युवा महोत्सव-साहित्य सम्मेलन
राजधानी रायपुर के साईंस कालेज मैदान म आज ले तीन दिवसीय राज्य स्तरीय युवा महोत्सव सुरू होगे हे। स्कूल शिक्षा मंत्री डॉक्टर प्रेमसाय सिंह टेकाम ह ए महोत्सव के सुभारंभ करीन। ए मउका म डॉक्टर टेकाम ह किहीन कि ए महोत्सव ले युवा मन ल अपन प्रतिभा ल देखाय के सुघ्घर मंच मिलत हे। उहें, राज्य के समृद्ध सांस्कृतिक, लोक कला अउ परंपरा ल जाने अउ समझे के मउका मिलही। ए आयोजन म संस्कृति विभाग डहार ले लोक साहित्य सम्मेलन के घलो आयोजन करे जात हे।
युवा महोत्सव के पहिली दिन प्रदेस के आने-आने संभाग के युवा मनके दल ह अपन परंपरागत लोकनृत्य ल प्रदर्सित करत मार्चपास्ट करीन। राज्य स्तरीय युवा महोत्सव म तीन हजार ले जादा प्रतिभागी मन हिस्सा लेवत हे।
पदस्थापना
राज्य सरकार ह भारतीय प्रशासनिक सेवा के तेरह, भारतीय पुलिस सेवा के सात अउ राज्य पुलिस सेवा के एक झिन अधिकारी के नवा पदस्थापना के आदेस जारी करे हे। ए फेरबदल म चार जिला के कलेक्टर अउ छह जिला के पुलिस अधीक्षक घलो प्रभावित होय हे।
जारी आदेस के अनुसार आई.ए.एस. अधिकारी पदुम सिंह एल्मा ल बेमेतरा कलेक्टर, तारण प्रकाश सिन्हा ल रायगढ़ कलेक्टर, ऋचा प्रसाद चौधरी ल जांजगीर-चांपा कलेक्टर अउ प्रियंका ऋषि महोबिया ल गौरेला-पेण्ड्रा-मरवाही के कलेक्टर बनाय गेहे। अइसने, आईपीएस अधिकारी अभिषेक मीणा ल राजनांदगांव, सदानंद कुमार ल रायगढ़, संतोष कुमार सिंह ल बिलासपुर, उदय किरण ल कोरबा, पुष्कर शर्मा ल नारायणपुर अउ योगेश कुमार पटेल ल गौरेला-पेण्ड्रा-मरवाही जिला के पुलिस अधीक्षक पदस्थ करे गेहे।
मन की बात
प्रधानमंत्री नरेन्द्र मोदी बिहनिया ग्यारह बजे आकाशवाणी ले ‘‘मन की बात‘‘ कार्यक्रम म देस-विदेश के श्रोता मन संग अपन विचार साझा करही। ये ह ए मासिक कार्यक्रम के संतानवीं अउ ए बछर के पहलइया कड़ी होही।
कार्यक्रम ल आकाशवाणी अउ दूरदर्शन के सबो नेटवर्क, आकाशवाणी समाचार के वेबसाइट अउ न्यूज ऑन एनआईआर मोबाइल ऐप म प्रसारण करे जाही। आकाशवाणी समाचार, दूरदर्शन समाचार, प्रधानमंत्री कार्यालय अउ सूचना अउ प्रसारण मंत्रालय के यू-ट्यूब चैनल मन म घलो ये कार्यक्रम के सीधा प्रसारण होही। हिन्दी प्रसारण के तुरंत बाद एला क्षेत्रीय भासा मन म प्रसारित करे जाही।
उहें, आकाशवाणी ह ‘‘मन की बात‘‘ कार्यक्रम के सौवीं कड़ी बर प्रतीक-चिन्ह बनाय के प्रतियोगिता सुरू करे हे। श्रोता, मन ये कार्यक्रम बर प्रविष्टि एक फरवरी तक भेज सकथे। प्रतियोगिता बर तैयार करे गे डिजिटल प्रतीक-चिन्ह अइसे होना चाही, जेखर उपयोग कोनो भी प्लेटफार्म म करे जा सकय। विजेता ल पुरस्कार स्वरूप एक लाख रूपिया दे जाही। प्रतियोगिता संबंधी विवरण माई जीओवी डॉट इन म उपलब्ध हे।
