संसद के बजट सत्र आज ले सुरू होगे। छह अप्रैल तक चलइया ए सत्र म सत्ताईस बइठका होही। त उहें, बछर दू हजार तेईस-चौबीस के केन्द्रीय बजट काली पेस करे जाही।
संसद के केन्द्रीय कक्ष म दूनों सदन के संयुक्त बइठका ल संबोधित करत राष्ट्रपति ह किहीन कि भारत म स्थिर, निडर अउ बेरा म फइसला लेवइया सरकार हवय। ओमन किहीन कि देस म अइसन सरकार हे, जउन ह ईमानदान मनखे मनके सम्मान करथे अउ गरीब मनखे मनके समस्या मन उपर काम करत हे।
भारत के जी-ट्वेंटी अध्यक्षता ले उपर राष्ट्रपति ह किहीन कि एक पृथ्वी, एक परिवार, एक भविष्य‘ के मंत्र के संगेसंग देस ह जी-ट्वेंटी के सदस्य देस के मदद ले ए बेरा जउन समस्या चलत हे, ओला सुलझाय के प्रयास करत हे।
संसद म आज वित्तीय बछर दू हजार बाईस-तेईस के आर्थिक सर्वेक्षण पेस करे गीस। सर्वेक्षण के मुताबिक चालू वित्त वर्ष म भारतीय अर्थव्यवस्था म सात प्रतिसत के दर ले बढ़ोतरी के संभावना हे।
बजट सत्र सुरू होय के पहिली संसद के बाहिर प्रधानमंत्री नरेन्द्र मोदी ह किहीन कि सरकार के एक मात्र ध्येय ‘भारत प्रथम-नागरिक प्रथम‘‘ हवय।
धान खरीदी
प्रदेस म किसान मन ले समर्थन मूल्य म धान खरीदी के काम आज सिरा गे। काली तीस जनवरी तक प्रदेस म तेईस लाख उनचालीस हजार किसान मन ले एक सौ सात लाख मीटरिक टन धान के खरीदी करे जा चुके हे। एखर एवज म किसान मन ल बाईस हजार करोड़ रूपिया दे गेहे।
खाद्य विभाग के अधिकारी मन ह बतईन कि एसो राज्य म चौबीस लाख अंठानवे हजार किसान मन ह पंजीयन कराय रिहीन, जेमा ले दू लाख बत्तीस हजार नवा किसान मन सामिल हे। उहें, एसो राज्य म एक सौ पैंतीस ठिन नवा धान खरीदी केन्द्र सुरू करे गीस।
जानबा के मुताबिक सामान्य धान के भाव दू हजार चालीस रूपिया प्रतिकुंटल अउ ग्रेड-ए धान के भाव दू हजार साठ रूपिया प्रतिकुंटल राखे गे रिहीस। राज्य सरकार ह एसो एक सौ दस लाख मीटरिक टन धान खरीदी के लक्ष्य राखे रिहीन। प्रदेस म धान बिसाय के काम एक नवंबर ले सुरू होय रिहीस।
हादसा
राजधानी रईपुर के सिलतरा म राखड़ निकालत बेरा मलबा के भरभरा के ढहे ले दू झिन माईलोगिन के संग तीन झिन लोगन के मउत होगे। त उहें, दू झिन आने मनखे मन घायल होगे हे। जानबा के मुताबिक सिलतरा स्थित एक ठिन प्राईवेट कंपनी के राख ल सड़क के तीर म राखे गे रिहीस, जेला पांच झिन लोगन मन निकाले बर गढ्ढा म उतरे रिहीन। इही दउरान मलबा ह उंखर मनके उपर गिर गे।
ए घटना उपर मुख्यमंत्री भूपेश बघेल ह दुख जताय हे। ओमन घायल मनके बने इलाज के संगेसंग जरूरी निरदेस अधिकारी मन ल देहे।
एएसआई हमला-मौत
सारंगढ़-बिलाईगढ़ जिला म आज एक झिन मानसिक रोगी मनखे ह एएसआई उपर डंडा ले हमला कर दीन, जेखर ले ओखर मउत होगे।
