संसद बजट सत्र
संसद के बजट सत्र काली ले शुरू होवत हे। ये सत्र छै अप्रैल तक चलही अउ छियांसठ दिन म एखर सत्ताईस ठन बइठका होही। सत्र के पहिली भाग तेरह फरवरी तक चलही, चौदा फरवरी ले बारा मार्च तक सदन के कार्यवाही नइ होही। ए दउरान विभाग ले जुड़े संसदीय स्थायी समिति ह अनुदान के मांग के समीक्षा करही अउ अपन मंत्रालय अउ विभाग ले जुड़े रिपोर्ट तियार करही। बजट सत्र के दूसर भाग तेरा मार्च ले शुरू होके छै अप्रैल तक चलही।
सत्र के पहिली दिन कालीच राष्ट्रपति द्रौपदी मुर्मु ह केंद्रीय कक्ष म लोकसभा अउ राज्यसभा के संयुक्त बइठका म अपन भाषण दीही अउ दूनो सदन म आर्थिक सर्वेक्षण ल पटल म राखे जाही।
इही बीच संसंद के बजट सत्र ले पहिली आज नई दिल्ली म संसंद भवन परिसर म सर्वदलीय बइठका होइस। बइठका म केंद्रीय मंत्री राजनाथ सिंह, प्रहलाद जोशी अउ पियूष गोयल ह हिस्सा लीन। उंहे दूसर पार्टी के नेता मन ह घलो एमा भाग लीन। बइठका म सरकार ह दूनो सदन के कार्यवाही सुनिश्चित करे बर सबो राजनीतिक दल मनके सहयोग के अपेक्षा जताइन।
भाजपा-मन की बात
प्रधानमंत्री नरेंद्र मोदी के मन की बात कार्यक्रम ल सुने बर भारतीय जनता पार्टी डहार ले प्रदेश के अठारा हजार पांच सौ जगा म बेवस्था करे गे रीहिस। जिहां भाजपा के दिग्गज नेता अउ कार्यकर्ता मनके मौजूदगी म आम लोगन मन प्रधानमंत्री के संबोधन ल उछाह के संग सुनीन ।
प्रदेश भाजपा अध्यक्ष सांसद अरूण साव ह बिलासपुर जिला के आज्ञा नगर म मन की बात कार्यक्रम ल आम जनता संग सुनीन। उंहे राष्ट्रीय उपाध्यक्ष डॅाक्टर रमनसिंह ह राजनांदगांव के रेवाडीह वार्ड, नेता प्रतिपक्ष नारायण चंदेल ह जांजगीर, राज्यसभा सांसद सरोज पांडे ह दुर्ग, प्रदेश उपाध्यक्ष शिवरतन शर्मा ह भाटापारा अउ प्रदेश महामंत्री केदार कश्यप ह नारायणपुर म मन की बात कार्यक्रम ल जनता संग सुनीन।
खबर के मुताबिक प्रधानमंत्री ह मन की बात कार्यक्रम के दउरान छत्तीसगढ़ ले इही बछर पद्मश्री बर चुने गे कांकेर जिला के अजय कुमार मंडावी, रायगढ़ के मिलेट्स कैफे अउ बिलासपुर जिला म प्राकृतिक खेती ले जुड़े संदीप शर्मा के घलो चर्चा करीन।
माओवादी एनआईए गिरप्तार
राष्ट्रीय जांच एजेंसी-एनआईए के टीम ह बीजापुर के भोपालपट्नम ले एक झन महिला माओवादी ल पकड़े हे। जउन ह पाछू दू बछर ले एनआईए के वांटेड लिस्ट म शामिल रीहिस अउ एखर तलाश करे जावत रीहिस। एनआईए के विशेष अदालत म पेश करे के बाद महिला माओवादी मड़काम उनगी ले पूछताछ करे जावत हे। एखर उपर अप्रैल दू हजार इक्कीस म होय टेकुलगुड़ेम मुठभेड़ म शामिल रेहे के आरोप हे।