संस्कृति विभाग-योजना
छत्तीसगढ़ के समृद्ध पुरातत्व अउ ऐतिहासिक धरोहर मन ल आम जनता अउ विद्यार्थी मन ल परिचित कराय बर आगामी वित्तीय बछर ले मुख्यमंत्री विरासत झरोखा योजना अउ मुख्यमंत्री धरोहर दर्शन योजना सुरू करे जाही।
मुख्यमंत्री भूपेश बघेल ह संस्कृति विभाग के बइठका म ए योजना मन ल सुरू करे के प्रस्ताव ल मंजूरी दीन।
परीक्षा पे चर्चा-भाजपा
प्रधानमंत्री नरेन्द्र मोदी ह काली नई दिल्ली के तालकटोरा स्टेडियम म विद्यार्थी, अभिभावक अउ सिक्षक मनके संग परीक्षा पे चर्चा कार्यक्रम म संवाद करीन। प्रधानमंत्री के सफलता मंत्र ल सुने बर छत्तीसगढ़ के अलग-अलग स्कूल मन म आयोजन करे गीस। ये दौरान भाजपा नेता मन ह स्कूल मन म जाके लइका मन संग प्रधानमंत्री के सफलता मंत्र ल सुनीन।
भाजपा के प्रदेस अध्यक्ष अरूण साव ह बिलासपुर के गुरूद्वारा चउक स्थित केन्द्रीय विद्यालय म प्रधानमंत्री के परीक्षा पे चर्चा कार्यक्रम ल सुनीन। ए मउका म श्री साव ह किहीन कि प्रधानमंत्री ह लइका मन ले परीक्षा पे चर्चा म जीवन म होवइया सबो परीक्षा के प्रश्न मनके समाधान करे हे। ओमन किहीन कि लइका मन ल हर चुनौती के जीवटता के संग सामना करे बर जेन गुर सिखाय जात हे, ओ ह सामर्थ्यवान बने के गुरूमंत्र आय, जेन ह हर क्षेत्र म लागू होथे।
उहें, भाजपा के राष्ट्रीय उपाध्यक्ष अउ पूर्व मुख्यमंत्री डॉक्टर रमन सिंह ह रायपुर के डूण्डा स्थित कृष्णा पब्लिक स्कूल म परीक्षा पे चर्चा कार्यक्रम ल सुनीन। अइसने, क्षेत्रीय संगठन महामंत्री अजय जामवाल अउ प्रदेस संगठन महामंत्री पवन साय ह रायपुर के माना स्थित सरस्वती शिशु मंदिर म प्रधानमंत्री के परीक्षा पे चर्चा कार्यक्रम म भाग लीन।
नेता प्रतिपक्ष-बयान
नेता प्रतिपक्ष नारायण चंदेल ह केहे हे कि कांग्रेस ह अपन जन घोषणा पत्र म करे गे वादा मन ल अभी तक पूरा नइ करे हे अउ अब जनता के आक्रोश ल दबाय बर मुख्यमंत्री भूपेश बघेल ह गणतंत्र दिवस म अलग-अलग घोषणा के शिगुफा छोड़े हे। श्री चंदेल ह किहीन कि प्रदेस के जनता जन-घोषणा पत्र म करे गे वादा पूरा करे के उम्मीद करत रिहीस हे, लेकिन राज्य सरकार ह चार बछर म वादा पूरा नइ करे सके हे। नेता प्रतिपक्ष ह यहू किहीन कि छत्तीसगढ़ सरकार उपर पहिली से ही लगभग तिरसठ हजार करोड़ रूपिया के करजा हे।
कांग्रेस-हाथ से हाथ जोड़ो यात्रा