जानबा के मुताबिक सरिया थाना क्षेत्र म पदस्थ एएसआई डी.एन. साहू ह कोनो काम ले चउक कोति जावत रिहीन, इही दउरान एक झिन मानसिक रोगी मनखे ह उंखर सिर उपर डंडा ले हमला कर दीन। गंभीर रूप ले घायल होय के बाद ओमन ल अस्पताल म भर्ती कराय गीस। इलाज के दउरान ओखर मउत होगे। पुलिस ह आरोपी ल गिरफ्तार कर लेहे।
निजी प्रसारक-परामर्श
केन्द्रीय सूचना अउ प्रसारण मंत्रालय ह प्राईवेट प्रसारक मन बर सलाह जारी करे हे। मंत्रालय ह सैटेलाइट टीवी चैनल अउ उंखर प्रसारक मनके संग विचार-विमर्स करे हे, जेमा केहे गेहे कि हर दिन तीस मिनट के लोक सेवा के प्रसारण करे बर पड़ही। आने-आने बेरा के प्रसारण म राष्ट्रीय बिसय, सिक्षा, कृषि अउ ग्रामीण विकास, महिला कल्याण, पर्यावरण के संगेसंग सांस्कृतिक विरासत जइसन बिसय ल सामिल करना जरूरी हे। प्रसारण सेवा पोर्टल म प्रसारक मन ल एक ठिन मासिक रिपोर्ट ऑनलाइन जमा करे बर पड़ही।
भाजयुमो-प्रशिक्षण सत्र
भारतीय जनता युवा मोर्चा-भाजयुमो के प्रदेस स्तरीय प्रसिक्षण सत्र के आयोजन उनतीस ले इकतीस जनवरी तक राजनांदगांव म होईस। ए प्रसिक्षण वर्ग म भारतीय जनता युवा मोर्चा के अवइया कामकाज उपर गोठबात होईस।
भाजयुमो के प्रदेस अध्यक्ष रवि भगत ह किहीन कि अइसन प्रसिक्षण सत्र होय ले कार्यकर्ता मन म जोस बढ़थे। उहें, प्रदेस भाजपा अध्यक्ष अरूण साव ह घलो अपन बात राखीन। प्रसिक्षण के दउरान पार्टी के प्रदेस सह-प्रभारी नितिन नबीन ह भ्रष्टाचार के खिलाफ युवा मन ल आगू आय के बात किहीन। प्रसिक्षण सत्र म राष्ट्रीय सह-संगठन मंत्री शिवप्रकाश, क्षेत्रीय संगठन मंत्री अजय जामवाल के संगेसंग सांसद, विधायक अउ पदाधिकारी मन घलो आय रिहीन।
अस्पताल-कार्रवाई
प्रदेस के रईपुर अउ बिलासपुर स्थित पांच ठिन प्राईवेट अस्पताल मन म हिसाब-किताब म गड़बड़ी पाय जाय के बाद स्वास्थ्य विभाग ह ए जम्मों अस्पताल मनके खिलाफ कार्रवाई करे हे। ए अस्पताल मन ले छह लाख सोलह हजार ले जादा के पइसा जुर्माना के रूप म वसूल करे गेहे। स्वास्थ्य विभाग ह टोल फ्री नंबर एक सौ चार अउ एक चार पांच पांच पांच जारी करे हे। कोनों भी मरीज मन इलाज ले जुड़े सिकईत ल ए नंबर म फोन करके बता सकथे।
जानबा के मुताबिक केन्द्र सरकार के आयुष्मान भारत योजना अउ छत्तीसगढ़ सरकार के डॉक्टर खूबचंद बघेल स्वास्थ्य योजना म पंजीकृत प्राईवेट अस्पताल के ऑडिट बेरा-बेरा म करे जाथे।
युवा महोत्सव-समापन
रईपुर के साईंस कालेज मैदान म चले तीन दिन के राज्य स्तरीय युवा महोत्सव काली सिरा गे। ए महोत्सव म अड़तीस ठिन कारीकरम मन म प्रदेस के तेईस सौ प्रतिभागी मन ह अपन प्रतिभा के प्रदर्शन करीन।