ये मुठभेड़ म बाईस झन जवान मन शहीद होगे रीहिन अउ तीस ले जादा जवान मन घायल होगे रीहिन। माओवादी मन ह सुरक्षा बलके हथियार घलो लूटके लेगे रीहिन। गिरप्तार महिला माओवादी के खिलाफ थाना तर्रेम म घलो मामला दर्ज हे।
इही बीच कांकेर जिला म डिस्ट्रिक्ट रिजर्व गार्ड-डीआरजी अउ माओवादी मनके बीच मुठभेड़ होय के खबर हे। पुलिस अधीक्षक शलभ कुमार सिन्हा ह बताइन कि आमाबेड़ा थाना क्षेत्र के उसेली, मरमाकोनारी अउ ओखर तीर तखार के क्षेत्र म माओवादी मनके अस्थायी कैम्प के जानकारी मिले म डीआरजी के टीम अउ आमाबेड़ा पुलिस ल रवाना करे गे रीहिस।
इही दउरान उसेली अउ मरमाकोनारी तीर माओवादी मनके संग सुरक्षा बलके मुठभेड़ होगे। सुरक्षा बल ल भारी पड़त देख माओवादी मन ह मउका ले भागीन। ये मुठभेड़ म कतकोन माओवादी मन ह घायल होइन हे अउ मउका ले सोलर प्लेट, इलेक्ट्रिक वॉयर, पिट्ठूल संगरा भारी मात्रा म नक्सली समान अउ साहित्य बरामद करे गेहे।
महात्मा गांधी-पुण्यतिथि
राष्ट्र आज राष्ट्रपिता महात्मा गांधी ल उंखर पचहत्तरवां पुण्यतिथि म श्रद्धांजलि देवत हे। ये दिन ल शहीद दिवस के रूप म घलो मनाये जाथे। उन्नीस सौ अड़तालिस म आजेच के दिन महात्मा गांधी के हत्या होय रीहिस।
राष्ट्रपति द्रौपदी मुर्मू ह नई दिल्ली के राजघाट म महात्मा गांधी के समाधी म फूल चघाके अपन श्रद्धांजलि दीन। उपराष्ट्रपति धनखड़, प्रधानमंत्री नरेंद्र मोदी, रक्षामंत्री राजनाथ सिंह, आवास अउ शहरी कार्यमंत्री हरदीप सिंह पुरी अउ लोकसभा अध्यक्ष ओम बिड़ला ह घलो राष्ट्रपिता ल श्रद्धांजलि दीन। ये मउका म सर्वधर्म प्रार्थना सभा के आयोजन करे गीस।
आज शहीद दिवस के मउका म देशभर म बीहनिया ग्यारा बजे दू मिनट के मौन राखे गीस।
उंहे छत्तीसगढ़ म घलो शहीद दिवस के मउका म कतकोन कार्यक्रम कराये गीस। ये मउका म राजभवन म सचिवालय के अधिकारी अउ कर्मचारी मन ह महात्मा गांधी के चित्र म फूल चघाके दू मिनट के मौन राखीन। रायपुर कलेक्ट्रेट जगदलपुर के कमिश्नर कार्यालय अउ दूसर सरकारी कार्यालाय मन म घलो श्रद्धांजलि सभा करके राष्ट्रपिता ल सुमिरे गीस।
मुख्यमंत्री भूपेश बघेल ह शहीद दिवस के मउका म महात्मा गांधी अउ अमर सेनानी मन ल अपन श्रद्धांजलि दीन हे।
युवा महोत्सव/लोक साहित्य सम्मेलन
रायपुर म चलत युवा महोत्सव के आखरी दिन आज छत्तीसगढ़ लोक साहित्य सम्मेलन के आयोजन होइस। प्रथम सत्र के अध्यक्षता वरिष्ठ साहित्यकार परदेसी राम वर्मा अउ दूसर सत्र के अध्यक्षता रामेश्वर वैष्णव ह करीन।
