अउ लोगन ल जागरूक करे के आह्वान करीन।
शिक्षक-सम्मान
स्कूल शिक्षा मंत्री डॉक्टर प्रेमसाय सिंह टेकाम ह मुख्यमंत्री शिक्षा गौरव अलंकरण योजना म रईपुर संभाग के इकतीस झिन शिक्षक मन ल सम्मानित करीन हे। काली रईपुर के माध्यमिक शिक्षा मंडल परिसर के सभागार म राखे गे कारीकरम म शिक्षादूत सम्मान ले बारह झिन सिक्षक, ज्ञानदीप ले तीन सिक्षक, शिक्षाश्री ले तीन झिन व्याख्याता, पांच झिन सबले बने प्राचार्य अउ आठ सबले बने प्रधानपाठक मन ल सम्मानित करे गीस। ए सम्मान सिक्षा के क्षेत्र म सुघ्घर काम करइया सिक्षक मन ल लइका मनके पढ़ई-लिखई के संग कौसल विकास, बौद्धिक, सारीरिक अउ सामाजिक दायित्व बर बने काम करे खातिर दे गेहे। ए मउका म डॉक्टर टेकाम ह किहीन कि सिक्षक आदिकाल ले समाज के पथप्रदर्सक हवय। एखर सेती ओमन सम्मान के पात्र हे।
धान खरीदी
छत्तीसगढ़ ह खरीफ विपणन बछर म समर्थन कीमत म धान खरीदी म एक सौ सात लाख इंक्यावन हजार मीटरिक टन ले जादा धान बिसाय के नवा रिकॉर्ड बनाय हे। पाछु बछर राज्य म अंठानवे लाख मीटरिक टन धान बिसाय गे रिहीस। छत्तीसगढ़, पंजाब के बाद दूसर राज्य हे, जिहां सबले जादा धान बिसाय गेहे।
उहें, धान बेचईया किसान मनके संख्या के हिसाब ले छत्तीसगढ़ देस म अव्वल जघा म हवय, इहां समर्थन कीमत म करीबन तेईस लाख बयालीस हजार किसान मन ह अपन धान बेचे हे। खाद्य सचिव टी.के. वर्मा ह बतईन कि एसो घलो धान बिसाय के संगेसंग कस्टममिलिंग बर खरीदी केन्द्र ले मिलर्स कोति ले सोझ ेधान के उठाव के व्यवस्था करे गीस, जेमा अभी तक नब्बे लाख मीटरिक टन ले जादा धान के उठाव होगे हे।
खबर के मुताबिक राज्य म एसो समर्थन मूल्य म धान खरीदी एक नवंबर ले इकतीस जनवरी तक करे गीस।