समापन कारीकरम ल संबोधित करत खेल अउ युवा कल्याण मंत्री उमेश पटेल ल किहीन कि युवा महोत्सव ह प्रदेस के आने-आने कला, खेल अउ इहां के लोगन मनके प्रतिभा ल एक मंच म लाय के परयास हरय। ओमन किहीन कि युवा महोत्सव अब हर साल होही। समापन कारीकरम म खेल मंत्री ह विजेता प्रतिभागी मन ल प्रमाण पत्र अउ प्रतीक चिन्ह दीन।
आरडीए-सरचार्ज छूट
रायपुर विकास प्राधिकरण के संचालक मंडल के बइठका म लोगन मन ले जुड़े कतकोन फइलसा ले गेहे, जेमा बकाया सरचार्ज पइसा ल एकमुश्त भुगतान करे उपर आवासीय रासि के भुगतान म पचास प्रतिसत अउ व्यावसायिक भवन मनके भुगतान म तीस प्रतिसत के छूट दे जाही। ए छूट ह इकतीस मार्च तक प्रभावी रइही। संगेसंग पन्द्रह प्रतिसत के चक्रवृद्धि दर ले, लेवइया सरचार्ज ल घलो घटा दे गेहे।
रायपुर प्रेस क्लब-चुनाव
रायपुर प्रेस क्लब के कार्यकारिणी-पदाधिकारी मनके चुनई बर मतदाता सूची के आखिरी प्रकासन दस फरवरी के होही। एखर पहिली आज मतदाता सूची के प्रारंभिक प्रकासन करे गीस। दावा आपत्ति पेस करे के आखिरी तारीख सात फरवरी राखे गेहे।
कुष्ठ जागरूकता अभियान
आजादी के अमृत महोत्सव के तहत कोंडागांव जिला म तीस जनवरी ले तेरह फरवरी तक स्पर्श कुष्ठ जागरूकता अभियान चलाय जात हे। एमा काली स्वास्थ्य विभाग डहार ले जन-जागरूकता रैली निकाले गीस। अभियान म गांव के लोगन मनके संगेसंग स्कूल के लइका मन ल कुष्ठ उन्मूलन के बारे म जागरूक करे जात हे।
सद्भावना दौड़
भिलाई के सेक्टर-पांच स्थित शहीद स्मारक उद्यान म दू फरवरी के सद्भावना क्रॉस कंट्री रेस के आयोजन करे जाही। थैंक्यू भिलाई फाउंडेशन कोति ले राखे गे ए दउड़ म प्रदेस के आने-आने जिला ले आय प्रतिभागी मन ह सामिल होही। त उहें, आने-आने उमर वाले वर्ग म चित्रकला प्रतियोगिता अउ प्रश्नोत्तरी के कारीकरम घलो होही।
अउ अब थोरकुन समाचार सार म-
– राष्ट्रपति भवन के अमृत उद्यान आज ले आम लोगन मन बर खोल दे गेहे। राष्ट्रपति ह आजादी के पचहत्तर साल पूरा होय उपर ‘‘आजादी का अमृत महोत्सव‘‘ म राष्ट्रपति भवन के मुगल गार्डन ल अमृत उद्यान के नाव देहे।
– भारतीय सेना डहार ले होय अग्निवीर भर्ती म राजनांदगांव जिला के पन्द्रह झिन युवा मन ल चुने गेहे। पूर्व सैनिक संगठन ह ए युवा मन ल मोहारा मैदान म मुफत म प्रसिक्षण दे रिहीन।
– जवाहर नवोदय विद्यालय म छठवीं कक्षा म प्रवेस परीक्षा बर ऑनलाइन पंजीयन के तारीख ल इकतीस जनवरी ले बढ़ाके आठ फरवरी कर देहे।
अउ
– रईपुर जिला के ग्राम पंचायत हसदा म दू फरवरी के जिला स्तरीय रामायण प्रतियोगिता राखे गेहे।