पहिली सत्र म प्रतिभागी मन ह कहानी अउ दूसर सत्र म कविता पाठ करीन। ये दउरान डॅाक्टर परदेशी राम वर्मा ह परमानंद वर्मा के गोंदा उपन्यास अउ सरगुजिया भाषा म दीपलता देशमुख के बाल कहानी के विमोचन करीन।
दूसर सत्र म वरिष्ठ साहित्यकार श्री रामेश्वर वैष्णव ह घलो कविता पढ़ीन। ओमन ह सुधा वर्मा डहार ले लिखे गे कहानी संग्रह इंद्रावती के धार के विमोचन करीन। ये मउका म राजभाषा आयोग के सचिव अनिल भतपहरी ह घलो अपन संस्मरण सुनाइन।
अग्निवीर भर्ती चयन
भारतीय सेना डहार ले राखे गे अग्निवीर भर्ती म भिलाई के मरोदा एथलेटिक्स क्लब के आठ झन विद्यार्थी मन ल चुने गेहे। ए मन ल काली रायपुर के सेना भर्ती कार्यालय म उपस्थित होय के आदेश दे गे हवय। ए क्लब के संचालन स्कूल शिक्षा विभाग डहार ले करे जावत हे। जिहां युवा मन ल एथलेटिक्स कोचिंग देके सेना म भर्ती बर तैयार करे जावत हे।
अंडर-19 विमेंस क्रिकेट वर्ल्ड कप
भारत ह पहिली अंडर नाइंटिन विमेंस क्रिकेट वर्ल्ड कप के खिताब जीत ले हवय। साउथ अफ्रीका के पोचेस्ट्रम के स्टेडियम म भारत ह टॉस जीतके पहिली बॉलिंग चुनीस अउ इंग्लैंड ल सतरा दशमलव एक ओवर म अड़सठ रन म ऑल आउट कर दीस। उनहत्तर रन के टारगेट ल भारत ह चौदा ओवर म तीन विकेट म हासिल करीस।
मुख्यमंत्री भूपेश बघेल अउ खेलमंत्री उमेश पटेल ह ये उपलब्धि बर भारतीय महिला क्रिकेट टीम ल बधाई अउ शुभकामना देहे।
ज्ञानेश्वरी स्वर्ण पदक
हेमचंद यादव विश्वविद्यालय दुर्ग के वेट लिफ्टर ज्ञानेश्वरी ह ऑल इंडिया वेट लिफ्टिंग टूर्नामेंट म स्वर्ण पदक हासिल करे हे। ज्ञानेश्वरी ह पैंतालिस किलोग्राम वर्ग म हिस्सा ले रीहिस। विश्वविद्यालय के खेल संचालक दिनेश नामदेव ह बताइन कि ज्ञानेश्वरी ल प्लेयर ऑफ द टूर्नामेंट के खिताब दे गेहे। ये टूर्नामेंट म पच्यासी विश्वविद्यालय के वेट लिफ्टर मन ह भाग ले रीहिन। ये प्रतियोगिता सत्ताईस ले उनतीस जनवरी तक केरल के कालीकट म होइस।
ग्रामीण चक्काजाम
नारायणपुर जिला के अबूझमाड़ क्षेत्र के सैंकड़ो ग्रामीण मन ह अपन छै सूत्रीय मांग ल लेके ओरछा रद्दा म चक्काजाम कर देहे। चक्काजाम के आज दूसर दिन हे। इंखर मनके आंदोलन के सेती ए रद्दा म अवई जवई बाधित होगे हे। एमन ह ग्रामीण माड़ क्षेत्र म नवा पुलिस कैम्प अउ ड्रोन के माध्यम ले क्षेत्र के निरीक्षण के विरोध करत हे। उंखर मांग हे कि रोड चौड़ीकरण के नाव म हजारो एकड़ जमीन के अधिग्रहण अउ पेड़ काटना बंद करे जाय।