भारत जोड़ो पदयात्रा के तर्ज म छत्तीसगढ़ म घलो ‘‘हाथ से हाथ जोड़ो पदयात्रा‘‘ सुरू होगे हे। रायपुर के गांधी मैदान ले कांग्रेस के पर्यवेक्षक अरूण यादव ह अउ प्रदेस अध्यक्ष मोहन मरकाम ह ए पदयात्रा के सुरूवात करीन। मुख्यमंत्री भूपेश बघेल ह जगदलपुर म हाथ से हाथ जोड़ो यात्रा म सामिल होईन। पहलइया दिन पार्टी के सबो ब्लॉक संगठन स्तर म लगभग तीन हजार किलोमीटर के पदयात्रा करे गीस। पदयात्रा के तहत प्रत्येक ब्लॉक म हर दिन दस किलोमीटर यात्रा करे के लक्ष्य राखे गेहे। ए पदयात्रा अगले दू महीना तक चलही।
जिले की चिट्ठी
आकाशवाणी रायपुर डहार ले जिले की चिट्ठी कार्यक्रम के प्रसारण काली संझा छै बजके पांच मिनट ले छै बजके दस मिनट तक करे जाही। ए कार्यक्रम ल छत्तीसगढ़ के जम्मों आकाशवाणी केंद्र ह रिले करही। ए बखत के अंक म महासमुंद जिला के बारे म जानकारी दे जाही।
सद्भावना-क्रिकेट मैच
रायपुर के सुभाष स्टेडियम म जनसंपर्क संचालनालय अउ प्रेस क्लब रायपुर के बीच खेले गे सद्भावना क्रिकेट मैच म रायपुर प्रेस क्लब ह छह विकेट ले जीत दर्ज करे हे। जनंसपर्क के टीम पहिली बल्लेबाजी करत हुए निर्धारित बारह ओवर म नब्बे रन बनाके ऑलआउट होगे। इंक्यानवे रन के लक्ष्य ल प्रेस क्लब के टीम ह चार विकेट गंवा के हासिल कर लीस।
अउ अब थोरकुन समाचार सार म-
– मुख्यमंत्री भूपेश बघेल ह पंजाब केसरी के नाम से प्रसिद्ध स्वतंत्रता संग्राम सेनानी लाला लाजपत राय के जयंती म उनला नमन करीन।
– मुख्यमंत्री भूपेश बघेल अउ प्रदेस भाजपा अध्यक्ष अरूण साव ह पद्मश्री सम्मान बर चयनित पंडवानी गायिका उषा बारले, काष्ठ कलाकार अजय कुमार मंडावी अउ नाचा कलाकार डोमार सिंह कुंवर ल बधाई अउ सुभकामना दीन।
– रायपुर रेलमंडल के डीआरएम संजीव कुमार ह भिलाई रेलवे स्टेसन के निरीक्षण करीन। ए दौरान ओमन इंजीनियरिंग अउ ‘‘एस एंड टी‘‘ विभाग के कामकाज म कमी पाय जाय उपर अधिकारी मन ल कामकाज म सुधार लाय के निरदेस दीन।
– रेलवे के चालीस लाख रूपिया के गबन करइया एजेंट ल रायपुर के मौहदापारा थाना पुलिस ह गिरफ्तार करे हे।
– कबीरधाम जिला के पंडरिया विकासखंड के ग्राम तोरला नवागांव म दूषित भोजन खाय ले पच्चीस झिन बीमार होगे। जेन ल इलाज बर पंडरिया के स्वास्थ्य केन्द्र म भर्ती कराय गेहे।
अउ
– महासमुंद जिला के कोमाखान पुलिस ह ग्राम खैरतकला करा मोटर साइकिल सवार दू झिन ल गिरफ्तार कर उंखर करा ले दस किलो गांजा बरामद करे हे। जब्त गांजा के कीमत लगभग पचास हजार रूपिया बताय गेहे।